STUDY ARTICLE 23
SONG 28 Who Fit Be Your Friend Jehovah?
Jehovah De Give Us Special Invitation to Be Im Visitor
“My tent go dey with them, and I go be their God.”—EZEK. 37:27.
WETIN WE GO LEARN?
For this article, we go learn wetin go help us understand wetin e mean to be visitor for Jehovah tent, and how e de care for us as Person wey invite us.
1-2. Which big honor Jehovah de give im servants?
IF SOMEBODY ask you say, ‘Who Jehovah be to you?’ Wetin you go talk? Your answer fit be, ‘Jehovah na my Papa, my God, and my Friend.’ Other ways still dey to describe Jehovah. But, you don ever see Jehovah as Person wey de invite you to im house?
2 King David compare Jehovah to person wey invite visitor come im house. And e compare people wey de worship Jehovah to the visitor wey them invite. David ask say: “O Jehovah, who go fit be visitor for your tent? Who fit stay for your holy mountain?” (Ps. 15:1) From this verse, we learn say we fit be visitor for Jehovah tent. This one mean say, we fit be im friend. Na really big honor to be Jehovah visitor.
JEHOVAH WANT MAKE WE BE IM VISITOR
3. Who be Jehovah first visitor, and how the two of them de feel about each other?
3 Before Jehovah make everything, na only im dey. But after, e make im firstborn Son wey be Jesus Christ. Jehovah come be like person wey invite visitor come im house, and na Jesus be the first visitor for Jehovah tent. Jehovah really happy to invite Jesus come im tent. Bible talk say Jesus de really make Jehovah happy no be small. And Jesus de happy as e dey with im Papa all the time.—Prov. 8:30.
4. Who Jehovah later make im visitor?
4 After Jehovah make the angels, e invite them to be im visitor. Bible call the angels “sons of God,” and still show say them de happy as them dey with Jehovah. (Job 38:7; Dan. 7:10) For many-many years, the only friend or visitor wey Jehovah get na Jesus and the angels. After, Jehovah make people for this earth and invite them to be im visitor. Some of the people wey accept the invitation na Enoch, Noah, Abraham, and Job. Bible show say them be Jehovah friend because them obey-am.—Gen. 5:24; 6:9; Job 29:4; Isa. 41:8.
5. Wetin we fit learn from wetin Ezekiel talk for Ezekiel 37:26, 27?
5 For many-many years, Jehovah continue to invite im friends to be im visitor. (Read Ezekiel 37:26, 27.) For example, wetin Ezekiel talk show say Jehovah want make people wey de worship-am, be im tight friend. Jehovah promise to make “agreement of peace with them.” Ezekiel de talk about the time wey anointed Christians and the other sheep, go dey together for Jehovah tent as “one group of sheep.” (John 10:16) Wetin e talk de happen for this our time.
GOD DE CARE FOR US NO MATTER WHERE WE DE STAY
6. How person fit become visitor for Jehovah tent, and where you fit see Jehovah tent for this our time?
6 For Bible time, tent na where person fit rest and where person fit hide from bad weather. Every visitor know say the person wey get the tent go care for-am. Na when we give our life to Jehovah and baptize, we become visitor for Jehovah tent. (Ps. 61:4) Jehovah de give us everything wey we need to continue to make our friendship with-am strong, and we de enjoy good friendship with other people wey don become Jehovah visitor. But no be only one place Jehovah tent dey, people for everywhere fit become visitor for im tent. E fit be say you don travel go another country to attend convention for there, and you happy to see other people wey be visitor for Jehovah tent. Jehovah tent reach everywhere wey im servants dey. So if we de serve Jehovah well, we fit be visitor for im tent no matter where we dey.—Rev. 21:3.
7. Why we fit talk say people wey worship Jehovah well wey don die, still be visitor for Jehovah tent? (Still check the picture.)
7 What about people wey serve Jehovah well wey don die? Them still continue to be visitor for Jehovah tent? Yes! Why we talk like that? Because Jehovah still de remember them. Jesus talk say: “For the matter say them de resurrect people wey don die, even Moses talk about-am for the story about the chuku-chuku tree, when e call Jehovah ‘the God of Abraham, and God of Isaac, and God of Jacob.’ E no be God of people wey don die, but na God of people wey dey alive, because all of them dey alive for im eye.”—Luke 20:37, 38.
Even people wey worship Jehovah well but wey don die, still continue to be visitor for Jehovah tent (Check paragraph 7)
WETIN WE DE GAIN AND WETIN WE NEED TO DO?
8. Wetin we de gain as we be visitor for Jehovah tent?
8 Just as tent na where person fit rest and hide from bad weather, na so Jehovah tent de protect im visitor from anything wey fit spoil their friendship with-am, and give them hope for future. If we continue to hold Jehovah tight, nothing wey Satan do us go last forever. (Ps. 31:23; 1 John 3:8) For Paradise, Jehovah go protect all im friends from all the things wey fit spoil their friendship with-am, and wey fit put their life for danger.—Rev. 21:4.
