To make Jehovah happy, we must get faith. But apostle Paul talk say, “Faith no be something wey everybody de get.” (2 Thess. 3:2) When apostle Paul talk this one, e de talk about some “bad and wicked people” wey e want make God save-am from their hand. But no be only the “bad and wicked people” wey apostle Paul talk about no get faith. Some people dey wey no want gree believe say na God make everything. (Rom. 1:20) Other people de talk say them believe say God dey. But this one no be the faith wey Bible talk say go make Jehovah happy.

For us to get real faith, we must believe say Jehovah dey and say na im be the Person wey “de reward” people wey get strong faith for-am. (Heb. 11:6) To get this kind faith, we need God holy spirit. And for person to get God holy spirit, e need to beg Jehovah make e give-am. (Luke 11:9, 10, 13) Another way to get God holy spirit na to de read Bible wey Jehovah use holy spirit direct people to write. And when we de read Bible, e good make we think deep about wetin we de read, and use wetin we de learn for our life. When we do all this things, e de show say we de allow Jehovah holy spirit direct the way we de live our life to show say we get faith, and na this kind faith de make Jehovah happy.