1. Wetin fit make some people no want study?

NOWADAYS, e no dey easy to survive. Person go need to really work hard. Many of our brothers de work with plenty time to fit provide wetin their family need. Many other brothers de spend plenty time for road to travel go work and to come back from work. And for many of this brothers, their work really need power and na strong work. When this brothers and sisters finish their work for the day, they go don over tire! They go don tire sotey they fit no get power to study again.

2. Which time you de use study?

² But the truth be say, we must find time to study Bible and our publications. Yes, we really need to study. This one dey important if we want get tight friendship with Jehovah and live forever! (1 Tim. 4:15) Na for early morning some people de get up from sleep to study everyday. Their house go dey quiet that time and their mind go dey fresh after they get up from sleep. For other people, na when day don end them de use small quiet time study and think deep about wetin they study.

3-4. Wetin don change about the amount of things wey we de receive from Jehovah’s organization, and why?

³ True-true, you go gree say na important thing for us make we find time to study. But, wetin we suppose to study? You fit talk say, ‘Plenty things dey to read. For me to read everything no dey easy.’ Some people de fit read and watch everything wey the organization de give us. But many other brothers de struggle to fit do that one. Governing Body know this one. Because of this one, e never take long time wey Governing Body decide say the amount of things wey we go de print and produce for Internet, go reduce.

 ⁴ For example, we no de do Yearbook again. This one na because plenty experience dey for jw.org^® and JW Broadcasting^® wey we de do every month. The experience them fit encourage us. Na just three times every year we de produce the Watchtower and Awake! magazines wey we de give people for preaching. Why we make this change? We no make this change so that we go get more time for other things. Instead, we make this change so that we go fit get time to sofri think about “wetin dey more important.” (Phil. 1:10) Make we talk about how you fit know wetin dey more important and how you fit really benefit well from your personal study.

5-6. Which publications we want make sure say we study sofri-sofri?

⁵ Wetin we go first study? True-true, we need to spend time everyday de study Bible. The number of verses wey we need to read every week for congregation Bible reading don reduce. Na so because this one go give us more time to think deep about wetin we read and do more research. Our plan no be just to read all the verse for that week. Instead, we need to allow the message for Bible touch our heart so that our friendship with Jehovah go de grow.​—Ps. 19:14.

⁶ Which other thing we need to sofri study? True-true, we want prepare for Watchtower Study, Congregation Bible Study, and our midweek meeting. We go still read each Watchtower and Awake! magazine.

7. If we no fit read or watch everything for our website and JW Broadcasting, we go allow that one make us tire?

⁷ You fit talk say, ‘Na true, but what of all the other things for our jw.org website and JW Broadcasting? Things plenty o!’ Think about this example: Different-different kind of food dey for restaurant and they surplus. But customers no go try to chop everything for the restaurant. Instead, they go just chop some of the food wey they choose. For the same way, if you no fit de read and watch everything wey we receive from the organization for Internet, make that one no make you tire. Read or watch the one wey you fit. Now, make we talk about wetin e mean to study and how we fit gather everything wey we fit from our study.

8. Which things we fit do when we de study Watchtower, and how this one go help you?

⁸ When person de study, e de put e mind for wetin e de read so that e go fit learn important thing. Study no be just to rush read something and mark answers. For example, when you de prepare for Watchtower Study, make you first read the part wey be “Wetin We Go Learn?” for the beginning of the article. Number two, make you read and think about the topic of the article. Do the same thing for the small topics and the review questions. Then, take time read the article sofri-sofri. Some sentence go help you know wetin the paragraph talk about. This kind sentence na normally the first sentence for every paragraph. Make you check them well. Many times, this sentence go help you know the point wey the paragraph want explain. As you de read the article, think about the way each paragraph support the small topic and the main lesson wey the article de talk about. Write any word or point wey you no know before and wey you want do research about.

9. (a) Why e dey fine make we check the Bible verses well when we de study Watchtower, and how we go do-am? (b) As e dey for Joshua 1:8, which other thing we need to do apart from to read Bible verse?

