1. Wetin Adam and Even lose, and wetin be the result?

WHO you think say suppose tell us wetin good and wetin bad? When Adam and Eve eat the fruit from the tree of the knowledge of good and bad, they show-am clear say: They no trust Jehovah and the things wey e talk about wetin good and bad. They choose to decide for theirself wetin dey good and bad. (Gen. 3:22) Just think about wetin they lose. They lose their friendship with Jehovah. They still lose the chance wey they get to live forever, and they pass sin and death to their children. (Rom. 5:12) The thing wey Adam and Eve choose to do bring trouble.

2-3. (a) When Philip preach to the Ethiopian eunuch, wetin the eunuch do? (b) Which blessings we go get if we baptize, and which questions we go talk about?

² The way Adam and Eve behave dey different from the way the Ethiopian eunuch behave when e hear the message wey Philip preach. Jehovah and Jesus don do things for the eunuch and e value wetin them do. So quick-quick e baptize. (Acts 8:34-38) When we dedicate ourself to Jehovah and baptize, we de make-am clear say we value wetin Jehovah and Jesus don do for us just like that eunuch. We still de show say we trust and accept Jehovah as the person wey suppose tell us wetin good and bad.

³ Think about the blessings wey we go get when we serve Jehovah! One blessing be say, Jehovah go give us all the things wey Adam and Eve don troway, even the chance to live forever. Jehovah de forgive our sin and give us clean conscience because we get faith for Jesus Christ. (Matt. 20:28; Acts 10:43) Another thing be say, as people wey de do wetin Jehovah like, we go become part of e family. And this one go make us  get wonderful future with blessings. (John 10:14-16; Rom. 8:20, 21) Even with all this benefit, e still de hard some people wey don know Jehovah to follow the example of the Ethiopian eunuch. Wetin fit de hold them make they no baptize? And wetin fit help them handle this problems?

4-5. Which problem one young person wey e name na Avery and one young person wey her name na Hannah face?

⁴ They no dey sure about theirself. Avery na one young person wey dey 19 years, e papa and mama na Jehovah Witness. E papa na better elder wey de show good example and de do e work well for congregation. Even with this one, Avery no gree baptize. Why? E talk say: “I no think say I go fit dey good like my papa, and show good example.” Another thing be say, Avery no believe say e go fit handle any work wey e go get for congregation for future. E still talk say: “I de fear make they no tell me to pray for public, give talk, or organize brothers and sisters for field service.”

⁵ Hannah na one young person wey dey 18 years. She no dey sure about herself at all. Her papa and mama na Jehovah Witness. Even with that one, she no dey sure say she go fit live her life the way Jehovah want-am. Why? Because Hannah de feel say she dey useless. Sometimes, she de feel bad sotey she go decide to wound herself, and this one de make her condition worse. She talk say: “I no de tell anybody wetin I do, even my papa and mama no know. I de feel say Jehovah no go ever want make I be one of e servants, because of wetin I de do to myself.”

6. Wetin hold Vanessa make she no baptize?

⁶ Their friends de affect them. Vanessa na one young person wey dey 22 years. She talk say: “I be get one friend wey really good wey I don know for almost 10 years.” But this her friend no support her plan to baptize. This one really pain Vanessa well-well, she talk say: “E de hard me to make friend, and that time I fear say if I end the friendship, I no go fit get another tight friend.”

7. Wetin make Makayla de fear before, and why?

⁷ Them de fear say they go make mistake. Makayla na one young person wey dey 21 years. She dey 5 years when they disfellowship her brother. As Makayla de grow, she see say the thing wey her brother do really affect her papa and mama. She talk say: “That time, I de fear say if I baptize, I go make mistake and they go disfellowship me. And this one go still make my papa and mama sad.”

8. Wetin one young person wey e name na Miles de fear?

 ⁸ Them de fear say people go cause them trouble. Miles na one young person wey dey 22 years. E mama no de serve Jehovah, but e papa and e stepmother de serve Jehovah. Miles talk say: “I live with my mama for 18 years, and I de fear to tell my mama say I want baptize. I see the thing wey she do when my papa become Jehovah Witness. So I de fear say she go cause trouble for me.”

9. Wetin go fit happen when you learn how Jehovah get love and dey patient reach?

⁹ Adam and Eve choose say they no go serve Jehovah, because they no make their love for Jehovah strong. Even with that one, Jehovah still allow them to live for long time so that they go born children and decide how them go train their children. Na Adam and Eve decide say no be Jehovah go tell them wetin good and bad. The result of their decision make-am clear say they really foolish. Their first son kill e younger brother wey dey innocent. And as time de go, fight-fight and hatred come full everywhere. People for the whole world come de like only theirself, they no care about other people. (Gen. 4:8; 6:11-13) But for all Adam and Eve children wey want serve Jehovah, e don get how e go use save them. (John 6:38-40, 57, 58) As you de learn more about how Jehovah get love and dey patient reach, your love for Jehovah go fit grow more-more. This one go make you reject the bad example of Adam and Eve and dedicate yourself to Jehovah.

