1. How some servants of Jehovah de feel sometimes when them de face problem?

 E REALLY de sweet us to know say Jehovah de happy with us. Bible talk say: “Jehovah dey happy with im people.” (Ps. 149:4) But sometimes, because of the problem wey some of us de face, we fit de ask ourself say, ‘Jehovah de happy with me?’ Many people wey worship Jehovah well for Bible, feel like that sometimes.—1 Sam. 1:​6-10; Job 29:2, 4; Ps. 51:11.

2. Which kind person Jehovah de happy with?

² Bible make-am clear say even though say we no dey perfect, we fit make Jehovah happy. How we fit do this one? We must show say we put faith for Jesus sacrifice and baptize. (John 3:16) This one go show people say we don repent, and we don promise Jehovah say we want use all our life do wetin e want. (Acts 2:38; 3:19) Jehovah de happy with us well-well when we do this things to fit be im friend. If we continue to do our best to live our life the way Jehovah want just as we promise-am, e go continue to happy with us and see us as im tight friend.—Ps. 25:14.

3. Which questions we go answer for this article?

³ But sometimes, why some servants of Jehovah de feel say Jehovah no de happy with them? How Jehovah de help us know say e de happy with us? How you fit dey sure say Jehovah de happy with you?

 SOMETIMES, WHY SOME SERVANTS OF JEHOVAH DE FEEL SAY JEHOVAH NO DE HAPPY WITH THEM?

4-5. Even if we de feel sometimes say we no get value, wetin we fit dey sure of?

⁴ From small pikin, many people de feel say them dey useless. (Ps. 88:15) One brother wey im name na Alex a talk say: “I don always feel say I dey useless. I remember say when I dey small, I de pray make my family fit enter Paradise, even though say I de feel say Paradise no be for person like me.” Brother Tony wey no grow for family wey be Jehovah Witness, talk say: “My papa and mama no ever tell me say them love me, and say them de happy with me. This one make me feel say no matter wetin I do, I no go ever fit make them happy.”

⁵ When we de feel sometimes say we no get value, make we remember say Jehovah see something wey good about us wey make-am draw us near body. (John 6:44) E de see the better-better character wey we get, wey we fit no see, and e know wetin dey our heart. (1 Sam. 16:7; 2 Chron. 6:30) So we go fit trust-am when e talk say we dey special.—1 John 3:​19, 20.

6. How apostle Paul feel about the sin wey e commit before e become Christian?

⁶ Before we learn the truth, many of us do some things wey still de worry us for mind. (1 Pet. 4:3) Even people wey de worship Jehovah well, still de fight the bad things wey de come their mind. What about you? Sometimes, you de feel say Jehovah no go ever forgive you? If na so you de feel, you no dey alone. Many servants of Jehovah feel like that. For example, when apostle Paul remember the mistakes wey e make before, e really make-am feel bad. (Rom. 7:24) Even after Paul repent and baptize, e still talk about imself say na im “small pass among the apostles,” and say na im be “number one” person among people wey de sin.—1 Cor. 15:9; 1 Tim. 1:15.

7. Wetin we suppose get for mind about the sins wey we commit before we baptize?

⁷ Our Papa for heaven promise us say e go forgive us if we repent. (Ps. 86:5) So if you don really repent from the sins wey you commit before you baptize, make you get-am for mind say Jehovah don forgive you.—Col. 2:13.

8-9. Wetin go help us stop to de feel say we no go ever fit do reach wetin go make Jehovah happy?

⁸ All of us want serve Jehovah for the best way wey we fit. But some of us fit de feel say wetin we de do no go ever fit reach wetin go make Jehovah happy. One sister wey im name na Amanda talk say: “For my mind, I be de think say to give Jehovah my best mean say I need to always do more. So I de always try to do pass where my power reach. When I no succeed, I go de feel say Jehovah no de happy with me, just as I no de happy with myself.”

