1-2. Wetin we go talk about for this article?

WE GET more reason for this our time to believe say the end of this wicked world don near. Today, different-different government no de support the Kingdom, but small time, Jehovah and Jesus Christ go destroy all of them. But before that time, the king of the north and the king of the south go continue to fight each other and de attack servants of God.

² For this article, we go talk about the prophecy for Daniel 11:40–12:⁠1. We go talk about who the king of the north be today and why we fit trust Jehovah say e go save us no matter wetin happen.

3-4. Who be the king of the north today? Explain.

³ Servants of God get small freedom after Soviet Union fall for 1991. The book of Daniel call this freedom “small help.” (Dan. 11:34) This one make them dey free to preach. And small time, the number of publishers for countries wey be part of Soviet Union before come over plenty. But as time de go, Russia and other countries wey e de get support from, come be the king of the north. As we don talk for the article before this one, for any government to be king of the north or king of the south, e must do this three things: (1) de rule place wey plenty servants of God de live or de attack servants of God, (2) the things wey e de do go show say e be enemy of Jehovah and e people, and (3) the two kings go dey against each other.

⁴ See why we talk say today, the king of the north na Russia and other countries wey e de get support from. (1) They attack servants of God as they try to stop the preaching  work and suffer plenty-plenty brothers and sisters for the areas wey them de rule. (2) This things wey they do show say they hate Jehovah and e people. (3) They don try to strong pass Britain and America, wey be king of the south. Make we see how Russia and other countries wey e de get support from don show say na them be the king of the north.

5. Wetin Daniel 11:40-43 talk about?

⁵ Read Daniel 11:40-43. This part of the prophecy talk about the time of the end. E talk about how the king of the north and the king of the south go de struggle with each other. The book of Daniel talk say for the time of the end, the king of the south go de “struggle with,” or “use horn fight” the king of the north.​—Dan. 11:40; ftn.

6. Wetin show say the two kings don de struggle with each other?

⁶ The king of the north and the king of the south de attack each other because they want be the number one government for the whole world. For example, think about wetin happen after second world war when Soviet Union and other countries wey e de get support from begin control plenty place for Europe. The things wey the king of the north do force the king of the south to get agreement with other countries make they join their army together against the king of the north. The name of the organization wey they form na North Atlantic Treaty Organization (NATO). Another thing be say, the king of the north and the king of the south de spend plenty money so that one of them go get strong army pass the other one. They still de fight each other when them de support each other enemy for war for Africa, Asia, and Latin America. For sometime now, Russia and countries wey e de get support from don get power more-more for the whole world. Apart from that one, they still de use computer de fight the king of the south. The two kings de talk bad about each other say one of them de use different-different computer program against the other one so that e go lose money and e government go spoil. And as the book of Daniel talk, the king of the north de continue to attack servants of God.​—Dan. 11:41.

7. Wetin be “the Beautiful land”?

⁷ Daniel 11:41 talk say the king of the north go enter “the Beautiful land.” Wetin be that land? For Bible time, na the land of Israel. Na Israel “fine pass among other lands.” (Ezek. 20:6) But that land really dey special because na for there people de worship Jehovah. Since Pentecost 33 C.E., “the Beautiful land” no be any place for the earth again. And this one make sense because today, servants of Jehovah dey for the whole earth. Instead, “the Beautiful land” today na the way servants of Jehovah de live their life. And part of the things wey them de do na to worship Jehovah for their meeting and preaching work.

8. How the king of the north don enter “the Beautiful land”?

⁸ For the last days, the king of the north don enter “the Beautiful land” many times. For example, when Nazi Germany  be the king of the north, especially for second world war, e enter “the Beautiful land” when e de suffer servants of God and de kill them. After second world war when Soviet Union become the king of the north, e enter “the Beautiful land” when e suffer servants of God and carry them go far place to suffer them.

9. For some years now, how Russia and other countries wey e de get support from don enter “the Beautiful land”?

⁹ For some time now, Russia and countries wey e de get support from still don enter “the Beautiful land.” How? For 2017, Russia make law to stop the work wey servants of Jehovah de do and put some of our brothers and sisters for prison. E still make law say e no want see any of our book them, even the New World Translation Bible. Apart from that one, e seize our branch office for Russia, our Kingdom Halls, and Assembly Halls. After all this things wey Russia do, for 2018 Governing Body talk say na Russia and other countries wey e de get support from be the king of the north today. But, servants of Jehovah no go fight any government or try to change-am, even when that government de suffer them. Instead, them de follow the advice for Bible wey talk say make we de pray for “everybody for high position,” especially when this people de make some decision about the freedom wey we get to worship God.​—1 Tim. 2:1, 2.

