1. Why Jesus beg Jehovah to protect e disciples?

FOR the last night wey Jesus live for this earth, Jesus de think about all the problems wey e disciples go get. Because Jesus love e disciples, e beg e Father make e “protect them because of the wicked person.” (John 17:14, 15) Jesus know say after e go back to heaven, Satan the Devil go continue to fight anybody wey want serve Jehovah. So this one make-am clear say servants of Jehovah go need protection.

2. How we fit dey sure say Jehovah go answer our prayer?

² Jehovah answer Jesus prayer because e love e Son. If we do our best to make Jehovah happy, e go love us too and e go answer us when we pray make e help and protect us. Like better family head wey de care for e children, Jehovah go continue to love and care for e children. If Jehovah no do like that, this one go spoil e name.

3. Why we need Jehovah to protect us today?

³ We need Jehovah to protect us now pass any other time. God don throw Satan comot from heaven and Satan don de “over vex.” (Rev. 12:12) Satan don manage to make some people think say when they suffer us, them de “do God work.” (John 16:2) Other people wey no believe say God dey, de suffer us because we dey different from the world. No matter the reason why people de suffer us, we no de fear. Why? Because Bible talk say: “The Lord dey faithful, and e go make wuna strong and protect wuna from the wicked person.” (2 Thess. 3:3) How Jehovah de protect us? Make we talk about two ways.

4. As e dey for Ephesians 6:13-17, which things Jehovah don give us to protect us?

⁴ Jehovah don give us things wey we fit wear wey go protect us when Satan attack us. (Read Ephesians 6:13-17.) This things wey God don give us dey powerful and them de work well. But this things go fit protect us only if we continue to use all of them. Wetin each of this things mean? Make we talk about them one by one.

5. Wetin be the belt wey we need to tie, and why we need to tie this belt?

⁵ The belt mean the truth them for inside Bible. Why we need to tie this belt? Because Satan na “papa of lie.” (John 8:44) E don de lie for many-many years now and e don deceive “the whole world”! (Rev. 12:9) But the truth them for inside Bible de protect us make Devil no fit deceive us. How we de tie truth for waist like belt? We fit do this one when we de learn the truth about Jehovah, when we de worship Jehovah “with spirit and truth,” and when we de talk truth for everything.​—John 4:24; Eph. 4:25; Heb. 13:18.

6. Wetin be the iron wey we need to wear for chest, and why we need to wear this iron?

⁶ The iron wey soldier de wear for chest mean the righteous laws wey Jehovah don give us. Why we need to wear this iron? The iron wey soldier de use cover e chest de protect the soldier so that something no go chuk e heart. For the same way, righteousness de protect us so that the wicked things for this world no go spoil the kind person wey we be for inside. (Prov. 4:23) Jehovah want make we love and worship-am with all our heart. (Matt. 22:36, 37) Satan de try to make us love the things for this world wey e de give and wey Jehovah hate. Satan want make we stop to serve Jehovah with all our heart. (Jas. 4:4; 1 John 2:15, 16) And if this style no work, Satan go try to make us fear so that we go do something wey go make Jehovah vex.

7. How we de wear righteousness like iron wey soldier de use cover e chest?

⁷ We de wear righteousness like iron wey soldier de use cover e chest when we de accept the things wey Jehovah see as right and wrong, and when we de obey this things for our life. (Ps. 97:10) Some people fit de feel say the laws wey Jehovah de give us no de make us dey free. But if we stop to do the things wey Bible talk, we go be like soldier for war wey remove the iron wey e use cover e chest because e feel say the iron too heavy. This kind thing go really dey foolish. But if we love Jehovah, the things wey e command no go “hard to obey,” instead they go save our life.​—1 John 5:3.

8. Wetin e mean to ready our leg make we tell people the good news of peace?

⁸ Paul still talk say make our leg dey ready to tell people the good news of peace. This one mean say we go always dey ready to preach the good news about the Kingdom. When we tell other people the good news from Bible, this one de make our faith de strong more-more. E de really encourage us when we see how servants of Jehovah for the whole world de use any chance wey they see to preach, no matter the place wey them dey. For example, them de preach for workplace or for school, when them de do house to house or for business area, when they go market go buy something, when they visit their family people wey no de serve Jehovah or when them de talk to people wey they know, and even when they no fit comot for house for some time. If we fear sotey we stop to preach, we go be like soldier wey remove e sandal when e de  fight. This kind thing go make the soldier get wound for leg quick-quick. This one go make-am hard for the soldier to protect e self when enemies attack, and e no go fit obey the command from e master.

9. Why we need to carry the big shield of faith?

⁹ The big shield of faith mean the faith wey we get for Jehovah. We trust Jehovah say e go do all the things wey e don promise. This kind faith go help us “quench all the arrow” wey get fire “from the wicked one.” Why we need to carry this big shield? Na because e de protect us so that former Jehovah Witness wey de talk wicked lie about the organization no go fit deceive us with the things wey them de teach. The shield still de help us make we no tire when people de talk bad about the things wey we believe. If we no get faith, we no go get the power to obey Jehovah when people want make us stop to obey Jehovah. But our faith de protect us anytime wey we no gree do something wey Jehovah hate, whether na for work or for school. (1 Pet. 3:15) Our faith still de protect us anytime wey we no accept work wey go make us no serve Jehovah well, even if the work go give us more money. (Heb. 13:5, 6) And our faith de protect us anytime wey we continue to serve Jehovah well, even with the problem wey we de face from people.​—1 Thess. 2:2.