⁹ Wetin go help us stop to de feel say we no go ever fit do reach wetin go make Jehovah happy? Remember say Jehovah no de expect make we do pass where our power reach, and e no go ever tell us say make we do pass where our power reach. E value anything wey we do for-am as far say na the best wey we fit do. You fit still think deep about some people for Bible wey worship Jehovah with all their heart. Think about apostle Paul. E use all im heart travel go preach for different-different place and form plenty congregation. But when im condition change and e no fit preach like before, e mean say Jehovah no happy with-am again? No. E continue to do im best and Jehovah bless-am. (Acts 28:​30, 31) Na so e still be, our best fit no be the same all  the time. Wetin dey important to Jehovah na why we do wetin we de do. Now, make we talk about some ways wey Jehovah de show us say e de happy with us.

HOW JEHOVAH DE HELP US KNOW SAY E DE HAPPY WITH US?

10. How Jehovah de tell us say e de happy with us? (John 16:27)

¹⁰ E de use Bible. Jehovah like to let im servants know say e love them and say e de happy with them. Two times for Bible, Jehovah tell Jesus say, Jesus na im pikin wey e love and wey de make-am happy. (Matt. 3:17; 17:5) You go like make Jehovah tell you say e de happy with you? Jehovah no de talk to us direct from heaven for this our time, but na Bible e de use talk to us. When we read the things wey Jesus tell im disciples, e go just be like say Jehovah de tell us the same thing. (Read John 16:27.) Jesus copy the way im Papa de do things and e copy-am finish! So when you read about how Jesus use better words make im disciples mind come down, you go fit use your mind think about how Jehovah de use those words make your mind come down.—John 15:9, 15.

11. When we de face problem, why e no mean say Jehovah no de happy with us? (James 1:12)

¹¹ E de give us wetin we need. E de always hungry Jehovah to help us. For example, e de give us wetin we need to care for ourself. But sometimes, Jehovah fit allow make bad things happen to us just as e allow make e happen to Job. (Job 1:​8-11) When we de face problems, e no mean say Jehovah no de happy with us. Instead, them de give us chance to show how our love for Jehovah strong reach and say we trust-am. (Read James 1:12.) And when we de face problem, we go see say Jehovah really love us as e de help us fit endure the problem.

12. Wetin we fit learn from the example of Brother Denis?

¹² Make we see the example of Brother Denis for Asia. Them sack-am for work and e no get work for many months. To show say e trust Jehovah, e decide to do more for the preaching work. E look for work for many months, but e no still see. Then serious sickness hold-am sotey e no fit de comot from bed. This one make-am start to feel say e no be good papa and husband again, and e even start to de think say Jehovah no de happy with-am. One evening, im daughter write  wetin Isaiah 30:15 talk for paper. The verse talk say: ‘You go dey strong if you dey calm and show say you trust me.’ Then, e give im papa for bed and talk say, “Papa, when you de feel bad, remember this Bible verse.” This one make Brother Denis think, and e see say Jehovah don de care for im family as them get food, cloth and where them de live. E talk say: “Wetin I be need to do, na to dey calm and continue to trust Jehovah.” If you de face this kind problem, dey sure say Jehovah care about you and e go help you to fit endure.

13. Who Jehovah fit use to make us know say e de happy with us, and how?

¹³ E de use our brothers and sisters. Jehovah de use our brothers and sisters to help us know say e de happy with us. For example, e fit move brothers and sisters to talk wetin go encourage us when we really need-am. This one happen to one sister for Asia when e de face serious problem. Them sack-am for work and e come de sick. Then, them remove im husband as elder for congregation because e commit serious sin. The sister talk say: “I no understand why this kind things de happen to me. And I start to think say, e fit be say I don do something wey bad, wey make Jehovah no de happy with me again.” The sister beg Jehovah say make e help-am know, if e still de happy with-am. How Jehovah answer im prayer? The sister talk say, “Elders for congregation talk to me and help me see say Jehovah still love me.” But after sometime, e still pray to Jehovah again say make Jehovah make-am know if e de happy with-am. The sister talk say: “The same day after I pray, I receive one letter wey brothers and sisters for my congregation write to me. As I read the letter, I feel say Jehovah don answer my prayer.” True-true, Jehovah de use the better word wey our  brothers and sisters de tell us, to make us know say e de happy with us.—Ps. 10:17.

