1-2. Wetin person must do before e fit baptize?

 FOR five years now, e don pass one million people wey baptize to be Jehovah Witness. Many of them learn the truth when them still be “small pikin,” just like Timothy for Bible. (2 Tim. 3:​14, 15) But some of them learn about Jehovah when them don grow, and some na when them don old. E never too tey wey one woman wey dey 97 years study Bible with Jehovah Witness people and baptize.

² If Jehovah Witness person de study Bible with you, or your papa and mama na Jehovah Witness, you de plan to baptize? If your answer na yes, know say na better thing you want do. But before you go fit baptize, you go need to give your life to Jehovah. This article go explain wetin e mean to give your life to Jehovah. And e go help you see why you no suppose fear to give your life to Jehovah and baptize.

WETIN E MEAN TO GIVE YOUR LIFE TO JEHOVAH?

3. Give example of people for Bible wey Jehovah choose or wey give their life to Jehovah to worship-am for special way.

³ For Bible time, Jehovah choose some people to do some special work, and some other people give theirself to-am, to worship-am for special way. Jehovah choose the nation of Israel to be im special people. But e choose some people for Israel to serve-am for special way. For example, Jehovah  choose Aaron to do special work for-am, wey be to be high priest for Israel. For the front of one cap wey them de call turban wey Aaron de wear, them put one long-flat gold wey be “holy sign say God don choose-am.” (Lev. 8:9) Nazirites na another example of people wey give theirself to Jehovah to worship-am for special way. The word “Nazirite,” na from one Hebrew word nazirʹ, wey mean, “Person Wey Them Keep,” or “Person Wey Give Imself or Wey Them Choose.” For Nazirites to fit do wetin them promise, them need to run from all the things wey the Law wey Jehovah give Moses talk say make them run from.—Num. 6:​2-8.

4. (a) When person give im life to Jehovah, wetin e don choose to do? (b) Wetin Jesus mean when e talk say: “If anybody want follow me, make e deny imself”?

⁴ When you give your life to Jehovah, e mean say you don choose to become Jesus disciple and you ready to put wetin Jehovah want as the number one thing for your life. Wetin this one mean? Jesus answer this question when e talk say: “If anybody want follow me, make e deny imself.” (Matt. 16:24) For Greek language, this part of the verse wey them translate as “make e deny imself,” fit still mean “e must tell imself no.” When you give your life to Jehovah, you need to run from anything wey Jehovah no like. (2 Cor. 5:​14, 15) For example, we go run from “the things wey body want,” like sex wey no clean for God eye. (Gal. 5:​19-21; 1 Cor. 6:18) Life go hard you if you obey wetin Bible talk? No. If you love Jehovah and believe say all im law na to help you, you go see-am say Jehovah law no be to make life hard for you. (Ps. 119:97; Isa. 48:​17, 18) One brother wey im name na Nicholas talk say: “You fit see Jehovah law as prison fence wey no de allow you to do wetin you like, or as fence wey de protect you from lion wey dey the other side.”

5. (a) How you fit give your life to Jehovah? (b) When you give your life to Jehovah, how e take different from when you baptize? (Still check the picture.)

 ⁵ How you fit give your life to Jehovah? You fit do this one when you pray to Jehovah and promise-am say na only im you go worship and say you go put wetin e want as number one thing for your life. This one mean say you de promise Jehovah say you go continue to love-am “with all your heart, and with all your soul and with all your mind and with all your power.” (Mark 12:30) When you give your life to Jehovah, na only you and Jehovah know. But when you baptize, na that time people go know say you don give your life to Jehovah. The promise wey you make to Jehovah when you give-am your life na serious promise wey you no suppose fail, and Jehovah expect say make you do as you promise.—Eccl. 5:4, 5.

WHY YOU NEED TO GIVE YOUR LIFE TO JEHOVAH?

