1. Why servants of Jehovah fit feel say them dey alone sometimes?

SOMETIMES, plenty of us de feel say we dey alone. For some people, them de feel like this just for some time. For other people, they fit continue to feel say them dey alone for long time. We fit de feel say we dey alone even when plenty people dey around us. E de hard some people to make friends for their new congregation. For other people, they come from family wey everybody de do things together. But when they leave their family go live for another place, them de really feel lonely. And even other people de really miss the time wey they be de spend with their person wey don die. And some Christians, especially people wey just learn the truth, de feel say them dey alone when their family members and former friends wey no be servant of Jehovah reject or suffer them.

2. Which questions we go answer?

² Jehovah know and understand everything about us. When we de feel say na only us dey, Jehovah know how we de feel and e want help us. How Jehovah de help us? Wetin we fit do to help ourself? And how we fit help other people for our congregation wey de feel say them dey alone? Make we talk about the answers to this questions.

3. How Jehovah show say e care about Elijah?

³ Jehovah want make all e servants dey happy. Jehovah dey near to each of us and e know when we de feel sad, or when condition tire us. (Ps. 145:18, 19) Think about how Jehovah show say e really care about how prophet Elijah  de feel. Elijah dey faithful and e live for time wey things no de go well for Israel. Powerful people for Israel that time wey no love Jehovah suffer e servants, and they want kill Elijah especially. (1 Ki. 19:1, 2) Another thing wey worry Elijah be say, e feel say e be the only prophet wey remain and wey de serve Jehovah. (1 Ki. 19:10) Quick-quick, God do something to help Elijah. Jehovah send one angel to tell E prophet say e no dey alone. The angel tell Elijah say many other Israel people still dey and them de serve Jehovah well!—1 Ki. 19:5, 18.

4. How Mark 10:29, 30 show say Jehovah de really care about people wey their family members or friends don stop to support?

⁴ Jehovah know say when we choose to be e servant, some of us need to leave plenty things. One of this things fit be the support wey we de get from our family members and former friends wey no be Jehovah Witness. Maybe because apostle Peter de worry, e ask Jesus one time say: “We don leave everything and follow you. So, wetin go be our gain?” (Matt. 19:27) Jesus tell e disciples for kind way say the congregation go be like family for them. (Read Mark 10:29, 30.) And if anybody want serve Jehovah wey be our Papa for heaven, Jehovah promise say e go support the person. (Ps. 9:10) Jehovah go help you when you de feel say na only you dey. So make we talk about some things wey you fit do to get this help.

5. Why e good to think about how Jehovah de help you?

⁵ Think about how Jehovah de help you. (Ps. 55:22) This one go help you see say no be only you dey. Make we see the example of one sister wey e name na Carol. * This sister never marry and e family people no de serve Jehovah. The sister talk say: “When I remember how Jehovah help me endure problems, this one de help me make I no feel say na only me dey. And this one de make me dey sure say Jehovah go help me for future.”

6. How 1 Peter 5:9, 10 fit encourage people wey de feel say them dey alone?

 ⁶ Think about how Jehovah de help brothers and sisters wey dey lonely. (Read 1 Peter 5:9, 10.) One brother wey e name na Hiroshi, wey be the only Witness for e family for many years, talk say: “For congregation, e dey easy to see say everybody get e own problem. When we know say everybody de do e best to serve Jehovah, this one fit encourage we wey our family people no de serve Jehovah.”

7. How prayer de help you?

⁷ De always pray, read Bible, and go meeting. You need to tell Jehovah how you de feel. (1 Pet. 5:7) One young sister wey e name na Massiel talk say: “I de always pray to Jehovah with all my heart. This one na the number one important thing wey help me cope when I de feel say I dey alone.” When this sister decide to serve Jehovah, e feel lonely because e family no serve Jehovah. The sister still talk say: “Jehovah na real Papa to me. I de pray to Jehovah many times, everyday. And I de tell-am the way I de feel.”

8. When you de read Bible and de think deep about wetin you read, how this one go help you?

⁸ Make you de read Bible everytime, and de think deep about things for Bible wey show say Jehovah love you. One sister wey e name na Bianca face some things from e family people. Because of the things wey them de tell sister Bianca, e be de really feel sad. This sister talk say: “When I de read and de think deep about the things wey I read for Bible, and the life story of servants of Jehovah wey face the kind things wey I de face, this one de really help me.” Some brothers and sisters de cram Bible verse wey de really give them comfort, like Psalm 27:10 and Isaiah 41:10. Other people de listen to our audio recording when them de prepare for meeting or de do their Bible reading. They talk say this one de help them make they no too de feel say them dey alone.

9. When you de go meeting, how this one go help you?

⁹ Do everything wey you fit do to always go meeting. Our meeting go encourage you and e fit help you know your brothers and sisters well. (Heb. 10:24, 25) Massiel wey we talk about before talk say: “Even though say I de really shame, I make up my mind say I go de go all our meeting and de answer question for there. This one help me to feel say I dey part of the congregation.”

10. Why e dey important to make friends with brothers and sisters for congregation?

¹⁰ Dey tight with brothers and sisters for  congregation. Make friends with brothers and sisters for congregation wey you fit learn from. They fit senior you or you fit senior them and wuna fit no come from the same place. Bible remind us say: “Old people de get sense.” (Job 12:12) Old people fit learn plenty things from young servants of Jehovah too. Jonathan senior David by far, but this one no make the two of them no dey tight as friends. (1 Sam. 18:1) David and Jonathan help each other serve Jehovah well even with the serious problem wey they face. (1 Sam. 23:16-18) One sister wey e name na Irina and wey be the only Witness for e family talk say: “Our brothers and sisters for congregation fit really be like our papa and mama, or real brothers and sisters from the same mama. Jehovah fit use them to be the family wey we need.”

