1. Wetin de hard some of us to do?

 YOU don ever get plan to do more as you de worship Jehovah, but e hard you to do wetin you plan? If na so e be, no be only you e don happen to. For example, one brother wey e name na Philip, plan to de pray plenty times and to make e prayer better pass before, but e no still de always get chance to pray. Sister Erika plan be say e no want de go late for meeting for field service, but even with e plan, e still de go late. Brother Tomáš don try to read Bible from Genesis to Revelation plenty time. E talk say: “I no de enjoy to de read Bible. Three times wey I don try-am, na Leviticus I de stop.”

2. Why we no suppose feel say we don fail if we never fit do wetin we plan to do for Jehovah?

² If you get plan to do more, but you never fit do as you plan, make you no worry, e no mean say you don fail. Even if na small thing you plan to do, you go need to work hard and dey patient to fit do-am. As you de try to do wetin you plan, this one de show say you value your friendship with Jehovah and say you want give-am your best. Know say wetin you de do de make Jehovah happy. Remember say e no de expect you to do pass your power. (Ps. 103:14; Mic. 6:8) So when you plan to do something, make sure say na wetin you go fit do. After you don make the plan, wetin go help you fit do-am? Make we talk about some things wey fit help you.

3. Why e dey important make you de put mind for things wey go help you do wetin you plan?

³ E dey important make you de put mind for things wey go help you do wetin you plan. Na this kind things go move you fit do wetin you plan. The things wey go move you to do wetin you  plan, be like the force wey river de use push boat to quick reach where e de go if the boat de travel go the direction wey the river de flow go. And if the river de flow well-well, e fit help-am quick reach where e de go. Na so e still be when we get plan. The more we get things wey de move us to do wetin we plan, the more we go fit do wetin we plan. One brother for El Salvador wey e name na David talk say: “When you get wetin fit move you to do wetin you plan, e go help you want do your best to do as you plan. E go still help you no allow anything stop you to do wetin you plan.” So wetin you go do so that you go get more things wey go make you want do as you plan?

4. Wetin we fit ask Jehovah for? (Philippians 2:13) (Still check the picture.)

⁴ Pray make Jehovah help you, make e de hungry you to do wetin you plan. Jehovah fit use e holy spirit move you to fit do wetin you don plan. (Read Philippians 2:13.) Sometimes, we de make plan to do something wey we know say we suppose do and this one really good. But as time de go, e fit no dey our mind again to do wetin we don plan. Na so e happen to one sister for Uganda wey e name na Norina. E plan na to get Bible student, but e feel say e no go fit do-am because e no sabi teach well. Wetin help-am? E talk say, “I start to pray every day say make Jehovah make me really like to get Bible student. To make my prayer work, I do my best to make the way I de teach better pass before. After some months, I notice say e de really hungry me to conduct Bible study. And that year, I start to conduct two Bible study.”

5. Wetin we fit think deep about wey go make-am hungry us to do wetin we plan?

⁵ Think deep about wetin Jehovah don do for you. (Ps. 143:5) Apostle Paul think deep about the special favor wey Jehovah show-am, and this one move-am to work more for Jehovah. (1 Cor. 15:9, 10; 1 Tim. 1:12-14) Na so e go still be for you. The more you de think about wetin Jehovah don do for you, the more e go de hungry you to do wetin you plan. (Ps. 116:12) See wetin help one sister for Honduras to fit be regular pioneer as e plan. E talk say: “I think about the things wey Jehovah don do wey show say e really love me. E bring me to e organization, e de care for me and de protect me. When I think about this things, e make me love Jehovah more and do my best to become pioneer.”

6. Which other thing fit make-am hungry you more to do wetin you plan?

⁶ Put mind for the things wey you go gain when you do wetin you plan. Sister Erika wey we don talk about before, talk wetin help-am make e no de go late to meeting for field service as e plan. E talk say: “I see say when I go late, I de miss plenty things wey I suppose gain for meeting for field service. But when I no go late, e de give me chance to fit greet brothers and sisters and spend time with them. And e de still give me chance to learn  things wey go help me enjoy my preaching and make-am better.” Sister Erika succeed to do wetin e plan because e put mind for wetin e go gain when e no go late to meeting for field service. What about you? Which blessing you go put for mind wey go move you to fit do wetin you plan? If your plan na to make your Bible reading and prayer better, think about how e go make your friendship with Jehovah strong more-more. (Ps. 145:18, 19) If your plan na to get some better character, think about how the character go help you be better person to other people. (Col. 3:14) You fit even write all the reason why you want do wetin you plan. And you fit de always check-am. Brother Tomáš wey we talk about before talk say: “When I get plenty reason to do wetin I plan, e go help me continue to do my best to do-am.”

