1. Wetin the prophecy for Bible help us know?

SMALL time for future, wetin go happen to servants of Jehovah? We fit know the answer. Bible tell us which important things go soon affect all of us. One prophecy for Bible help us see wetin some very strong governments for this earth go do. This prophecy dey for Daniel chapter 11, and e talk about two kings. This kings go fight each other, and Bible call them king of the north and king of the south. Plenty things wey the prophecy talk about don already happen, so we dey sure say the remaining things go still happen.

2. As e dey for Genesis 3:15 and Revelation 11:7 and 12:17, which important things we need to remember when we de study the prophecy for the book of Daniel?

² If we want understand the prophecy for the book of Daniel chapter 11, make we remember say the only rulers and governments wey the prophecy talk about na the ones wey don rule place wey plenty servants of God de live or they don attack servants of God before. Even though say servants of God dey very small pass the number of people for this world, this governments still de attack them. Why e be like that? Na because the main thing for Satan and this world wey e de control na to destroy servants of Jehovah and followers of Jesus. (Read Genesis 3:15 and Revelation 11:7; 12:17.) Another thing na say, the prophecy wey the book of Daniel talk about must agree with other prophecy for Bible. And if we  want really understand the prophecy for the book of Daniel, we need to check other parts for Bible.

3. Wetin we go talk about for this article and the next one?

³ So now, make we talk about wetin dey Daniel 11:25-39. We go see who the king of the north and the king of the south be from 1870 to 1991. And we go see why e good make we change the way we understand some things for this prophecy. For the next article, we go discuss Daniel 11:40–12:1, and we go explain wetin that part of the prophecy tell us about the time from 1991 to the war of Armageddon. As you de study this two article, e good make you check wetin dey for this topic “Two Kings for the Time of the End Wey No De Agree With Each Other.” But the first thing wey we go do now, na to know who the two kings for this prophecy be.

4. Which three things go help us know the king of the north and the king of the south?

⁴ The name “king of the north” and “king of the south” first de describe the rulers for other lands wey dey the north side of Israel and the south side of Israel. Why we talk like that? Na because the angel tell Daniel say: “I don come make you understand wetin go happen to your people for the last part of the days.” (Dan. 10:14) The nation of Israel continue to be people of God until Pentecost 33 C.E. But from that time, Jehovah make-am dey clear say na the faithful disciples of Jesus be e people. So, plenty things for the prophecy for Daniel chapter 11 na about followers of Jesus Christ no be the nation of Israel. (Acts 2:1-4; Rom. 9:6-8; Gal. 6:15, 16) And as time de go, different rulers or governments don be king of the north and king of the south for different-different time. But even with that one, some things make all of them resemble. Number one, the kings rule land wey plenty servants of God de live, or they suffer servants of God. Number two, the way they treat servants of God show say they hate the true God, Jehovah. And number three, the two kings de struggle with each other to gain power.

5. From the year 100 go reach the year 1870, king of the north and king of the south dey? Explain.

⁵ Some time after the year 100 C.E., lie-lie Christians come de plenty among true Christians. They start to teach lie-lie and they hide the truth wey Bible de teach. From that time go reach the year 1870, no group de serve God together as e servants for this earth. Lie-lie Christians come plenty like useless plant. Because of that one, e really hard to know who be true Christians that time. (Matt. 13:36-43) Why e dey important to know this one? Na because e show say the king of the north and the king of the south no fit be kings or governments between the year 100 and the year 1870. That time, God no get any organization for the earth wey they go attack. * But  small time after the year 1870, e dey possible to know the king of the north and the king of the south. Why e be like that?

6. Which time servants of God start to dey together again as one group? Explain.

⁶ From the year 1870, servants of God begin dey as one group to worship God. Na that year Brother Charles T. Russell and e friends form one Bible study class. Na Brother Russell and e friends be the messenger wey Bible talk say go clear the way before Jesus begin rule for heaven. (Mal. 3:1) So God don get group of true worshippers again! Any government for the world that time go suffer servants of God? Make we see.

7. Who be the king of the south until 1917?

⁷ For the year 1870, Britain don de rule plenty place pass any other country for the world, and na their army strong pass for the whole world. The prophecy for the book of Daniel, talk say one small horn go break three other horns. The small horn na Britain, and the other horns na France, Spain, and Netherland. (Dan. 7:7, 8) And Britain come be the king of the south until 1917. Around this same time, America don be the richest country for the world, and e don start to be tight friend with Britain.

8. Who don be the king of the south for the last days?

⁸ For World War I, Britain and America come together as one for the war and they come really dey powerful. That time, America and Britain come be friends and together they come be the strongest country for the whole world. As Daniel talk, this king don gather army  and they “go over plenty and they go strong.” (Dan. 11:25) For the last days, the king of the south don always be Britain and America. * But, who come be the king of the north?

9. Which time new king of the north come out, and how the thing wey Daniel 11:25 talk happen?

⁹ For 1871, the year after Brother Russell and e friends form their Bible study group, new king of the north come dey. That year, different-different area wey their language na German language come together and they become one strong country wey them de call Germany. As time de go, Germany begin control some countries for Africa and the Pacific Ocean, and e try to get more power pass Britain. (Read Daniel 11:25.) So Germany come gather plenty army and remain small their army for almost strong reach the one wey Britain get. For the time of the first world war, Germany use that army to fight e enemies.