14. Which other way Jehovah de use show say e still de happy with us?

¹⁴ Another way wey Jehovah de show say e de happy with us na when e use brothers and sisters correct us. For example, for the time of the apostles, Jehovah use apostle Paul write 14 letters to different-different congregation that time. For the letters wey e write, e give them strong correction and the way e do-am show say e love them. Why Jehovah direct apostle Paul make e give them strong correction? Because Jehovah na better Papa and e de correct im children “wey e really like.” (Prov. 3:​11, 12) So when them give us strong correction from Bible, e no mean say Jehovah de vex for us. Instead, e de show say e love us. (Heb. 12:6) Which other things de show say Jehovah de happy with us?

OTHER THINGS WEY DE SHOW SAY JEHOVAH DE HAPPY WITH US

15. Which kind people Jehovah de give im holy spirit, and wetin this one fit make us dey sure of?

¹⁵ Jehovah de give im holy spirit to people wey e de happy with. (Matt. 12:18) We fit ask ourself say, ‘I de show say I get the better-better character wey holy spirit de help person get?’ You don dey patient now pass when you start to learn about Jehovah? The truth be say, the more you de show the better-better character wey holy spirit de help person get, the more e go dey clear to you say Jehovah de happy with you.—Check the box “ The Better-Better Character Wey Holy Spirit De Help Person Get Na . . . ”

16. Which kind people Jehovah give the work to preach the good news, and how that one de make you feel? (1 Thessalonians 2:4)

¹⁶ Na people wey Jehovah de happy with, e give the work to preach the good news. (Read 1 Thessalonians 2:4.) See how one sister wey im name na Joy see say Jehovah de happy with-am as e de preach to people. One day as Sister Joy wake up, e no happy at all. E talk say: “I just tire and de feel say I dey useless. I de pioneer, and that day na my preaching day. So I pray to Jehovah and go preaching.” That morning, Sister Joy meet one woman wey im name na Mary. E preach to-am and the woman gree make e de study Bible with-am. After some months, the woman talk say before Sister Joy knock im door the first day wey e preach to-am, e don de pray to God say make e help-am. When Sister Joy think about this  thing wey happen, e talk say: “E make me feel like say Jehovah de tell me say, ‘I de happy with you.’” The truth be say, no be everybody go listen to the good news wey we de preach. But make we always remember say Jehovah de happy with us when we do our best for the preaching work.

17. Wetin you learn about Jesus sacrifice from wetin Sister Vicky talk? (Psalm 5:12)

¹⁷ Na people wey Jehovah de happy with, de gain from Jesus sacrifice. (1 Tim. 2:5, 6) But what if we still de feel say Jehovah no de happy with us, even though say we put faith for Jesus sacrifice and we don baptize? Remember say sometimes, our mind fit deceive us, but we go fit always trust Jehovah. E de see people wey put faith for Jesus sacrifice as righteous people and e don promise say e go bless them. (Read Psalm 5:12; Rom. 3:26) One sister wey im name na Vicky really gain when e think deep about Jesus sacrifice. One day, after e don think deep about Jesus sacrifice, e tell imself say: “Jehovah don do many things to show say e love me. . . . But the way I be de feel, just be like say I de tell-am say: ‘You no fit love person like me. And the sacrifice of your Son no reach to cover my sin.’” As e think deep about Jesus sacrifice, that one help-am see say Jehovah really love-am. Na so e still be for us, if we think deep about Jesus sacrifice, e go dey clear to us say Jehovah love us and say e de happy with us.

18. Wetin we fit dey sure of if we continue to love our Papa for heaven?

¹⁸ Even though say we fit do our best to do the things wey we don learn for this article, sometimes, some things fit still make us de wonder if Jehovah de happy with us. If e happen to you like that, remember say Jehovah de happy with “people wey continue to love-am.” (Jas. 1:12) So, continue to do things wey go make you near Jehovah more-more and try see the different-different things wey e de do to show say e de happy with you. Always remember say Jehovah “no far from each one of us.”—Acts 17:27.