1. Why we fit talk say Satan be like hunter?

THE thing wey hunter de get for mind na to catch the animal or kill-am. E fit use different kind of traps. Even that fake friend of Job wey Bible talk about, talk something like that. (Job 18:8-10) How hunter fit deceive animal so that the animal go enter e trap? E de take time look the animal well. Where the animal de like to go? Which kind things the animal de like? Which trap fit catch the animal wey the animal no go quick suspect say na trap? Satan be like that hunter. E de take time look us well. E de notice the place wey we de go and wetin we de like. Then, e go choose the trap wey e know say go fit catch us when we no expect. But Bible tell us say even if the trap catch us, we fit run comot. Bible still teach us how we fit make sure say we no enter any of the trap.

2. Which two traps don really de work well for Satan?

² This two traps don really work well for Satan: E want make we dey proud and make we get long throat. * For many years now, Satan don use this two bad character well. Satan be like person wey de catch bird. This person de use something deceive the bird make e enter the trap or the net. (Ps. 91:3) But no be must say the trap wey Satan set go catch us. Why we talk so? Na because Jehovah don show us the different ways wey Satan de use catch people.—2 Cor. 2:11.

3. Why Jehovah make sure say some kind examples dey for Bible?

³ Jehovah de use the story of some of e servants to teach us say, to dey proud and to get long throat no good at all. So, this one go help us make we no make the same mistake. We go see how Satan catch even some people wey don serve  Jehovah for long time. So this one mean say the traps wey Satan de set must catch us? No. Jehovah make sure say this examples dey for Bible “so that they go be as warning for us.” (1 Cor. 10:11) E know say we fit learn from this examples about how to dey careful so that we no go enter, or so that we go comot from the traps of Satan.

4. Wetin fit happen to us if we dey proud?

⁴ Satan want make we dey proud. If we dey proud we go be like Satan, and we no go fit live forever. Satan know this one. (Prov. 16:18) So, apostle Paul warn say person fit “dey proud and get the judgment wey Devil don get.” (1 Tim. 3:6, 7) That one fit happen to anyone of us, whether we just accept the truth or we don de serve Jehovah for many years.

5. As e dey for Ecclesiastes 7:16, 20, how person fit show say e dey proud?

⁵ When person dey proud na only e self e de think about. Satan de try to make us think about ourself pass the way we de think about Jehovah, especially when we de face problem. For example, person don ever lie say you do something wey you no do? Or person don do you partial before? Satan go dey happy if you blame Jehovah or your brothers. And Devil want make you think say the only way to solve the problem na to do things for your own way, instead of you to follow the things wey Jehovah say make you do for Bible.—Read Ecclesiastes 7:16, 20.

6. Wetin the example of one sister for Netherlands teach you?

⁶ Make we talk about the example of one sister for Netherlands. The mistakes of other people begin make this sister vex with them. The sister decide say e no want spend time with this people again. E talk say: “I come feel say I really dey alone, and I no fit change the way I de feel. I tell my husband say make we change congregation.” Then the sister watch March 2016 JW Broadcasting^® program. Some advice dey the program about how to handle the  mistakes of other people. The sister talk say: “I see say I need to tell myself the truth, dey humble, and think about my own mistakes, instead of me to try change the brothers and sisters for congregation. The program help me to think about Jehovah and the right wey e get to tell us wetin to do.” Wetin be the lesson? When you get any problem, make you de think about Jehovah. Beg Jehovah make e help you to see other people the way e de see them. Jehovah de see their mistakes, but e still dey ready to forgive them. E want make you do the same thing.—1 John 4:20.

7. Wetin happen to King Uzziah?

⁷ Because King Uzziah of Judah start to dey proud, e no listen to advice and e do something wey e no get right to do. Uzziah do plenty things well. E win plenty war, e build plenty city, and e get plenty farm. Bible tell us say God make e life better. (2 Chron. 26:3-7, 10) Bible still talk say: “But when e see say e don strong, e begin carry e self up, and cause trouble for e self.” Jehovah don command before say na only the priest them get the right to burn incense for the temple. But King Uzziah do something wey e no get the right to do; e go burn incense for temple. Jehovah no dey happy because of this one and e make that proud man get leprosy. Uzziah suffer from leprosy till e die.—2 Chron. 26:16-21.

8. How 1 Corinthians 4:6, 7, fit help us make we no dey proud?

⁸ We fit dey proud and sin just like Uzziah? See the example of José. This brother na correct businessman and better elder for congregation. E de give talk for assembly and convention, and circuit overseers de ask this brother for advice. José talk say: “But I trust the thing wey I sabi and the experience wey I get. I no trust Jehovah. I feel say I dey strong, so I no listen to the warning and advice from Jehovah.” José put hand for serious sin and they disfellowship José. Some years ago, they call José come back. Now e talk say: “Jehovah don teach me say no be title dey important, but na to do the things wey e talk say make we do.” Make we remember say anything wey we sabi do and any work wey we get for congregation, na from Jehovah. (Read 1 Corinthians 4:6, 7.) If we dey proud, Jehovah no go use us.

9. Wetin Satan and Eve do because of long throat?

⁹ We fit remember Satan the Devil when we think about long throat. When Satan be angel of Jehovah, e go don get plenty fine work wey e be de do. But e want more things. E want the worship wey only Jehovah suppose get. Satan want make we follow e example, so e de try to make us feel say the things wey we get no do for us. The first time wey Satan try to do this kind thing na when e talk to Eve. Because of love, Jehovah give Eve and e husband plenty better food make they chop. They go chop “from every tree” for “the garden,” except from one. (Gen. 2:16) Even with that one, Satan deceive Eve to begin think say e need to chop from that one tree wey God talk say make they no chop from. The things wey Eve get no do for Eve. E want more. And we know wetin happen after. Eve sin and after e die.—Gen. 3:6, 19.

