Bible talk say after Median people carry Joseph go Egypt, Jacob and e family pack from Canaan to Egypt. They start to live for one place for Egypt wey the name na Goshen. Goshen near the place wey River Nile divide enter Mediterranean sea. (Gen. 47:1, 6) Israel people start to plenty and ‘their number continue to over plenty.’ So Egypt people begin fear them and they force them to be slave.—Ex. 1:7-14.

Some people no believe this story wey Bible talk; they say e no happen. But, things dey to prove say people from family of Shem or Semites * don live as slave for Egypt before.

For example, some science people don dig some things from ground for place wey people for olden days live. This place dey north part of Egypt. Dr. John Bimson talk say they see things to show say 20 community or more than 20 community of Shem people be dey for that area for north part of Egypt. Apart from that one, one man wey e name na James K. Hoffmeier talk say from around 1800 to 1540 B.C., Egypt na really fine place for this Shem people to pack go live. This Shem people na from family of Jacob (west part of Asia). The man still talk say this time match the time of people like Abraham, Isaac, and Jacob and na the same time and condition wey book of Genesis talk about.

Another thing for south part of Egypt still prove say Israel people live for Egypt. This thing na about wetin dey inside one olden days paper (from around 2000 to 1600 B.C.E.). The name of slaves dey the paper. This slaves don work for one family for the south part of Egypt. Na Shem people de answer more than 40 of this names for the paper. The work wey this slaves, or servants, be de do na to cook, weave things like cloth, and other hard work. Hoffmeier talk say since na more than 40 Shem people work for only one family for this south part of Egypt (Thebaid), then their number for the whole Egypt go really plenty, especially for the area wey River Nile join Mediterranean sea.

One science man wey e name na David Rohl write say some of the names of the slaves for this list be like the names wey Bible mention. For example, some names for the paper resemble names like Issachar, Asher, and Shiphrah. (Ex. 1:3, 4, 15) Rohl talk say: “This one na better proof say Israel people be de live for Egypt as slaves.”

Dr. Bimson talk say: “The story wey Bible talk about the slaves for Egypt and say this slaves comot for Egypt, na true.”