1-2. How our time take be like the time of Lot?

 TODAY, plenty people no de fear God. Them de put hand for sex wey no clean for God eye, and this one de make us feel the way Lot feel for e time. Because e know say our Papa for heaven hate the bad things wey the people de do, this one make-am really “worry about the bad things wey e see and hear when e de live among them.” (2 Pet. 2:7, 8) Because Lot love God and get deep respect or fear for God, e no join the people for the bad life wey them de live. Na the same thing we de face today as plenty people around us no de obey Jehovah law. Even with this one, we go fit dey clean for Jehovah eye if we continue to love and fear-am for the correct way.—Prov. 14:2.

² To fit do this one, Jehovah don use e servant write wetin go help us for the book of Proverbs. All servant of Jehovah, whether na man, woman, young or old people, we go really gain from wetin dey the book of Proverbs.

3. As we see for Proverbs 17:3, wetin be one reason why we need to protect our mind? (Still check the picture.)

³ One important reason why we need to protect our mind na because Jehovah de see wetin dey our mind. This one mean say no be only wetin people de see about us Jehovah de see, e know the kind person wey we really be. (Read Proverbs 17:3.) E go love us if we continue to think about the better-better advice for Bible wey fit help us get life wey no go end. (John 4:14) This one go help us no de think about the lie wey Satan and e world de spread and we no go copy the bad character of people for this world. (1 John 5:18, 19) The more we de near Jehovah, the more we go de love and respect-am. Because we no want do wetin go pain our Papa for heaven, we hate to think about bad things. When bad thing come our mind, e good make we ask  ourself say, ‘Why I go do this kind thing wey I know say e go pain Jehovah wey don show me love well-well?’—1 John 4:9, 10.

4. As one sister fear Jehovah, how the fear help-am no do wetin Jehovah hate?

⁴ One sister for Croatia wey e name na Marta talk wetin help-am when e face situation wey tempt-am to do sex wey no clean for God eye. E say: “When this bad thing come my mind, I no fit think well again and e hard me to comot-am for my mind. But because I fear Jehovah, this one protect me.” b How? Sister Marta talk say e think deep about the bad things wey fit happen to-am if e do-am. We too fit think deep about the problem wey we fit face if we make bad decision. The one wey bad pass be say wetin we do go really pain Jehovah and e fit spoil our friendship with-am forever.—Gen. 6:5, 6.

5. Wetin you fit learn from Leo example?

⁵ If we de fear Jehovah, we no go make friends with people wey no de fear-am. Brother Leo for Congo learn e lesson when e follow bad friends. Four years after e baptize, e start to follow bad friends. E think say e no bad to follow bad friends since no be e de do bad things. But small time, because of the bad friends wey e de follow, e start to over drink and do sex wey no clean for God eye. Na that time e eye clear, and e start to think deep about the things wey e papa and mama teach-am and how e de happy before, when e de serve Jehovah. Wetin come happen? E change and stop to follow bad friends. Elders for e congregation help-am start to worship Jehovah again. Now, Brother Leo na elder and special pioneer.

6. Which two “women” we go talk about?

⁶ For Proverbs chapter 9, Bible talk about deep sense and foolishness like say them be  women. c Make we see wetin we fit learn from this chapter. As we de do this one, make we remember say people for Satan world de run follow sex wey no clean for Jehovah eye and them like film and picture of naked people. (Eph. 4:19) E dey important make we de show say we de fear God and run from bad things. (Prov. 16:6) So all of us, whether we be man or woman, we go fit really gain from wetin dey Proverbs chapter 9. Each of the women wey be deep sense and foolishness de call “people wey no get sense” or wey no get experience come their house. E just be like say each of them de talk say, ‘Come chop for my house.’ (Prov. 9:1, 5, 6, 13, 16, 17) Wetin happen to people wey go deep sense house different well-well from wetin happen to people wey go foolishness house.

7. From wetin Proverbs 9:13-18 talk, wetin de happen to people wey go the house of the “woman wey no get sense”? (Still check the picture.)

