1. With wetin Matthew 24:9 talk, why e no suppose surprise us if the world hate us?

JEHOVAH make us to love people and to want make people love us too. So when person hate us, this one fit really pain us and even make us de fear. For example, one sister for Europe wey e name na Georgina talk say: “When I dey 14 years my mama hate me because I de serve Jehovah. I just feel like person wey they reject and I start to think say, maybe I no be better person.” * One brother wey e name na Danylo write say: “When soldier hit me, insult me, and threaten me because I be Jehovah Witness, fear really catch me. And this one just make me feel say, I dey useless.” E de really pain us when people hate us like this, but e no de surprise us. Jesus don already talk-am say people go hate us.​—Read Matthew 24:9.

2-3. Wetin make the world hate people wey de follow Jesus?

² The world hate people wey de follow Jesus. Why? Because like Jesus, we “no be part of the world.” (John 15:17-19) Because of this one, even though say we de respect government people, we no de support politics, we no de salute flag, or de sing national anthem. We de worship only Jehovah. We de support God as the person wey get right to rule everybody, even though say Satan and e servants de reject this right wey God get. (Gen. 3:1-5, 15) We de preach say na the Kingdom of God be the only hope wey people get, and say the Kingdom go soon destroy everybody wey no support the Kingdom. (Dan. 2:44; Rev. 19:19-21) This message na good news for humble people, but na bad news for wicked people.​—Ps. 37:​10, 11.

 ³ The world still hate us because we de obey the laws wey God give for Bible. The things wey God see as good and bad really dey different from the things wey people for the world de see as good and bad. For example, plenty people today no feel say e dey bad to do the kind bad things about sex wey make God destroy people for Sodom and Gomorrah! (Jude 7) Because we de obey wetin Bible talk about this kind things, plenty people de laugh us and de feel say our own too much.​—1 Pet. 4:3, 4.

4. Which different-different character fit give us power when people hate us?

⁴ Wetin fit help us endure when people hate us and de insult us? We need to get strong faith say Jehovah go help us. Like shield, our faith fit “quench all the arrow” wey get fire “from the wicked one.” (Eph. 6:16) But no be only faith we need. We still need love. Why? Because love “no de quick vex.” No matter wetin happen, love no de tire for person. And even when something pain-am, e de “endure everything.” (1 Cor. 13:4-7, 13) So make we see how love for Jehovah, love for our brothers and sisters, and even love for our enemies fit help us endure when people hate us.

5. Wetin Jesus fit do because e love e Father?

⁵ For the night before Jesus enemy kill Jesus, e tell e faithful disciples say: “I love the Father, [so] I de do just as the Father don command me to do.” (John 14:31) Jesus fit endure the problems wey e face because e love Jehovah. The love wey we get for Jehovah fit help us too.

6. As e dey for Romans 5:3-5, how servants of Jehovah de feel as them de endure the way people for the world hate them?

⁶ Na the love wey servants of Jehovah get for Jehovah de always help them to endure suffer from people. For example, when the high court for Jew people command the apostles make they stop to preach, their love for God move them to ‘obey God as ruler, no be people.’ (Acts 5:29; 1 John 5:3) This kind strong love de help our brothers and sisters to dey faithful when harsh and powerful government de suffer them. When the world hate us, instead of us to allow the situation to make us tire, make we see-am as honor to endure.​—Acts 5:41; read Romans 5:3-5.

7. Wetin we go do when our family members de give us trouble?

⁷ E fit be say, one of the things wey hard pass to endure na when our own family members de give us trouble because we de serve Jehovah. When they see say we want learn about Jehovah, some of them fit de think say people don deceive us. Some of them fit still de think say we don de craze. (Compare Mark 3:21.) They fit even de treat us for bad way. Make we no surprise if they treat us like that. Jesus talk say person go get enemies “from e own family.” (Matt. 10:36) The truth be say, no matter how our family people de see us, we no go treat them as our enemies. But as our love for Jehovah de grow, na so our love for people go de grow. (Matt. 22:37-39) But we no go ever stop to obey the law and advice for Bible just to make other people happy.

