1. Which example Jesus show e followers, and wetin they do? (Check picture for front cover.)

WHEN Jesus dey for earth, e continue to preach and get hope say people go listen to e message. And e want make e disciples do the same thing. (John 4:35, 36) When Jesus dey with e disciples, they put all their heart for the preaching work. (Luke 10:1, 5-11, 17) But as they arrest and kill Jesus, the disciples come weak for the preaching work for sometime. (John 16:32) After Jesus come back to life, e encourage the disciples make they put all their heart for the preaching work. And after Jesus go back to heaven, they really preach with all their heart sotey their enemies complain say: “See! Wuna don spread wetin wuna de teach enter everywhere for Jerusalem.”—Acts 5:28.

2. How Jehovah don bless the preaching work?

² Jesus direct the preaching work wey the Christians for time of apostles do, and Jehovah bless them. So plenty people accept their message. For example, for Pentecost 33 C.E., about 3,000 people baptize. (Acts 2:41) And the number of disciples continue to grow no be small. (Acts 6:7) Even with that one, Jesus talk say more people go even accept the good news for the last days.—John 14:12; Acts 1:8.

3-4. Why the preaching work no easy for some area, and wetin we go talk about for this article?

³ All of us fit try to always get the hope say people go listen to our message as we continue to preach. For some place them, e dey easy to do that one. Why? Na because plenty people get interest for Bible study, sotey some of them go need to wait until person don dey to study them.  But for some other place, the preaching work no dey easy for brothers and sisters. E de hard to see person for house. And if you see person for house, the person fit get only small interest for Bible.

⁴ If the preaching work no easy for your area, the things wey we go talk about for this article go fit help you. We go talk about wetin some publishers don do to help them meet more people to preach to. And we go talk about why we fit continue to get hope as we de preach, whether people listen to our message or they no listen.

5. Which things plenty publishers de face for their preaching work?

⁵ E de hard more-more for plenty publishers to see people preach to for house. Some publishers de live for area wey plenty flat dey inside one big building with tight security, or for some big area with gate. This buildings fit get gateman wey no de allow people to enter, unless somebody wey de live for the building give permission. For some other area, publishers no get problem to preach from house to house, but they no de see plenty people for house. Apart from that one, other publishers de preach for village or far-far place wey plenty people no dey. The publishers fit travel for long time just to see one person for house and maybe the person no go even dey house! If our territory be like this, make we no tire to preach. Wetin fit help us make we no tire and de preach to more people?

6. How preachers of the good news be like fishermen?

⁶ Jesus talk say the preaching work be like work wey fisherman de do. (Mark 1:17) Some fishermen fit work for days and they no go see any fish catch. But they no go stop. Instead, they go change the way them de do the work. They go change the time wey them de go, change the place, or the style wey them de use catch the fish. We fit do the same thing for our preaching work. So, make we talk about some things wey we fit do to help us.

7. Wetin fit happen if we preach for different time?

⁷ Try de preach for different time. We go meet more people if we preach for time wey they go fit dey for house. After all, person go come back to house! Plenty brothers and sisters don see say e better for them to preach for afternoon or for evening because they go meet more people. Another thing be say, the people wey they go meet fit get more time and dey ready to talk around that time. Or you fit do like one elder wey e name na David. E talk say after e preach with e partner finish for any territory, they go go back go check the people wey they no meet for house before. E talk say, “I de surprise to meet plenty people for house when we come back the second time.” *

8. How Ecclesiastes 11:6 concern our preaching work?

⁸ Make we no tire to go find people for their house. The Bible verse wey we take this article from, help us know the kind mind wey we suppose get. (Read Ecclesiastes 11:6.) David wey we talk about before no stop to go find people for their house. David come see person for one house after e don go many times. The man get interest to discuss Bible and e talk  say, “I don live for this place for about eight years, and I never see one Jehovah Witness person knock my door.” David talk say, “I don see say when you try meet people for their house at last, many times them de listen to the message wey we de preach.”

9. Wetin some publishers don do to see people wey they no de fit see for house?

⁹ Try different place. Some publishers de preach for other place so that they go fit see the people wey they no de fit see for house. For example, them de preach for street and them de use magazine-stand. This one de work for people wey de live for big buildings wey plenty flat dey inside, but wey they no de allow door-to-door preaching. This one de make our brothers and sisters de fit preach to people wey they no de fit see for this buildings. Apart from that one, plenty publishers don see say people de get more chance to listen to us or to collect our book them for park, market, and business area. One circuit overseer for Bolivia wey e name na Floiran, talk say: “We de go the markets and business place them between 1 o’clock and 3 o’clock for afternoon, when the people wey de sell go don dey free small. Many times, we de discuss well and de even start Bible study.”

10. Which ways you fit use preach to people?

¹⁰ Try different style. You fit don try to preach to person plenty times. You don visit the person different times, but you no de see the person for house. Another way dey to see this kind person? One sister wey e name na Katarína, talk say, “I de write  letter to people wey I no de see for house. I de write wetin I for tell them if to say I see them.” Wetin this one teach us? Try use different-different way to preach to everybody for your territory as you de do your preaching work.

11. Why some people no get interest for our message?

¹¹ Some people no want listen to our message. They no feel say they need to know God or Bible. They no believe say God dey because they don see plenty people de suffer for this world. They no get interest for Bible because they see say leaders for religion no de live clean life, but this leaders de claim say them de obey Bible. Other people de think about their work, their family, or their problem everytime, and they no feel say Bible fit help them. How we fit continue to get joy when the people wey we de go preach to no think say our message dey important?

