1-2. (a) Wetin de happen to apostle Paul when e write letter to the congregation for Ephesus? (b) Which questions we go answer for this article?

 WHEN them put apostle Paul for one house for Rome and them no allow-am go anywhere, e really hungry-am to encourage im brothers and sisters. But since e no fit visit them, e decide to write letters to them. E write one of this letters to the congregation for Ephesus, around the year 60 or 61 C.E.—Eph. 1:1; 4:1.

² Around ten years before them arrest Paul for Rome, e don spend some time de preach and teach for Ephesus. (Acts 19:1, 8-10; 20:​20, 21) E love im brothers and sisters well-well, so e want help them continue to hold Jehovah tight. But, why apostle Paul write to anointed Christians about darkness and light? And wetin all of us fit learn from wetin Paul write? Make we see the answer to this questions.

THEM COMOT FROM DARKNESS, ENTER LIGHT

3. Which word apostle Paul use explain the condition of the Christians for Ephesus before and after them become Christians?

³ Apostle Paul write to the congregation for Ephesus say: “Una be darkness before, but now una be light.” (Eph. 5:8) Apostle Paul use darkness and light show the condition wey brothers and sisters for Ephesus dey before and after them become Christians. Make we talk about why apostle Paul talk say brothers and sisters for Ephesus be dey inside darkness before.

4. How the Christians for Ephesus be dey darkness before, because of lie-lie religion?

 ⁴ Them be dey inside darkness because of lie-lie religion. Before brothers and sisters for the congregation for Ephesus become Christians, them be dey lie-lie religion, them put trust for magic, and when something happen to them, them believe say no be ordinary. For Ephesus, them build the temple of one lie-lie god wey them de call Artemis. And people that time believe say that temple na one of the biggest thing wey people don ever build. So plenty people de go worship that lie-lie god for that temple. People de carve and sell the image of the temple and the lie-lie god, and this one de give them plenty money. (Acts 19:​23-27) Another thing be say, plenty people for Ephesus de do magic.—Acts 19:19.

5. How the Christians for Ephesus be dey darkness before, because of the kind life wey them de live?

⁵ Them dey inside darkness because them de live dirty life. People for Ephesus de do all kind of dirty things and them no de shame to do-am. Them de talk joke about sex for party, even when them de do party to worship their gods. (Eph. 5:3) Many people for Ephesus “no de care again about wetin good or bad.” (Eph. 4:​17-19) Before the Christians for Ephesus learn the truth, their mind no de worry them if them do wetin Jehovah hate. And them no even de care about how Jehovah feel. Na this one make apostle Paul describe them as people wey be “dey darkness for the way them de think and them no dey part of the life wey God de give.”

6. Why apostle Paul talk say Christians for Ephesus don be “light”?

⁶ Some people for Ephesus no continue to stay for darkness. Apostle Paul write say: “Now una be light as one with the Lord.” (Eph. 5:8) Them de follow Jehovah law wey be like light wey de direct them. (Ps. 119:105) Them don leave lie-lie religion and the dirty life wey them de live before. Them don de copy God example and de do their best to worship Jehovah well and make-am happy.—Eph. 5:1.

7. How our situation be like the situation for many Christians for Ephesus?

 ⁷ For the same way, before we learn the truth, many of us be dey lie-lie religion and de live dirty life. Before, some of us de join lie-lie religion for their celebration, and some de do all kind of bad thing. But when we learn the truth, we change the way we de live our life, and start to do things the way Jehovah want. Because of this one, we don gain well-well. (Isa. 48:17) But now, e no easy for us to continue to stay far from the darkness wey we dey before and “continue to live as children of light.” Wetin fit help us?

STAY FAR FROM DARKNESS

8. As e dey Ephesians 5:​3-5, wetin Christians for Ephesus need to continue to run from?

⁸ Read Ephesians 5:​3-5. For Christians for Ephesus to fit continue to stay far from dirty life, them need to continue to run from things wey Jehovah no like. This one mean say them no go only run from sex wey no clean, but them still need to run from dirty joke about sex wey people de talk. Apostle Paul remind the Christians for Ephesus say them need to run from all this things, if them want “get any share for the Kingdom of Christ and God.”

9. Why we need to continue to dey careful to run from anything wey fit make us put hand for sex wey no clean?

⁹ We too must continue to dey careful so that we no go ‘put hand for things wey no get gain, wey be part of darkness.’ (Eph. 5:11) Wetin don happen to plenty people show say, the more person look, listen, or talk about sex wey no clean, the more e go dey easy for-am to do-am. (Gen. 3:6; Jas. 1:​14, 15) For one country, many brothers join one group for Internet wey them de use send message to each other. When them first start, them de talk about Jehovah and things wey them learn from Bible. But after some time, them start to talk about things wey no clean. Them start to talk about sex matter. Later, plenty of this brothers wey dey the Internet group talk say, the dirty things wey them de talk about for this group, push them to do sex wey no clean.

10. Wetin Satan want make we believe? (Ephesians 5:6)

¹⁰ Satan de try to deceive us and make us believe say all the things wey Jehovah talk say make we no do, no bad at all. (2 Pet. 2:19) This one no de surprise us! One way wey Satan don de use to make people no know their left from their right, na to confuse them. (Isa. 5:20; 2 Cor. 4:4) Na im make some things wey them de show for films, television and Internet, de make people do wetin Jehovah hate! Satan de try to make us think say all the dirty things wey people de do today, de make them enjoy theirself, and say this things no fit cause any problem for us if we do them.—Read Ephesians 5:6.

