1. Which problems servants of Jehovah fit face?

YOU de face serious problem? E fit be say person for congregation don do something wey really pain you. (Jas. 3:2) Or e fit be say your workmate or schoolmate de laugh you because you de serve Jehovah. (1 Pet. 4:3, 4) Or maybe your family people de try to stop you make you no de go meeting again, or make you stop to preach. (Matt. 10:35, 36) If the problem don really hard you, you fit feel say the best thing na to stop to serve Jehovah. But you fit dey sure say, no matter the kind problem wey you de face, Jehovah go give you the sense to handle the problem and the power to endure.

2. As e dey for Romans 15:4, how Bible fit help us when we read-am?

² Jehovah make sure say Bible get example of people wey no dey perfect, but they endure serious problems. Why? So that we go fit learn from their example. This one na the thing wey Jehovah direct apostle Paul to write. (Read Romans 15:4.) When we read about this people, their story fit encourage us and give us hope. But if we want gain from their story, we go do pass just to read Bible. We must allow Bible to change the way we de think and touch our heart. For example, wetin we fit do if we need direction about how we go handle one problem wey we de face? We fit do this four things: (1) Pray, (2) See yourself for the story, (3) Think deep, and (4) Use wetin you learn. We go talk about how to do each of this things. * Then we go use this style wey person fit use study Bible to learn the things wey happen to King David and apostle Paul.

3. Before you start to read Bible, wetin you suppose do, and why?

³ (1) Pray. Before you start to read Bible, beg Jehovah  make e help you see how you fit gain from the thing wey you want read. For example, if you de find advice about how to handle problem wey you de face, beg Jehovah make e help you see Bible verse wey fit guide you.​—Phil. 4:6, 7; Jas. 1:5.

4. Wetin fit help you make the story of the person wey you de read about dey real to you?

⁴ (2) See yourself for the story. Jehovah make us for way wey we go fit think about something like say we dey the place when the thing de happen. So that the story go dey real to you, try to think about wetin de happen and see yourself as the person wey you de read about. Try to see the things wey the person see and feel the way the person fit don feel.

5. Wetin e mean to think deep about something and how you fit do this one?

⁵ (3) Think deep. To think deep mean say you go sofri think about wetin you de read and about how the thing concern you. This one go help you see how things connect with each other, and you go understand the things wey you de read more. If you de read Bible and you no think deep about the things wey you de read, you go just be like person wey get ingredient wey e want use cook, but e no put all the ingredient for the food. The person no go enjoy the food. For the same way, when we no de think deep about the things wey we read for Bible, we no go fit connect them well. To help you think deep about wetin you read, you fit ask and answer this kind questions: ‘Wetin the main person wey the story talk about do to help e self? How Jehovah help this person? How I fit use the things wey I don learn so that they go fit help me endure problems?’

6. Why we need to use the thing wey we learn?

⁶ (4) Use wetin you learn. Jesus talk say if we no use the thing wey we learn, we just be like person wey build house ontop sand. E de work hard, but e de work for nothing. Why? Because when strong wind de blow with heavy rain and water de flow push the house, the house go fall. (Matt. 7:​24-27) For the same way, if we pray, we see ourself for the story, and we think deep about wetin we learn but we no use wetin we learn, we go don work hard for nothing. So when we face problems or people suffer us, our faith no go strong reach to help us endure the problem. But when we de study Bible and we use wetin we learn, we go make better decision, we go get more peace, and our faith go de strong more-more. (Isa. 48:​17, 18) Make we use the four ways wey we just talk about to see wetin we fit learn from something wey happen to King David.

7. Which story for Bible we go talk about now?

⁷ Any friend or family member don do wetin pain you reach your bone before? If na so, you go gain if you study about King David pikin wey e name na Absalom. Absalom do wetin really pain e papa David and e try to be king.​—2 Sam. 15:5-14, 31; 18:6-14.