10. When you think deep about Psalm 19:7, how e fit help you serve Jehovah?

¹⁰ Continue to learn about Jehovah. The more you de learn about Jehovah, the more you go dey sure say you fit serve Jehovah well. Avery wey we first talk about, talk say: “I come dey sure about myself after I study and think deep about the promise wey dey Psalm 19:7.” (Read-am.) When Avery see how Jehovah do the promise wey dey that verse, e love for God strong more. Love no de only make us get  the mind say we fit serve God. But, e still de give us power to serve God and help us to comot hand from things wey God no like. Hannah wey we talk about for up talk say: “As I de do my personal Bible reading and study, I come see say when I wound myself, as e de pain me e de pain Jehovah too.” (1 Pet. 5:7) Hannah start to de ‘do wetin Bible talk.’ (Jas. 1:22) Wetin come be the result? Hannah talk say: “When I see say to obey Jehovah de really benefit me, this one make my love for Jehovah grow. Now I dey sure say Jehovah go always guide me when I need e help.” Hannah come fit stop the feeling wey she de get to de wound herself. She dedicate her life to Jehovah and she baptize.

11. Wetin Vanessa do to make good friends, and wetin we fit learn from this one?

¹¹ Choose your friends well. Vanessa wey we talk about before, come know say na that her friend make her never de serve Jehovah. So she end the friendship. But Vanessa still do other things. She try to make new friends for congregation. She talk say she benefit from the example of Noah and e family. She say: “Even though say na people wey no love Jehovah full everywhere that time, Noah and e family enjoy good friendship among theirself.” Vanessa start to pioneer after she baptize. She still talk say, “This one really help me to make good friends from my congregation and even other congregations.” You too fit make good friends if you keep yourself busy with the work wey Jehovah don give us to do.​—Matt. 24:14.

12. Which kind fear Adam and Eve no get, and wetin come be the result?

¹² Get good fear. Some kind fear good for us. For example, we need to fear to do anything wey go make Jehovah sad. (Ps. 111:10) If to say Adam and Eve get that kind fear, they for no disobey Jehovah. After they disobey Jehovah, their eyes open. This one mean say they come really know say they be sinners. Because they don know or understand their condition, shame start to catch them, and they cover their nakedness. Adam and Eve pass sin and death to their children.​—Gen. 3:7, 21.

13-14. (a) According to 1 Peter 3:21, why we no need to fear death too much? (b) Which reasons we get to love Jehovah?

 ¹³ Even as e good say we go fear to do anything wey go make Jehovah sad, e no good make we de fear death too much. Jehovah don arrange how we go take get everlasting life. If we sin and we really repent, Jehovah go forgive us because we get faith for the sacrifice of e Son. One of the ways wey dey important pass to show say we get faith na when we dedicate our life to God and baptize.​—Read 1 Peter 3:21.

¹⁴ We get many reason to love Jehovah. E de give us good things wey we de enjoy everyday, and e still de teach us the truth about himself and wetin e want. (John 8:31, 32) E don give us the Christian congregation to guide and support us. E de help us now to fit endure our problems. And e don give us hope say for future, we go live forever for condition wey single problem no dey. (Ps. 68:19; Rev. 21:3, 4) When we think about all the things wey Jehovah don do to show say e love us, e de move us to near Jehovah more-more. And when we love Jehovah, we go get the kind fear wey good. We go fear to do anything wey go make Jehovah sad, because we love Jehovah well-well.

15. Wetin help Makayla stop to fear say she go make mistake?

¹⁵ Makayla wey we talk about for up stop to de fear say she go make mistake, when she understand say Jehovah de forgive well-well. She talk say: “I come know say all of us no dey perfect and we go make mistake. But I come still understand say Jehovah love us, and e go forgive us because of the sacrifice of Jesus.” Makayla dedicate her life to Jehovah and baptize because she love Jehovah well-well.

16. Wetin help Miles stop to de fear say e mama go cause trouble?

¹⁶ Miles wey we talk about before be de fear say e mama go cause trouble if e talk say e want baptize. But e meet one circuit overseer for help, because the circuit overseer don face that kind problem before. Miles talk say: “The circuit overseer papa na Witness, but the mama no be Witness. So e help me think of wetin I fit tell my mama so that she go know say no be my papa de push me to baptize. Na me decide to do-am.” When Miles tell e mama, she no happy. After, Miles pack comot from the house, but e still do wetin e don decide. Miles still talk say: “As I de learn about the good things wey Jehovah don do for me, e really touch my heart. When I think deep about how Jesus give e life as sacrifice because of us, I come understand how Jehovah love me reach. And this one move me to dedicate myself to Jehovah and baptize.”

17. Which chance we get?

¹⁷ When Eve eat from that tree for garden of Eden, she reject her Father. When Adam join Eve eat the fruit, e show say e no  value all the good things wey e don receive from Jehovah. All of us get the chance to show say we no be like Adam and Eve. We value everything wey Jehovah don do for us. When we baptize, we de show say we really believe say na only Jehovah get the right to tell us wetin good and wetin bad. Na this one go show say we love and trust our Father.

18. Wetin go help you succeed as you de serve Jehovah?

¹⁸ After we don baptize, we need to live our life everyday the way Jehovah want-am, instead of the way we want. This one no be easy thing. But millions of people wey de serve Jehovah de live their life the way God want-am. You fit be like them if you continue to try understand Bible more, always de meet together with brothers and sisters, and dey ready to always tell people the things wey you don learn about Jehovah, the Father wey love you. (Heb. 10:24, 25) When you want decide anything, make you listen to the advice wey Jehovah de use Bible and e organization give you. (Isa. 30:21) Na that time everything wey you de do go succeed.​—Prov. 16:3, 20.

19. Wetin you need to always think about, and why?

¹⁹ Make you de always think about how you don benefit from all the advice wey Jehovah de use guide you. If you do like that, your love for God and the things wey e say make we follow for Bible go de grow. Then Satan no go fit use anything draw you comot from the service of Jehovah. Just imagine say you dey alive one thousand years from now. When you think back and remember as you decide to baptize, you go see say na the best decision wey you don ever make!