1. Wetin fit don surprise you when you first try to tell people about the message for Bible?

YOU remember the time wey you first know say you don see the truth? You really understand the things wey you de learn from Bible that time. You think say everybody go like to learn the things wey you don believe. You really dey sure say the message for Bible go give them better life now and better hope for future. (Ps. 119:105) So you use all your heart to tell your friends and family members about the correct thing wey you don learn. But wetin happen after you tell them? You surprise as plenty of them reject wetin you tell them.

2-3. For Jesus time, wetin plenty people think about Jesus and e message?

² Make we no surprise when people reject the message wey we de preach. For Jesus time, plenty people reject Jesus even though say e do different-different miracle wey show say e come from God. For example, Jesus bring Lazarus back to life. And this one na miracle wey the people wey dey against Jesus no fit talk say e no happen. Even with that one, leaders for Jew people no believe say Jesus na the Messiah. They even want kill Jesus and Lazarus!—John 11:47, 48, 53; 12:9-11.

³ Jesus know say plenty people no go believe say, e be the Messiah. (John 5:39-44) E tell some disciples of John the Baptist say: “If person no get any reason to doubt me, e go dey happy.” (Matt. 11:2, 3, 6) Why plenty people reject Jesus?

4. Wetin we go talk about for this article?

⁴ For this article and for the next one, we go talk about  some reasons why plenty people for Jesus time no put faith for Jesus. And we go still see why plenty people today no de gree listen to our message. And the number one important thing be say, we go learn why we fit get strong faith for Jesus so that nothing go make us stop to follow Jesus.

5. Why some people fit don think say Jesus no be the Messiah wey Bible talk say go come?

⁵ Plenty people reject Jesus because of the place wey Jesus grow. They gree say Jesus na wonderful teacher and say e do miracles. But they think say Jesus na just the son of one poor carpenter. And Jesus come from Nazareth. Plenty people fit don feel say Nazareth no be really important place. Even before Nathanael become disciple of Jesus, e first talk say: “Any good thing fit come out of Nazareth?” (John 1:46) E fit be say Nathanael no like the city wey Jesus de live that time. Or maybe e de think about the thing wey Micah 5:2 talk say they go born the Messiah for Bethlehem, no be for Nazareth.

6. Wetin for don help people for Jesus time to know say na Jesus be the Messiah?

⁶ Wetin Bible talk? Prophet Isaiah talk say, Jesus enemies no go bother theirself to “think about the things wey concern who [the Messiah] be.” (Isa. 53:8) Plenty prophecies dey about the life of Jesus. If to say those people don take the time to really check well and get all the truth, they for don know say na for Bethlehem they born Jesus, and say na the family line of King David e come from. (Luke 2:4-7) So the place wey they born Jesus match with wetin dey Micah 5:2. So, wetin be the problem? That time, people rush to make decision. They no know everything wey they suppose know. So because of this one, they reject Jesus.

7. Why plenty people today no de accept Jehovah Witness people?

⁷ We de see the same problem today? Yes. Plenty servants of Jehovah no get money or they no be important people for their community. So plenty people de see them as “ordinary people wey no go school.” (Acts 4:13) Some people feel say servants of Jehovah no suppose de teach Bible because they no go any of the important schools for religion. Other people talk say Jehovah Witness na “American religion.” But the truth na say, for inside 7 Jehovah Witness people, na only about 1 of them de live for America. Apart from that one, people de tell other people say Jehovah Witness no “believe in” Jesus. For plenty years now, people don de talk say we be wicked people, we de scatter family, and we de change wetin Bible talk. So plenty people no want be Jehovah Witness because them de hear this story them, and they no know the truth about Jehovah Witness people.

