1-2. How e de be when person de baptize, and wetin we go talk about for this article?

 YOU don ever see people wey want baptize for convention or assembly? The way them answer the two question before them baptize de always show say them dey sure of the answer wey them give. Their friends and family members de happy well-well. When the people wey de baptize come out from water, you go see-am for their face say them dey happy and brothers and sisters go de clap for them. When we calculate-am, we see say thousands of people de give their life to Jehovah every week and baptize to become Jehovah Witness.

² You de plan to baptize? If your answer na yes, make you know say you be special person because you de “look for Jehovah.” (Ps. 14:1, 2) This article na for everybody wey de plan to baptize, whether you dey young or you don old. But we wey don baptize want make sure say our decision to worship Jehovah forever, continue to dey strong. Plenty reason dey to worship Jehovah, but for this article, we go talk about three.

3. Why Jehovah people love truth and like to do wetin correct? (Psalm 119:128, 163)

³ Jehovah talk say make we “love truth.” (Zech. 8:19) Jesus tell e disciples say make them de do wetin correct. (Matt. 5:6) This one mean say we go love to do wetin correct, good and clean for God eye. You love truth and like to do wetin correct? We dey sure say your answer na yes. You hate lie-lie, bad and wicked things. (Read Psalm 119:128, 163.) Person wey de lie, de copy example of Satan wey de control this wicked world.  (John 8:44; 12:31) Satan plan na to spoil Jehovah name wey dey holy. Na since Adam and Eve sin for garden of Eden, Satan don de lie to spoil Jehovah name. E try to make people believe say Jehovah dey selfish and de talk lie. And say Jehovah de hide good things from people. (Gen. 3:1, 4, 5) This lie wey Satan talk don make plenty people hate Jehovah. When people show say them no “love truth,” Satan go fit make them like to do all kind wicked and bad things.—Rom. 1:25-31.

4. How Jehovah take show say na e be “the God of truth”? (Still check the picture.)

⁴ Na Jehovah be “the God of truth,” and e de use all e heart teach people wey love-am, the truth. (Ps. 31:5) Jehovah de use this one help them so that Satan no go fit deceive them again with e lie. Jehovah still de teach e servants to de always talk true and do wetin correct. This one de give them peace of mind and make people respect them. (Prov. 13:5, 6) E don do this one for you as you de study Bible? You don learn say to follow wetin Jehovah talk na the best thing for you and for everybody. (Ps. 77:13) Na this one make you want do wetin God talk say na the correct thing. (Matt. 6:33) You want make people know the truth and show people say wetin Satan talk about Jehovah na lie. How you fit do this one?

5. Wetin you go do to show say you support the truth and like to do wetin good for Jehovah eye?

⁵ You go fit use the way you de live your life show say you don reject Satan lie, and say you support the truth wey Jehovah de teach. You go fit show say na Jehovah you want as your King and you like to do wetin good for e eye. How you go take do this one? Na to pray to Jehovah and tell-am say you de give your life to-am and then baptize to show people say you don give your life to Jehovah. Because you love truth and like to do wetin good for Jehovah eye, this na strong reason to baptize.

6. Wetin Psalm 45:4 talk, wey suppose make you love Jesus Christ?

⁶ Why you love Jesus Christ? See some good reason wey we see for Psalm 45:4. (Read-am.) Jesus de always talk true, dey humble and always do wetin good for Jehovah eye. If you love truth and like to do wetin good for Jehovah eye, e dey clear say you  love Jesus Christ. Think about how Jesus use all e heart help people know the truth and wetin good for Jehovah eye. (John 18:37) How Jesus help people know how to dey humble?

7. Wetin you like well-well about the way Jesus show say e dey humble?

⁷ Jesus use e example teach people how to dey humble. For example, when e do something, na Jehovah e de always praise, no be e self. (Mark 10:17, 18; John 5:19) How e de make you feel to know say Jesus dey humble like this? E no make you love Jesus more and want be e disciple? Yes, e really de make us love-am more-more. Why Jesus dey humble? Na because e love e Papa wey dey humble, and de copy-am. (Ps. 18:35; Heb. 1:3) This na better reason to love Jesus wey copy Jehovah character finish.

8. Why e de make us happy say Jesus na our King?

⁸ We love Jesus wey be our King because na e be the best King. Na Jehovah train Jesus and make-am King. (Isa. 50:4, 5) Think about the kind love wey Jesus don show us. (John 13:1) You need to really love Jesus because na your King. Jesus talk say e disciples na e friends and them love-am. E still talk say if we love-am, we go obey e command. (John 14:15; 15:14, 15) Na really big honor to be friend of Jesus Christ.

9. How Jesus baptism resemble e disciples own?

⁹ One thing wey Jesus command be say, anybody wey want be e disciple must baptize. (Matt. 28:19, 20) Jesus show us example when e baptize. Jesus baptism get some area wey e take different from e disciples own. (Check the box “ How Jesus Baptism Different From E Disciples Own.”) But e still get some area wey them take resemble. When Jesus baptize, e show say e want use e life do wetin e Papa want. (Heb. 10:7) Na so e still be when Jesus disciples baptize, them de show people say they don give their life to Jehovah to do wetin e want. Now, wetin dey important pass to them na to use their life do wetin Jehovah want, no be their own. So them de follow Jesus example.

10. Why you love Jesus, and wetin that love suppose make you do?

¹⁰ You don learn and believe say Jesus na Jehovah special Son and you happy say Jehovah don choose-am to be King of E Kingdom. You don learn say Jesus dey humble and e resemble e Papa finish for character. You don learn say e give plenty people food, e make people mind come down when them no happy, and e even heal sick people. (Matt. 14:14-21) You don see how e de direct e congregation for this our time. (Matt. 23:10) And you know say e go do pass all this one for future, as King for God Kingdom. How you fit show say you love-am? Na to copy e example. (John 14:21) The first thing wey you need to do to show say you de copy e example, na to give your life to Jehovah and baptize.

