1-2. Wetin be one reason why the book of Revelation suppose concern us?

 PERSON don ever give you pictures of another person make you look? As you de look the pictures you see plenty people wey you no know. But you stop and start to look one of the pictures well. Why? Na because you dey for that picture. As you de look the picture, you try to remember when wuna take the picture and the place wey wuna take-am. You still try to remember everybody for the picture. You come really like that picture.

² The book of Revelation be like that picture. Why we talk so? Make we see just two reasons. Number one, they write this Bible book for us. The first verse for the book of Revelation talk say: “This one na the things wey God show Jesus Christ to show e slaves the things wey go soon happen.” (Rev. 1:1) So the things wey they write for this book no be for everybody, but na for us because we de serve God. We no surprise to see say we de join to make the prophecies for inside this book to happen, because we be servants of God. So when we de read the book of Revelation, we de read about things wey concern each of us.

3-4. As e dey for the book of Revelation, which time the prophecies for there go happen, and how this one suppose affect each of us?

³ The second reason why the prophecies for Revelation suppose concern us, na because of the time wey this prophecies go happen. When apostle John don old, e talk about when this prophecies go happen. E say: “Holy spirit make me dey for the Lord’s day.” (Rev. 1:10) When John write the thing wey dey that verse about the year 96 C.E., “the Lord’s day” still remain plenty years before e start. (Matt. 25:14, 19; Luke 19:12) But with wetin we know about Bible prophecy,  that day start for 1914 when Jesus begin rule as King for heaven. From that year, the prophecies for Revelation wey concern God people, start to happen. True-true, we de live for “the Lord’s day” now!

⁴ Because we de live for this our time wey wonderful things de happen, we need to really think about the better advice for Revelation 1:3, wey talk say: “The person wey de read loud and people wey de hear the word them for this prophecy and de do the things wey they write for inside-am, go dey happy, because the time wey God choose don near.” True-true we need to “read loud,” “hear the word them for this prophecy,” and “do” them. Wetin be some of this word wey we need to obey?

5. How the book of Revelation show say e really dey important to make sure say we de worship Jehovah for the correct way?

⁵ From the first chapter of Revelation, we learn say Jesus de see everything wey de happen for the Christian congregations. (Rev. 1:12-16, 20; 2:1) The message wey Jesus send to the seven congregations for Asia Minor show say this one na true. For the message them, e give clear direction wey go help the Christians that time to make sure say them de worship Jehovah for the correct way. And the things wey e talk for the message them concern all servants of God today. Wetin we learn from this one? Our Leader wey be Jesus Christ really know whether we hold Jehovah tight. Jesus de lead us, e de protect us, and e de see everything. E know wetin we need to do so that we go continue to make Jehovah glad. Which direction e give the congregations, wey we need to follow today?

6. (a) With wetin Jesus talk for Revelation 2:3, 4, wetin be the main problem wey the congregation for Ephesus get? (b) Wetin we learn from this one?

⁶ Read Revelation 2:3, 4. Make we no ever allow the love wey we first get for Jehovah to die. The message wey Jesus send to the congregation for Ephesus show say they don really endure, and say they no tire to serve Jehovah even with the different-different problems wey them de face. Even with that one, they don allow the love wey they first get to die. If they no get that love back, God no go accept their worship. Na so e still be today, we need to do pass just to endure. Make the reasons wey make us de endure dey correct. Our God no only de put mind for wetin we de do, but e still de put mind for why we de do-am. The reasons why we de do things dey important to Jehovah. So God want make we worship-am because we really love-am and we dey happy to be e servants.—Prov. 16:2; Mark 12:29, 30.

7. (a) As e dey for Revelation 3:1-3, which problem Jesus talk say the congregation for Sardis get? (b) Wetin we need to do?

⁷ Read Revelation 3:1-3. We must continue to watch. The brothers and sisters for the congregation for Sardis get another kind of problem. Even though say they hold God tight before, but now their hand don de weak. So Jesus tell them make they “wake up.” Wetin we learn from this warning? Na true say Jehovah no go forget our work. (Heb. 6:10) Even with that one, we no suppose de think say because we don do plenty things for Jehovah before, we no need to do things for-am now. Na true say because of our condition, we fit no de do plenty things for Jehovah  now like before. But, we need to continue to dey busy for “the work of the Lord,” and continue to watch go reach the end.—1 Cor. 15:58; Matt. 24:13; Mark 13:33.