8. As e dey for Acts 17:11, wetin people suppose do if they want know who servants of God be today?

⁸ Wetin fit help person make e no de get doubt? People need to find out the truth about the matter. This one na wetin one Bible writer make up e mind to do. E name na Luke. Luke work hard to “check the truth about everything from the beginning.” E want make the people wey de read wetin e write to really know say the things wey they hear about Jesus “dey correct.” (Luke 1:1-4) Jew people for Beroea that time be like Luke. When they first hear the good news about Jesus, they check Hebrew Scriptures to make sure  say the thing wey they tell them dey correct. (Read Acts 17:11.) For the same way today, people need to check well to know the truth. They must compare the things wey servants of God teach them with the things wey Bible talk. They still need to study about the things wey servants of Jehovah don do for our time. If they sofri check well, they no go allow the way them de feel or wetin people talk to blind them.

9. Wetin happen when Jesus no gree show some people sign from heaven?

⁹ Some people for time of Jesus no dey okay with the things wey Jesus teach. They want more. They want make e show them “sign from heaven” to show say e be the Messiah. (Matt. 16:1) Maybe they want make Jesus do this one because of wetin they read for Daniel 7:13, 14. But the time wey Jehovah want make the prophecy for that Bible verse happen never reach. The things wey Jesus de teach suppose dey okay to make them know say e be the Messiah. But they reject Jesus as e no gree show them the sign wey they want.—Matt. 16:4.

10. How Jesus do the thing wey Isaiah write about the Messiah?

¹⁰ Wetin Bible talk? Prophet Isaiah write about the Messiah say: “E no go shout or over talk loud, and e no go make people hear e voice for street.” (Isa. 42:1, 2) Jesus no do “notice me” when e de do e preaching work. Jesus no build big temples, and e no wear special clothes or get big titles wey e want make people de call. When them de judge Jesus, e no gree do miracle wey King Herod for like make e do even though say e life dey for danger. (Luke 23:8-11) Na true say Jesus do some miracles, but the number one important work for Jesus na the preaching work. E tell e disciples say: “Na this one make me come.”—Mark 1:38.

11. Which idea them some people get today wey no dey correct?

¹¹ We de see the same problem today?  Yes. Today, plenty people really like the big-big building wey religion get, with the different-different decoration for inside wey cost. They still like the big-big titles wey the leaders get, and the celebrations wey them de do. Plenty people don even forget how this celebrations start and wetin they mean. The people wey de go this their service no de really learn anything about God and the things wey e get for mind. But people wey de attend our Christian meetings de learn wetin Jehovah want make we do, and how we fit do the things wey e want. Our Kingdom Halls dey clean, they no too big and they no decorate-am with plenty things wey too cost. The people wey de direct the work for there no de wear special clothes, and they no get big-big titles. The things wey we de teach and wey we believe na from Bible. Even with that one, plenty people today de reject our message because they feel say the way we de worship too simple. They still feel say the things wey we de teach no be wetin they want hear.

12. With wetin Hebrews 11:1, 6 talk, wetin suppose de make our faith dey strong?

¹² Wetin fit help us make we no de get doubt? Apostle Paul tell Christians for Rome say: “Person de get faith after e hear something. And the thing wey e hear na the word wey person talk about Christ.” (Rom. 10:17) So we de make our faith strong when we de study Bible, no be when we de do celebrations wey Bible condemn even if we feel say they good for eye. We must use the truth for Bible to make our faith strong because “if faith no dey, e no dey possible to serve God well.” (Read Hebrews 11:1, 6.) So, we no need to see any special sign from heaven to show say we don get the truth. When we de sofri study the things wey Bible de teach, this one dey enough to make us dey sure say we get the truth, and to remove any doubt.

13. Wetin make plenty people reject Jesus?

¹³ For Jesus time, the disciples of John the Baptist surprise because disciples of  Jesus no de fast. Jesus explain say they no get any reason to fast, as e never die leave them. (Matt. 9:14-17) Even with that one, the Pharisees and other people wey dey against Jesus, condemn Jesus because e no follow their tradition. They vex when Jesus decide to heal sick people for Sabbath. (Mark 3:1-6; John 9:16) They claim say them de obey the law about the Sabbath, but to do business for the temple no be problem for them. They over vex when Jesus condemn them because of this one. (Matt. 21:12, 13, 15) When Jesus preach to some people for synagogue for Nazareth, e use history of Israel people as example to show them say them de only think about theirself and they no get faith. This one really make them vex. (Luke 4:16, 25-30) Plenty people no gree follow Jesus because e no do the things wey they think say e go do.—Matt. 11:16-19.