10. The thing wey Daniel 11:25b, 26 talk, how e happen?

¹⁰ Daniel still talk about wetin go happen to Germany and the army wey e don gather. The prophecy talk say the king of the north “no go stand.” Why e “no go stand”? Bible talk say: “Because they go plan secret things against-am. And the people wey de chop e better-better food go bring-am down.” (Dan. 11:25b, 26a) For time of Daniel, the people wey de “work for the king” dey among people wey de chop “the better-better food of the king.” (Dan. 1:5) Who the prophecy for this place de talk about? E de talk about the people for high position for government for Germany. Among this people na big-big oga them for army wey really dey close to the king. This people do wetin make the king stop to rule, and one new kind of government start for Germany. * The prophecy no only talk about how that king of the north go fall, but e still talk about the result of the war wey e go fight with the king of the south. The prophecy talk about the king of the north say: “As for e army, they go sweep-am comot, and they go kill many people.” (Dan. 11:26b) For first world war, just as Bible talk, they “sweep” German army “comot” and they “kill many of them.” Plenty people die for that war pass any other war before that one.

11. Wetin the king of the north and the king of the south do?

¹¹ Daniel 11:27, 28 talk say before World War I, the king of the north and the king of the south go “sitdown for one table de talk lie.” The prophecy still talk say the king of the north go gather “plenty-plenty property.” And this one na wetin happen. Germany and Britain talk say they want peace, but when they start to fight the war for 1914, e clear say they tell each other lie. And for some years go reach 1914, Germany don be the second country wey get money pass for the whole world. Then, as Daniel 11:29 and the first part of verse 30 talk,  Germany fight the king of the south but they win Germany for the fight.

12. For first world war, wetin the king of the north and the king of the south do?

¹² Since 1914, the two kings don de fight each other and de attack servants of God more-more. For example, for first world war, government for Germany and government for Britain suffer servants of God because they no gree fight for the war. And government for America arrest the brothers wey de direct the preaching work that time. The suffer wey they suffer this brothers show say the thing wey Revelation 11:7-10 talk don happen.

13. After 1930 and for the second world war, wetin the king of the north do?

¹³ Then after the year 1930, especially for the second world war, the king of the north really attack servants of God and e no pity them. When one party for politics wey them de call Nazi party start to control Germany, Hitler and e people make law to stop the work wey servants of God de do. The king of the north kill plenty servants of Jehovah and send plenty-plenty of them go one place go suffer them. The book of Daniel don talk about this things before. The king of the north ‘show say e no respect the house of God at all’ and e “stop the sacrifice wey them de do everytime.” The king of the north do this one when e make law to stop the preaching work that time. (Dan. 11:30b, 31a) The leader wey e name na Hitler even promise say e go kill all servants of Jehovah for Germany.

14. Who come be king of the north after second world war? Explain.

¹⁴ After the second world war, Soviet Union come be the king of the north. E start to control plenty place wey Germany de control before. Soviet Union just dey harsh like Nazi government. They suffer any person wey e service to God dey important pass to obey government.

15. Wetin the king of the north do after the second world war end?

¹⁵ Small time after second world war end, the new king of the north wey be Soviet Union and other governments wey e de get support from, attack servants of God. As the prophecy for Revelation 12:​15-17 talk, this king make law to stop our preaching work and send plenty-plenty servant of Jehovah go place wey e no easy to survive for there. The truth be say, for the last days the king of the north don de suffer servants of God more-more, but e never fit stop their work. This suffer just be like “river,” as the prophecy talk for book of Revelation. *

16. How Soviet Union do wetin dey Daniel 11:37-39?

¹⁶ Read Daniel 11:37-39. As that prophecy talk, the king of the north no “respect the God of e papa them.” How? The Soviet Union get-am for mind make they remove religions, so they try to collect their power even as this religions don dey for long time. For the year 1918, Soviet government don already  de arrange say make schools no teach say God dey. How the king of the north “worship the god of protection”? Soviet Union spend plenty money to get e army and to produce plenty powerful weapon so that e go get more control. As time de go, the king of the north and the king of the south, gather enough powerful weapon to kill billions of people!

17. Wetin be “the dirty thing wey de cause destruction”?

¹⁷ The king of the north don support the king of the south to do one important thing. Bible talk say they go bring “the dirty thing wey de cause destruction.” (Dan. 11:31) That “dirty thing” na United Nations.

18. Why Bible talk say United Nations na “dirty thing”?

¹⁸ Bible talk say United Nations na “dirty thing” because e claim say e fit bring peace for the whole world; and this one na something wey only the Kingdom of God go fit do. The prophecy talk say that dirty thing “de cause destruction” because United Nations go attack and destroy all lie-lie religion.​—Check the topic “Two Kings for the Time of the End Wey No De Agree With Each Other.”

19-20. (a) Why we need to know all this things? (b) Which question we go answer for the next article?

¹⁹ We need to know all this things because e show say from the year 1870 go reach 1991, the prophecy for the book of Daniel about the king of the north and the king of the south don happen. So we fit dey sure say the remaining part of the prophecy go still happen.

²⁰ For the year 1991, Soviet Union fall. So today, na who be the king of the north? The next article go answer that question.