1. Wetin David compare Jehovah to for Psalm 18:46?

 FOR this Satan world, problems fit come from anywhere, and sometimes e fit even change our life. But we happy say Jehovah ready to help us anytime wey we run to-am! For the article before this one, we learn say Jehovah na God wey dey alive and e always ready to help us. Anytime wey Jehovah help us, e de make us dey sure more-more say “Jehovah dey alive!” (Read Psalm 18:46.) After David talk say Jehovah dey alive, e talk say Jehovah na “my Rock.” Why David go compare Jehovah wey be the God wey dey alive to rock wey no get life?

2. Wetin we go learn from this article?

² For this article, we go see why Bible compare Jehovah to rock and wetin this one teach us about Jehovah. We go still learn how we fit see Jehovah as our Rock. And we go discuss different-different ways wey we fit copy Jehovah example.

HOW JEHOVAH TAKE BE LIKE ROCK?

3. When Bible call Jehovah “rock” wetin e mean? (Check the picture .)

³ Bible compare Jehovah to “rock,” to help us understand some of the character wey e get. Many times for Bible, when Jehovah servant de praise-am because of the kind God wey e be, them describe-am as rock. The first place for Bible wey them call Jehovah “Rock,” na for Deuteronomy 32:4. Another place wey Bible call Jehovah “rock” na when Hannah de pray. Hannah talk say: “No rock be like our God.” (1 Sam. 2:2) Prophet Habakkuk call Jehovah “my Rock.” (Hab. 1:12) The person wey write Psalm 73 talk say: “Na God de protect my heart; na im be my rock.” (Ps. 73:26) And even Jehovah call imself rock. (Isa. 44:8) Now, make we talk about three character wey make Jehovah be like rock, and we go still learn how we fit make Jehovah “our Rock.”—Deut. 32:31.

4. How Jehovah de protect us when things really hard? (Psalm 94:22)

 ⁴ Jehovah de protect us when things really hard. For area wey rock dey, person fit run enter inside cave when rain de fall, make rain no beat-am. Na wetin Jehovah de do for us be that. E de protect us when things really hard. (Read Psalm 94:22.) Jehovah de give us everything wey we need to make sure say nothing happen to our friendship with-am, and e make us dey sure say nothing wey Satan do us now go last forever. E still promise us say for future, e go comot everything wey de make us worry or suffer.—Ezek. 34:​25, 26.

5. How we fit run go meet Jehovah to protect us?

⁵ One way wey we de run to Jehovah to protect us na when we de pray to-am. When we pray, Jehovah de give us “peace” wey de protect our heart and mind. This one de make our mind come down. (Phil. 4:6, 7) Make we talk about the story of Brother Austin a wey them put for prison because e de serve Jehovah. When e dey prison, e get one officer wey ask-am question plenty times, treat-am for bad way, and even try to put fear for im body. The brother talk say: “Anytime wey e call me to ask me question, my mind go just cut. . . . I de always pray to Jehovah. I beg-am make e make my mind come down and give me sense. So no matter wetin the officer do, I no worry. . . . E come be like say Jehovah dey around me de protect me.”

6. Why we fit always trust Jehovah? (Isaiah 26:3, 4)

⁶ We fit trust Jehovah say e no go ever leave us. Just as big rock no de comot from where e dey, na so Jehovah always dey with us and ready to help us. We fit trust-am because e be “everlasting Rock.” (Read Isaiah 26:3, 4.) Jehovah go always dey alive to do wetin e promise, e de hear our prayer, and e de support us when we de face problem. We fit still trust Jehovah because e no de ever leave people wey hold-am tight. (2 Sam. 22:26) E no go ever forget wetin we do, and e go always bless us.—Heb. 6:10; 11:6.

