1-2. If you still get some things wey you need to correct before you fit baptize, why you no suppose let-am tire you? (Check the picture for front cover.)

 IF E dey your mind to baptize, na better thing you de plan to do. You think say you don ready to baptize now? If you believe say you don ready, and the elders see say you don really ready, no let anything stop you to baptize for the next assembly or convention. Because if you baptize, plenty blessing de wait for you as you continue to worship Jehovah.

² But what if somebody don tell you say somethings still dey wey you need to do before you go fit baptize? Or what if na you see-am by yourself? If na so e be, make you no let-am tire you. You go fit do your best to correct wetin you need to correct, so that you go fit baptize, whether you don old or you dey young.

3. Wetin the man from Ethiopia tell Philip, and which question that one fit make us ask? (Acts 8:36, 38)

³ Read Acts 8:36, 38. One man wey de work for the palace of Ethiopia kingdom, ask Philip say: “Wetin de hold me make I no baptize?” E dey the man mind to baptize, but e don really ready?

4. Wetin show say the Ethiopia man want learn more?

⁴ The Ethiopia man “de come back from Jerusalem where e go worship” Jehovah. (Acts 8:27) E fit be say e don join Jew  people religion. E dey clear say e don learn about Jehovah from the part of Bible wey them use Hebrew language write. But even with this one, e still want learn more. Wetin the man de do when Philip meet-am for road? E de read one of the scroll wey prophet Isaiah write. (Acts 8:28) Wetin dey inside that scroll na deep truth from God Word. The man no rest after e don learn the simple things from Bible, e still want learn more.

5. Wetin the Ethiopia man do with wetin e learn?

⁵ The man get high position for the palace of Queen Candace for Ethiopia. In fact, na the man “de care for all e property.” (Acts 8:27) So the man get plenty work wey e de do. But even with this one, e still use e time de worship Jehovah. E no just learn about God, e still de do wetin e learn. Na this one make-am travel from Ethiopia to Jerusalem, so that e go fit worship Jehovah for the temple wey dey there. This one no be small journey! So e go don spend time and plenty money to fit go Jerusalem, but e no allow this one make-am no worship Jehovah.

6-7. Wetin the Ethiopia man do so that e love for Jehovah go continue to grow?

⁶ The Ethiopia man learn new things from Philip. One of them na about who the Messiah be. (Acts 8:34, 35) E really touch the man when e learn say Jesus die for all of us. Wetin e do after e don learn all this things? Well, e for easy for-am to decide say e want continue to worship God for Jew people religion. But because of e love for Jehovah and Jesus, e decide to baptize and become Jesus disciple. As Philip see say the man don ready to baptize, e baptize-am.

⁷ If you copy the example of the Ethiopia man, e go help you ready to fit baptize. Just like the Ethiopia man, you go fit still talk say, “Wetin de hold me make I no baptize?” Make we talk about three things wey e do and how you fit copy e example. (1) E continue to learn, (2) e do wetin e learn, and (3) e continue to make e love for God grow.

8. Wetin John 17:3 talk say you need to do?

⁸ Read John 17:⁠3. Na wetin Jesus talk for this verse make you start to study Bible? Na wetin make many of us start to study Bible. But that same verse still tell us say make we continue to learn about God. We no go ever stop to “know . . . the only true God.” (Eccl. 3:11) So we go continue to learn about God forever and ever. The more we de learn about Jehovah, the more we go be e tight friend.—Ps. 73:⁠28.

9. Wetin we need to do after we don learn the simple things wey dey inside Bible?

⁹ The truth be say na simple things about Jehovah we first learn. For the letter wey apostle Paul write to the Hebrew Christians, e talk say the things wey we first learn, na “simple things.” Apostle Paul no mean say this “first things” no dey important. Na this one make-am compare wetin we first learn to milk wey de help small pikin grow. (Heb. 5:12; 6:⁠1) Apostle Paul advice all Christian say make them no stop for the simple things, but make them continue to learn deep truth wey dey inside Bible. E de hungry you to learn this deep truth? E dey your mind to continue to grow, and continue to learn about Jehovah and the things wey e get for mind for us?

