1. Wetin we de gain as we dey Jehovah organization?

 NA BIG honor e be for us to dey Jehovah organization for this last days wey problem full everywhere. As the condition of this world de bad more-more, Jehovah don give us brothers and sisters to help us fit continue to worship-am well. (Ps. 133:1) Jehovah de teach us to fit enjoy our family life. (Eph. 5:33–6:1) And e don give us the sense wey we need to fit handle all our problems and get peace of mind.

2. Wetin you need to do, and why?

² We need to do our best to fit continue to worship Jehovah well. Why? Because sometimes, our brothers and sisters fit talk or do wetin go pain us. We fit no happy because of our own mistake, especially if the mistake happen plenty times. So, we need to continue to worship Jehovah even when (1) brother or sister do wetin pain us, (2) our husband or wife do things wey pain us well-well, and (3) our mistake no make us happy. For this article, we go talk about this three things, and wetin we fit learn from three people for Bible wey face this kind problems and still continue to worship Jehovah well.

CONTINUE TO WORSHIP JEHOVAH EVEN WHEN BROTHER OR SISTER DO WETIN PAIN YOU

3. Which problem Jehovah people de face?

³ The problem. Some brothers and sisters get some kind character wey fit de make us vex. Some of them fit do us wetin we no ever expect say them fit do us, or even treat us for bad way. Elders fit make mistake. When this kind thing happen, e fit make you de wonder if this na really Jehovah organization. Instead to continue to worship Jehovah with their brothers and sisters, some people go stop to do things with the people wey make them vex or even stop to go meeting. (Zeph. 3:9)  This kind thing make sense? No! Make we talk about one person for Bible wey face this kind problem, and see wetin we fit learn from-am.

4. Which problems apostle Paul face?

⁴ Example for Bible. Apostle Paul know say brothers and sisters no dey perfect. For example, when apostle Paul just become Christian, some brothers and sisters for the congregation wey dey Jerusalem no believe say e really be Christian. (Acts 9:26) Later, some people talk bad things about-am so that other people no go respect-am. (2 Cor. 10:10) Another time, Paul see as one elder make decision wey fit make some people for congregation stop to worship Jehovah. (Gal. 2:​11, 12) And one of Paul friend wey be Mark, wey de travel with-am go preach, do something wey pain-am well-well. (Acts 15:​37, 38) E for dey easy for apostle Paul to talk say e no go do anything with this brothers and sisters again. But e make up im mind to continue to value im brothers and sisters, and continue to worship Jehovah. Wetin help-am fit do this one?

5. Wetin help Paul fit forgive im brothers and sisters and continue to worship Jehovah with them? (Colossians 3:​13, 14) (Still check the picture.)

⁵ Apostle Paul love im brothers and sisters. Na the love wey Paul get for them make-am fit put mind for their better-better character, no be their mistake. Na love still help apostle Paul to fit do wetin e write for Colossians 3:​13, 14. (Read-am.) Make we talk about how apostle Paul show say e do wetin e write for that verse. Even though say Mark leave Paul the first time wey Paul travel go preach, e no continue to vex for Mark. After, when Paul write letter to brothers and sisters for Colossae, e praise Mark say e be better friend wey don really comfort-am. (Col. 4:​10, 11) When apostle Paul dey prison for Rome, na Mark e say make them send come help-am. (2 Tim. 4:11) Paul forgive the brothers and sisters wey make-am vex and continue to worship Jehovah with them. Wetin we fit learn from apostle Paul?

6-7. Wetin fit help us continue to show our brothers and sisters love even though say them no dey perfect? (1 John 4:7)

⁶ Wetin we learn. Jehovah want make we continue to show love to our brothers and sisters. (Read 1 John 4:7.) If our brothers and sisters no treat us well, make we get-am for mind say them no really plan-am to do us bad, but them de struggle to do wetin Jehovah want. (Prov. 12:18) Jehovah love all im servants for this earth, even though say them no dey perfect. When we make mistake, e no de  troway us, and e no de carry our mistake for mind. (Ps. 103:9) E really dey important make we de copy our Papa for heaven wey de forgive!—Eph. 4:32–5:1.

