1-2. Who fit help Bible student grow reach to baptize?

ONE sister for Fiji wey e name na Amy talk say: ‘When them de study Bible with me, I really like the things wey I de learn. I know say na the truth. But na until I start to spend time with brothers and sisters I begin change some things for my life and I baptize.” This one teach us one important thing wey be: Bible student get more chance to grow reach to baptize when other people for congregation de help the student.

² Each publisher fit help new ones become part of the congregation. (Eph. 4:16) One pioneer for Vanuatu wey e name na Leilani talk say: “People talk say, no be only one person de train pikin. I feel say this thing wey they talk still concern the work wey we de do to make disciples. No be only one person for congregation de help person accept the truth. Na everybody for congregation.” Na family members, friends, and teachers for school de join hand together to help pikin grow to be better person. Them de do this one when them de encourage the pikin and teach the pikin important things for life. For the same way, brothers and sisters for congregation fit advice, encourage, and show good example for Bible students. And this one go help them grow reach to baptize.​—Prov. 15:22.

3. Wetin you learn from the thing wey Ana, Dorin, and Leilani talk?

³ Why e good make the publisher wey get the Bible student de glad when other publishers for congregation de help the student? See wetin one special pioneer for Moldova wey e name na Ana talk. E say, “E really dey hard for one person to give Bible student all the help wey e need when e don start to grow.” One special pioneer wey e name na Dorin for that  same country talk say, “Many times, other publishers de talk something wey touch the student for heart, and na something wey I fit no ever think of.” Leilani talk another reason why we need to dey happy when other publishers de help our student. E talk say, “When the student feel the love and care from other brothers and sisters, this one go help the student understand say we really be Jehovah people.”​—John 13:35.

4. Wetin we go talk about for this article?

⁴ But, you fit think say, ‘How I fit help Bible student grow when no be me de study with the student?’ Make we talk about wetin we fit do when we follow person go study e student. And wetin we fit do if the student start to come meeting. We go still see how elders fit help Bible students grow reach to baptize.

5. Wetin you suppose do when you follow person go study with e Bible student?

⁵ For the study, na the Bible teacher get the main work to help the student understand Bible. If you follow person go study with e student, make you see yourself as e partner. Your work na to support the person. (Eccl. 4:9, 10) But wetin you fit do to give better support for the study?

6. When you want follow person go study with e student, how Proverbs 20:18 fit help you?

⁶ Prepare for the Bible study. Make you first ask the Bible teacher to tell you small thing about the Bible student. (Read Proverbs 20:18.) You fit ask the teacher say: “Wetin you know about the student? Which topic you want study with the student? Wetin you want make the student learn from this study? E get anything wey I suppose do or talk or wey I no suppose do or talk for the study? How I fit encourage the student to grow?” The truth be say, the teacher no go tell you the things wey other people no suppose know about the student. But, the things wey e go tell you fit help you. One missionary wey e name na Joy, de talk about this things with anybody wey e take go study with e Bible student. The sister talk say: “This kind discussion de help my partner to want help the student and to know wetin e go talk for the study.”

7. Why you need to prepare if you want follow person go study with e student?

⁷ If you go follow person go study with e student, e dey fine make you prepare the part wey they go study. (Ezra 7:10) Brother Dorin wey we talk about before, talk say: “I de really like-am when my partner prepare for the study. This one fit help my partner join for the study well.” Another thing na say, the student fit see say the two  of wuna prepare well and this one go show the student better example. Even if you no fit prepare for the study well, you fit still take some time to know the main point wey they want study.

8. How you fit make sure say your prayer for Bible study de make sense?

⁸ Prayer dey important for Bible study. So first think about wetin you go talk if the Bible teacher tell you say you go pray. If you do like that, this one fit make your prayer make more sense. (Ps. 141:2) Hanae for Japan still remember the prayer of one sister wey follow e Bible teacher come. E talk say: “I notice-am say e friendship with Jehovah dey tight, and I want be like the sister. I still feel the love when e mention my name for e prayer.”

9. As e dey for James 1:19, wetin you fit do to be better partner when you follow person go study with e student?

⁹ Support the teacher for the study. One special pioneer for Nigeria wey e name na Omamuyovbi, talk say: “Better partner de follow the study well. The partner de make fine comment but e no de talk too much, because e know say na the teacher de conduct the study.” So, when you suppose talk something, and wetin you suppose talk? (Prov. 25:11) Listen well when the teacher and the student de talk. (Read James 1:19.) Na that time you go dey ready to give your support for the right time. But you must think before you talk. For example, you no go want talk too much, you no go cut the teacher when e de explain something, or begin talk different topic. But when you talk small thing, give example, or ask question, you go fit help make the point wey them de discuss dey clear. Sometimes, you fit de feel say you no really get anything wey you want add for that topic. But if you thank the student and show say you care about the student, you go don do something to help the student grow.

10. How your experience fit help Bible student?

¹⁰ Talk your experience. If e dey okay, you fit just take small time tell the student how you learn the truth, how you handle one problem, or how you don see Jehovah hand for your life. (Ps. 78:4, 7) Your experience fit just be wetin the student need to hear. This one fit make the student faith dey strong, or encourage the student to continue to grow reach when e go baptize. And this one fit still show the student how to handle problem wey e de face. (1 Pet. 5:9) Gabriel for Brazil wey de serve as pioneer now, remember how e gain when e de study Bible. E talk say: “When I hear the experience of the brothers, I learn say Jehovah de see our problem. And if they fit handle-am, I fit handle my own too.”

11-12. Why e good make we welcome Bible student fine when they come meeting?

¹¹ For Bible student to study sotey e reach when e go baptize, e must always de go meeting and de gain from the meeting. (Heb. 10:24, 25) E fit be say na the teacher invite the student come e first meeting. When e come, all of us fit encourage the student make e continue to come Kingdom Hall. Which different ways we fit do this one?