11. Which reason dey important pass wey suppose make us baptize, and why you talk like that?

¹¹ Which reason dey important pass wey suppose make us baptize? Jesus give the answer when e talk about the commandment wey dey important pass. E talk say: “You must love Jehovah your God with all your heart and with all your life and with all your mind and with all your power.” (Mark 12:30) You love God the way this Bible verse talk-am?

12. Why you love Jehovah? (Still check the picture.)

¹² Plenty reason dey to love Jehovah. For example, you don learn say na Jehovah “de give life,” and say “every good gift, and every  gift wey complete,” come from-am. (Ps. 36:9; Jas. 1:17) All the good things wey you de enjoy, come from our God wey love us and de use all e heart give us good things.

13. Why Jesus sacrifice dey important well-well?

¹³ Jesus sacrifice na one better thing wey Jehovah do for us. Why we talk like that? Think about the kind friendship wey Jehovah and Jesus enjoy before Jesus come this earth. Jesus talk say: “My Papa love me,” and ‘I love my Papa.’ (John 10:17; 14:31) Their friendship grow for the billions of years wey them stay together. (Prov. 8:22, 23, 30) Now, think about how Jehovah go don feel when e Son de suffer and when e die. Jehovah love everybody well-well; even you, sotey e ready to allow e special Son, sacrifice e life so that you and other people go fit live forever. (John 3:16; Gal. 2:20) Na this reason dey important pass to love Jehovah.

14. Wetin be the best thing wey you fit ever use your life do?

¹⁴ The things wey you don learn about Jehovah don make your love for-am grow. And we dey sure say you want make that love continue to de strong from now go reach forever. The truth be say, e dey possible for that love to continue to grow. Jehovah de advice you say make you de do wetin go make-am happy. (Prov. 23:15, 16) To make Jehovah  happy, no be only wetin you de talk matter, but the way you de do things still dey important. The way you de live your life go show say you really love Jehovah. (1 John 5:3) This na the best thing wey you fit ever use your life do.

15. How you fit show say you love Jehovah?

¹⁵ How you fit show say you love Jehovah? First, pray to Jehovah and tell-am say you don give your life to-am. (Ps. 40:8) The next thing na to baptize, to show people say you don give your life to Jehovah. As we don talk before for this article, your baptism na happy and important thing for your life. You don begin live new life for Jehovah, no be for yourself. (Rom. 14:8; 1 Pet. 4:1, 2) This one fit be like big decision for you. True-true, na really big decision. But when you baptize, e go help you live the best life. How?

16. Wetin Psalm 41:12 show say Jehovah go do for people wey use all their life serve-am?

¹⁶ Na Jehovah get open hand pass everybody. And anything wey you give-am, e go always give you back pass wetin you give-am. (Mark 10:29, 30) Jehovah go make you happy, e go bless you and make your life better, even for this wicked world. But the blessing no end for there. After you don baptize, do your best to continue to worship Jehovah. In fact, you go fit worship Jehovah wey be your Papa, forever. The love wey you get for your Papa go continue to grow, and you go dey alive forever as far as Jehovah dey alive.—Read Psalm 41:12.

17. Wetin you fit give Jehovah wey e never get before?

¹⁷ When you give your life to Jehovah and baptize, you don give your Papa for heaven something wey really dey special. All the good things wey you get, the things wey don make you happy, and wey you don ever enjoy, na from Jehovah. So to show say you value wetin Jehovah don do for you, you fit give-am something wey e never get before. Wetin be that? Na the worship wey come from your heart. (Job 1:8; 41:11; Prov. 27:11) True-true, this na the best way to live your life. The  truth be say the best reason to baptize na because you love Jehovah.

18. Which questions you fit ask yourself?

¹⁸ How you go answer this question, ‘You go baptize?’ Na you fit answer this question for yourself. But one question wey you fit ask yourself na, ‘Why I still de wait?’ (Acts 8:36) Remember the three reason wey we don talk about for this article. Number one, because you love truth and like to do wetin correct. Ask yourself say, ‘E de hungry me to live for the time wey everybody go de talk truth and de do wetin good for Jehovah eye? Number two, because you love Jesus Christ. Ask yourself say, ‘I want make Jesus wey be the Son of God be my King, and I like to follow e example?’ Number three, and na this one dey important pass, na because you love Jehovah. So ask yourself say, ‘E de hungry me to worship Jehovah and make-am happy?’ If your answer to this three questions na yes, why you no baptize? Why you still de wait?—Acts 16:33.

19. Why you no suppose delay to baptize? Give example. (John 4:34)

¹⁹ If you still de delay to baptize, think about one example wey Jesus use teach. (Read John 4:34.) Jesus talk say to do wetin e Papa want be like food. Why? Because food good for everybody. Jesus know say everything wey Jehovah say make we do, good for us. Jehovah no want make we do anything wey no good for us. Jehovah want make you baptize? Yes. (Acts 2:38) Then make you know say if you baptize as Jehovah don command us, you go really gain. If you no go waste time to chop your best food, why you de delay to baptize?

20. Wetin we go talk about for the next article?

²⁰ If you ask person say, ‘Why you still de wait to baptize?’ E fit talk say, “I never really ready.” The truth be say, to give your life to Jehovah and baptize na the most important thing wey you fit ever do for life. So you need to think-am well because e go take some time and serious work before you go reach to baptize. If e really dey your mind to give your life to Jehovah and baptize, wetin you go do now to fit baptize? We go answer this question for the next article.