14. Why Jesus condemn the traditions of people wey Bible no support?

¹⁴ Wetin Bible talk? Jehovah use prophet Isaiah talk say: “This people de near me with their mouth and them de honor me with their lips. But their heart really dey far from me. And the fear wey they get for me na from command of people wey they don learn.” (Isa. 29:13) Jesus do the correct thing as e condemn traditions wey Bible no support. The people wey think say the rules and the traditions of people dey important pass Bible, reject Jehovah and the person wey e send come as the Messiah.

15. Why plenty people today no like Jehovah Witness people?

¹⁵ We de see the same problem today? Yes. Plenty people de vex when they see say Jehovah Witness people no follow them celebrate things wey Bible no support, like birthday and Christmas. Other people de vex when Jehovah Witness people no de follow them do celebration to honor their country, or burial custom wey Bible no support. This people wey no like Jehovah Witness people because of this reasons, fit really believe say them de worship God for the correct way. But God no fit accept their worship if they like the traditions of people pass the things wey Bible de teach.—Mark 7:7-9.

16. As e dey for Psalm 119:97, 113, 163-165, wetin we need to do, and wetin we no need to do?

¹⁶ Wetin fit help us make we no de get doubt? We need to get strong love for the laws wey Jehovah don give us for Bible. (Read Psalm 119:97, 113, 163-165.) When we love Jehovah, we go reject any tradition wey e no like. We no go allow anything dey more important pass our love for Jehovah.

17. Wetin plenty people de expect for time of Jesus wey make them reject Jesus?

¹⁷ Some people for Jesus time want another government. They be de expect say the Messiah go free them from the government of Rome wey de suffer them. But when they try to make Jesus their king, e no gree. (John 6:14, 15) Other people, like the priest them, de fear say Jesus go try to change the government. Then, Rome people go vex and they go collect the power wey they don give this priest them. Because of this kind politics matter wey Jew people de worry about, plenty of them no follow Jesus.

18. Which prophecy for Bible about the Messiah plenty people reject?

¹⁸ Wetin Bible talk? Na true say plenty  prophecy talk say the Messiah go be powerful King, but other prophecy show say e go first die for our sin. (Isa. 53:9, 12) So why Jew people get wrong idea about the Messiah? Plenty people for time of Jesus reject any prophecy wey no promise say their problems go end that time.—John 6:26, 27.

19. Which wrong idea them don make plenty people reject our message?

¹⁹ We de see the same problem today? Yes. Plenty people today de reject us because we no de put hand for politics. They feel say we suppose vote for election. But we know say if we choose any person for this earth to rule us, that one mean say we de reject Jehovah. (1 Sam. 8:4-7) And some people feel say we suppose de build schools and hospitals and do other things to help the community. Them de reject our message because we de do our best to preach, instead of to try de solve the problems wey the world de face today.

20. With wetin Matthew 7:21-23 talk, wetin suppose be the number one important thing for us?

²⁰ Wetin fit help us make we no de get doubt? (Read Matthew 7:21-23.) The main thing wey suppose dey our mind na to do the work wey Jesus command us make we do. (Matt. 28:19, 20) Make we no ever busy de solve the problems for this world. We love people and we de feel for them because of their problem. But we know say the best way to help our neighbors na to teach them about the Kingdom of God and help them to get better friendship with Jehovah.

21. Wetin we suppose make up our mind to do?

²¹ For this article we don talk about four reason why plenty people no follow Jesus for e time and wey fit make some people today too to reject the followers of Jesus. But na this things be the only things wey we need to reject? No. For the next article, we go talk about four other things. Make we make up our mind say we no go ever reject Jesus and say we go continue to make our faith strong!