8. Wetin we learn from the thing wey Jesus tell the brothers for Laodicea, wey dey Revelation 3:15-17?

⁸ Read Revelation 3:15-17. We must put all our heart and power for our worship. The message wey Jesus send to the congregation for Laodicea, show another kind of problem. They no put all their heart for their worship. Because of this kind character wey they get, Jesus tell them say they “no dey happy” and their condition really bad. They need to really show say them de use all their power for Jehovah and e worship. (Rev. 3:19) Wetin this one teach us? If the way we de use all our heart and power for our worship don de go down, we need to show more-more say we value all the good things wey Jehovah and e organization de give us. (Rev. 3:18) Make we no ever pursue life of so-so enjoyment sotey our worship no go be the number one thing for our life again.

9. With wetin Jesus tell the Christians for Pergamum and Thyatira, which danger we need to run from?

⁹ Make we no ever listen to the thing wey apostates de teach. (Apostates na former servants of Jehovah wey don begin talk wicked lies about e organization.) Jesus give strong correction to some people for Pergamum because them de make the brothers de separate from each other. (Rev. 2:14-16) E praise the ones for Thyatira wey no follow the “deep things of Satan.” And e advice them make they “hold” the truth “tight.” (Rev. 2:24-26) Christians for there wey don weak, wey don allow the lie-lie things wey people de teach to deceive them, need to repent. What about us today? Make we no ever listen to anything wey people de teach, wey no agree with the way Jehovah de think. Apostates fit de “pretend say them de serve God,” but the things wey them de do show say “no be so they really be.” (2 Tim. 3:5) E go dey more easy to know and run from the lie-lie things wey people de teach when we be better Bible student.—2 Tim. 3:14-17; Jude 3, 4.

10. Which other thing we fit learn from the thing wey Jesus tell the congregations for Pergamum and Thyatira?

¹⁰ We must run from and no support any kind of sex wey no clean. The brothers for Pergamum and Thyatira get another problem.  Jesus condemn some of them for the congregations because they no run from sex wey no clean. (Rev. 2:14, 20) Wetin this one teach us? Make we no feel say Jehovah go just close mouth if we put hand for any kind of sex wey no clean, even if we don serve-am for many years and we get plenty assignments wey we de do for e organization now. (1 Sam. 15:22; 1 Pet. 2:16) E want make we continue to accept the things wey e see as good things and reject the things wey e see as bad things, even if the way the world de see this things de worse.—Eph. 6:11-13.

11. Wetin we don learn come reach now? (Still check the box “ Lesson for Us Today.”)

¹¹ Wetin we don learn come reach now? We must make sure say the way we de worship Jehovah dey correct. If we de do something wey fit make Jehovah no accept our worship, we need to change now-now so that we go fit make Jehovah glad. (Rev. 2:5, 16; 3:3, 16) But Jesus talk about another thing for the message wey e send to the congregations. Wetin be that?

12. Wetin Jesus tell the brothers for Smyrna and Philadelphia wey suppose concern us today? (Revelation 2:10)

¹² Now, make we talk about the message wey Jesus send to the congregations for Smyrna and Philadelphia. E tell the Christians for there make they no fear to face suffer from people because Jehovah go bless them if they continue to dey faithful. (Read Revelation 2:10; 3:10) Wetin this one teach us today? We must expect say people go suffer us, and make we dey ready to endure-am. (Matt. 24:9, 13; 2 Cor. 12:10) Why e dey important make we put this one for mind?

13-14. Wetin don happen to servants of God because of the things wey Revelation chapter 12 talk?

