1-2. Wetin we fit de wonder sometimes about our prayers?

 YOU don ever wonder if Jehovah de answer your prayer? If you don feel like that before, know say no be only you. Plenty brothers and sisters don talk say them de feel like that sometimes, especially when them de face serious problem. If we de suffer, e fit hard us to see how Jehovah de answer our prayer.

² Make we talk about why we fit dey sure say Jehovah de answer the prayer of e servants. (1 John 5:15) We go still answer this questions: Why e de be like say Jehovah no de answer our prayer sometimes? How Jehovah de answer our prayer today?

3. Why Jehovah want make we de pray to-am?

³ Bible tell us say Jehovah love and value us well-well. (Hag. 2:7; 1 John 4:10) Na e make Jehovah want make we de pray to-am for help. (1 Pet. 5:6, 7) E want help us continue to be e tight friend and fit endure our problems.

4. How we know say Jehovah de answer the prayer of e servants? (Still check the picture.)

⁴ Plenty story dey for Bible wey show say Jehovah de answer the prayer of e servants. You fit remember any one? One example na about King David. David get many wicked enemy but e always pray to Jehovah for help. One time, e beg Jehovah say: “O Jehovah, hear my prayer, listen to my cry for help. As  God wey no de fail and de always do wetin correct, answer me.” (Ps. 143:1) Jehovah answer David prayer and save-am. (1 Sam. 19:10, 18-20; 2 Sam. 5:17-25) Na this one make David talk with all e mind say: ‘Jehovah near all the people wey de pray to-am.’ We too fit dey sure say Jehovah go answer our prayer.—Ps. 145:18.

5. Jehovah de always answer the prayer of e servants for Bible time the way them expect? Give example. (Still check the picture.)

⁵ Jehovah fit no answer our prayer the way we expect. That na wetin happen to apostle Paul. Paul beg God make E remove one problem wey e call “chuku-chuku” for e body. Na three times apostle Paul pray about this problem. Jehovah answer the prayer? Yes, but no be the way apostle Paul be get for mind. Jehovah no remove the problem as Paul be expect, but E give Paul the power to fit endure and continue to worship-am well.—2 Cor. 12:7-10.

6. Sometimes, why e fit be like say Jehovah no de answer our prayer?

⁶ Sometimes, the way Jehovah fit answer our prayer fit different from the way we expect. We dey sure say Jehovah know the best way to help us. E fit “do plenty things even over pass all the things wey we fit ask or think of.” (Eph. 3:20) Because of this one, the answer for our prayer fit come for the time or way wey we no expect.

7. Why we need to change wetin we de pray for sometimes? Give example.

⁷ Sometimes, when we come understand say wetin we de pray for dey different from wetin Jehovah get for mind, we fit need to change wetin we de pray for. Make we see the example of Brother Martin Poetzinger. Small time after Brother Poetzinger marry, them arrest-am and carry-am go the camp wey Nazi government de suffer people. When e reach there, e first de pray say make Jehovah help-am comot for the camp to fit care for e wife and start to preach again. But after two weeks, e no see anything wey show say Jehovah go make them release-am. So e start to pray say: “Jehovah, abeg show me wetin you want make I do.” Then e start to think about the problem wey other brothers for the camp de face. Many of them de worry about their wife and children. Then Brother Poetzinger thank Jehovah for prayer, e say: “Thank you Jehovah for the new work wey you give me. Abeg help me to fit encourage my  brothers and make them strong.” That na wetin e use the nine years wey e spend for the camp, do!

8. Which important things we need to remember when we de pray?

⁸ Make we remember say Jehovah get time wey e don arrange to do everything wey e get for mind to do for us. Some of this things wey Jehovah get for mind to do na to remove all the problem wey de make us suffer, like heavy rain and breeze wey de scatter things, sickness, and death. And e go remove them forever. Jehovah go use e Kingdom do this one. (Dan. 2:44; Rev. 21:3, 4) But for now, Jehovah allow Satan to rule this world. b (John 12:31; Rev. 12:9) If Jehovah remove all the problem wey we de face now, e go be like say Satan de rule this world well. So even though say some of the things wey Jehovah promise us go happen for future and we need to wait for the time wey Jehovah go do them, this one no mean say e no de help us now. Make we talk about some things wey Jehovah de do to help us.

9. How Jehovah fit help us when we want make decision? Give example.

⁹ Jehovah de give us sense. Jehovah don promise us say e go give us the sense wey we need to make better decision. We need to beg God for sense when we want make decision especially the ones wey go affect us for the rest of our life. One example of this decision na whether we go marry or we no go marry. (Jas. 1:5) See the example of one sister wey e name na Maria. c E be regular pioneer when e meet one brother and the two of them come be friends. Sister Maria talk say: “As our friendship de grow, we start to get feeling for each other. But I know say I need to decide whether I go marry-am or I no go marry-am. So I pray plenty times about the matter. I need Jehovah help, even though I know say Jehovah no go make decision for me.” Sister Maria feel say Jehovah answer e prayer and give-am sense. How? As e use our book them do research, e see some article wey help-am answer the questions wey e get for mind about the matter. E still follow the advice of e mama wey be servant of Jehovah. That advice help-am check the feeling wey e get for the brother. All this one help-am make better decision.

10. As e dey Philippians 4:13, wetin Jehovah go do to help e servants to fit endure their problems? Give example. (Still check the picture.)