7. Wetin help Brother Julio and e wife to fit do wetin them plan?

⁷ Spend time with people wey go encourage you to do wetin you plan. (Prov. 13:20) See wetin help Brother Julio and e wife to preach more as them plan. E talk say: “We make friends with people wey support our plan and we discuss our plan with them. Many of them don do the same thing wey we plan to do, so them give us better advice wey help us. Sometimes, our friends de ask us how our plan de go, and them still de encourage us when we need-am.”

8. Wetin fit happen if we plan to do something and we want do-am only when we get things wey de move us to do-am? (Still check the picture.)

⁸ To talk true, sometimes e no de hungry us to do wetin we don plan. When this one happen, e mean say we no go fit do wetin we plan? No. For example, the force wey river take de flow fit help boat move fast reach where e de go. But no be every place for river de flow fast. This one mean say the person wey de travel with the boat no go fit continue to de move for the side wey no de flow fast? No. Some boats get engine wey de make-am move, and for some other ones, na paddle them de use move them. So the person wey de drive the boat fit use any of them to continue to go where e de go if e don pass where the river de flow fast. Wetin de move us to do something, be like the force wey river de use move boat go front. Sometimes, we de get plenty things wey de move us to want do wetin we plan, but some other time, we no de get things wey de make-am hungry us to do wetin we don plan. So if we plan to do something and we want do-am only when we get things wey de move us to do-am, we no go fit ever succeed. But just like the person wey de drive boat de find some other ways wey e go take reach where e de go, we too fit still try our best to do wetin we don plan even when e no de hungry us again to do-am. Even though say e no go easy, you go dey happy when you succeed to do  wetin you plan. Before we talk about wetin we fit do, make we first answer one question.

9. E good to continue to do wetin we plan to do for Jehovah work even when e no de hungry us again to do-am? Explain.

⁹ Jehovah want make we de happy as we de use all our heart serve-am. (Ps. 100:2; 2 Cor. 9:7) So when e no de hungry us again to do wetin we don plan to do for Jehovah, e good make we continue to do wetin we plan? Make we see the example of apostle Paul. E talk say: ‘I de train my body, and de control-am like slave.’ (1 Cor. 9:25-27) Paul force e self to do wetin correct even when e body no want-am. Jehovah happy with wetin Paul do? Yes! And Jehovah even bless-am.—2 Tim. 4:7, 8.

10. Wetin we go gain if we continue to do wetin we plan even when e no de hungry us again to do-am?

¹⁰ Just as Jehovah happy with apostle Paul, e go happy with us if we continue to do wetin we plan for e work even when e no de hungry us again to do-am. Jehovah go happy with us because e know say na the love wey we get for-am de make us do wetin we plan, no be just because we love wetin we de do. And Jehovah go bless us as e bless apostle Paul. (Ps. 126:5) As we de see the way Jehovah de bless us, e go start to hungry us again to do wetin we plan. Sister Lucyna wey come from Poland talk say: “Sometimes I no de like to go preaching, especially when I tire. But the joy wey I de get after I go preaching, na special gift from God.” Now, make we talk about some things wey we fit do when e no de hungry us again to do wetin we plan.

11. How Jehovah fit help us get self-control more-more?

¹¹ Pray make Jehovah help you get self-control. To get self-control mean say we de fit control how we de feel and the way we de do things. Many times, when we hear self-control, wetin de come our mind na to do our best make we no do wetin bad. But, we still need to control ourself so that we go fit do wetin good, especially if the thing hard to do or e no de hungry us to do again. Remember say self-control na part of the character wey holy spirit de help person get, so beg Jehovah make e give you e holy spirit so that you go fit get this better character more-more. (Luke 11:13; Gal. 5:22, 23) Brother David wey we don first talk about, explain how prayer help-am make e no miss e personal study again. E talk say: “I beg Jehovah make e help me get self-control. This one help me start good personal study program, and I no miss-am again.”

12. How the advice wey dey Ecclesiastes 11:4 fit help us do wetin we plan?

¹² No wait until your condition better. For this Satan world, problem go always dey. So, if you de wait say make everything better, you no go fit do wetin you plan. (Read Ecclesiastes 11:4.) One brother wey e name na Dayniel talk say: “No condition dey perfect. So, you no need to wait, make you just start.” One brother wey come from Uganda wey e name na Paul talk another reason why we no suppose de push our plan go front. E talk say: “When we start to do wetin we plan no matter how our condition be, Jehovah go help us.”—Mal. 3:10.