8-9. Wetin help one sister to hold God tight even with the serious problem?

⁸ Georgina wey we talk about before, fit hold Jehovah tight even with the serious problem wey e face from e mama. Georgina talk say: “Na me and my mama start to study Bible with Jehovah Witness people. But after six months when I want go meeting, e character change quick-quick. I find  out say my mama don de talk with former Jehovah Witness people wey de talk wicked lie about the organization, and so e de use that lie de talk to me. E go still insult me, draw my hair, press my neck, and troway my book them. When I reach 15 years, I baptize. Because my mama want make I stop to serve Jehovah, e carry me go live for house wey other young people de live. Some of them de take hard drugs and de do other bad-bad things. This kind problem de really hard to endure because e de come from person wey suppose love you and care for you.”

⁹ Wetin help Georgina to endure? E talk say: “The day wey my mama start to give me trouble, I just de finish the whole Bible. I come really believe more-more say I don see the truth, and my friendship with Jehovah come really tight. I always pray to God, and e hear me. When I de live for that house wey plenty young people dey, one sister invite me come e house, and we study Bible together. For the whole time, the brothers and sisters for Kingdom Hall de make me strong. They make me see say I be part of their family. E dey clear to me say Jehovah strong pass the people wey de give us trouble, no matter who they be.”

10. Wetin we fit trust say our God Jehovah go always do?

¹⁰ Apostle Paul write for Bible say nothing fit “separate us from the love wey God get for us through Christ Jesus our Lord.” (Rom. 8:38, 39) Even though say we fit suffer for some time, Jehovah go always dey our side to comfort us and make us strong. And as Georgina experience show, Jehovah still de use our dear brothers and sisters for congregation de help us.

11. How the love wey Jesus talk about for John 15:12, 13 help e disciples? Give one example.

¹¹ For the night before Jesus die, e remind e disciples say make they love each other. (Read John 15:12, 13.) Jesus know say when they get this kind love wey e talk about, this one go help them dey as one and they go fit endure when the world hate them. Make we talk about the example of the congregation for Thessalonica. Na from the time wey the congregation start, people start to suffer the brothers and sisters. Even with that one, the brothers and sisters continue to serve Jehovah well, they endure, and they no stop to  show love. This one na really fine example. (1 Thess. 1:3, 6, 7) Paul encourage them make they continue to show love, and make they even “do-am more-more.” (1 Thess. 4:9, 10) Love go make them fit comfort people wey life don tire, and support people wey dey weak. (1 Thess. 5:14) They do wetin Paul talk, because for e second letter wey e write one year after, e tell them say: “The love wey wuna get for each other de strong more-more.” (2 Thess. 1:3-5) Their love help them endure problem and suffer from people.

12. When them de fight war for one country, how the brothers and sisters for there show love for each other?

¹² Make we talk about the experience of Danylo wey we mention before. When war spread reach the town wey Danylo and e wife dey, they continue to go meeting, de do their best for the preaching work, and de share food wey they get with their brothers and sisters. Then one day, soldiers with gun come meet Danylo. Danylo talk say: “They tell me say make I stop to be Jehovah Witness. But when I no gree, they beat me, they do like say they want shoot me, but they shoot the gun pass my head. Before they comot, they threaten me say they go come back come rape my wife. But quick-quick, our brothers put us for train go another town. I no go ever forget the love wey this dear brothers show. And when we reach there, the brothers for there give us food, and help me find work and house. Because of this one, we fit give other brothers and sisters place to stay as they run comot from the area wey the war dey.” This kind story show us say, the love wey we get for each other fit help us endure when people hate us.

