1-2. Wetin go make God accept our worship?

 WETIN de come your mind when you hear the word “worship”? Maybe wetin de come your mind na the picture of one humble brother wey kneel down near e bed and de pray to Jehovah with all e heart. Or maybe you de think about one happy family wey de really enjoy their Bible study.

² The people wey we talk about for this two examples de do things to worship Jehovah. Jehovah go accept their worship? E go accept their worship if they do-am the way e want, and they show love and respect. We love Jehovah no be small. We know say na Jehovah we suppose worship. And we want do this one for the best way.

3. Wetin we go talk about for this article?

³ For this article, we go talk about the kind worship wey Jehovah accept for Bible time, and talk about eight ways wey Jehovah want make we worship-am today. As we de do this one, we fit de think about how each of us fit de make the way we de worship Jehovah de better. We go still talk about why to worship Jehovah for the correct way de make us happy.

4. Before Christ come this earth, how servants of God that time de show their love and respect for Jehovah?

⁴ Before Christ come this earth, faithful men like Abel, Noah, Abraham, and Job show their respect and love for Jehovah. How they do-am? They do this one as they obey God, get faith for God, and do sacrifice for God. Bible no talk about everything wey they suppose do to worship God that  time. But e dey clear say they do their best to worship Jehovah, and Jehovah accept their worship. After, Jehovah use Moses to give Israel people e Law. The way Jehovah want make they worship-am dey inside the laws wey e give them.

5. How Jehovah want make people de worship-am after Jesus die and come back to life?

⁵ After Jesus die and come back to life, Jehovah no expect e servants to still de follow the Law wey e use Moses give Israel people. (Rom. 10:4) Christians need to follow one new law wey be “the law of Christ.” (Gal. 6:2) They fit do this one when they follow the example of Jesus and the things wey e teach. No be when they cram plenty-plenty things wey they need to do and the things wey they no need to do. Today too, Christians de do their best to follow Christ so that they go fit do wetin Jehovah want and dey happy.—Matt. 11:29.

6. How we fit gain from this article?

⁶ As we go talk about the different-different ways wey we de worship Jehovah, ask yourself say, ‘Wetin I don do to make this different-different ways wey I de worship Jehovah de better?’ You fit still ask say, ‘I fit make the way I de worship Jehovah de better?’ You suppose dey happy with the things wey you de do now, but you still want beg Jehovah to help you see things wey you fit do to make the way you de worship-am better.

7. How Jehovah de see the prayer wey we de pray from our heart?

⁷ We de worship Jehovah when we pray to-am. Bible talk say our prayers be like the incense wey them de sofri prepare to give for tabernacle and after, for temple. (Ps. 141:2) That incense de bring out scent wey de make God glad. For the same way, when we pray with all our heart, this one de make God “glad,” even though say na simple words we use. (Prov. 15:8; Deut. 33:10) When we de show say we love Jehovah and thank-am for the things wey e de do for us, we get good reasons to believe say Jehovah like-am. Jehovah want hear the things wey de worry us, things wey we de hope for, and things wey we want. Before you pray to Jehovah, e go good make you sofri think about the things wey you want talk for the prayer. If you do this one, you go give the best “incense” wey you fit give to your Papa for heaven.

8. Which better chance we get to praise God?

⁸ We de worship Jehovah when we de praise-am. (Ps. 34:1) We de praise Jehovah when we tell people about how we love the fine-fine character wey e get and the things wey e de do. We go get many good things to talk about Jehovah when we show say we like the good things wey e de do for us. We go get plenty reasons to praise Jehovah when we think about all the better things wey e don do for us. The preaching work de give us better chance to ‘praise God. This one na fruit wey our mouth de produce as sacrifice.’ (Heb. 13:15) Just as we go sofri think well about the things wey we want tell Jehovah for prayer before we pray, na so we go still sofri think well about the things wey we want tell the people wey we want preach to. We want make our “praise” be our best. Na this one de make us de talk from our heart when we de preach to people.

9. Like Israel people for Bible time, how we de gain when we meet together? Give your own example.

⁹ We de worship Jehovah when we de go  meeting. They tell Israel people for Bible time say: “Three times every year, make all the men come meet Jehovah your God for the place wey e choose.” (Deut. 16:16) That time, they go need to leave their house and their farm, and nobody go protect-am for them. But Jehovah promise them say: “Nobody go want take your land when you de go up to see the face of Jehovah your God.” (Ex. 34:24) Because Israel people trust Jehovah with all their heart, they attend the festivals wey them de do every year. Because of this one, Jehovah bless them for many ways. For example, they learn more about God Law, they think about all the good things wey God de do for them, and they enjoy as them dey together with other people wey love Jehovah. (Deut. 16:15) Today, we still de gain like them when we do everything wey we fit do to attend meeting. And think about how Jehovah de glad when we prepare to give better answer for meeting even though say na short answer we give!

10. Why we fit talk say to sing song na one important way wey we de worship Jehovah?

¹⁰ We de worship Jehovah when we de join sing song. (Ps. 28:7) To sing song na one important way wey Israel people worship Jehovah. King David choose 288 Levites to sing for temple. (1 Chron. 25:1, 6-8) Today, we fit show our love for God when we de sing song to praise God. The number one important thing no be how our voice be. Think about this example: When we de talk, “all of us de make mistake many times,” but that one no de make us stop to talk for congregation or for preaching. (Jas. 3:2) For the same way, make we no de worry about how our voice be when we de sing, and allow this one make us no de sing song to praise Jehovah.

