STUDY ARTICLE 18
SONG 1 The Kind Person Wey Jehovah Be
Trust “the Judge of the Whole Earth” Wey De Show Pity!
“The Judge of the whole earth go do wetin no correct?”—GEN. 18:25.
WETIN WE GO LEARN?
We go learn about how Jehovah go show pity and judge well when e de bring people wey no dey righteous back to life.
1. Which important lesson Jehovah help Abraham learn?
ABRAHAM no ever forget wetin e and Jehovah angel discuss. Jehovah use im angel tell Abraham say E go destroy Sodom and Gomorrah. Wetin e hear worry-am well-well. Then e ask Jehovah say: “You go really destroy righteous people together with wicked people? . . . The Judge of the whole earth go do wetin no correct?” Jehovah sofri help Abraham learn one important lesson say, e no go ever destroy righteous people. All of us de gain from this lesson and e de make our mind come down.—Gen. 18:23-33.
2. Why we dey sure say when Jehovah de judge people, e go always do the correct thing and show pity?
2 Why we dey sure say when Jehovah de judge people, e go always do the correct thing and show pity? Because we know say “Jehovah de see wetin dey inside [person] heart.” (1 Sam. 16:7) The truth be say e know ‘any person heart.’ (1 Ki. 8:39; 1 Chron. 28:9) E really sweet us to know this one. Jehovah get sense pass us by far, so we fit no really understand why e de make some kind decision when e de judge some matter. Na this one make apostle Paul talk about Jehovah say: “Person no fit really understand the way e de judge.”—Rom. 11:33.
3-4. Which questions fit de come our mind sometimes, and wetin we go talk about for this article? (John 5:28, 29)
3 Even though we know say Jehovah de always do the correct thing, we fit still ask questions just as Abraham ask. We fit ask ourself say: ‘E dey possible say some people wey Jehovah destroy, like people for Sodom and Gomorrah go fit come back to life? E dey possible say some of them fit dey among the “people wey no do the correct thing for God eye,” wey e go bring back to life?’—Acts 24:15.
4 Make we talk about wetin we know about resurrection. E never tey wey we adjust wetin we understand about wetin e mean to “resurrect get life,” and “resurrect to face judgment.” a (Read John 5:28, 29.) The new way we understand-am now, don make us adjust more things. We go talk about them for this article and the next one. We go first talk about wetin we no know about the way Jehovah de judge, before we talk about wetin we know.
WETIN WE NO KNOW
5. Wetin we believe before about people wey Jehovah destroy for Sodom and Gomorrah?
5 Before, our book them don talk about wetin go happen to people wey Jehovah judge say them no dey righteous. We don talk before say people wey Jehovah destroy, like people for Sodom and Gomorrah, no go come back to life again. But after the faithful slave don sofri study the matter more, and pray well-well about-am, them come see say we no go fit really talk say hope no dey for them at all. Why?
6. Give example of people wey Jehovah judge for Bible time as people wey no dey righteous, and wetin Bible no tell us about each of them?
6 Make we talk about some example from Bible. Plenty place for Bible talk about wetin Jehovah do to people wey no dey righteous. For example, Bible talk about the plenty people wey Jehovah use Heavy Rain destroy for Noah time. E still talk about the seven nations wey Jehovah tell Israel people make them destroy for the Promise Land, and the 185,000 Assyria soldiers wey one angel kill for one night. (Gen. 7:23; Deut. 7:1-3; Isa. 37:36, 37) For all this people wey Jehovah destroy, Bible no tell us say Jehovah destroy each of them forever, and say e no go bring any of them back to life. Why we talk like that?
7. Wetin we no know about the people wey Jehovah use Heavy Rain destroy for the time of Noah, or the people wey Jehovah use Israel people destroy for Canaan? (Check the picture .)
7 For the example wey we don talk about, we no know how Jehovah judge each of the people wey e destroy. And we no know if each of them be get the chance to learn about Jehovah so that them fit repent. When Bible talk about the time of Noah, e talk say Noah “preach about wetin correct for God eye.” (2 Pet. 2:5) But Bible no talk say when Noah de build the big ark, e try to preach to each person wey dey this earth that time. Na so e still be for Canaan people wey Jehovah use Israel people destroy. We no know if each of them be get the chance to learn about Jehovah to fit change their bad life.