⁷ Another thing wey we need to remember be say, as we de near the end of this wicked world more-more, we need to dey close to our brothers and sisters more. Make we get-am for mind say people fit de suffer us more-more because we de worship Jehovah. Them fit even put us for prison because of our faith. If that one happen, we go need our brothers and sisters pass before. (Prov. 17:17) See wetin happen to one elder for Spain wey im name na Joseph. a Them put-am and other brothers for prison because them no gree join army. E talk say: “For prison, e dey easy to quick vex for each other, because all of us dey together for one place and we de see everything wey each person de do. So we need to always show each other love and forgive each other with all our heart. Na this one help us fit stay together and care for each other, as plenty other people wey dey the prison with us no de serve Jehovah. E get one time wey I injure my hand and them bandage-am, so I no fit use-am do anything. But one brother for the prison wash my cloth and help me do other things. The brothers really show me love when I need-am pass.” This na really better reason for us to de settle the problems wey we get with each other now!

CONTINUE TO WORSHIP JEHOVAH WHEN YOUR HUSBAND OR WIFE DO WETIN PAIN YOU WELL-WELL

8. Which problem people wey marry de face?

⁸ The problem. No marriage dey perfect! Bible talk say people wey marry go face problem. (1 Cor. 7:28) Why? Because the man and woman wey marry each other, no dey perfect. Each of them get their own character, wetin them like, and wetin them no like. Them fit grow for different area and come from different tribe. Them fit start to see some character wey them no see for each other body before them marry. Any of this things fit cause problem for marriage. Them fit start to blame each other for the problem wey dey their marriage, instead make them agree say the two of them no dey perfect and work together to settle the problem. Them fit even start to think say na to leave each other or end the marriage, go better pass. But na to end the marriage really better pass? b Make we talk about one person for Bible wey get serious problem for im marriage, and see wetin we fit learn from-am.

9. Which problem Abigail face for im marriage?

⁹ Example for Bible. Bible talk say Abigail husband wey be Nabal, dey harsh and get bad character. (1 Sam. 25:3) E go really don hard Abigail to live with this kind husband. Abigail get chance to end im marriage with Nabal? Yes! Abigail get this chance when David want kill Nabal and all the men for im house because Nabal insult David and im men. (1 Sam. 25:​9-13) E for easy for Abigail to run comot so that David go fit do wetin dey im mind. But e no do like that, instead, e beg David make e no kill Nabal. (1 Sam. 25:​23-27) Why e do like that?

10. Wetin fit don make Abigail no end im marriage?

¹⁰ Abigail love Jehovah and e de see marriage the way Jehovah de see-am. We dey sure say Abigail know wetin Jehovah talk when E  give Eve to Adam to be im wife. (Gen. 2:24) Abigail know say marriage dey holy to Jehovah. E want do wetin go make Jehovah happy, na im make-am do im best to save the people for im house and even im husband. E no waste time to go meet David make e no kill Nabal. E even ready to beg for wetin e no do. E dey clear say Jehovah love Abigail because of im strong mind and good heart. Wetin people wey don marry fit learn from Abigail example?

11. (a) Wetin Jehovah want make people wey don marry do? (Ephesians 5:33) (b) Wetin you learn from Sister Clara example? (Still check the picture.)

¹¹ Wetin we learn. Jehovah want make husband and wife continue to live together even if one of them de make things hard for their marriage. E de really make Jehovah happy when e see husband and wife wey de do their best to settle problem for their marriage, and show each other deep love and respect. (Read Ephesians 5:33.) Make we see the example of Sister Clara. After about six years wey e marry, e start to study Bible with Jehovah Witness people and later baptize. E talk say: “My husband no like-am as I become Jehovah Witness. E come de vex say I de use the time wey I for spend with-am, de go meeting and worship Jehovah. E go insult me and talk say e go end our marriage.” Even with all this one, Sister Clara continue to do wetin go make Jehovah happy for im marriage. For 50 years, e work hard to continue to love and respect im husband. E talk say: “As time de go, I understand how my husband de feel and how to talk to-am with respect. Because I know say marriage dey holy to Jehovah, I do my best to make sure say my marriage no scatter. Because I love Jehovah, I no ever try to leave my husband.” c If you de face problem for your marriage, you fit trust Jehovah say e go support you and help you to fit succeed.