11. As e dey for Psalm 48:13, why we suppose de bring out time to study Bible together as family?

¹¹ We de worship Jehovah when we de study Bible and teach our children about Jehovah. Israel people no de work for Sabbath day. Them de use that day to make their friendship with Jehovah de strong more. (Ex. 31:16, 17) The ones wey hold Jehovah tight among them teach their children about Jehovah and the good things wey e de do. Today too, we must bring out time to read and study Bible. This na one way wey we de worship Jehovah, and this one de help us near Jehovah more. (Ps. 73:28) And when we de study Bible together as family, we fit help our children to get tight friendship with Jehovah our Papa for heaven wey love us.—Read Psalm 48:13.

12. The people wey make the things wey dey inside the tabernacle, wetin we learn from how Jehovah see the work wey they do?

¹² We de worship Jehovah when we de build and maintain the buildings wey we de use for worship. Bible talk say, the work wey they do to build the tabernacle and the things wey dey inside na “holy work.” (Ex. 36:1, 4) Today too, Jehovah de see the work wey we de do to build Kingdom Halls and other buildings wey we de use worship Jehovah, as part of our worship. Some brothers and sisters de spend plenty time de do this kind work. We really dey happy for this important work wey this brothers and sisters de do. The truth be say, they still de join for the preaching work. Some of them fit even want be pioneer. As this brothers and sisters de try their best to be pioneers, elders for congregation fit show say them de support the building work if they no de waste time to make them pioneers when they qualify. Whether we sabi  build or we no sabi build, all of us fit join hand to maintain the buildings wey we de use worship Jehovah and make them dey clean.

13. How we suppose de feel about the contribution wey we de make to support the Kingdom work?

¹³ We de worship Jehovah when we de support the Kingdom work with our contribution. For Bible time, Israel people no suppose come meet Jehovah with empty hand. (Deut. 16:16) They suppose bring something as their power reach. As they do like that, they show say they really de glad for all the things wey Jehovah de do for them. How we fit show our love for Jehovah and show say we dey happy for everything wey e de do for us? One way wey we fit do this one na when we de use our money to support our congregation and the worldwide work as our power reach. Apostle Paul talk-am like this say: “If person ready to give, e go really good make e give according to wetin e get, no be wetin e no get.” (2 Cor. 8:4, 12) Jehovah de really glad for anything wey we fit give no matter how e small reach.—Mark 12:42-44; 2 Cor. 9:7.

14. As e dey for Proverbs 19:17, how Jehovah de see the help wey we de give our brothers and sisters wey need help?

¹⁴ We de worship Jehovah when we de help our brothers and sisters wey need help. Jehovah promise say e go bless Israel people wey help poor people. (Deut. 15:7, 10) The truth be say, anytime wey we help any brother or sister wey need help, this one just be like gift wey we give Jehovah and na so e de see-am. (Read Proverbs 19:17.) For example, when Christians for Philippi send gifts to Paul for prison, Paul call the gift “better sacrifice, the one wey God really like.” (Phil. 4:18) Think about the people for your congregation and ask yourself say, ‘Anybody dey wey I fit help?’ Jehovah de glad when e see us de use our time, power, the things wey we sabi do, and the things wey we get to help the people wey need help. Jehovah de see-am as part of our worship.—Jas. 1:27.

15. We need to spend time and work hard to worship God for the correct way, but why this one no too hard?

¹⁵ We need to spend time and work hard if we want worship God for the correct way. But this one no too hard. (1 John 5:3) Why we talk so? We de worship Jehovah because we love-am. Just think about pikin wey want give e papa something. E fit spend plenty time to draw picture for e papa. The pikin no de regret the time wey e spend for the thing wey e draw for e papa. E love e papa, and e dey happy to give e papa the gift. For the same way, because of the love wey we get for Jehovah, we dey happy to use our time and power to worship-am.

16. As e dey for Hebrews 6:10, how Jehovah de feel about wetin each of us fit do to make-am happy?

¹⁶ Better papa and mama no de expect to receive the same gift from all their children. They know say all their children no be the same, and the things wey they fit do no be the same. For the same way, our Papa for heaven know wetin each of us fit do. E fit be say you fit do more things pass plenty people wey you know and love. Or e fit be say you no fit do reach the things wey other people de do, maybe because of your age, your health, or the things wey you de do for your family. Make you no allow this one make you dey sad. (Gal. 6:4) Jehovah no go forget your work. As long as say you de give Jehovah your best and  you de do-am with correct reason, this one go make Jehovah happy. (Read Hebrews 6:10.) Jehovah even know the things wey you for like to do. E want make you dey happy with the thing wey you fit give-am as your power reach.

17. (a) If e de hard us to worship God for some ways, wetin we fit do? (b) How one of the things wey you see for the box wey the topic na “ Add to Your Joy” don help you?

¹⁷ What if e de hard us to do some of the things wey we just talk about, like to study Bible or to preach? We go fit see say the more we de do this things, the more we de enjoy-am, and we go even gain more. We fit talk say our worship be like to do one type of exercise, or to learn how to use one instrument wey them de use play music. If we no de do-am everytime, we fit no sabi-am well. But, wetin fit happen if we decide to do-am everyday? We fit start to spend just small time de do-am. But as time de go, we fit begin spend more time de do-am. When we de see the things wey we de gain from our hard work, e fit de hungry us to spend more time de do-am and really enjoy-am. Na so e still be with the way we de worship Jehovah.

18. Wetin be the number one important thing wey we fit do, and wetin we go enjoy if we do-am?

¹⁸ To do our best to worship Jehovah na the number one important thing wey we fit do for our life. If we do this one, we go enjoy better life wey go make us happy and we go get the hope to worship Jehovah forever. (Prov. 10:22) We don already get peace of mind because we know say Jehovah de help e servants when them de face problem. (Isa. 41:9, 10) True-true, we get good reasons to dey happy as we de worship our Papa wey love us. Na Jehovah ‘deserve the honor and the praise’ from everything wey e make!—Rev. 4:11.