1. Wetin be the main thing wey de affect the kind person wey we be?

 WHETHER we don baptize just for some days or e don reach many years, all of us want be the kind person wey Jehovah love. To be that kind person, we need to control the way we de think. Why? Na because the main thing wey de affect the kind person wey we be na the way we de think. If we de always think about how to do the things wey our body want, we go de talk and de do bad things. (Eph. 4:17-19) But, if we de think about good things, this one fit help us to talk and do things for way wey our Papa Jehovah go like.—Gal. 5:16.

2. Which questions we go talk about for this article?

² As we don talk for the article before this one, we no go fit stop every bad thing make e no enter our mind. But we fit decide say we no go do this kind things wey de enter our mind. Before person baptize, e need to stop to talk and do things for way wey Jehovah hate. Na this one be the number one thing wey dey important pass if we want remove the old character. But to really make Jehovah glad, we must still obey the command wey be: “Make wuna wear the new character like cloth.” (Col. 3:10) For this article, we go answer this questions: Wetin be “the new character”? How we fit wear the new character and no remove-am?

3. With wetin Galatians 5:22, 23 talk, wetin be “the new character,” and how person de wear-am like cloth?

³ Person wey get “the new character” de do like Jehovah. When person wear the new character like cloth, the person go show the different-different character wey holy spirit de help  person get. E go allow holy spirit to affect the way e de think, the way e de feel, and the things wey e de do. (Read Galatians 5:22, 23.) For example, e love Jehovah and E people. (Matt. 22:36-39) This kind person no de stop to get joy even when e de endure problems. (Jas. 1:2-4) E de make peace with people. (Matt. 5:9) E dey patient and kind for the way e de do things with people. (Col. 3:13) E really like good thing and e de do-am. (Luke 6:35) The things wey e de do de show say e get strong faith for e Papa for heaven. (Jas. 2:18) When people provoke this kind person, e de continue to dey gentle for heart, and e de show say e get self-control when e face temptation.—1 Cor. 9:25, 27; Titus 3:2.

4. For us to wear the new character, we go fit get the character them wey Galatians 5:22, 23 talk about one by one? Explain.

⁴ For us to wear the new character, we need to get all the character wey Galatians 5:22, 23 and other Bible verse them talk about. * This character them no be like different-different cloth wey we de wear one by one. The truth be say, plenty of this character them connect with other ones. For example, if you really love your neighbor, you go dey patient and kind to the person. And if you really dey good, you must dey gentle for heart and show say you de control yourself.

5. Wetin e mean to “get the mind of Christ,” and why we suppose study about the life of Jesus? (1 Corinthians 2:16)

⁵ Read 1 Corinthians 2:16. For us to wear the new character, we need to “get the mind of Christ.” This one mean say we must learn how Jesus de think and then do like Jesus. Jesus show the different-different character wey the holy spirit de help person get, for complete way. Like mirror wey de show person well, Jesus show the different-different character wey Jehovah get well. (Heb. 1:3) The more we de think like Jesus, the more we go de do like Jesus and the more we go succeed for how we de show the kind person wey e be.—Phil. 2:5.

6. Wetin we suppose remember as we de try to wear the new character?

⁶ E really dey possible for us to follow the example wey Jesus show? We fit de think say: ‘Jesus dey perfect. I no go ever fit be like Jesus for complete way!’ If na so you de feel,  make you remember this things. Number one, they make you to be like Jehovah and Jesus. So you fit choose to do like them, and you go fit succeed for some ways. (Gen. 1:26) Number two, the power wey strong pass for heaven and earth na the power wey God de use holy spirit de give. The holy spirit fit help you do things wey you no go fit ever do with your own power. Number three, Jehovah no expect say now, you go fit show for complete way all the character wey the spirit de help person get. True-true, our Papa Jehovah wey love us go give 1,000 years to people wey their hope na to live forever for earth, for them to dey perfect. (Rev. 20:1-3) The thing wey Jehovah want make we do now, na to try our best and trust say e go help us.

7. Wetin we go talk about now?

⁷ Wetin be some ways wey we fit do like Jesus? We go talk small about four part for the character wey holy spirit de produce. For each of the part, we go see wetin we fit learn from the way Jesus show this fine-fine character. And we go talk about some questions wey fit help us check how we don grow reach for the way we de wear the new character.

8. How Jesus show love?

⁸ Because Jesus get deep love for Jehovah, e do things for e Papa and for us. (John 14:31; 15:13) Jesus show how e love people reach for the way e live e life when e dey this earth. Even when some people de give Jesus trouble, e de show love and de feel for people everyday. One important way wey e show love for people na to teach them about God Kingdom. (Luke 4:43, 44) Jesus still show say the love wey e get for God and for people, no be love wey de think about only e self. We know this one because e accept to suffer and die for the hand of sinners. Because of this thing wey e do, all of us get the hope to live forever.

9. How we fit de show love like Jesus?

⁹ We give our life to Jehovah and baptize because we love our Papa for heaven. So, like Jesus, we suppose show say we love Jehovah for the way we de treat people. Apostle John write for Bible say: “The person wey no love e brother, wey e don see, no fit love God, wey e never see.” (1 John 4:20) We fit ask ourself say: ‘I don work to get strong love for people? I de show say I de feel for people even when they talk to me for way wey I no like? Love de move me to use my time and the things wey I get to help people learn about Jehovah? I dey ready to do this one even when plenty people no like wetin I de do, or when them de give me trouble? I fit look for ways to spend more time de help people become disciples?’—Eph. 5:15, 16.