⁷ Make we talk about wetin the “woman wey no get sense” talk as e de invite people come e house. (Read Proverbs 9:13-18.) E tell people wey no get sense say “come here” come enjoy wunaself. Wetin happen to people wey go e house? Bible talk say: “People wey don die full e house.” Remember say the book of Proverbs don use this kind word before. For there, Bible warn us about the “stupid woman, . . . wey like sex wey no clean.” And say “person wey de go e house be like person wey want go die.” (Prov. 2:11-19) Proverbs 5:3-10 warn us about another stupid woman wey e way de lead to death.

8. Which decision dey our hand to make?

⁸ People wey de hear wetin the “woman wey no get sense” de talk need to choose whether them go go e house or them no go go. We too fit face this kind situation wey we go need to choose wetin we go do. Wetin we go do if we de watch television or de use Internet and we jam film or picture of naked people and sex wey no clean?

9-10. Give some reason why we suppose run from sex wey no clean for God eye.

⁹ We get plenty important reason why we need to run from sex wey no clean for God eye. Bible tell us say the “woman wey no get sense” talk say: “Water wey person thief de sweet.” Wetin “water wey person thief” mean? Bible talk say sex wey husband and wife de enjoy be like water wey de cool person body. (Prov. 5:15-18) Na only man and woman wey marry each other for the correct way, get right  to sleep with each other. But this one different from “water wey person thief.” E dey different because “water wey person thief” fit mean sex wey no clean for God eye. People wey de do sex wey no clean de hide do-am like person wey de thief something. This bad thing wey them de do fit de sweet them especially if them think say nobody go ever know about-am. Them de really deceive theirself because Jehovah de see everything. Nothing bad reach to lose our friendship with Jehovah. So nothing about sex wey no clean for God eye de sweet. (1 Cor. 6:9, 10) This one no be the only bad thing wey go happen to person wey do sex wey no clean for God eye.

¹⁰ Sex wey no clean for God eye de cause shame for person wey do-am, e de make person feel say e dey useless, the person fit carry belle, and e de scatter family. So to show say we get sense, we need to run from the “woman wey no get sense” and make we no chop e food. Another thing be say when person do sex wey no clean for God eye, no be only e friendship with Jehovah go die, but the person fit carry sickness wey go kill-am. (Prov. 7:23, 26) No wonder Proverbs 9:18 talk say: “People wey go e house dey inside grave.” So why person go use e own hand pack wahala for e own body?—Prov. 9:13-18.

11. Why e really bad to de watch film or picture of naked people?

¹¹ One trap wey common well-well wey Satan de use na film and picture of naked people. Some people think say to de watch film or picture of naked people no go fit affect them. But e de cause plenty problem for person. For example, e de make person wey de watch-am no get respect for e self and other people and e no de easy for people wey de watch-am to stop-am. When person watch film wey show naked people or see picture of naked people, e de hard to forget-am. Another thing be say film and picture of naked people de make person wey watch-am hungry to do sex wey no clean. (Col. 3:5; Jas. 1:14, 15) True-true, plenty people wey watch film or picture of naked people, de put hand for sex wey no clean for God eye.

12. How we fit show say we de run from pictures wey fit make us start to think about sex wey no clean for God eye?

¹² As servants of Jehovah, wetin we go do if picture of naked people just show for our phone or computer when we no expect? Make we comot our eye from-am quick-quick. E go easy for us to fit do this one if we remember say our friendship with Jehovah dey important pass any other thing. The truth be say, even picture or film wey no de show people wey really dey naked, fit still make person start to think about sex wey no clean for God eye. Why we suppose run from them? Because we no want anything wey fit make us even start to think about sex wey no clean for God eye. (Matt. 5:28, 29) One elder for Thailand wey e name na David talk say: “I de ask myself say, ‘Jehovah go happy if I continue to look picture or film even if the people for inside no really naked?’ When I ask myself this kind question, e go help me do the correct thing.”