7. Wetin de happen to us when we trust Jehovah and see how e de help us? (Still check the picture.)

⁷ We de show say Jehovah na our Rock when we trust-am with all our heart. We know say when we obey-am even when things really de hard, na we go gain. (Isa. 48:​17, 18) Anytime wey we see how Jehovah help us, e de make us trust-am more. We go really dey sure say na only Jehovah go fit help us endure any problem wey we face no matter how e hard reach. Many times, we de face some kind problem wey nobody go fit help us. For this kind condition, we de see-am clear say na only Jehovah we fit run to for help. Brother Vincent talk say: “The time wey I feel say I near Jehovah pass for my life na when them put me for prison. I learn to trust Jehovah more because I dey alone, and I no fit do anything to change the condition.”

8. (a) Why we fit talk say Jehovah no de ever change? (b) When we make Jehovah our Rock, how we de gain? (Psalm 62:6, 7)

⁸ Jehovah no de ever change. Just as big  rock no de shift comot from where e dey, na so Jehovah be. Im character and wetin e get for mind to do, no de ever change. (Mal. 3:6) When Adam and Eve sin against Jehovah for the garden of Eden, Jehovah no change wetin e get for mind to do for us. Apostle Paul talk say Jehovah “no go fit do wetin dey against who e really be.” (2 Tim. 2:13) This one mean say no matter wetin happen or wetin other people do, Jehovah no go ever change im character, wetin e get for mind to do, or im law. Because we know say Jehovah no de ever change, we know say e go help us when things really hard, and e go do wetin e promise us for future.—Read Psalm 62:6, 7.

9. Wetin you learn from wetin happen to Sister Tina?

⁹ If we think deep about Jehovah character, wetin e get for mind to do for us and this earth, e go make us continue to trust-am and make-am our Rock. This one go help us no shake or de fear when we de face problem, and we go continue to hold Jehovah tight. (Ps. 16:8) This na wetin happen to Sister Tina. Them no allow-am comot from im house because e de serve Jehovah. Sister Tina talk say: “I just dey alone. When e just happen, e really hard for me. Many times, I no de happy.” But when Sister Tina think deep about Jehovah and wetin E get for mind to do for us, this one make-am see why e dey important for-am to endure the problem wey e de face. E make im mind come down and give-am the power to continue to hold Jehovah tight. E still talk say: “When I understand say the reason why I de face this problem na because I de serve Jehovah, e make me stop to think about myself.”

10. How we fit make Jehovah our Rock now?

¹⁰ We go soon face serious hard time, and we go need to trust Jehovah that time pass before. So e dey important now make we continue to make our faith for Jehovah strong, so that we go really dey sure say Jehovah go help us continue to hold-am tight, no matter wetin happen. How we fit do this one? Read people story for Bible, and story of brothers and sisters for this our time. Try think about how Jehovah don show say e be rock for the way e take help them. Think deep about this different-different story. This one go help you make Jehovah your Rock.

COPY JEHOVAH CHARACTER WEY MAKE-AM BE LIKE ROCK

11. Why e good make we copy Jehovah character wey make-am be like rock? (Still check the box “ Wetin Young Brothers Fit Do to Be Elder?”)

¹¹ We don talk about different-different character wey make Jehovah be like rock. Now make we talk about how we fit copy them. This one go help us fit support our brothers and sisters for congregation. For example, Jesus give Simon another name wey be Cephas (wey them translate as “Peter”), the name mean “One Small Rock.” (John 1:42) Wetin Jesus mean be say Peter go comfort brothers and sisters for congregation and make their faith strong. Bible talk say elders for congregation be like shadow  of “big rock.” This one mean say them go care for people for congregation. (Isa. 32:2) But the truth be say all of us fit make each other strong if we de copy Jehovah character wey make-am be like rock.—Eph. 5:1.