⁹ Na Bible we de study for our Watchtower  Study. So make you check the Bible verses well, especially the ones wey congregation de read when them de discuss the article. Check them well to know how the main words or group of words for the verse de support the point wey the paragraph de talk about. Apart from that one, take your time think deep about the verse wey you read, and about how you fit use them for your life.​—Read Joshua 1:8.

10. With wetin we learn for Hebrews 5:14, why e dey good make papa and mama spend time for family worship to teach their children how to study and do research?

¹⁰ Na normal thing say, papa and mama want make their children de enjoy the Family Worship wey them de do every week. And na good thing for papa and mama to always get plan about the thing wey the family go discuss for family worship. But, they no need to feel say they go always arrange special thing or project every week wey the family go do. Na true say families de do different-different things for Family Worship, like to watch program every month for JW Broadcasting. They still de do special project sometimes, maybe to make wetin be like the ark of Noah for Bible. Even with that one, na important thing for children to still learn how to study. For example, they need to learn how to prepare for congregation meeting, or how to do research about problem or question wey person ask for school. (Read Hebrews 5:14.) If they spend some time to study Bible topic like this for house, this one go make-am dey easy for them to understand the things wey we de learn for meeting, assembly, and convention. And remember say no be everytime this things de get video to watch. Another thing be say, children dey different-different age and their character no be the same. So the amount of time wey papa or mama go spend with them for study no go be the same.

11. Why e dey important make we teach our Bible students how to do better study by theirself?

¹¹ Our Bible students still need to learn how to study. When they just start to study Bible, we dey happy if them de underline their answer when them de prepare for their study or congregation meeting. But we need to teach them how to do research and do deep study by theirself. With that one, when they face problem they no go run quick-quick go ask people for congregation wetin they go do. Instead, they go know how they fit do research for inside our publication and get the advice wey they need.

12. Which reasons we fit de think for mind as we de study?

¹² If you no like to de study, you fit no think say e dey possible for you to learn how you fit de enjoy your study. But, you go fit learn-am. You fit start with small time and as you continue, make you increase the amount of time wey you de use for study. Think about why you de study. Na true say, the main reason why we de study na to make our friendship with Jehovah de tight more-more. But one other reason fit be say we want immediately find answer to question wey person ask, or do research about problem wey we de face.

13. (a) Explain the things wey young person fit do to defend wetin e believe for school. (b) How you fit follow the advice for Colossians 4:6?

¹³ Make we talk about one example. Maybe you be young person and you still de go school. All your classmates fit believe say people appear for this earth by mistake, say no be God make them (or, evolution). You go like to defend wetin Bible talk. But maybe you no feel say you fit do-am. So you go need to study! You fit get two reasons why you want study. (1) You want learn wetin go make your faith strong say na God make everything. And (2) you want learn how you go fit explain the truth well pass before. (Rom. 1:20; 1 Pet. 3:15) You fit ask yourself say, ‘Why my classmates believe evolution?’ Then, take time do research for our publications. To defend the truth for Bible fit no hard as you think-am. The reason why plenty people believe evolution na just because person wey they respect tell them say na true. But some people really want know the truth. So if you find one or two things to tell people, you fit help person learn the truth.​—Read Colossians 4:6.

14-16. (a) Wetin you fit do so that you go fit learn more about the Bible book wey you no too know about? (b) Explain how the Bible verses for the paragraph fit help you to understand the book of Amos more-more. (Still check the box “ Make the Bible Dey Real to You!”)

¹⁴ Imagine say for one congregation meeting we go read and talk about one Bible book. Na one of the men wey people de call minor prophet write this Bible book. And maybe you no too know things about this prophet. Wetin fit help you? One thing na to do wetin go make you like to learn about the Bible book wey this prophet write. How you fit do-am?

¹⁵ The first thing na to ask yourself say: ‘Wetin I know about this prophet? Who e be, which place e live, which work e do?’ When we learn more about the person, we fit really understand why e use some kind word and example. Some things for the verses fit help you understand the kind person wey the writer be. Look for this things as you de read the Bible.