¹³ The book of Revelation tell us say people go suffer servants of God for this our time wey be “the Lord’s day.” Revelation chapter 12 talk say war start for heaven just after Jesus become King of God’s Kingdom. Michael, wey be Jesus Christ after e don go back to heaven, and e angels fight with Satan and the demons. (Rev. 12:7, 8) Because of this one, the enemies of God lose the war. Jesus Christ throw them come the earth, and they don de cause serious suffer for people. (Rev. 12:9, 12) But how this thing wey happen don affect servants of God?

¹⁴ The book of Revelation come tell us wetin Satan do. Because e no go fit go back to heaven, e de attack anointed servants of God for this earth. Na them de represent God’s Kingdom, and “their work  na to tell people about Jesus.” (Rev. 12:17; 2 Cor. 5:20; Eph. 6:19, 20) How this prophecy don happen?

15. Who be the “two witness” wey Revelation chapter 11 talk about, and wetin happen to them?

¹⁵ Satan make enemies of God to attack anointed brothers wey de direct the Kingdom preaching work. This anointed brothers na the “two witness” wey the book of Revelation talk about say they kill. * (Rev. 11:3, 7-11) For 1918, they lie against eight of the brothers wey de direct the work for the organization. They talk say this brothers do bad and say each of them go dey for prison for long time. Plenty people that time think say the work wey this anointed Christians de do don “die.”

16. Wetin happen for 1919 wey really surprise people, but wetin Satan don continue to do since that time?

¹⁶ The prophecy for Revelation chapter 11 still talk say the “two witness” go come back to life after small time. E no reach one year after they put the brothers for prison wey that prophecy happen. This one surprise people no be small! For March 1919, they release this anointed brothers from prison. And after, they free them from all the things wey they talk say they don do. Quick-quick, the brothers start to direct the Kingdom work again. But that one no make Satan stop to attack servants of God. From that time, Satan don make people de suffer servants of God and this one just be like the “river” wey Bible talk about. (Rev. 12:15) True-true, “na because of this one” all of us “go need to endure and get faith.”—Rev. 13:10.

17. How servants of God don get help wey they no expect, even though say na them Satan get for mind to attack?

¹⁷ Revelation chapter 12 show say servants of God go get help from place wey they no expect. The book of Revelation talk say “the earth” swallow “the river,” wey be the suffer wey people de suffer servants of God. (Rev. 12:16) And na so e don happen. Sometimes, some people or group of people for this world wey Satan de control, de do well and they don help servants of God. For example, some judge de favor us for court. Plenty times, servants of Jehovah don win some case for  court wey don make them get some kind freedom. How they don use this freedom? They don use this chance well to do the work wey Jehovah don give them. (1 Cor. 16:9) Wetin and wetin dey part of this work?

18. Wetin be our main work for this last days?

¹⁸ Jesus don talk say e people go preach the “good news about the Kingdom” for the whole earth before the end go come. (Matt. 24:14) As them de do this one, them de gain from the help of one angel or group of angels wey Bible talk say they get “everlasting good news to tell people for this world, for every country, and tribe and language and people.”—Rev. 14:6.

19. Which other message people wey love Jehovah must preach?

¹⁹ The good news about the Kingdom no be the only message wey servants of God must tell people. They still need to support the work wey the angels de do wey Revelation chapter 8 to 10 talk about. This angels de announce some trouble wey go affect people wey reject God’s Kingdom. So Jehovah people don de preach message wey be like “ice block and fire,” and wey explain the way God go judge the different-different part of this wicked world wey Satan de control. (Rev. 8:7, 13) People need to know say the end don near, so that they go fit change their life quick-quick and survive the day wey Jehovah go vex. (Zeph. 2:2, 3) But no be everybody go accept this kind message. We need to get strong heart so that we go fit preach this message. For great tribulation, the final message of judgment go even make people vex more-more.—Rev. 16:21.

20. Wetin we go talk about for the next two articles?

²⁰ We really need to obey “the word them for this prophecy” because we dey part of the people wey de make the thing wey we read for the book of Revelation to happen. (Rev. 1:3) But how we fit continue to endure suffer from people and continue to preach this message them with strong heart? Na two things go make us strong. Number one, the thing wey the book of Revelation show us about the enemies of God. And number two, the blessings wey we go get for future if we continue to serve God well. We go talk about this two things for the next two articles.