10. Which things Jesus do to show say e de make peace?

¹⁰ Jesus make peace with people. When people treat Jesus for bad way, e no do them back. But apart from that one, e make peace and e encourage people make they settle their quarrel with other people. For example, e teach them say they must make peace with their brother if they want make Jehovah accept their worship. (Matt. 5:9, 23, 24) And many times, e help the apostles make they stop to argue about who dey important pass among them.—Luke 9:46-48; 22:24-27.

11. How we fit be the kind person wey de make peace?

¹¹ To make peace no be only say we no go de cause problem. We go do pass that one. We need to do everything to make peace with people and encourage our brothers and sisters to settle any problem wey they get. (Phil. 4:2, 3; Jas. 3:17, 18) We fit ask ourself this questions: ‘Wetin I dey ready to do even if no  be wetin I want, so that I go fit make peace with people? When brother or sister do wetin vex me, I de keep the matter for mind? I de wait for the person to first make peace, or I de try to make peace with the person even if I feel say na the person cause the problem? When e dey okay, I de encourage people wey de quarrel with each other to make peace?’

12. How Jesus show say e dey kind?

¹² Jesus dey kind. (Matt. 11:28-30) E show say e dey kind as e dey gentle and sometimes, e change wetin e get for mind to do even when the condition hard. For example, when one Phoenician woman beg Jesus to heal e pikin, Jesus no first do wetin the woman talk. But when the woman show say e get strong faith, Jesus show say e dey kind as e heal the pikin. (Matt. 15:22-28) Even though say Jesus dey kind, e still give people correction when they need-am. Sometimes, e show say e dey kind when e give strong correction to people wey e love. For example, when Peter try to make Jesus weak so that Jesus no go do the thing wey Jehovah get for mind, e correct Peter for front of other disciples. (Mark 8:32, 33) E no do this one to disgrace Peter, but na to train Peter and warn the other disciples make they no cross their boundary. Na true say Peter go don feel somehow because of the correction, but e gain from the correction.

13. How we fit really dey kind?

¹³ To show say you really dey kind to people wey you love, you fit need to correct them sometimes. When you do like that, make the thing wey you go talk come from Bible. This one go show say you de do like Jesus. Make you dey gentle. Get the belief say they want do the correct thing. And trust say because of the advice wey you give to show say you care, people wey love Jehovah and wey love you go do well. Ask yourself this question them: ‘I get the heart to talk something when I see say the person wey I love de do wetin no good? If I need to give advice or correction, I de talk for harsh way or for kind way? Wetin de move me to give advice? I de give the advice because I no like wetin the person de do or I want help the person?’

14. How Jesus show say e dey good?

¹⁴ Jesus no only know good thing, e still do good thing. Jesus love e Papa, so e de always do the correct thing with correct reason. If person really dey good, this one go show for the things wey e de do for people. We fit show this character when we de do things to help people. No be just to know the correct thing wey we go do, we must do the correct thing and do-am with the correct reason. Person fit ask say, ‘E dey possible to do the correct thing with the wrong reason?’ Yes, e dey possible. For example, Jesus talk about people wey give poor people gifts. But this people make sure say other people de see them and praise them. Even though say this things wey they do dey good, Jehovah no like-am.—Matt. 6:1-4.

15. How we fit really dey good?

¹⁵ We fit really dey good only if the reasons wey de make us do the correct thing no be because we de think about ourself. So you fit ask yourself say: ‘Na true say I know the correct thing to do, but I de do-am? Wetin de move me to do good things?’

16. Wetin we suppose de do everyday, and why?

¹⁶ Make we no ever think say when we don baptize, we don wear the new character finish  and we no go need to maintain-am again. The new character be like new cloth wey we need to keep well make e no spoil. One way wey we fit do this one, na to find ways everyday wey we fit show the different-different character wey God de use e spirit give. Why? Because Jehovah na God wey de make things happen, and e de use e spirit work. (Gen. 1:2) So, the different-different part of the fruit wey holy spirit de produce go fit move us to do things, and e must move us. For example, the disciple wey e name na James write for Bible say: “Faith wey no get work don die.” (Jas. 2:26) No so e still be with all the other character wey God de use e spirit de help us get. Everytime wey we show say we get the different-different character, we de show say the spirit de work for our body.

17. How we suppose do anytime wey we no show say we get the different-different character wey the spirit de produce?

¹⁷ Sometimes, even servants of Jehovah wey don baptize for many years, fit no show the different-different character wey the spirit de produce. But the important thing be say, we de try to show this character them. Think about this example. If your best cloth tear, you go just troway-am? No. You go sofri fix the part wey don spoil, if na wetin dey possible. And after that one, you go dey careful for the way you de use the cloth. For the same way, if sometimes you no dey kind, patient, or you no show love to person, make you no allow this one make you tire. You go tell the person sorry from your heart, so that you go fit fix the better friendship wey you get with the person. And you go make up your mind to do well next time.

18. Which thing we fit really dey sure of?

¹⁸ We really dey happy for the example wey Jesus show us! The more we de think like Jesus, the more e go dey easy for us to do like Jesus. The more we de do like Jesus, the more the new character go de size us well. For this topic, we don discuss only four character wey God de use e spirit help us get. E good make you spend time de study about the other character them wey the spirit de produce, and think whether you de really show this character them well. You go see list of topics about this character them for Research Guide for Jehovah’s Witnesses under “Christian Life,” and then check “Fruitage of the Spirit.” You fit really dey sure say if you try to wear the new character and you no pull-am, Jehovah go help you.