¹² Welcome the student fine. (Rom. 15:7) If we welcome the student well as e come meeting and e feel the love, e fit want continue to come Kingdom Hall. Greet the student well, but no over do-am, and show the student to other brothers and sisters. Make you no feel say the student get all the care wey e need because the teacher fit never come meeting, or e fit dey busy de do other things for Kingdom Hall. Listen well to the student when e de talk and show say you care. Wetin fit be the result when you welcome the student well? See the experience of Dmitrii. E baptize some years ago, and e don de serve as ministerial servant. Hear wetin e talk about the first meeting wey e go, e say: “One brother notice-am say small fear dey my body as I de wait outside the Kingdom Hall, and e sofri follow me go inside. Plenty people come greet me. E really surprise me. I really like-am sotey e be me like say make them de do meeting everyday of the week. I never see something like this before for any place.”

13. How your good example fit help the Bible student?

¹³ Show better example. Your good example fit help the student dey sure say e don see the truth. (Matt. 5:16) Vitalii, wey be pioneer now for Moldova, talk say: “I see the way everybody for congregation de live their life, the way them de think, and behave. This one really make me dey sure say Jehovah Witness na the true religion.”

14. How your example fit help person to continue to do well?

¹⁴ Before the Bible student go fit grow reach to baptize, e go need to do the things wey e de learn. To do this one no de easy everytime. But if the student see how you don benefit as you do wetin Bible talk, this one fit move the student to want do like you. (1 Cor. 11:1) See the experience of Hanae wey we don talk about before, e talk say: “The brothers and sisters de really do the things wey I de learn. I see how I fit de encourage other people, de forgive, and de show love. Them de always talk good things about other people. This one move me to want be like them.”

15. How Proverbs 27:17 help us see why we need to make friend with Bible student as e continue to attend meeting?

 ¹⁵ Make friend with the student. As the student continue to come meeting, continue to show say you care. (Phil. 2:⁠4) Try to know more about the student. You fit thank the student for any change wey e de make for e life. And you fit still ask the student about e Bible study, e family, and e work. But make you dey careful so that you no go ask question wey go make the student feel bad. This kind discussion fit make wuna dey close. When you make the student your friend, you go help the student grow reach to baptize. (Read Proverbs 27:17.) Hanae na regular pioneer now. E remember when e first start to attend meeting, e talk say: “As I make friend with people for congregation, this one make me want de go meeting everytime. I de go even when I tire. I enjoy my new friends and the time wey we de spend together. This one help me stop to be friends with people wey no de worship Jehovah. E hungry me to dey tight with Jehovah and with the brothers and sisters. So because of this one, I decide say I go baptize.”

16. Which other thing you fit do to help the student dey happy and see say e be part of the congregation?

¹⁶ As the student continue to do well and make some change for e life, help the student to see say e be part of the congregation. You fit do this one when you get open hand and de invite people make they come to your house. (Heb. 13:2) Denis for Moldova remember when e be Bible student, e talk say: “Many times, brothers and sisters de invite me and my wife come their house to spend some time together and enjoy ourself. They tell us how Jehovah don help them, and that one encourage us. All those time wey we spend together make us dey sure say we want serve Jehovah. And this one still make us know say, if we continue to serve Jehovah, we go enjoy better life for Paradise.” When the student don be publisher, you fit invite the student make e join you for preaching. One publisher for Brazil wey e name na Diego talk say: “Many brothers invite me to follow them go preach. This one na fine way to know them well. As I continue to join them, I learn plenty things. And this one make me dey close to Jehovah and Jesus Christ.”

17. How elders fit help Bible students?

¹⁷ Make time for Bible students. Elders, when wuna show love and care to the student, this one go help the student grow reach to baptize. You fit make time to always talk to Bible students for meeting?  They go feel the love and care wey you get for them when you remember their name, especially when they start to make comment for meeting. You fit de always arrange your time so that you go fit bring out time to join publishers when they want go study with their Bible students? You fit help the student for the way you no expect. One pioneer for Nigeria wey e name na Jackie talk say: “Many students de surprise when they hear say na elder come with me to study with them. One Bible student talk say: ‘My pastor no fit ever do that one. Na only rich people e de visit, and na only if they give-am money!’” That student de attend meeting now.

18. How elders fit do the work wey God give them as e dey for Acts 20:28?

¹⁸ Train and encourage Bible teachers. Elders, wuna get important work to help publishers to sabi preach and teach Bible well. (Read Acts 20:28.) If person de shame to study with e Bible student for your present, you fit conduct the study. Jackie, wey we talk about before talk say: “Elders de always ask me about my Bible students. When I need help for the way I de study with any of my Bible student, them de give me advice wey go help me.” Elders fit really do plenty things to encourage publishers and help them as them de study with their students. (1 Thess. 5:11) Jackie still talk say: “I de like-am when elders encourage me and tell me say they value my hard work. This kind word de really sweet me. E just be like when person give you cold water for inside hot sun. Their fine encouragement de help me, and make me feel say I de do well with the way I de study with my Bible students. And this one de give me more joy.”​—Prov. 25:25.

19. Which joy all of us fit get?

¹⁹ Even if we no de study Bible with person now, how we fit still help person grow reach to baptize? We fit do this one when we prepare well and make fine comment to support the Bible teacher as e de study with e student. But we go dey careful make we no talk too much. We fit make friend with the student when they come Kingdom Hall, and try to be good examples for them. Elders fit encourage Bible students when they make time for them. And they fit encourage Bible teachers when them de thank them and de train them. We de really get joy to know say we don do something, no matter how small, to help person come love and serve our Papa Jehovah.