10. Wetin be the helmet wey go save us, and why we need to wear this helmet?

 ¹⁰ The helmet na the hope wey Jehovah give us. This hope go save us from death and e go be blessing for everybody wey do wetin Jehovah want. (1 Thess. 5:8; 1 Tim. 4:10; Titus 1:1, 2) Just as helmet de protect soldier head, the hope wey we get say God go give us life de protect the way we de think. How this one dey possible? This hope de make us continue to put our mind for the things wey God don promise us, and the hope de help us make we no allow our problems de over worry us. How we de wear this helmet? We de do this one when we continue to make sure say we de see things the way Jehovah de see things. For example, we de put our hope for God, no be for money or property.​—Ps. 26:2; 104:34; 1 Tim. 6:17.

11. Wetin be the sword of the spirit, and why we need to use-am?

¹¹ The sword of the spirit na Bible. The sword get the power to show anything wey be lie and to make people dey free from bad character and any teaching wey be lie. (2 Cor. 10:4, 5; 2 Tim. 3:16, 17; Heb. 4:12) We de learn to use the sword well as we de do our Bible study and from the training wey Jehovah’s organization de give us. (2 Tim. 2:15) Apart from this things wey Jehovah don give us wey we de wear, Jehovah don still give us another powerful thing wey go protect us. Wetin be that?

12. Which other thing we need, and why?

¹² Soldier wey get experience know say e no go fit fight plenty army by e self. E go need support from other soldiers. For the same way, we no go fit win our fight against Satan and e servants by ourself. We go need the support of our brothers and sisters. Jehovah don give us plenty soldiers wey go help us, and this soldiers na our “brothers for the whole world.”​—1 Pet. 2:17.

13. As e dey for Hebrews 10:24, 25, how our meeting de help us?

¹³ One way wey we de get support na when we de go meeting. (Read Hebrews 10:24, 25.) When the condition of things make us tire sometimes, our meeting fit encourage us. The comment wey our brothers and sisters de give from their heart de encourage us. The talk wey them de give from Bible and the different-different demonstration de give us power to continue to serve Jehovah. And when we de talk with our brothers and sisters before and after the meeting, this one de encourage us too. (1 Thess. 5:14) Apart from that one, our meeting de give us the chance to help other people and this one de make us happy. (Acts 20:35; Rom. 1:11, 12) E still get other ways wey our meeting de help us. Meeting de help us de make the way we de preach and teach de better pass before. For example, we de learn how to use our book them for inside our Teaching Toolbox well. So make you de prepare well before you go meeting. And when you dey meeting, make you de listen well. And after meeting, make you use the things wey you don learn. When you do this kind things, you go be “correct soldier of Christ Jesus.”​—2 Tim. 2:3.

14. Which other things we get to help us?

¹⁴ Plenty powerful angels still de support us. Think about wetin only one angel fit do! (Isa. 37:36) Now think about wetin plenty powerful angels go fit do. No demon or anybody go fit win the powerful army wey Jehovah get. Na Jehovah get power pass. So when Jehovah dey with us, we go always strong pass people wey dey against us no  matter how they plenty reach. (Judg. 6:16) This one na really true! Make that one always dey your mind anytime wey your workmate, schoolmate, or family member wey no de serve Jehovah talk or do something wey worry you. Remember say, no be only you dey for this fight. You de follow the direction wey Jehovah de give.

15. With wetin Isaiah 54:15, 17 talk, why e be say nobody go fit ever close our mouth make we no preach again?

¹⁵ This world wey Satan de control get plenty reasons to hate us. We no go ever support politics and join for war. We de tell people about the name of God. We de preach say na only the Kingdom of God fit bring peace, and we de obey the things wey God talk for Bible. We de show people say, the person wey de rule this world de talk wicked lie and na killer. (John 8:44) And we de tell people say God go soon destroy this world wey Satan de control. Even with this one, Satan and e servants no go fit close our mouth. We go continue to praise Jehovah with everything wey we get. No matter how Satan get power reach, e never fit stop the good news about the Kingdom make e no reach people for the whole world. This one dey possible only because Jehovah de protect us.​—Read Isaiah 54:​15, 17.

16. How Jehovah go save e people for great tribulation?

¹⁶ Wetin go soon happen for future? For great tribulation, Jehovah go save us for two wonderful ways. Number one, e go save e faithful servants when e go make the kings of the earth to destroy Babylon the Great, wey be all lie-lie religion together. (Rev. 17:16-18; 18:2, 4) Number two, e go save e people when e go destroy the remaining part of this world wey Satan de control for Armageddon.​—Rev. 7:9, 10; 16:14, 16.

17. How we go gain if we continue to hold Jehovah tight?

¹⁷ When we continue to hold Jehovah tight, Satan no go fit do us any bad thing wey go last forever. The truth be say, na Satan Jehovah go destroy forever. (Rom. 16:20) So make you wear all the things wey God don give you to fight, and make you continue to use all of them! No try to fight the fight by yourself. Make you support your brothers and sisters. And continue to follow the direction wey Jehovah de give. If you do like that, you go fit dey sure say your Papa for heaven wey love you go make you strong and e go protect you.​—Isa. 41:10.