¹⁰ Jehovah de give us power to fit endure. Jehovah go give us power wey we need to fit endure any problem wey we de face, the way e do for apostle Paul. (Read Philippians  4:13.) See how Jehovah help one brother wey e name na Benjamin to fit endure the problems wey e face. When e dey young, Brother Benjamin and e family stay for different-different camp for Africa wey people wey run from their country because of problem, de stay. Brother Benjamin talk say: “I pray plenty time to Jehovah say make e give me the power to fit do wetin good for e eye. Jehovah answer my prayers and give me peace of mind. E still give me strong mind to fit continue to preach, and our book them wey help my faith continue to dey strong. As I de read the story of brothers and sisters, I learn how Jehovah don help them to fit endure, this one make my mind strong to continue to hold Jehovah tight.”

11-12. How Jehovah fit use our brothers and sisters answer our prayer? (Still check the picture.)

¹¹ Jehovah de use our brothers and sisters help us. The night before Jesus die, e really pray well-well. Jesus beg Jehovah say make E no allow people judge-am as person wey de spoil the name of God. Jehovah answer Jesus prayer, but no be exactly the way Jesus get for mind. E send one angel to encourage Jesus. (Luke 22:42, 43) Jehovah fit still use our brothers or sisters help us when they call us or visit us. So make all of us de look for chance to tell our brothers and sisters “good word” wey go encourage them.—Prov. 12:25.

¹² See wetin happen to one sister wey e name na Miriam. One day wey e dey alone for house after some weeks wey e husband die, Sister Miriam start to feel say e no get hope again and e no happy. This one make-am cry well-well, and as e de cry, e need somebody wey go comfort-am. E talk say: “That day, I no get power to call anybody, so I pray to Jehovah. As I still de cry and pray, my phone ring. Na one elder wey be our good friend call me.” The elder and e wife really comfort Sister Miriam. Sister Miriam really believe say na Jehovah move this elder and e wife to call-am.

13. Give example of how Jehovah fit use people wey no de worship-am, answer our prayer.

¹³ Jehovah fit still use people wey no de worship-am help us. (Prov. 21:1) Sometimes,  Jehovah de use people wey no de worship-am help e servants when them pray for help. For example, e move King Artaxerxes to allow Nehemiah go Jerusalem so that e go fit help repair the city. (Neh. 2:3-6) Na so e still be today, Jehovah fit use people wey no de worship-am, to help e servants when they need help.

14. Wetin you like for Sister Soo Hing story? (Still check the picture.)

¹⁴ One sister wey e name na Soo Hing, believe say Jehovah use e doctor help-am. When the sister son dey young, doctor talk say e get brain problems wey de affect-am. Plenty years later, the son fall from high place and injure well-well. This one make Sister Soo Hing and e husband stop their work so that they go fit care for-am. This one make them no get money again. Sister Soo Hing talk say this one make-am tire sotey e feel say e no fit endure again. So e pray with all e heart to Jehovah say make Jehovah help-am. The doctor wey de treat their pikin decide to look for how e fit help Sister Soo Hing and e family. This one make them fit get help from government and cheap place to stay. Sister Soo Hing talk say: “We see how Jehovah help us for this matter. True-true, na God ‘wey de hear prayer.’ ”—Ps. 65:2.

15. Wetin help Sister Yoko see say Jehovah de answer e prayer?

¹⁵ Many times, Jehovah no de answer our prayer the way we de expect. But the answer wey Jehovah de give na wetin we need to fit continue to worship-am well. So continue to look for wetin show say Jehovah de answer your prayer. One sister wey e name na Yoko be feel say Jehovah no de answer e prayers, so e start to write the things wey e de pray for inside book. After some time, e check the book to see wetin e don pray for. And e see say Jehovah don answer plenty of them, even some wey e don forget. So we need to de take time think about how Jehovah de answer our prayer.—Ps. 66:19, 20.

16. How we fit show say we get faith when we pray? (Hebrews 11:6)

¹⁶ No be only when we pray to Jehovah we de show say we get faith, but we still de show say we get faith when we accept the way Jehovah answer our prayer. (Read Hebrews 11:6.) See the example of Brother Mike and e  wife wey be Chrissy. Their plan na to go serve for Bethel. Brother Mike talk say: “We fill Bethel form many times and pray about-am plenty times, but them no call us.” Brother Mike and e wife Chrissy believe with all their heart say Jehovah know the best way to use them for e work. That time, them be regular pioneer and they continue to do their best as them de go help congregations wey need more publishers and de join for construction work wey Jehovah organization de do. But now them dey for circuit work. Brother Mike talk say: “No be every time Jehovah don answer our prayer the way we expect-am, but e don answer them for the way wey better pass wetin we fit even think of.”

17-18. From wetin dey Psalm 86:6, 7, wetin we fit dey sure of?

¹⁷ Read Psalm 86:6, 7. King David dey sure say Jehovah hear e prayers and answer them. You too fit dey sure of this one. The examples wey we don talk about for this article teach us say Jehovah fit give us the sense and power wey we need to endure. Jehovah fit still use our brothers and sisters and some people wey no de worship-am now, help us when we need help.

¹⁸ Na true say some times, Jehovah fit no answer our prayer the way wey we expect, but we know say e go always answer them. E go give us wetin we need for the time wey we need-am. So, continue to pray and believe say Jehovah go hear your prayer. And dey sure say Jehovah go care for you now and for paradise, e go “give everything wey get life wetin they want.”—Ps. 145:16.