6. Wetin suppose move person to give im life to Jehovah?

⁶ The number one thing wey suppose move you to give your life to Jehovah na because you love-am. Your love for Jehovah no be only how you de feel about-am. But you love Jehovah because of the truth wey you don learn about-am, and im holy spirit help you to fit understand-am. (Col. 1:9) The things wey you learn from Bible don help you believe say (1) Jehovah dey real, (2) Bible na the Word of God, and (3) say Jehovah de use im organization do wetin e get for mind.

7. Which things we suppose de do before we fit give our life to Jehovah?

⁷ Before person give im life to Jehovah, e suppose don learn the main teaching for Bible, de live im life the way Jehovah want, and  de do im best to tell people wetin e don learn from Bible. (Matt. 28:​19, 20) Im love for Jehovah don grow and e don make up im mind say na only Jehovah e go worship. No be so e be for you? If you love Jehovah with all your heart, you no go give Jehovah your life and baptize because you want make your Bible teacher or your papa and mama happy, or just because your friends don give their life to Jehovah and baptize. Instead, you go do-am because of the love wey you get for-am.

8. When you think deep about wetin Jehovah don do for you, how this one go help you?

⁸ When you think deep about all the things wey Jehovah don do for you, e go dey easy for you to decide to give your life to-am. (Read Psalm 116:​12-14.) Bible talk say “Every good gift, and every gift wey complete de come” from Jehovah. (Jas. 1:17) The gift wey dey important pass wey Jehovah don give you, na Jesus sacrifice. Just think-am! Jesus sacrifice don make-am possible for you to fit be Jehovah friend. And e don make-am possible for you to fit live forever. (1 John 4:9, 10, 19) The best way to show say you value Jesus sacrifice and all the things wey Jehovah don take bless you, na to give your life to Jehovah. (Deut. 16:17; 2 Cor. 5:15) Lesson 46, point 4, for Enjoy Life Now and Forever! book, and the video for there, explain how we fit do this one. The title of the video na, Things Wey We Fit Give Jehovah.

YOU DON READY TO GIVE YOUR LIFE TO JEHOVAH AND BAPTIZE?

9. Why e no good to compare yourself to other people?

⁹ You fit de think say you never ready to give your life to Jehovah and baptize. E fit be say some things still dey wey you need to change for your life. Or e fit be say you need more time to make your faith strong pass as e be now. (Col. 2:6, 7) All Bible students no de progress for the same way, and all young people no de ready to give their life to Jehovah and baptize for the same age. So, try understand the things wey you need to change for your life, so that you go fit give your life to Jehovah and baptize. Make you no de compare yourself to other people.—Gal. 6:4, 5.

10. Wetin you go do if you never really ready to give your life to Jehovah and baptize? (Still check the box “ For Young People Wey Their Papa and Mama Na Jehovah Witness.”)

¹⁰ Even when you see say you never ready to give your life to Jehovah and baptize, e good make e still be your plan to do-am. Pray make Jehovah help you to fit change the things wey you need to change for your life. (Phil. 2:13; 3:16) Make you know say e go hear your prayer and help you.—1 John 5:14.

WHY SOME PEOPLE DE FEAR

11. How Jehovah de help us fit serve-am well?

¹¹ Some people wey don reach to give their life to Jehovah and baptize, fit still de fear. Them fit de think say after them don baptize, them fit disfellowship them if them commit serious sin. If you de feel like that, make you know say Jehovah go give you everything wey you need to fit ‘live your life as person wey de serve Jehovah, so that you go really make-am happy.’ (Col. 1:10) Another thing be say, e go give you the power wey you need to fit do the correct thing. E don help other people before, so trust say e fit help you. (1 Cor. 10:13) Because of this one, people wey them de disfellowship for congregation no plenty. Jehovah de help im people to fit continue to serve-am well.