10. Why some people no de fit study?

¹⁰ For many of us, e de hard us to study. What about you? For your school, them teach you how to study well? You de enjoy to study and learn plenty things when you study? Or you don see-am say to study de hard you? No be only you de feel like that. But make you know say Jehovah go fit help you. Jehovah dey perfect and na e be the best Teacher wey you fit ever get.

11. How Jehovah de show say na e be our “Teacher Wey High Pass”?

¹¹ Jehovah talk say na e be “your Teacher Wey High Pass.” (Isa. 30:20, 21) Na good Teacher wey dey patient, kind, and wey understand our condition. Na the good side of e students e de put eye. (Ps. 130:⁠3) And e no de tell us make we do pass where our power reach. Remember say one of the better gift wey e don give you na your brain wey you de use learn. (Ps. 139:14) God make us to want learn. Jehovah want make we continue to learn forever and enjoy-am. So e dey important make e ‘de hungry’ us now to de learn the truth from Bible. (1 Pet. 2:⁠2) Get better plan to de read and study Bible, and make you no miss-am. (Josh. 1:⁠8) Jehovah go help you enjoy to de read, study, and learn more about the kind God wey e be.

12. Why e dey important make we study about Jesus life for this earth and about e preaching work?

¹² Always take time think about the way Jesus live e life and about e preaching work. E dey important make we do our best to follow Jesus example so that we go fit worship Jehovah well for this hard time. (1 Pet. 2:21) Jesus no hide the truth from e disciples when e de tell them about the problem wey them go face for this wicked world. (Luke 14:27, 28) But Jesus know say e disciples go fit succeed to hold Jehovah tight. (John 16:33) So make you study about the kind life wey Jesus live for this earth and get plan to copy e example every day.

13. Wetin you need to continue to beg Jehovah, and why?

¹³ No be only to know wetin Bible de teach you need. Wetin you learn get value if e help you learn more about Jehovah, love-am, and put faith for-am. (1 Cor. 8:1-3) As you continue to de learn, make you de beg Jehovah to help you get more faith. (Luke 17:⁠5) E go answer the prayer and help you get more faith. When you learn the correct thing about God, e go help you get real faith. This faith, go help you do the next important thing.—Jas. 2:⁠26.

14. Wetin apostle Peter talk wey show say e dey important to do wetin we de learn? (Still check the picture.)

¹⁴ Apostle Peter talk say e really dey important for us to continue to do wetin we de  learn. Na the story of Noah e use talk about this one. Jehovah tell Noah say E go use heavy rain destroy wicked people that time. No be just to know say God want destroy wicked people save Noah and e family. Notice say Peter talk about the time before the rain start to fall, when “Noah de build [the] ark.” (1 Pet. 3:20) As Noah and e family build the ark, e mean say them do wetin them learn. (Heb. 11:⁠7) Peter talk say wetin Noah do, be like baptism, e write say: “Baptism be like this one, and e still de save [you].” (1 Pet. 3:21) So we fit talk say wetin you de do now to fit baptize na the same thing wey Noah and e family do to fit build the ark wey save them. Which things you need to do so that you go ready to baptize?

15. How we fit show say we really feel bad for all our sin?

¹⁵ One important thing wey we go do first na to really feel bad for all our sin. (Acts 2:37, 38) This one go help us change. You don stop to de do things wey Jehovah no want, like sex wey no clean for God eye, to de smoke, to de talk bad word or curse person? (1 Cor. 6:9, 10; 2 Cor. 7:1; Eph. 4:29) If you never stop them, continue to do your best so that you go fit change. Tell the person wey de study Bible with you or the elders for congregation make them help you. If you still de stay with your papa and mama, beg them say make them help you know how to stop any bad character wey fit make you no baptize.