8. Wetin you fit do make Jehovah help you?

⁸ (1) Pray. As the story dey your mind, tell Jehovah how you de feel about the way wey they don treat you. (Ps. 6:6-9) Make you tell Jehovah how you really de feel. Then beg Jehovah make e help you see wetin fit guide you as you de try to endure this serious problem.

9. Wetin happen between David and Absalom?

⁹ (2) See yourself for the story. Think about the things wey happen for the story and how they affect King David. So that  people go fit love Absalom wey be David pikin, Absalom work hard for many years. (2 Sam. 15:7) When Absalom feel say the correct time don reach, e send people wey be spy go the whole of Israel, so that they go make people to accept Absalom as their king. E even try to make Ahithophel, one of David tight friend and person wey de advice David, make e join dey against David. Absalom announce say e be king, and e try to catch and kill David. And that time, e fit be say David really dey sick. (Ps. 41:​1-9) David find out the plan wey Absalom get, and e run comot for Jerusalem. As time de go, the army wey Absalom get fight with the army wey David get. The army wey dey against David lose the fight, and Absalom die.

10. Wetin King David for don do?

¹⁰ After that one, think about how David go don feel as all this things de happen. E love Absalom and e trust Ahithophel. Even with that one, the two of them do wetin really pain David. The thing pain David no be small, and they even try to kill David. David for don think say e other friends don join Absalom too, and e for don stop to trust them. E for don think about only e self and try to run comot from the country by e self. Or, e for don really feel bad. But David no do any of this things. Instead, e handle this serious problem. Why e fit do this one?

11. Wetin David do when e face one serious problem?

¹¹ (3) Think deep. Which things you learn from this story wey fit guide you? Answer this question, “Wetin David do to help e self?” David no over fear sotey e rush make foolish decision. And e no worry sotey e no fit decide the thing wey e go do. Instead, e beg Jehovah for help. E still beg e friends for help. And e no waste time do the things wey e don decide. The truth be say, the thing wey happen really pain David, but this one no make David stop to trust people and allow hatred full e heart. E continue to trust Jehovah and e friends.

12. Wetin Jehovah do to help David?

¹² How Jehovah help David? If you do research, you go see say na Jehovah give David the power wey e need to endure this problem wey e face. (Ps. 3:​1-8; superscription) Jehovah bless the decision wey David make. And e support the friends wey no leave David when they fight to protect their king.

13. How you fit do like David if another person do something wey really pain you? (Matthew 18:15-17)

¹³ (4) Use wetin you learn. Ask yourself, ‘How I fit copy David?’ You go need to do something quick-quick to solve the problem. The situation go help you know whether you go need to do wetin Jesus talk for Matthew chapter 18 one by one or to allow wetin dey that chapter to guide you. (Read Matthew 18:​15-17.) But when you de vex, make you no rush decide the thing wey you want do. Make you pray to Jehovah make e give you heart wey dey calm and the sense wey you need to handle the matter. No stop to trust your friends. Instead, accept help from them. (Prov. 17:17) The number one important thing na say, make you follow the advice wey Jehovah de give you for Bible.​—Prov. 3:​5, 6.

14. Which condition fit make 2 Timothy 1:12-16 and 4:6-11, 17-22 encourage you when you read-am?

¹⁴ Your family members de give you trouble because you de serve Jehovah? Or you de live for country wey they ban some part  of our work or all our work? If na so, wetin dey 2 Timothy 1:​12-16 and 4:​6-11, 17-22 fit encourage you when you read-am. * Paul write wetin dey this Bible verse them when e dey for prison.

15. Wetin you fit beg Jehovah for?

¹⁵ (1) Pray. Before you read the Bible verse them, tell Jehovah about your problem and how the problem de make you feel. Tell Jehovah wetin the problem be. Then make you beg Jehovah to help you see how the story about wetin happen to Paul fit guide you, so that you go fit know the thing wey you go do.