10. How long throat become trap for King David?

¹⁰ Jehovah make David rich, e make David King and e help David to win plenty of e enemies for war. But because of long throat King David forget all the things wey e get from Jehovah. Na true say David thank God and e talk for Bible say the gifts wey God de give “over plenty sotey person no go fit count them!” (Ps. 40:5) But one time dey wey David forget the things wey e don get from Jehovah. David come get long throat and e want get more. Even though say David get plenty wife, e start to want the wife of another man, something wey Jehovah condemn. The woman name na Bath-sheba and e husband name na Uriah wey be Hittite. David think about only e self and give Bath-sheba belle. The thing wey David do really bad. But e do wetin worse pass that one. David arrange make they kill Uriah. (2 Sam. 11:2-15) Wetin David be de think? E de think say Jehovah no fit see the thing wey e do? Even as David don serve Jehovah for long time, e begin get long throat and e really suffer because of this one. But the good thing be say, David confess e sin and e repent. David really dey happy say e become Jehovah friend again!—2 Sam. 12:7-13.

11. As e dey for Ephesians 5:3, 4, wetin fit help us make we no begin get long throat?

¹¹ Wetin we learn from the example of  David? We learn say if we no want begin get long throat, make we continue to thank Jehovah for everything wey e don give us. (Read Ephesians 5:3, 4.) We must dey okay with the things wey we get. When we start to study Bible with people, we fit teach them to think of one good thing wey Jehovah don give them and make they thank Jehovah for the thing. If person do this one everyday for one week, the person go don pray about seven different things. (1 Thess. 5:18) You de do that kind thing? If you think about everything wey Jehovah don do for you, this one go help you de thank Jehovah. And when you de thank Jehovah, you go dey okay with the things wey you get. And when you dey okay with the things wey you get, you no go want things wey you no get.

12. Wetin Judas Iscariot do because of long throat?

¹² Long throat make Judas Iscariot give Jesus to the enemies. And this thing wey e do really dey bad. But Judas no first be like that. (Luke 6:13, 16) Jesus choose Judas as apostle. Judas de care for the contribution box, so na person wey Jesus trust. Jesus and the apostles de use the money for the box to care for the things wey they need for their preaching work. The money just be like the contribution wey people de make today for the worldwide work. But after sometime, Judas begin thief, even as e don hear Jesus de warn people plenty times make they no get long throat. (Mark 7:22, 23; Luke 11:39; 12:15) Judas no listen to the plenty warning.

13. Which time Judas show say e don get long throat?

¹³ Small time before they kill Jesus, Judas show say e don de get long throat. Jesus and e disciples, with Mary and e sister Martha, visit Simon the leper. As them de chop, Mary get up and pour perfume oil ontop Jesus head. This oil really cost no be small. Judas and the other disciples vex for wetin happen. E fit be say the other disciples feel say they suppose use the money for the preaching work. But, na another thing make Judas vex. Judas na “thief” and e want thief money from the box. And because Judas don get long throat, e give Jesus to the enemies for money wey be price of slave.—John 12:2-6; Matt. 26:6-16; Luke 22:3-6.

14. How one husband and wife do wetin dey Luke 16:13?

¹⁴ Jesus remind the disciples about this truth: “Wuna no fit be slave of God and Money.” (Read Luke 16:13.) That thing wey Jesus talk still dey correct today. For example, make we see how one husband and wife for Romania follow wetin Jesus talk. They say make they come work for sometime for one country wey get more money. They talk say: “We de owe bank big money. So we first think say Jehovah want use this work bless us.” But, problem dey. If they accept the work, they go use only small time de serve Jehovah. After they read the article wey be “Maintain Loyalty With a Unified Heart” for August 15, 2008 Watchtower, they make their decision. They talk say: “If we pack go another country go work because we want get more money, then our friendship with Jehovah no go be number one for our life again. We dey sure say na our friendship with Jehovah go suffer.” So they no gree take the work. Wetin happen? The husband see work for the country wey e come from and the salary dey enough to care for the things wey they need. The wife talk  say: “Jehovah go always help e people.” This husband and wife really dey happy say they choose Jehovah as their Master instead of money.

15. Why we fit dey sure say person fit run comot from the traps wey Satan set?

¹⁵ Wetin we suppose do if we see say we don dey proud or get long throat? We fit comot from the trap. Paul talk say people wey Devil “don catch” alive, go fit comot from the trap. (2 Tim. 2:26) This one happen to David. E listen to the strong correction from Nathan. E repent from e sin and e dey tight with Jehovah again. No forget say Jehovah get power pass Satan. So if we allow Jehovah to help us, we fit run comot from any trap wey Satan don set.

16. Wetin go help us make we no enter the traps wey Satan set?

¹⁶ E go better make we no enter any of Satan trap, instead of us to enter and begin find how we want come out. Na only God go fit help us make we no enter any of the trap. But make we no think say we dey strong sotey we no go fit ever dey proud or get long throat. Even if person don de serve Jehovah for long time, e fit begin dey proud or get long throat. So de beg Jehovah everyday make e help you see whether this bad character them don begin affect the way you de think and the things wey you de do. (Ps. 139:23, 24) No ever allow this character them to hold you!

17. Wetin go soon happen to our enemy wey be Devil?

¹⁷ For many years now, Satan don de work like hunter. But small time, Satan no go fit work again and after, God go destroy Satan. (Rev. 20:1-3, 10) We really want make that day reach. Until that time, dey careful make you no fall for the traps wey Satan set. Try your best make you no dey proud or get long throat. Make you decide say you go ‘fight against Devil, and e go run from you.’—Jas. 4:7.