16. Which things we go de do if we want always worship Jehovah?

¹⁶ De do things wey go show say the worship of Jehovah really dey important to you. Some of this things na to de go meeting, de answer question and do assignment. (Heb. 10:24, 25) And when the elders say you fit de follow the congregation go preach, make you add that one join the important things wey you go de do as you de worship Jehovah. The more you de go preach, the more you go de enjoy-am. (2 Tim. 4:⁠5) If you still de live with your papa and mama, ask yourself this question: ‘Na my papa and mama de tell me to go meeting and preaching? Or na me de decide-am by myself?’ If na you de decide  this things by yourself, this one na way to thank Jehovah and show your love and faith for-am. This na wetin we de do to show say we “hold God tight,” and we de see them as gift wey we de give Jehovah. (2 Pet. 3:11; Heb. 13:15) Everything wey we give Jehovah from our heart de make-am happy. (Compare 2 Corinthians 9:⁠7.) We de worship Jehovah like this because e de make us happy to give-am our best.

17-18. Which important thing fit help you reach to baptize, and why? (Proverbs 3:3-6)

¹⁷ As you de do your best to fit baptize, you go face some problems. Some people go laugh you because you don start to worship Jehovah, some go dey against you and some go even suffer you. (2 Tim. 3:12) As you de do your best to stop the bad characters wey you get, sometimes, you fit make mistake do them again. If this one happen, e fit tire you and make you feel say you no fit ever stop the bad character. But wetin fit help you make you no tire? Na your love for Jehovah.

¹⁸ Your love for Jehovah na the best thing wey you get. (Read Proverbs 3:3-6.) Strong love for Jehovah go help you face any problems wey come as you de worship Jehovah. And e go help you continue to worship Jehovah even when you de face problem. Plenty times, Bible talk say Jehovah love for e servants no de fail. This one mean say Jehovah no de ever stop to love e servants or leave them. (Ps. 100:⁠5) Jehovah make you to get the kind character wey e get. (Gen. 1:26) So how you fit show this kind love wey Jehovah get?

19. Wetin go help you continue to thank Jehovah more-more for the things wey e don do for you?

¹⁹ The first thing na to de thank Jehovah. (1 Thess. 5:18) Ask yourself everyday say, ‘Wetin Jehovah don do for me wey show say e love me?’ Then, make sure say you pray to-am to thank-am and mention the things wey e don do for you. This things wey show say Jehovah love you, see-am say na you e do-am for, na the same way apostle Paul de see Jehovah love. (Read Galatians 2:20.) Ask yourself say, ‘I want show Jehovah say I love-am as e don show say e love me?’ Your love for Jehovah go help you continue to hold Jehovah tight when you face temptation  and problem. And you go continue to worship Jehovah well and de show everyday say you love-am.

20. How you fit give your life to Jehovah, and why e dey important?

²⁰ As your love for Jehovah continue to de grow, e go move you to pray one important prayer to Jehovah say you want give your life to-am. Remember say when you give your life to Jehovah, you don be e own forever. This one mean say you don promise Jehovah say you go worship-am whether things good or bad for you. And you no need to make the promise again. So to give Jehovah your life, na serious thing. You go make plenty decision for your life, and some of them go really good, but to give Jehovah your life na the best decision wey you go ever make. (Ps. 50:14) Satan go like to make you do wetin go make Jehovah vex so that you no go fit worship Jehovah well again. No allow Satan succeed! (Job 27:⁠5) Your strong love for Jehovah go help you continue to worship-am forever, and continue to be e tight friend.

21. Why we talk say baptism na the beginning, no be the end?

²¹ After you don give your life to Jehovah, tell the elders for your congregation say you go like to baptize. But always remember say baptism na the beginning, no be the end. Baptism go give you the chance to worship Jehovah forever. So continue to do wetin go make your love for Jehovah strong now. Get plan wey go make your love for Jehovah grow every day. Na this one go help you reach to baptize. And the day wey you go baptize go really be happy day. But remember say you just de start. Na our prayer say make the love wey you get for Jehovah and Jesus continue to grow forever!