12. Wetin go help us no commit serious sin?

¹² All of us no dey perfect. Because of this one, our body de push us sometimes to do  wetin bad. (Jas. 1:14) But e dey your hand to choose whether you go do wetin your body de push you to do, or you no go do-am. The truth be say, e dey your hand to choose how you go live your life. Some people de talk say e no dey our hand to control how we de feel and do things. But that one na lie! You fit learn how to control the way you de feel and do things. And even if your body de push you to do wetin bad, you fit decide say you no go do-am. To fit do this one, you need to de pray everyday. Continue to study Bible and think deep about wetin you de learn. No de miss meeting and continue to de preach to people. If you de do all this things, e go help you fit do wetin you promise Jehovah when you give-am your life. And no forget say Jehovah go help you to fit do-am.—Gal. 5:16.

13. Which better example Joseph show us?

¹³ E go easy for you to continue to worship Jehovah well if you don decide wetin you go do before temptation come. Bible tell us about some people wey do like that, and this one help them succeed to worship Jehovah well, even though say them no dey perfect. Joseph na one example. Plenty times, Potiphar wife try to make Joseph sleep with-am. But Joseph don decide for im mind wetin e go do before temptation come. Bible tell us say Joseph no gree! E talk say: “How I go come do this kind bad thing and sin against God?” (Gen. 39:​8-10) E dey clear say Joseph don plan wetin e go do even before Potiphar wife come meet-am. Na this one make-am easy for-am to fit run from the temptation.

14. Wetin go help us no fall for temptation?

¹⁴ How you fit copy Joseph example when you face temptation? You fit decide now wetin you go do when temptation come. Learn to run from things wey Jehovah hate quick-quick, and no even think about them. (Ps. 97:10; 119:165) If you do like this, you no go fall when you face temptation. Because you go don already know wetin you go do before the temptation come.

15. How person fit show say e de use all im heart look for Jehovah? (Hebrews 11:6)

¹⁵ E fit be say you dey sure say wetin you don learn from Bible na the truth and you want serve Jehovah with all your heart, but something still de make you fear to give your life to Jehovah and baptize. You fit copy King David example. Like David, beg Jehovah  say: “Check me well, O God, and know my heart. Check me and know the things wey de worry me for mind. See whether I get any bad thing for my heart, and help me make I fit de waka for the way wey lead to everlasting life.” (Ps. 139:​23, 24) This kind prayer de show say you want make Jehovah help you, and say you de do your best to fit give-am your life and baptize. And Jehovah de bless “people wey de use all their heart de look for-am.”—Read Hebrews 11:6.

CONTINUE TO MAKE YOUR FRIENDSHIP WITH JEHOVAH STRONG

16-17. How Jehovah de draw people wey them born for truth to imself? (John 6:44)

¹⁶ Jesus talk say na Jehovah de draw people wey want be im disciple, come near-am. (Read John 6:44.) Think about wetin this one mean, and how e take concern you. Jehovah de see good thing about each person before e go draw-am to imself. And e de see each person wey e draw to imself as im “special property.” (Deut. 7:6) Na so e de see you too.

¹⁷ E fit be say you be young person wey im papa and mama dey for the truth. You fit de feel say you de serve Jehovah just because your papa and mama de serve Jehovah, no be because Jehovah draw you to imself. But see wetin Bible talk, e say: “Make una come near God, and e go come near una.” (Jas. 4:8; 1 Chron. 28:9) When you take the first step to near Jehovah, Jehovah go come near you. Jehovah no de only see you as part of im organization, but e de draw each person to imself, even person wey them born for truth. When this kind person take the first step to near Jehovah, Jehovah go near-am just as James 4:8 talk.—Compare 2 Thessalonians 2:13.

18. Wetin we go talk about for the next article? (Psalm 40:8)

¹⁸ When you give your life to Jehovah and baptize, you de copy Jesus example. E use all im heart give imself to Jehovah and ready to do anything wey Jehovah want. (Read Psalm 40:8; Heb. 10:7) For the next article, we go talk about wetin go help you fit continue to worship Jehovah well after you baptize.