Sarah * talk say: “I sabi shame, I feel say I no reach anything, and say other people better pass me. And because of this one, I no de like to dey with proud people or people wey de force other people accept their idea. But my mind de come down when I de with gentle or humble person. I go fit dey free with this kind person, I go talk how I de feel and discuss my problems.”

The thing wey Sarah talk show say, other people go like to be e friend. Another thing be say, when we dey gentle e de make Jehovah glad. Bible talk say make we “dey gentle.” (Col. 3:12) Wetin e mean to dey gentle? How Jesus show say e dey gentle? When we dey gentle, how this one fit make us dey happy more-more?

When person dey gentle, e mean say the person dey calm. Gentle person no de treat other people for harsh way. E dey kind and e de get self control.

When person dey gentle that one no mean say na weak person. The Greek word for “gentle” na the same word wey they use describe horse wey they don train to control e power. No be say the horse no get power again, but because of the training wey e don receive, e de fit control e power. Na so e still be with us, when we dey gentle we go fit control ourself and dey peaceful with other people.

Person fit think say, ‘I no be gentle person since wey they born me.’ We de live for the world wey many people de force other people accept their idea and they no dey patient. This one fit make-am hard for us to dey gentle. (Rom. 7:19) So e dey clear say we need to work hard to dey gentle. But the holy spirit wey Jehovah de give go help us as we continue to work hard to dey gentle. (Gal. 5:22, 23) Why we go need to work hard to dey gentle?

To dey gentle na fine character, and people really like-am. Just like Sarah wey we talk about for up, our mind de come down when we dey with gentle person. Jesus na number one example of gentle and kind person. (2 Cor. 10:1) Because of this one, children want dey with Jesus even as they no know-am.​—Mark 10:13-16.

To dey gentle good for us and for people around us. If we dey gentle, situation no go tire us quick-quick and we no go quick de vex. (Prov. 16:32) Our mind no go de worry us,  because we no go do wetin go make other people vex, especially people wey we love. And people around us go benefit because we go control the way we de feel and behave and we no go do wetin go pain them.

Even though say Jesus get plenty work to do and e dey busy, e still dey gentle to everybody. Many people for the time of Jesus de suffer and de struggle with heavy load wey they carry, so they need help. They go don really glad when Jesus tell them say: “Come meet me because I dey gentle for heart and humble!”​—Matt. 11:28, 29.

How we go fit dey gentle for heart like Jesus? We go study Bible to learn how Jesus deal with people and handle some hard situation. Then, when we face any situation wey fit make us no dey gentle, we go try to do like Jesus. (1 Pet. 2:21) Make we see three things wey help Jesus to dey gentle.

Jesus really dey humble. Jesus talk say e dey “gentle for heart and humble.” (Matt. 11:29) Bible use this two character together because, to dey gentle and to dey humble de go together. (Eph. 4:1-3) Why e be like that?

When we dey humble we no go take ourself too serious or de vex quick-quick because of the things wey other people talk about us. Some people attack Jesus say e de “chop too much” and e de “drink too much wine.” How Jesus answer this people? Jesus show say the thing wey they talk na lie for the way e live e life. Because e dey humble, e show them for gentle way say, “better sense de use the kind work wey e de do show say e dey righteous.”​—Matt. 11:19.

If person talk bad thing about where you come from, the kind person wey you be, or how they train you, e go good if you try to answer the person for gentle way. One elder wey e name na Peter for South Africa talk say: “When person do wetin I no like, I de first ask myself say ‘if na Jesus wetin e for do?’” The brother still talk say: “One thing wey I don learn na make I no de take my self too serious.”

Jesus know say we no dey perfect. Disciple of Jesus always want do wetin dey right, but because they no dey perfect, e talk say they no do the right thing everytime. For example, the night before Jesus die Peter, James, and John fail to support Jesus when e need them. Jesus show say e understand their condition when e talk say: “I know say wuna spirit dey ready, but wuna body dey weak.” (Matt. 26:40, 41) Jesus no vex for e apostles because e understand say they no dey perfect.

Mandy na one sister wey de always talk bad about other people, but now e de really try to dey gentle like Jesus. E talk say: “I de try to remember say all of us no dey perfect, and to always see only the good wey people de do just like Jehovah.” As Jesus no vex for e disciple because e understand say they no dey perfect, this one fit help you to dey gentle with other people?

Jesus get trust for God. Jesus endure harsh treatment when e dey for this earth. People no value Jesus they reject and suffer-am. Even with that one, e still continue to dey gentle because “e put e self for the hand of the person wey de judge well.” (1 Pet. 2:23) Jesus know say e Father for heaven go take care of-am and for the right time e go punish the people wey treat-am for bad way.

If people treat us for bad way, and we vex do something we fit make our situation worse. That na why Bible talk say: “Person vex no de bring God righteousness.” (Jas. 1:20) Even if the reason why we vex dey right, but because we no dey perfect, we fit do something wey no dey right.

Before-before, one sister for Germany wey e name na Cathy de think say, ‘If you no defend yourself, no body go fit help you.’ But when e learn why e good to trust Jehovah, the way e de think change. E talk say: “Now I no need to always dey ready to defend myself again.” E still talk say: “I de like to dey gentle because I know say Jehovah go correct everything wey no dey right for this world.” If people don treat you for bad way, when you follow the example of Jesus to always trust God, this one go help you to always dey gentle.

Jesus make-am clear say, if we want dey happy for life we must dey gentle. E talk say: “When people dey gentle for heart, they go dey happy.” (Matt. 5:5) Now, make we see some examples to show say when person dey gentle e de really help.

If we dey gentle, e de help when problem dey marriage. One brother wey e name na Robert from Australia talk say: “I don talk plenty bad things to my wife, but no be say I really mean this things. I de feel bad when I say the things wey I talk really pain my wife. But the problem be say, when person vex talk something, e no go fit gather all the things wey e talk back.”

“All of us de make mistake many times” for the things wey we de talk. And when we no think well before we talk something, e fit bring problem for our marriage. (Jas. 3:2) When this kind thing happen, if we dey gentle e go help us dey calm and control our tongue.​—Prov. 17:27.

Robert work hard to control e self and dey calm. Wetin be the result? E talk say: “Now when me and my wife no agree on something, I de try my best so that I no go vex, I go listen well, and talk for gentle way. Now, me and my wife don understand ourself more pass before and our friendship don tight more.”

When we dey gentle, e go help us do things well with other people. People wey de vex quick no de get plenty friends. When we dey gentle, e go help us continue to get the “peace wey de make us dey as one.” (Eph. 4:2, 3) Cathy wey we talk about for up talk say, “To dey gentle don give me the power to fit enjoy any situation with anybody, even though say e hard to do things with some people because of their character.”

When person dey gentle e de get peace of mind. Bible connect the “sense from heaven” with peace and to dey gentle. (Jas. 3:13, 17) Gentle person de get “cool heart.” (Prov. 14:30) Martin don work hard to dey gentle. E talk say: “Now, I no de stand my ground say they must do something the way I want make e be. I no de vex quick-quick again. And I de enjoy peace and happiness.”

True-true, we go need to work hard to dey gentle. One brother talk say: “Make I no lie, even till now I still de vex inside my heart when some kind things happen.” But Jehovah de encourage us say, e go help us if we no tire to continue to struggle to dey gentle. (Isa. 41:10; 1 Tim. 6:11) Jehovah fit ‘finish our training,’ and e fit ‘make us strong.’ (1 Pet. 5:10) As time de go, just like apostle Paul we go fit de do like Jesus to dey “gentle and kind.”​—2 Cor. 10:1.