Some brothers and sisters de use technology to send message or talk with their family members and other brothers and sisters. But person wey dey tight with Jehovah go always remember the advice for Proverbs 27:12. E talk say: “Person wey get sense de see danger and hide e self, but person wey no get experience de continue to go and suffer the result.”

We know say Jehovah want protect us. So we no go make friends with people wey want divide congregation, people wey they disfellowship, or wey de teach lie. (Rom. 16:17; 1 Cor. 5:11; 2 John 10, 11) Some people for congregation fit no de obey wetin Bible talk. (2 Tim. 2:20, 21) Make we remember that one when we de choose friend. But to choose friend fit no dey easy when we de use program or app for computer or phone de send or receive message.

To choose our friends well really dey important especially when we dey for big group wey them de talk with text message. Some brothers and sisters don join big groups before and e bring them problem. How brother or sister fit dey careful if the people for the group wey e dey, plenty reach hundreds or thousands? You no go fit know all the people for the group well, and whether their faith strong or e no strong. Psalm 26:4 talk say: “I no de make friend with people wey de deceive other people. And I no de near people wey de hide who they be.” This one show say e better make we de send message to only people wey we know.

Even if the group no big, we need to dey careful of how much time we de spend de send message for there, and wetin the people de talk about for there. Make we no think say we go need to chat with other people no matter wetin them de talk about, or no matter how much time we go spend to do-am. Paul warn Timothy about people wey de “gossip and put mouth for other people matter wey no concern them.” (1 Tim. 5:13) Today, e dey possible to use computer or phone do that kind thing.

No mature Christian go listen or talk bad things about another brother or sister. E no go talk things wey other people no suppose know about the brother or sister, or even listen to things like that. (Ps. 15:3; Prov. 20:19) And e no go add salt and pepper or blow the matter to make-am worse pass as e dey, or de talk things wey e no dey sure about. (Eph. 4:25) For our jw.org website and the program wey we de enjoy every month for JW Broadcasting^®, we get plenty things from Bible and other information wey we fit trust.

Some Jehovah Witness de use this kind way to sell, buy, and advertise their business or even give people work. That one na business, e no get anything to do with our worship. Christians wey no get ‘love for money’ no go ever fall for the temptation to use their brothers and sisters do business.​—Heb. 13:5.

When our brothers and sisters need help, or things like heavy wind or rain scatter their property, we suppose use apps for phone or computer send message to other brothers and sisters and beg them for money? We love our brothers and sisters and we care about them. So we de always help and encourage them. (Jas. 2:15, 16) But, when we form big messaging group to help our brothers and sisters, this one fit scatter the better arrangement wey branch office or congregation don make. (1 Tim. 5:3, 4, 9, 10, 16) And nobody among us go want make other people think say e get special assignment to take care of our brothers and sisters.

Our main concern na to do wetin go bring glory to God. (1 Cor. 10:31) So when you de think whether you go use any program for phone or computer wey them de use send message, or other kind of technology, make you think about the dangers wey fit dey and dey careful.