CONTINUE TO WORSHIP JEHOVAH EVEN WHEN YOU MAKE MISTAKE

12. Wetin fit happen to us if we commit serious sin?

¹² The problem. If we commit serious sin, we fit start to feel say we no go fit make Jehovah happy again. Bible talk say our sin fit make us de feel say our “own don finish.” (Ps. 51:17) One brother wey im name na Robert don work hard for many years to fit be ministerial servant. But after e don become ministerial servant, e commit sin and e see say wetin e do no good for Jehovah eye. E talk say: “When I see say wetin I do really bad, e worry me  well-well. E really pain me no be small. I cry and pray to Jehovah. I come de think say Jehovah no go ever listen to my prayer. Why e go even listen to me after wetin I do? I don do wetin bad for im eye.” If we commit serious sin, e fit make us begin think say Jehovah don troway us, and say we no go fit worship-am again. (Ps. 38:4) If this kind thing don ever happen to you, see one person for Bible wey do something wey serious, and later do im best to continue to worship Jehovah.

13. Which serious sin Peter commit, and which mistakes make-am commit that sin?

¹³ Example for Bible. The night wey Jesus enemy them arrest-am to kill-am, Peter make plenty mistake and because of this mistake them, Peter commit one serious sin. The first mistake wey Peter make be say e boast say e no go ever leave Jesus even if other disciples run leave-am. (Mark 14:​27-29) When them reach one place wey them de call Gethsemane, Peter sleep plenty times instead make e de pray just as Jesus tell-am. (Mark 14:​32, 37-41) Then, when the people wey want arrest Jesus reach where them dey, Peter run leave Jesus. (Mark 14:50) For the end, Peter deny Jesus three times. E even swear say e no know Jesus. (Mark 14:​66-71) Wetin Peter do when e see say e don commit serious sin? E pain-am well-well and e cry no be small. Wetin e do really worry-am for mind. (Mark 14:72) Imagine how Peter go feel when them kill Jesus that day. This one go don make-am feel say e dey useless!

14. Wetin help Peter to fit continue to worship Jehovah? (Check picture.)

¹⁴ Even with the serious sin wey Peter commit, e no stop to worship Jehovah. Why? Because e no hide imself from other servants of Jehovah. E meet other disciples of Jesus and them comfort-am. (Luke 24:33) After Jehovah bring Jesus back to life, e meet Peter, and e fit be say na because e want encourage-am. (Luke 24:34; 1 Cor. 15:5) When Jesus meet Peter again, e no blame-am for im mistake, instead, e tell-am say e go give-am more work. (John 21:​15-17) Peter know say e don make serious mistake, but e continue to do wetin go make Jehovah happy. Why? Because e dey sure say im Master don forgive-am, and still love-am. And other disciples continue to work with-am. Wetin we fit learn from Peter example?

15. Wetin Jehovah want make we dey sure of? (Psalm 86:5; Romans 8:​38, 39) (Still check the picture.)

¹⁵ Wetin we learn. Jehovah want make we know, and dey sure say e love us and say e ready to forgive us. (Read Psalm 86:5;  Romans 8:​38, 39.) When we sin, e de pain us well-well. This one good and na normal thing. But make we no think say Jehovah don troway us or say e no go fit forgive us again. When we sin, wetin we suppose do na to look for help quick-quick. Brother Robert wey we talk about before talk say: “I commit sin because I think say I go fit face temptation with my own power.” Later, e see say e need to tell elders say e need help. E talk say: “When I tell the elders, the way them treat me help me see say Jehovah still love me. The elders show say them love me. Them help me see say Jehovah never troway me.” If we repent from our sin, meet the elders make them help us, and do our best make we no repeat our mistake, we go see say Jehovah really love us and ready to forgive us. (1 John 1:8, 9) If we know this one, e go help us make we no stop to worship Jehovah even when we sin.

16. Why you don make up your mind to continue to worship Jehovah?

¹⁶ Jehovah value everything wey we de do, to fit continue to worship-am for this last days wey hard to handle. With Jehovah help, we go fit continue to worship Jehovah even when our mistake or the mistake of our brothers and sisters no make us happy. We go fit continue to love our brothers and sisters and forgive them when them do wetin pain us. We go fit show say we love Jehovah well-well and de see marriage the way e de see-am, if we do our best to settle problem for our marriage. And if we sin, make we meet the elders to help us. Make we get-am for mind say Jehovah love us and ready to forgive us, and make we continue to worship-am. Make we get-am for mind say Jehovah go bless us well-well if we “no stop to do wetin dey fine.”—Gal. 6:9.