1. Wetin plenty people de see when them come our meeting for their first time? (Still check the picture.)

 JUST think-am say one husband and wife come our meeting for Kingdom Hall for their first time. Them really happy for the fine way brothers and sisters welcome them and the way brothers and sisters de show love for each other. As them de go house after the meeting, the wife tell e husband say, ‘Jehovah Witness People really dey different from other people wey we don see before and I really enjoy their meeting.’

2. Why some people don stop to worship Jehovah?

² The love wey brothers and sisters get for congregation really dey special. The truth be say Jehovah Witness People no dey perfect. (1 John 1:8) So the more we know our brothers and sisters, the more we go de see their mistake. (Rom. 3:23) E really pain us to see say some brothers and sisters don stop to worship Jehovah because of wetin person for congregation do them.

3. Wetin go help people know true Christians? (John 13:34, 35)

³ Look the Bible verse wey the topic for this article come from again. (Read John 13:34, 35.) Wetin go help people  know true Christians? Na love, no be say them go dey perfect. Remember say Jesus no talk for that verse say: ‘Na this one go make wuna know say wuna be my disciples.’ But e talk say: “Na this one go make everybody know say wuna be my disciples.” So wetin Jesus de talk be say, no be only e disciples go see the kind love wey dey among them, but even people wey no de worship Jehovah go see-am and e go make them know say them be true Christians.

4. Which questions some people fit ask to know who be true Christians?

⁴ Some people wey no be Jehovah Witness fit de ask theirself say: ‘How love de help us know true Christians? How Jesus show say e love e apostles? How we fit copy Jesus example today? Servants of Jehovah still need to think about the answer to this questions. This one go help us love our brothers more especially when them do wetin vex us.—Eph. 5:2.

5. Wetin Jesus mean for John 15:12, 13?

⁵ Jesus make-am clear say true Christians go get special love for each other. (Read John 15:12, 13.) Remember say Jesus command them say: “Make wuna love each other the way I love wuna.” Wetin this one mean? Jesus explain say e mean say we go love our brothers and sisters pass the way we love ourself sotey we ready to die for them. b

6. How Bible show say love really dey important?

⁶ Bible teach us say love really dey important. For example, some of the Bible verse wey people like pass na: “God na love.” (1 John 4:8) “You must love your neighbor as yourself.” (Matt. 22:39) “Love de cover plenty sin.” (1 Pet. 4:8) “Love no de ever fail.” (1 Cor. 13:8) This Bible verse them  and other ones make-am clear say e dey important to show love.

7. Why Satan no fit ever make people for lie-lie religion get real love for each other?

⁷ Plenty people de ask say: ‘How I fit know the true religion? All religion de talk say na the correct thing them de teach, but all of them de teach different-different thing about God.’ Satan don form plenty lie-lie religion, so this one de make-am hard for people to know the true religion. But e no fit ever make people for the whole world for the lie-lie religions wey e don form, to love each other. Na only Jehovah fit do-am. We know this one because real love come from Jehovah. So na only people wey get Jehovah spirit and wey Jehovah de bless, fit get real love for each other. (1 John 4:7) Na this one make Jesus talk say na only true Christians go show real love for each other.

8-9. How the love wey Jehovah Witness People de show each other, don affect many people?

⁸ Just as Jesus talk before, many people don know which people be true Christians, because of the love wey them de show each other. For example, one brother wey e name na Ian talk about the first convention wey e attend, for one stadium wey near e house. E don first go watch some game for the stadium some months before e attend that convention. E talk say: “The way the people wey I meet for the convention de do things really different from the people wey I see for the stadium when I go watch game. The people for the convention dress well, get respect, and their children de behave well. I still see say everybody dey calm and them no de put eye for wetin no be their own. Na this kind life I really want live. I no remember any of the talk wey them give that day, but I no go ever forget their better character.” c This one be like that because of the real love wey we get for each other. Because we love our brothers and sisters, we de respect them and treat them well.

⁹ This kind thing still happen to one brother wey e name na John, the first time wey e go meeting. E talk say: “The way them de treat each other like friends really sweet me and e just be like say them dey perfect. The kind love wey I see for there make me believe say I don see the true religion.” d This examples and other ones de show say na Jehovah Witness People be true Christians.

10. Which chance we get to show say we really love our brothers? (Still check footnote.)

¹⁰ As we don talk before, our brothers and sisters no dey perfect. Sometimes, them go talk or do wetin go make us vex. e (Jas. 3:2) When this kind thing happen, na chance to show say we really love them. We go show this one for the way we go talk and wetin we go do. Wetin we fit learn from Jesus example when person make us vex?—John 13:15.

11. Which bad character James and John show say they get? (Still check the picture.)

¹¹ Jesus no expect e apostles to dey perfect. But e help them change some of their character, so that them go fit make Jehovah happy. One time, two of Jesus apostles wey be James and John tell their mama to  help them beg Jesus to give them important position for E Kingdom. (Matt. 20:20, 21) Wetin James and John do show say them dey proud and them want position wey go make them dey important pass other people.—Prov. 16:18.