10. The king of the north go destroy the king of the south? Explain.

¹⁰ The main things wey Daniel 11:40-45 talk, na things about the king of the north. This one mean say the king of the north go destroy the king of the south? No. The king of the south go still dey “alive” when Jehovah and Jesus go destroy all government for this world for the war of Armageddon. (Rev. 19:20) Why we dey sure about this one? Think about wetin the prophecy for the book of Daniel and Revelation talk.

11. Wetin Daniel 2:43-45 mean? (Check picture for front cover.)

¹¹ Read Daniel 2:43-45. Prophet Daniel talk about different-different government wey rule place wey plenty servants of God de live. Bible describe them as big image with different-different part like iron, copper, silver and gold. The last government wey that Bible verse talk about na the feet of the image (or, the down part of the leg) wey they make with iron and clay. The feet of the image na Britain and America together. This one show say Britain and America go still de rule when the Kingdom of God go destroy all government for this world.

12. Wetin the number seven head for the wicked animal mean, and why e dey important make we know this one?

¹² Apostle John still talk about different-different government wey don rule place wey plenty servants of Jehovah de live. John describe this governments as wicked animal with seven head. The number seven head of the animal na Britain and America. This one dey important because Bible no talk say another head dey after this one. The number seven head of the animal go still de rule when Jesus and e army for heaven go destroy-am with the rest of the animal. *​—Rev. 13:1, 2; 17:13, 14.

13-14. Who be “Gog from the land of Magog,” and wetin fit make-am attack servants of God?

¹³ One prophecy wey Ezekiel write make us know wetin fit happen before God destroy the king of the north and the king of the south. E be like say the prophecy for Ezekiel 38:10-23; Daniel 2:43-45; 11:44–12:1; and Revelation 16:13-16, 21 de talk the same thing. If na so, then see wetin we think say go happen.

¹⁴ Sometime after great tribulation don start, the kings for “the whole earth” go come together as one to form one group. (Rev. 16:13, 14; 19:19) This one group wey the nations form go come be the thing wey Bible call “Gog from the land of Magog.” (Ezek. 38:2) This group of nations go attack servants of God for the last time and try to destroy all of them. Wetin go make them attack? For one prophecy about this time, apostle John talk say big-big stones go fall like rain de hit enemies of God. This big-big stone fit be the strong judgment message wey servants of Jehovah go de preach. E fit be say na this message go provoke Gog of Magog and make-am attack servants of God to destroy all of them.​—Rev. 16:21.

15-16. (a) Which things Daniel 11:44, 45 fit de talk about? (b) Wetin go happen to the king of the north and other governments wey be part of Gog of Magog?

¹⁵ This strong message and the last attack from enemies of God fit be the same thing wey Daniel 11:44, 45 talk about. (Read-am.) For that verse, Daniel talk say “news from the east and from the north” disturb the king of the north, and e “really vex” comot. The king of the north get-am for mind ‘to destroy many people.’ E be like say the “many people” wey this verse talk about na servants of Jehovah. * Maybe the thing wey Daniel de talk about for here na the last attack wey they go attack servants of God.

¹⁶ God go really vex when the king of the  north and other governments go attack e people, and then the war of Armageddon go start. (Rev. 16:14, 16) That time, Jehovah go destroy the king of the north and other governments wey be part of Gog of Magog, and “e no go see anybody to help-am.”​—Dan. 11:45.

17. Who be Michael “the great prince” wey Daniel 12:1 talk about? Wetin e de do now, and wetin e go soon do for future?

¹⁷ The next verse for this prophecy wey Daniel write tell us more things about how God go destroy the king of the north and other countries wey e de get support from, and how God go save us. (Read Daniel 12:1.) Wetin this verse mean? Michael na another name for Jesus Christ our King as e de rule for heaven. Jesus don “de stand for” servants of God since 1914 when e Kingdom start to rule for heaven. Small time for future, Jesus go “stand up,” for the war of Armageddon. This one mean say e destroy e enemies. That war go be the last thing wey Daniel talk say go happen for the “time of serious suffer.” This kind suffer never happen before. The prophecy wey John write for the book of Revelation de talk about the time just before Armageddon and the war of Armageddon. John call this time “great tribulation.”​—Rev. 6:2; 7:14.

18. Why we no need to fear no matter wetin go happen for future?

¹⁸ Daniel and John talk say Jehovah and Jesus go save their servants for great tribulation. So we no go fear no matter wetin go happen. Daniel talk say the people wey God go save na people wey they write their “name for the book.” (Dan. 12:1) Wetin we fit do so that our name go dey for that book? We must show say we get faith for Jesus, the Lamb of God. (John 1:29) We need to give our life to God and baptize. (1 Pet. 3:21) And we must do everything wey we fit do to help people learn about Jehovah to show say we de support e Kingdom.

19. Wetin we suppose to do now, and why?

¹⁹ Na now be the time to get more trust for Jehovah and e organization. Now na the time to support God’s Kingdom. If we do like that, we go survive when God’s Kingdom don destroy the king of the north and the king of the south.