13. Why e good make we start to do wetin we plan small-small?

¹³ Start small-small. E fit no de hungry us to do wetin we plan because e be like say wetin we plan, no easy to do. If na like this e be for you, you fit try to do-am small-small? If wetin you plan to do na to get better character, you fit find small-small way wey you fit show the better character. If your plan na to read Bible from Genesis go reach Revelation, you fit arrange to de use small time read-am every day. Brother Tomáš wey we talk about before, try  to read Bible from Genesis to Revelation for one year, but e no succeed. E talk say: “I see say the number of chapters wey I plan to read for one day, too much for me. So I decide to try again, but this time, my plan na to read some verse them every day and think about wetin I read. This one make me start to enjoy my Bible reading.” As Brother Tomáš start to enjoy e Bible reading, e add join the time wey e de use read Bible. This one help-am fit read Bible from Genesis to Revelation. b

14. Wetin fit make-am hard for you to fit do wetin you plan?

¹⁴ The truth be say, even though e de really hungry us to do wetin we plan and we get self-control, things fit still happen wey fit make-am hard for us to do wetin we plan. For example, “wetin [we] no expect” fit happen wey go make us no get time to do wetin we plan. (Eccl. 9:11) We fit face problem wey fit make us tire or no get power to do wetin we plan. (Prov. 24:10) Because we no perfect, we fit make mistake wey go make-am hard for us to fit do wetin we plan. (Rom. 7:23) Or we fit just tire. (Matt. 26:43) Wetin go help us fit continue to try to do wetin we plan even if something happen wey make-am hard for us to do wetin we plan?

15. If something happen wey make-am hard for us to do wetin we plan, e mean say we don fail? Explain. (Psalm 145:14)

¹⁵ Remember say if something happen wey make-am hard for you to do wetin you plan, this one no mean say you don fail. Bible talk say we fit face problem plenty time. But e still talk say we go fit succeed to do wetin we plan even when we get problem, especially when Jehovah help us. (Read Psalm 145:14.) Brother Philip wey we talk about before talk say: “I no de see myself as person wey don fail just because something happen wey make me  no fit do wetin I plan. But I de put mind for the time wey I go start to do wetin I plan again. This one de help me feel say I de succeed.” Brother David wey we don still talk about before talk say: “When something happen wey make-am hard for me to do wetin I plan, I no de see-am as something wey fit stop my plan, but, I de see-am as chance to show Jehovah say I really love-am.” When you do your best to do wetin you plan even when wetin fit stop you happen, you de show Jehovah say you want make-am happy. E de really make Jehovah happy to see say you de do your best to do wetin you plan.

16. Wetin you fit learn from things wey happen wey make-am hard for you to fit do wetin you plan?

¹⁶ Learn from things wey happen wey make-am hard for you to fit do wetin you plan. Think about wetin cause-am and ask yourself, ‘Wetin I fit do make this kind thing no happen again?’ (Prov. 27:12) Sometimes, if e too hard for you to fit do wetin you plan to do, e fit mean say the plan pass wetin you go fit do. If na so e be for you, you fit check your plan again to see whether wetin you plan na something wey you fit really do. c Jehovah no go see you as person wey don fail just because you no fit do wetin you plan wey pass your power.—2 Cor. 8:12.

17. Why e dey important make we no forget the things wey we don do?

¹⁷ No forget the ones wey you don do. Bible talk say: ‘God no be bad person so e no go forget the things wey you don do.’ (Heb. 6:10) Since God no go forget wetin you don do, make you no forget them too. Make you think about the things wey you don do. E fit be to become Jehovah friend, to de preach to people, or to baptize. Just as you succeed to do the things wey you plan to do before, you go fit succeed to do the one wey you plan now.—Phil. 3:16.

18. Wetin we need to remember as we de do our best to do wetin we plan? (Still check the picture.)

¹⁸ Just as the person wey de use boat travel de happy when e reach where e de go, Jehovah go help you fit do wetin you plan as you de worship-am. Remember say plenty people wey de use boat travel, de enjoy their journey. For the same way, make you try to see how Jehovah de bless you. This one go help you de happy as you de do your best to do wetin you plan. (2 Cor. 4:7) If you no tire and stop to de do your best, Jehovah go bless you well-well.—Gal. 6:9.