12. Na only James and John show say them get some character wey they need to change? Explain.

¹² That day, no be only James and John show say them get some character wey them need to change. Bible tell us wetin the other apostles do. E talk say: “When the other ten disciples hear about-am, them really vex for the two brothers.” (Matt. 20:24) E fit be say James and John and the other apostles quarrel because of this matter. The other apostles fit don tell James and John something like this: ‘Who wuna think say wuna be self wey wuna go de ask say make them give wuna important position for the Kingdom? Wuna think say na wuna be the only people wey don work hard with Jesus? Even we reach to get important position like wuna!’ No matter wetin them talk and do that day, them forget say them suppose show love and treat each other well all time.

13. Wetin Jesus do when e apostles quarrel about who dey important pass among them? (Matthew 20:25-28)

¹³ When this thing happen, wetin Jesus do? E no vex for them. E no talk say e go leave them go look for apostles wey better pass them, people wey humble pass them and wey  go always show say they love each other. Instead, Jesus sofri correct them because e know say them want do wetin correct. (Read Matthew 20:25-28.) E continue to treat them well and love them even though say this one no be the first or last time wey them quarrel about who dey important pass among them.—Mark 9:34; Luke 22:24.

14. Which kind thing them de teach people for the area wey Jesus apostles grow?

¹⁴ Jesus know say the way people de do things for where the apostles grow, de affect them. (John 2:24, 25) For the area wey them grow, leaders for Jew people religion de teach people say person only dey important if e get high position. (Matt. 23:6; compare the video The Front Seats in the Synagogue for study note wey dey Matthew 23:6.) This people wey de lead for Jew people religion be de think say them better pass other people. f (Luke 18:9-12) Jesus understand say this kind thinking fit don affect the way e apostles de see theirself and other people. (Prov. 19:11) Jesus no expect say e disciples no go ever make mistake and when them make mistake, e de sofri help them. Jesus know say e apostles get good mind. So e sofri teach them how to dey humble and how to show love to other people more, instead of to de try to get high position.

15. Wetin we fit learn from the story of James and John and the other apostles?

¹⁵ We fit learn plenty things from the story of James and John and the other apostles. E no good as James and John say make Jesus give them important position for the Kingdom. Even wetin the other apostles do no good as them allow wetin James and John do make them quarrel. But Jesus show all of them love and treat them well. Wetin this one teach us? Wetin matter no be only wetin people do wey make us vex, but wetin we do when them do wetin make us vex still matter. Wetin fit help us do the correct thing? When our brother or sister do wetin make us vex, make we ask ourself say: ‘Why wetin e do really vex me like this? E de show say I get some character wey I need to change? The person wey make me vex get problem wey e de face? Even if wetin e do reach to make me vex, I fit just forgive-am and forget about the matter?’ When we show say we love our brothers and sisters, we de show say we be true Christians.

16. Which other thing we fit learn from Jesus example?

¹⁶ Jesus example still teach us say make we de try understand our brothers and sisters. (Prov. 20:5) The truth be say Jesus fit know wetin dey person mind, but we no fit. But we fit dey patient with our brothers and sisters when them do wetin make us vex. (Eph. 4:1, 2; 1 Pet. 3:8) This one go dey easy for us to do if we try know more about them. Make we see one example.

17. When one circuit overseer try know one brother more, how e help the circuit overseer?

¹⁷ One circuit overseer wey de serve for East Africa remember one brother for one of the congregation wey e serve for there. E first think say the brother no dey kind. Wetin the circuit overseer do? E talk say: “Instead for me to run from-am, I decide to know-am more.” When the circuit overseer spend time  with the brother, this one help-am know how the brother grow up, and how this one affect the way e de treat people. The circuit overseer still talk say: “When I see how the brother don work hard to change even though say e no easy for-am, and how e don change reach to fit treat people well, e make me like the brother more. This one come make us be good friends.” True-true, when we try to understand our brothers and sisters, e go easy for us to show them love.

18. Which questions we fit ask ourself if our brother or sister make us vex? (Proverbs 26:20)

¹⁸ Sometimes, we fit think say we need to talk with the brother or sister wey make us vex. But before we talk with the person, make we first ask ourself this questions: ‘I really understand wetin happen?’ (Prov. 18:13) ‘E do-am by mistake?’ (Eccl. 7:20) ‘I don make this kind mistake before?’ (Eccl. 7:21, 22) ‘If I go talk with-am, e go cause more problem?’ (Read Proverbs 26:20.) When we take time think about this questions, we fit see say e go better make we forget about the matter because of the love wey we get for the brother or sister.

19. Wetin you don make up your mind to continue to do?

¹⁹ Jehovah Witness People don show say na them be true Christians as them de show love to each other. And when each of us show love to our brothers and sisters wey make us vex and forgive them, we de show say we be true Christian. When we de show love like this, e fit help other people know say we dey the true religion and join us de worship Jehovah wey be God of love. Make we make up our mind to continue to show the kind love wey go help people know say na we be true Christians.