9. As visitor for Jehovah tent, how e want make we behave?
9 Na big honor to be visitor for Jehovah tent. Because e de help us enjoy friendship with-am wey fit last forever. How we go behave if we want continue to be Jehovah visitor? If person invite you to im house, you go want know wetin you need to do to be good visitor. For example, the person fit expect say you go remove your shoe before you enter im house, so you go do wetin e want. For the same way, we need to know wetin Jehovah expect from us so that we go fit continue to be visitor for im tent. The love wey we get for Jehovah de make us want do everything wey we fit do to “really make-am happy.” (Col. 1:10) Na true say Jehovah na our Friend, but make we no forget say e still be our God and our Papa, so we suppose respect-am well. (Ps. 25:14) Make we no ever forget this one, and make we always get deep respect for-am. This one go make us no do wetin go make-am vex. We really want “know where [we] fit do reach as [we] de follow God waka.”—Mic. 6:8.
JEHOVAH NO DO PARTIAL FOR THE WAY E TREAT ISRAEL PEOPLE
10-11. How the way Jehovah care for Israel people when them dey wilderness for Sinai, show say e no de do partial?
10 Jehovah no de do partial for the way e de treat im visitor. (Rom. 2:11) We fit see this one from the way Jehovah treat Israel people when them dey wilderness for Sinai.
11 After Jehovah save Israel people from Egypt people hand, e choose people wey go be priests to work for tabernacle. E still choose Levites to do other work for the tabernacle. The way Jehovah care for the people wey de work for the tabernacle or people wey de live near the tabernacle, better pass the way e care for people wey de stay far from the tabernacle? No! Jehovah no de do partial.
12. How Jehovah show say e no de do partial for the way e treat Israel people? (Exodus 40:38) (Sill check the picture.)
12 Every Israel person fit be Jehovah friend whether e de work for the tabernacle or e no de work for there and whether im tent near the tabernacle or e far from the tabernacle. For example, Jehovah make sure say all Israel people fit see the pillar of cloud and pillar of fire ontop the tabernacle. (Read Exodus 40:38.) When the cloud start to move go another place, everybody fit see-am, even people wey their tent far well-well from the tabernacle. Then them go fit pack their things, remove their tents, and follow the rest of the people move. (Num. 9:15-23) All the people fit hear the loud sound from the two silver trumpet, wey de help the people know say na time for everybody to move. (Num. 10:2) Just because person de live near the tabernacle no mean say na im friendship with Jehovah strong pass people wey dey live far. Instead, every Israel person fit become Jehovah visitor and dey sure say Jehovah go direct and protect-am. Na so e still be for Jehovah servants today. No matter where we de live for this earth, Jehovah love us, e de care for us, and e de protect us.
As Jehovah put the tabernacle where all Israel people go de see the pillar of cloud and pillar of fire, e show say Jehovah no de do partial (Check paragraph 12)
EVEN FOR THIS OUR TIME, JEHOVAH NO DE DO PARTIAL
13. Wetin be one way wey Jehovah de show for this our time say e no de do partial?
13 Some of Jehovah people de live near our headquarters or branch office. And some servants of Jehovah de work for there. Because of this one, them de join do plenty things wey de happen for our headquarters and branch office them, and de work with the people wey Jehovah de use direct im organization. Some servants of Jehovah de serve as circuit overseers or other type of special full-time service. Even if you no de live near headquarters or branch office, or you no de work for there, or you no dey for any type of special full-time service, get-am for mind say you still be Jehovah visitor and e love you. Jehovah know you well and e de care for you. (1 Pet. 5:7) Jehovah de give all im servants wetin them need to fit continue to hold-am tight, e de direct them, and protect them.
14. Which other way Jehovah don show say e no de do partial?
14 Another way wey Jehovah de show say e no de do partial na as e make-am possible for people for the whole world to fit read Bible for language wey them understand. The language wey them use write Bible na Hebrew, Aramaic, and Greek. But you think say people wey sabi read this three language wey them use write Bible, get better friendship with Jehovah pass people wey no sabi read-am? No, e no be like that.—Matt. 11:25.
15. Wetin Jehovah don do to make people know-am wey show say e no de do partial? (Still check the picture.)
15 Jehovah no de invite us to be im visitor just because we go school or we sabi the three language wey them take write Bible. Jehovah make-am possible for people for the whole world to fit learn about-am from Bible, no be only people wey go school. E make sure say them translate Bible to different-different language. So this one don make-am possible for people for the whole world to fit learn about-am and become im friend.—2 Tim. 3:16, 17.
As Jehovah make-am possible for people to fit translate Bible to many different language, how this one show say e no de do partial? (Check paragraph 15)
CONTINUE TO BE JEHOVAH VISITOR
16. As e dey for Acts 10:34, 35, wetin person go do to continue to be Jehovah visitor?
16 Na big honor say Jehovah accept us as visitor for im tent. Nobody fit care for im visitor well like Jehovah. Jehovah dey kind, de show love, and de care for im visitor pass any other person. Another thing be say, Jehovah no de do partial, e de welcome anybody no matter where them de live, where them come from, their skin color, their tribe, age, whether them go school or them no go, or whether na man or woman. But na only people wey de obey-am go fit be visitor for im tent.—Read Acts 10:34, 35.
17. Where we fit see other things wey we need to know so that we go continue to be visitor for Jehovah tent?
17 For Psalm 15:1, King David ask some questions, e say: “O Jehovah, who go fit be visitor for your tent? Who fit stay for your holy mountain?” Jehovah still use David to answer this questions for other verse of Psalm 15. For the next article, we go talk about some of the things wey we must do if we want continue to be Jehovah visitor.
SONG 32 De Stay Near Jehovah!