13. How holy spirit de help us endure as we de serve Jehovah even when people hate us?

¹³ Jesus tell e disciples say make they love their enemies. (Matt. 5:44, 45) This one dey easy? E no easy at all! But e dey possible if God use e holy spirit help us. Some of the character wey holy spirit de help us get na love, to dey patient, to dey kind for heart, to dey gentle, and to get self-control. (Gal. 5:22, 23) This character them de help us to endure when people hate us. Plenty people don stop to give us trouble because their husband, wife, pikin, or neighbor wey be Jehovah Witness don show them this fine-fine character. And plenty of them don  even be our brothers and sisters. So if e de hard you to love people wey hate you because you de serve Jehovah, make you pray for holy spirit. (Luke 11:13) And make you get full trust say the way God de do things go always be the best.​—Prov. 3:5-7.

14-15. How Romans 12:​17-21 help Sister Yasmeen to show love to e husband, even as e de get trouble from e husband?

¹⁴ Make we talk about the example of Yasmeen for Middle East. When this sister become Jehovah Witness, the husband try to stop this sister make e no serve Jehovah again because e think say they don deceive e wife. E insult Sister Yasmeen and e tell family people, one leader for religion, and one witch doctor make they threaten Yasmeen and talk say Yasmeen want scatter e own family. When brothers and sisters de do meeting, Sister Yasmeen husband even shout for the brothers and insult them! Na so-so cry Sister Yasmeen de cry because of the suffer wey e de face.

¹⁵ For the Kingdom Hall, the brothers and sisters de encourage and comfort Sister Yasmeen. The elders encourage Sister Yasmeen make e do wetin dey Romans 12:17-21. (Read-am.) The sister talk say: “This one hard me, but I beg Jehovah make e help me. And I do my best to do the thing wey Bible talk. So when my husband troway dirty for kitchen, I sofri clean the place. When e insult me, I answer for kind way. And when e de sick, I take care of-am.”

16-17. Wetin Sister Yasmeen example teach you?

¹⁶ Yasmeen get better result as e show love to e husband. E talk say: “My husband begin trust me more-more because e know say I go always talk truth. E start to listen to me with respect when I de talk about religion and e agree to make peace for house. Now e de encourage me make I de go congregation meeting. Now our marriage don better pass before and peace dey for house. The hope wey I get be say, one day, my husband go accept the truth and e go join me de serve Jehovah.”

¹⁷ Sister Yasmeen example show say no matter wetin happen, love no de tire for people, e “get hope for everything,” and e de “endure everything.” (1 Cor. 13:4, 7) Hatred fit get power and de cause pain, but love get power pass-am by far. Love fit change person. And when we continue to show love, this one de make Jehovah dey happy. But even if people wey de give us trouble continue to hate us, we fit still dey happy. How this one fit happen?

18. Why we fit dey happy when people hate us?

¹⁸ Jesus talk say: “Wuna go dey happy when people hate wuna.” (Luke 6:22) No be say we want-am make people hate us. We no de enjoy-am when people de suffer us because of wetin we believe. So why we fit dey happy when people hate us? Make we see three reasons. Number one, God like-am when we endure. (1 Pet. 4:13, 14) Number two, our faith go strong more and better pass before. (1 Pet. 1:7) And number three, we go live forever. This one na really better gain.​—Rom. 2:6, 7.

19. Why the apostles dey happy after they flog them?

¹⁹ Small time after God bring Jesus back to life, the apostles experience the happiness wey God talk about. After they flog the disciples and command them make they stop to preach, they happy. Why? Bible talk say: “God give them the chance to suffer for the name of Jesus.” (Acts 5:40-42) The love wey they get for their Master strong pass the fear wey they get for their enemies wey hate them. And they show their love as “they no stop” to preach the good news. Plenty of our brothers and sisters today de continue to serve Jehovah well even when things no easy. They know say Jehovah no go forget their work and the love wey they show for e name.​—Heb. 6:10.

20. Wetin we go talk about for the next article?

²⁰ People go hate us as long as this wicked world still dey. (John 15:19) But we no need to fear. As we go see for the next article, when people hold Jehovah tight, e go make them “strong and protect” them. (2 Thess. 3:3) So make we continue to love Jehovah, our brothers and sisters, and even our enemies. When we follow this advice, we go continue to dey as one and our faith go strong. Apart from that one, we go bring praise to Jehovah and we go show say love get power pass hatred by far!