¹⁶ The second thing na to know when they write the book. You fit do that one if you check “Table of the Books of the Bible” for back of the New World Translation of the Holy Scriptures. Apart from that one, you fit check Appendix A6 to see the chart of prophets and kings. If the Bible book wey you de study na about prophecy, e go dey fine if you find out how condition be the time wey they write that book. Which bad things the people de think or do wey the prophet want correct? Which people live for the same time wey the writer dey alive? You fit need to check other place to fit understand well how things be that time. For example, some things happen for the time of prophet Amos and you want understand more about this things. For you to learn more, you go read some other verses for  2 Kings and 2 Chronicles. You go see this verses for the marginal reference (or, Bible verses for center of the page) wey Amos 1:1 get. Apart from that one, you fit check the things wey Hosea write about. Hosea fit don live around the time wey Amos dey alive. All this other Bible books go help you understand more-more how condition be for the time of Amos.​—2 Ki. 14:25-28; 2 Chron. 26:1-15; Hos. 1:1-11; Amos 1:1.

17-18. We fit enjoy our personal Bible study more-more if we de notice some small-small information wey dey like say they no dey important. Use examples for the paragraph or your own example to show say this one na true.

¹⁷ When we de read Bible, na good thing for us to really get the mind to want learn more. For example, make we talk say you de read chapter 12 of Zechariah. That chapter na prophecy about the death of the Messiah. (Zech. 12:10) When you reach verse 12, you read say “the family from the house of Nathan” go really cry and dey sad when the Messiah go die. Instead of you to pass that small information quick-quick, you fit wait small and ask say: ‘Wetin concern the house of Nathan with the Messiah? Any way for person to get more information?’ Then you try to find out more. One of the marginal reference direct you go 2 Samuel 5:13, 14, and for there you learn say Nathan na one of the son of King David. The second marginal reference na Luke 3:23, 31. That verse show say Jesus come from the family of Nathan, and Nathan na forefather of Mary. (Check “Joseph, son of Heli,” study note for Luke 3:23.) At once, your interest just come up! You be know say one prophecy talk say Jesus go come from the family of David. (Matt. 22:42) But David get pass 20  sons. So Zechariah make us know the reason why the family of Nathan go really dey sad about the death of Jesus. No be fine information be this?

¹⁸ Make we talk about another example. For the first chapter of Luke, we read say angel Gabriel visit Mary. The message wey the angel bring go don surprise Mary. This message na about the son wey Mary go born. The angel talk say: “This pikin go dey great and they go call this pikin Son of the Most High, and Jehovah God go put the throne of David e papa for e hand. E go rule as King forever for the house of Jacob.” (Luke 1:32, 33) Na normal thing if we notice only the first part of the message from Gabriel. E talk say they go call Jesus “Son of the Most High.” But Gabriel still talk say Jesus go “rule as King.” So we fit de wonder wetin Mary think say Gabriel de talk about. Mary think say Gabriel de talk say Jesus go replace King Herod or take the place of one of the rulers after Herod for Israel? If Jesus become king, Mary go receive special honor as the mama and e family go live for palace. But Bible no talk say Mary mention anything like that to Gabriel. And we no ever read say Mary ask for special position for the Kingdom, as two disciples of Jesus do. (Matt. 20:20-23) This small information make us dey sure more-more say Mary na really humble woman!

19-20. As James 1:22-25 and 4:8 explain, which reasons we fit de think for mind when we de study?

¹⁹ Make we remember say, the main reason why we de study Bible and our publications na to make our friendship with Jehovah de grow. Apart from that one, we want really see more-more “the kind person wey” we be and things wey we need to change so that we go fit make God glad. (Read James 1:22-25; 4:8.) So any time wey we start to study, make we tell Jehovah to give us holy spirit. We go beg Jehovah make e help us to really benefit well from wetin we de study and help us see ourself the way e de see us.

²⁰ Make all of us be like the faithful servant of God wey the book of Psalms talk about say: “Wetin de make this kind person to dey happy na the law of Jehovah. E de read-am and de think deep about-am for day and for night. . . . Everything wey e de do go succeed.”​—Ps. 1:2, 3.