16. Wetin happen to Paul?

¹⁶ (2) See yourself for the story. Think-am say you be Paul. They chain Paul for prison for Rome. They be don put Paul for prison, but this time Paul dey sure say they go kill-am. Some of the friends wey Paul get don abandon Paul and e tire.​—2 Tim. 1:15.

17. Wetin Paul for don do?

¹⁷ Paul fit don think about the way e life be before, and de feel say if to say no be the Christian life wey e de live, e for no enter prison. E for don vex for the men wey dey Asia wey abandon-am, and e for stop to trust e other friends. But Paul no do any of this things. Wetin make Paul continue to get full trust and hope?

18. Wetin Paul do about the problem wey e face?

¹⁸ (3) Think deep. Answer this question, “How Paul help e self?” Even when Paul know say e go soon die, e no forget say the important thing na to do wetin go praise Jehovah. And e continue to think about how e fit encourage other people. E show say e trust Jehovah as e de always pray. (2 Tim. 1:3) Even though say people abandon Paul, e no continue to think about them. Instead, Paul show say e really dey happy for the support and help wey e get from e friends for different ways. Apart from that one, Paul continue to study Bible. (2 Tim. 3:16, 17; 4:13) The number one important thing na say, e really dey sure say Jehovah and Jesus love-am. They no abandon Paul, and they go bless Paul for e faithful service.

19. How Jehovah help Paul?

¹⁹ Jehovah don already warn Paul say, e go endure suffer from people because e be Christian. (Acts 21:11-13) How Jehovah help Paul? Jehovah answer Paul prayer and e give Paul power after. (2 Tim. 4:17) God tell Paul say e go get the blessing wey e don really work hard to get. Jehovah still use the better friends wey Paul get to help Paul.

20. With wetin dey for Romans 8:38, 39, how you fit copy Paul?

²⁰ (4) Use wetin you learn. Ask yourself, ‘How I fit copy Paul?’ Like Paul, make we expect say people go suffer us because we de serve Jehovah. (Mark 10:29, 30) If we want continue to serve Jehovah well when we de face problems, make we continue to pray to Jehovah and de always study e Word. And we must always remember say, one thing wey important pass wey we fit do na to bring praise to Jehovah. We fit dey sure say Jehovah no go ever abandon us, and say nobody go fit do anything wey go make Jehovah stop to love us.​—Read Romans 8:38, 39; Heb. 13:5, 6.

21. Wetin help Aya and Hector to handle the problems wey they face?

²¹ No matter our condition, the example for Bible fit give us the power wey we need.  For example, one pioneer for Japan wey e name na Aya talk say, e get help from the story of Jonah. Because of this one, e no de fear to preach for open place again. Another example na one young brother for Indonesia wey e name na Hector. E papa and mama no de serve Jehovah. The example of Ruth help this brother to learn about Jehovah and serve-am.

22. Wetin fit help you to really benefit from Bible drama them or the different article under “Imitate Their Faith”?

²² Where you fit see examples for Bible wey go make you strong? Our video them, audio drama, and different article under “Imitate Their Faith” fit make the story for Bible to dey real for us. * Before you watch this videos, before you listen to the audio or read the story wey we don sofri do research about, make you beg Jehovah to help you see important lesson wey you fit use. See yourself as the person wey you de read about. Think deep about wetin this faithful servants of Jehovah do, and how Jehovah help them to handle their problems. Then see how you fit use the things wey you don learn for your situation. Thank Jehovah for the help wey e don de give you. And to show say you value this help, make you look for ways to encourage and support other people.

23. As e dey for Isaiah 41:10, 13, wetin Jehovah promise say e go do for us?

²³ Life for this world wey Satan de control fit really hard to handle. And sometimes, we no de know wetin we go do. (2 Tim. 3:1) But we no need to over worry or de fear. Jehovah know the things wey we de face. When we need help, e promise say e go hold us with e right hand wey dey strong. (Read Isaiah 41:10, 13.) We get full trust say Jehovah go help us. And Bible de give us the power wey we need to endure any problem.