13. Wetin fit help us do wetin correct for God eye?

¹³ If we de fear God and no want do wetin go pain-am, this one go help us do wetin correct for God eye. Bible talk say ‘to fear God na the start or beginning of deep sense.’ (Prov. 9:10) We fit see this one for the first part of Proverbs chapter 9, wey talk about “deep sense” like say na woman.

14. How the invitation wey dey Proverbs 9:1-6, take different from invitation from the “woman wey no get sense”?

¹⁴ Read Proverbs 9:1-6. For this verse them,  we see say Jehovah de advice us say make we accept deep sense wey e de give us, because na e make us and na e de give people deep sense. (Prov. 2:6; Rom. 16:27) The place still talk about one big house wey get seven pillar. This one de show say Jehovah get open hand, and e de happy to give deep sense to everybody wey want-am.

15. Wetin Jehovah want for us?

¹⁵ From the example of the woman wey Bible use describe “deep sense,” we learn say Jehovah get open hand and e de give us plenty good things. For Proverbs chapter 9, Bible talk say, this woman wey be “deep sense,” de call people make them come e house, come chop the better meat and wine wey e don prepare and arrange for table for e house. (Prov. 9:2, ftn.) For verse 4 and 5, Bible talk say the woman wey be deep sense de “tell person wey no get sense say: ‘Come chop my food and drink the wine wey I don prepare.’ ” So why e good make we go deep sense house and chop e food? Na because Jehovah want make all e children get sense wey go protect them from problems. E no want make we make mistake wey we go regret for life. Na this one make Jehovah “de keep deep sense for people wey de do wetin correct.” (Prov. 2:7) If we de really fear Jehovah, we go want do wetin go make-am happy. So when we learn wetin Jehovah want, we go happy to do-am.—Jas. 1:25.

16. How fear of God help Brother Alain fit make good decision, and wetin happen?

¹⁶ See how fear of God help Brother Alain to fit make good decision. Brother Alain wey be elder for congregation and teacher for school talk say, “Many teachers wey I de work with for school think say to de watch picture and films of people wey dey naked, na one way to learn about sex.” But Brother Alain know say this one na lie. E talk say: “Because I love and respect God, I use all my heart tell them say I no go watch that kind thing. I still tell them why I no fit do-am.” E follow the advice of the woman wey be “deep sense” as e “do things with better sense.” (Prov. 9:6) Because of this one, some of the teachers wey Brother Alain de work with start to study Bible and them de attend meetings now.

17-18. Wetin people wey accept invitation to go “deep sense” house de enjoy now, and wetin them go gain for future? (Still check the picture.)

¹⁷ Jehovah use the example of the two women wey be foolishness and deep sense, to show us how we fit de happy now and for future. People wey go the house of the “woman wey no get sense,” think say them de enjoy when them do sex wey no clean for God eye. But, them no  know say wetin them de do go affect them for future. Because na their own grave them de dig.—Prov. 9:13, 17, 18.

¹⁸ But the future of people wey accept invitation to go “deep sense” house go dey different. Even now, them de happy because them get everything wey they need to continue to hold Jehovah tight. (Isa. 65:13) Jehovah use prophet Isaiah tell us say: “Listen to me well-well, and chop better thing. And you go happy well-well when you chop better food.” (Isa. 55:1, 2) Jehovah de teach us to love wetin e love, and hate wetin e hate. (Ps. 97:10) And we dey happy because we fit invite other people to come learn from “deep sense.” We just be like e servants wey “go where high pass for the city and call people from there say: ‘Make anybody wey no get experience come here.’ ” We and the people wey we invite go gain now and for future. We go live forever as we continue to “de do things with better sense.”—Prov. 9:3, 4, 6.

19. With wetin Ecclesiastes 12:13, 14 talk, wetin we suppose make up our mind to do? (Still check the box wey be “ Things Wey We De Gain When We Fear God.”)

¹⁹ Read Ecclesiastes 12:13, 14. If we de fear Jehovah, e go make us run from sex wey no clean and continue to hold Jehovah tight for this last days. We go continue to invite other people make them come “deep sense” house and chop e food, because we love and respect Jehovah with all our heart.