12. How we fit help our brothers and sisters when things de hard them?

¹² Help brothers and sisters when things de hard. Plenty things de happen to our brothers and sisters. For example, things wey them no expect, like heavy rain fit just scatter their property, or fight fit start for their area. If something like this happen and them de look for place to stay, we fit help them arrange for where them go stay. As things de hard more-more for this “last days,” we go get more chance to help our brothers and sisters. (2 Tim. 3:1) We go fit make the mind of our brothers and sisters come down and give them wetin them need. One way wey we fit do this one na when we de talk to them for meeting and encourage them. We want make our brothers and sisters for congregation feel like say we give them cold water to drink when hot sun de shine. Many people today de treat other people for bad way. Things like this de affect our brothers and sisters and make them no happy. So when our brothers and sisters come meeting, we want try our best to make sure say we encourage them, and show say we love them.

13. How elders fit help brothers and sisters when things de hard them? (Still check the picture.)

¹³ When brothers and sisters de face problem, elders for congregation fit make their mind come down. Elders de quick arrange to help brothers and sisters when things wey them no expect happen, like sickness and other bad things. Them still de use Bible encourage brothers and sisters. People for congregation go like to talk to elder if them know say the elder go sofri listen to them, treat them well,  and try to understand how them de feel. This better-better character de make brothers and sisters feel say the elder love them. And this one go make-am easy for them to follow any advice from Bible wey the elder give them.—1 Thess. 2:7, 8, 11.

14. How we fit show say we be person wey them fit trust?

¹⁴ Show say you be person wey them fit trust. Na better thing e be when other people know say them fit trust us to help them when them need help. (Prov. 17:17) How we fit show say we be person wey them fit trust? Na when we de do our best to copy Jehovah example everyday. For example, no de do promise and fail, and make we no de late. (Matt. 5:37) We fit help person wey we know say e need our help. Apart from this one, when them give us any work to do, make we do-am the way them say make we take do-am.

15. How brothers and sisters for congregation de gain when them know say them fit trust the elders?

¹⁵ Congregation de gain from elders wey show say e be person wey them fit trust. How? When brothers and sisters know say them go fit call  elders anytime wey them need help, e de make them no too worry. When elders ready to help brothers and sisters, e de make them see say the elders love them. Brothers and sisters de trust elders more, when them de use Bible and our books give advice, instead to use wetin come from their mind. People for congregation still de trust elders wey no de tell other people wetin them tell them, and wey no de do promise and fail.

16. When we de always do the correct thing, how we and other people de gain?

¹⁶ Always do the correct thing. We go fit be better example to other people if we de obey Jehovah for everything, and de follow wetin Bible talk when we de make decision. When we de study Bible and de make our faith for Jehovah strong, we go fit hold-am tight and follow im law. This one go help us know wetin people de teach wey no correct, and the way them de think wey Jehovah no like. And we no go allow this things affect us. (Eph. 4:14; Jas. 1:​6-8) Our faith for Jehovah and wetin e promise, go help us dey calm when we hear bad news. (Ps. 112:7, 8) And we go fit help people wey de face problem.—1 Thess. 3:2, 3.

17. Wetin elders de do to help brothers and sisters for congregation?

¹⁷ Jehovah want make elders de think well, no de over do things, de arrange things well, and no de talk say na only wetin them want must stand. When elders de “really follow” wetin Bible talk, them de use their example help brothers and sisters dey calm, and get strong faith. (Titus 1:9; 1 Tim. 3:​1-3) Elders de help brothers and sisters for congregation with their better example, and as them de always encourage them. This one de make brothers and sisters de always come meeting, go preaching, and do their personal study. When brothers and sisters de face problem wey de make them worry, elders de always remind them to trust Jehovah, and make them no forget wetin e don promise to do for future.

18. Wetin go make us want praise Jehovah and continue to hold-am tight? (Still check the box “ How We Fit Near Jehovah More?”)

¹⁸ As we don talk about some of the wonderful character wey Jehovah get, we fit feel like King David wey talk say: “Praise Jehovah, wey be my Rock.” (Ps. 144:1) We fit trust Jehovah forever. We fit trust-am say e go continue to help us fit hold-am tight. And we go fit talk say Jehovah na “my Rock.”—Ps. 92:​14, 15.