11. How the example of Sister Angela show say we need to follow the advice wey dey Ephesians 5:7? (Still check the picture.)

¹¹ Satan want make we make friend with people wey go make-am hard for us to worship Jehovah well. Na im make Apostle Paul tell Christians for Ephesus say: “Make una no join them.” (Eph. 5:7) This one mean say we no suppose make friends with people wey de do things wey bad for Jehovah eye. We need to remember say the people wey be our friend no be only the people wey we de see face to face. Even people wey we de talk to for Internet na our friend. But, for the time of Christians for Ephesus, them no de use Internet, so  them no face this kind thing. Sister Angela a wey de live for Asia, see say danger dey social media. E talk say: “Small-small, social media change the way I de think. E reach one point wey I start to think say e no really bad to get friends wey no de worship Jehovah. After, I come de think say e no really bad to do things wey Jehovah no like.” But elders use love help sister Angela to fit change the wey e de think. E talk say: “Now, I de put my mind for Jehovah worship, no be social media.”

12. Wetin go help us to fit continue to follow Jehovah law?

¹² We need to dey careful, make we no let this world make us believe say dirty life good. We know say that kind life no good at all. (Eph. 4:​19, 20) So, make we ask ourself this questions: ‘I de do my best make I no de spend time with people wey I de work with, my school mate or anybody wey no de follow Jehovah law? I de use strong mind do wetin Jehovah want, even when people talk say my own too much?’ As e dey for 2 Timothy 2:​20-22, we still need to dey careful when we de choose friends even for inside congregation. Make we get-am for mind say no be everybody go help us to fit serve Jehovah well.

CONTINUE TO “LIVE AS CHILDREN OF LIGHT”

13. Wetin e mean to continue “to live as children of light”? (Ephesians 5:​7-9)

¹³ Apostle Paul encouraged Christians for Ephesus say make them no only continue to run from darkness, but make them still “continue to live as children of light.” (Read Ephesians 5:​7-9.) Wetin this one mean? E mean say we need to de live our life the way Jehovah want all the time. One thing wey fit help us do this one, na to de take time read and study Bible and our book them. Bible talk say na Jesus be “the light of the world.” So when we de read, e dey important to put mind for im example and wetin e teach.—John 8:12; Prov. 6:23.

14. How Jehovah holy spirit fit help us?

¹⁴ Another thing wey go help us “continue  to live as children of light,” na Jehovah holy spirit. Why? Because e no dey easy at all to live clean life for this Satan world wey people de live dirty life. (1 Thess. 4:​3-5, 7, 8) Holy spirit fit help us make we no de think like people for this world, wey no de think the way Jehovah de think. Holy spirit go still help us do “every kind of thing wey dey good and wey correct for God eye.”—Eph. 5:9.

15. Wetin we need to do to fit get Jehovah holy spirit? (Ephesians 5:​19, 20)

¹⁵ One way wey we fit get Jehovah holy spirit na to pray to Jehovah make e give us holy spirit. Jesus talk say Jehovah “go give holy spirit to people wey de ask-am.” (Luke 11:13) And when we de worship Jehovah together for meeting, we de get holy spirit. (Read Ephesians 5:​19, 20.) Holy spirit go help us live our life the way wey go make Jehovah happy.

16. Wetin go help us make better decision? (Ephesians 5:​10, 17)

¹⁶ When we want make any important decision, we need to first “understand wetin Jehovah want” and then use wetin we learn make better decision. (Read Ephesians 5:​10, 17.) When we de look for advice for Bible wey fit help us for our condition, e mean say we de look for wetin Jehovah think about wetin we want do. And, when we follow the advice for Bible, we go fit make better decision.

17. How we fit use our time well? (Ephesians 5:​15, 16) (Still check the picture.)

¹⁷ Apostle Paul advice Christians for Ephesus say make them de use their time well. (Read Ephesians 5:​15, 16.) Satan “na wicked person,” e want make we use all our time de do things wey people for this world de do, sotey we no go get time to serve Jehovah. (1 John 5:19) Servant of Jehovah fit start to de put mind for money, school matter, or work, instead make e put mind for how e go fit worship Jehovah well. If e happen like that, e mean say e don de allow the way  people for this world de think, to affect-am. The truth be say this things no be sin, but make them no be number one thing for our life. To continue to live “as children of light,” we need to “de use [our] time well.” This one mean say we need to put mind for wetin dey important pass.

18. Wetin Brother Donald do to fit use im time well?

¹⁸ Look for way wey you fit do more for Jehovah. This na wetin Brother Donald for South Africa do. E talk say: “I think about my situation and I pray well-well say make Jehovah help me fit do more for the preaching work. I pray say make e help me get work wey go allow me get more time to preach. And e answer my prayer. This one help me and my wife join full-time service.”

19. How we fit continue to live our life as “children of light”?

¹⁹ The letter wey Apostle Paul write to Christians for Ephesus, really help them fit continue to serve Jehovah well. And that advice from Jehovah fit still help us today. As we don learn, the advice fit help us choose our friends well, and the kind things wey we de use enjoy ourself. E fit move us to continue to study Bible, so that wetin we de learn go help us continue to live our life the way Jehovah want. And the letter show say holy spirit dey important for our life, if we want get better character. If we follow the advice wey Paul give, we go fit make better decisions wey go make Jehovah happy. When we do all this things, we go fit continue to run from darkness for this world and remain inside light!