12. How Philippians 2:4 fit help us for our preaching work?

¹² Show say you care about people. Plenty people wey no get interest for our message listen to our message after, when they see say we really care about them. (Read Philippians 2:4.) For example, David wey we talk about before talk say, “If person talk say e no get interest, we go keep our Bible or our book and talk say: ‘I go like to know why you de feel like that.’ ” People de know when person care about them. They fit forget the thing wey we talk, but they go fit remember how we make them feel. Even if the person no allow us talk, we fit show say we care about the person with the way our face be and how we behave.

13. How we fit preach for way wey go match the condition of each person wey we meet?

¹³ We de show say we care about people when we change the thing wey we plan to talk, so that e go match the condition of the person. For example, we see anything wey show say the person wey we meet get children? The papa and mama fit like to listen to advice for Bible about how to train children or how to get happy family. They lock their door with padlocks? We fit decide to talk about the bad-bad things wey de happen for the world, and how this one de make plenty people de fear. The person fit dey happy to hear say this things go end one day. Anytime wey you see people and they want listen, try to help them understand how the advice for Bible fit help them. Katarína wey we talk about  before talk say, “I de think about how the truth don really make my life better.” So, Katarína really believe wetin e de talk, and the people wey e de talk to fit see say this one na true.

14. As e dey for Proverbs 27:17, how preaching partners fit help each other?

¹⁴ Learn from other people. For time of the apostles, Paul teach Timothy the way e de preach and teach. And e encourage Timothy to use wetin e don learn to help other people. (1 Cor. 4:17) Like Timothy, we fit learn from brothers and sisters with experience for congregation. (Read Proverbs 27:17.) See the example of one brother wey e name na Shawn. For sometime, this brother pioneer for village area wey plenty people dey okay with their religion. Wetin help this brother continue to get joy? E talk say: “Anytime wey e dey possible, I de work with person. When we de travel go the next house, we de use that time to help each other to make the way we de teach de better. For example, we go talk about wetin the person wey we meet talk and how we answer the person. Then we go talk about wetin we fit do when we meet that kind person again.”

15. Why prayer dey important for our preaching work?

¹⁵ Pray to Jehovah make e help you. Tell Jehovah make e help you everytime wey you de preach. If the holy spirit no help us, we no go fit do anything. (Ps. 127:1; Luke 11:13) When you pray to Jehovah make e help you, talk that thing wey you want make e do. For example, tell Jehovah make e direct you go meet anybody wey dey ready to listen and learn about Jehovah. Then you must do your best to preach to anybody wey you meet.

16. Why e dey important make we de do our own study to make our preaching work de better?

¹⁶ Get time for your study. Bible talk say: “Prove to wuna self say wuna de do wetin good, wetin God accept and wetin God really want.” (Rom. 12:2) The more we de study, the more we de know about God. Then when we de talk to people about God, they go see say we really believe wetin we de talk. Katarína wey we talk about before talk say: “Sometime ago, I see say I need to make my faith strong for some things wey Bible de teach. So I take my time study about the things wey show say na God make everything, say Bible na really the Word of God, and say God get organization wey e de use today.” Katarína talk say the study wey e de do don make e faith strong and e don get more joy for the preaching work.

17. Why Jesus continue to preach even as some people no want listen?

¹⁷ Jesus continue to get hope and de preach, even though say some people no want listen to e message. Why? Jesus know say people really need to know the truth and e want help all the people wey e fit help to accept the message. E still know say even if some people no first listen to the message, they fit get interest after. Think about wetin happen for e own family. For three and half years wey Jesus do e preaching work for this earth, any of e brother no become e disciple. (John 7:5) But after Jesus come back to life, they become Christian.—Acts 1:14.

18. Why we de continue to preach?

¹⁸ We no know who go accept the truth  one day. Some people de take longtime to learn the truth pass other people. People de see our fine character and how we continue to preach, even if they no want listen to us. And after, they fit start to “give glory to God.”—1 Pet. 2:12.

19. As e dey for 1 Corinthians 3:6, 7, wetin we must understand?

¹⁹ As we de plant and de put water for wetin we plant, make we remember say na God de make-am grow. (Read 1 Corinthians 3:6, 7.) One brother for Ethiopia wey e name na Getahun talk say: “For more than 20 years, na me be the only Witness for one area wey publishers no de too come. But now, na 14 publishers dey here. Thirteen of them don baptize, and my wife and three children dey among them. Na around 32 people de come meeting.” Getahun de glad say e continue to preach as e de wait make Jehovah help people come e organization!—John 6:44.

20. How we be like people wey de save other people?

²⁰ The life of everybody dey important to Jehovah. E don give us the honor to work with e Son to gather people from all country before this wicked world end. (Hag. 2:7) Our preaching work be like the work wey people de do to save other people. And we be like the team or people wey they send go save people wey dey inside boat wey de sink. Even if na only some people dey alive for the boat wey the team fit save, the work wey everybody for the team do dey important. Na so e still be with our preaching work. We no know how many person we fit save from this world wey Satan de control. But Jehovah fit use any of us to help them. One brother for Bolivia wey e name na Andreas, talk say, “I know say when person learn the truth and e baptize, na because plenty people don work together to help the person.” Make we continue to see our preaching work like that too. If we do like that, Jehovah go bless us and our preaching work go really de give us joy.