11. Wetin you fit do to make person your tight friend?

¹¹ To make new friends fit no dey easy, especially if you de shame. One sister wey e name na Ratna and wey de shame, learn the truth even with trouble from people. The sister talk say, “I just need to accept say I need brothers and sisters for congregation to help me.” E fit no dey easy to tell another person how you de feel. But when you do like that, that person fit become your tight friend. Your friends dey ready to encourage and support you. Even with that one, they need you to tell them how they fit do this one.

12. How the preaching work fit help you get better friend?

¹² One fine way to make friend na when we de preach with other people for congregation. Carol wey we talk about before talk say: “I don get plenty good friends as I de spend time with sisters for preaching and de do other work together for Jehovah. For many years now, Jehovah don use this friends help me.” To make friends with faithful brothers and sisters na really better thing. Jehovah de use this kind better friends to help you when you really dey sad, like when you dey lonely.—Prov. 17:17.

13. Which work all of us for congregation get?

¹³ All of us get the work to make peace dey for congregation and to show everybody love, so that nobody go feel say e dey alone. (John 13:35) Anything wey we do and talk fit really encourage other people. One sister talk say: “When I start to serve Jehovah, the congregation come be my family. I for no be Jehovah Witness today if to say they no help me.” Wetin you fit do to help people wey their family members no de serve Jehovah to feel say they be part of the congregation?

14. Wetin you fit do to make friend with new people?

¹⁴ Try to make friend with new people. We fit start to do this one when we de sofri welcome new people for congregation. (Rom. 15:7) But, we go do pass just to greet them well. As time de go, we want dey tight with them as friend. So, dey kind and show say you really care about this new ones. Make you no ask them questions wey go make them de feel somehow, but try to understand the problems wey them de face. E no go dey easy for some of them to tell you how them de feel, so make you dey careful so that you no go force them to talk. Instead, make you sofri use questions wey go make them talk  how them de feel, and make you sofri listen to their answers. For example, you fit ask them how they learn the truth.

15. How brothers and sisters with strong faith fit help other people for congregation?

¹⁵ We de make everybody for congregation get strong faith when we de show say we care about each other, especially when elders and other people with strong faith do this one. One sister wey e name na Melissa, and wey e mama train to serve Jehovah well talk say: “I really thank the brothers wey don be like papa to me, wey spend time with me, and wey show say they care about me for all this years. Anytime wey I need person to talk to, person dey to listen to me.” When the brother wey study with one young brother wey e name na Mauricio stop to serve Jehovah, Mauricio begin feel say e dey alone. Mauricio talk say: “The elders show say they care about me, and that one really help me. Them de talk with me everytime. They preach with me, they tell me the things wey they learn from their Bible study, and they even play sports with me.” Melissa and Mauricio don de serve Jehovah full-time.

16-17. Wetin and wetin we fit do to help people?

¹⁶ Do something to help. (Gal. 6:10) One brother wey e name na Leo de serve as missionary for one place wey far from e family. This brother talk say: “Plenty times, the thing wey you need na just one simple thing wey person go do for the right time to show say e care about you. I remember one day wey I get accident with motor. When I finally reach house, I don over tire. But one husband and wife invite me come their place just to chop food together. I no remember wetin we chop, but I remember say they sofri listen to me. After everything, my condition come better pass before!”

¹⁷ All of us de enjoy-am when we dey with other brothers and sisters, and de discuss the talks wey we hear for place like, our assemblies and conventions. But Sister Carol wey we talk about before talk say: “I de really feel lonely for assemblies and conventions.” Why this sister talk like that? E talk say: “Even though say I dey around plenty-plenty brothers and sisters, many times them dey with their  family. For me, anytime wey I see them, I de really feel say I dey alone.” E no de easy for some people to go convention or assembly for the first time after their husband or wife die. You know anybody wey de face this kind problems? You fit invite the person make e join your family for the next program wey we go do.

18. How we fit do wetin dey for 2 Corinthians 6:11-13 when we de do good for people?

¹⁸ Spend time together. Try to spend time with different brothers and sisters, especially people wey fit de feel say them dey alone. We want “open [our] heart,” especially for this kind brothers and sisters. (Read 2 Corinthians 6:11-13.) Melissa wey we talk about before talk say: “We de really enjoy-am everytime when brothers and sisters invite us come their house to spend time with their family or to travel together.” Any person dey your congregation wey you fit do something for, to show say you care about the person?

19. Which time some of our brothers and sisters go really want make we spend time with them?

¹⁹ E get some times wey our Christian brothers and sisters go really like-am if we spend time with them. E fit dey hard for some of them to dey with their family members wey no de serve Jehovah, when them de do celebrations wey Bible no support. For some other people, they fit really dey sad for some kind days like, when the date wey their person die reach. When we de spend time with brothers and sisters wey de face this kind problems, we de show say we de “use all [our] heart care” for them.—Phil. 2:20.

20. How the things wey Jesus talk for Matthew 12:48-50 fit help us when we de feel say we dey alone?

²⁰ Plenty reasons dey why servant of Jehovah fit feel say e dey alone sometimes. But, make we no ever forget say Jehovah really know how we de feel. Many times, e de use our brothers and sisters to give us wetin we need. (Read Matthew 12:48-50.) And when we do our best to help our brothers and sisters, we de show Jehovah say we really like this fine arrangement wey e don make. No matter how we de feel sometimes, we no ever dey alone because Jehovah always dey with us!