Noah and im family de build the big ark. We no know if Noah and im family preach to everybody for this earth when them de build the ark, before the Heavy Rain fall (Check paragraph 7)
8. Wetin we no know about the people of Sodom and Gomorrah?
8 What about the people wey Jehovah destroy for Sodom and Gomorrah? Lot wey be righteous man live for Sodom. But we know whether Lot preach to all of them? No. Na true say them be wicked people, but each of them really know wetin good and wetin bad? You remember wetin Bible talk about the people wey be want rape Lot visitors? Bible talk say the people wey surround the house na “from boy to old man.” (Gen. 19:4; 2 Pet. 2:7) We really know whether our God wey de show pity don decide say all the people wey e destroy for Sodom and Gomorrah, no go come back to life? Jehovah tell Abraham say ten people wey dey righteous no dey that city. (Gen. 18:32) So Jehovah destroy them because them no dey righteous. But, we fit really talk say Jehovah no go bring any of them back to life, when e de bring people wey no dey righteous back to life? No, we no go fit talk like that!
9. Wetin we no know about King Solomon?
9 We get story of some people for Bible wey start to worship Jehovah well, but later them start to do wetin bad for Jehovah eye. One example na King Solomon. E know Jehovah well and how to worship-am, and Jehovah really bless-am. But later, Solomon start to worship other gods. This one make Jehovah vex well-well, and Israel people suffer for many-many years because of wetin Solomon do. Na true say Bible talk say when King Solomon die, “them bury-am with im papa-papa them,” the way them bury King David with im papa-papa them. (1 Ki. 11:5-9, 43; 2 Ki. 23:13) But as Bible talk say them bury Solomon with im papa-papa them, e mean say Jehovah go bring-am back to life? Bible no talk. Some people fit think say Jehovah go bring Solomon back to life because Bible talk say, “Person wey don die don free from im sin.” (Rom. 6:7) But wetin this verse talk no mean say Jehovah go bring everybody wey don die back to life. After all, just because person die no mean say e get the right to live again. Resurrection na gift from our Papa wey love us well-well. Na people wey Jehovah want give the chance to worship-am forever, e go bring back to life. (Job 14:13, 14; John 6:44) Jehovah go bring Solomon back to life? Na only Jehovah know. Wetin we know be say, Jehovah go do the correct thing.
WETIN WE KNOW
10. How Jehovah de feel about to destroy people? (Ezekiel 33:11) (Still check the picture.)
10 Read Ezekiel 33:11. Jehovah tell us how e de feel when e de judge people. Apostle Peter write about the same idea wey prophet Ezekiel don talk about. Peter talk say: “Jehovah . . . no want destroy anybody.” (2 Pet. 3:9) This one de make our mind come down, because we know say Jehovah no go destroy person forever, unless e get better reason to do-am. Jehovah de show pity well-well and e de look for any chance to show-am.
When Jehovah go bring people wey no dey righteous back to life, different-different kind of people go get the chance to learn about Jehovah (Check paragraph 10)
11. Which people Jehovah no go bring back to life, and how we take know?
11 Which people we know say Jehovah no go bring back to life? Bible talk about only some of them. b Wetin Jesus talk show say Judas Iscariot no go come back to life. (Mark 14:21; still check John 17:12 and the study note for English.) Judas know say wetin e do dey against Jehovah and im Son Jesus, but e still do-am. (Check Mark 3:29 and the study note wey follow-am, for English.) Jesus still talk say some of the people wey de lead for Jew people religion, wey dey against-am no go come back to life. (Matt. 23:33; check John 19:11 and the study note wey be “the man,” for English.) And apostle Paul talk say people wey comot from Jehovah organization and de fight against the organization, no go come back to life if them no repent.—Heb. 6:4-8; 10:29.
12. Wetin we know about the way Jehovah de show pity? Give example.
12 As we don talk before, Jehovah de show pity well-well and “e no want destroy anybody.” How e don show pity to some people wey commit serious sin? Make we see some examples. King David commit serious sins. For example, e sleep with another man wife and kill the man. But later, David repent, so Jehovah show-am pity and forgive-am. (2 Sam. 12:1-13) King Manasseh na another example. E use almost all im life do wicked things. Even as Manasseh wicked reach, Jehovah show-am pity and forgive-am when e repent. (2 Chron. 33:9-16) This two example, teach us say Jehovah de show pity when reason dey for-am to show pity. E go bring people like King David and Manasseh back to life, because them see say wetin them do bad, and them repent.
13. (a) Why Jehovah pity Nineveh people? (b) Wetin Jesus talk say go happen to Nineveh people wey repent?
13 We still know about how Jehovah show Nineveh people pity. Jehovah tell prophet Jonah say: “I don see the bad things wey them de do.” But when them repent, Jehovah forgive them. Jehovah show say e get pity pass Jonah by far. Jonah really vex when Jehovah pity Nineveh people, but Jehovah let-am know say the people “no even know their right from their left.” (Jonah 1:1, 2; 3:10; 4:9-11) Later, Jesus use this example teach im disciples say Jehovah de judge well and show pity. E talk say Nineveh people wey repent, “go come back to life for Judgment Day.”—Matt. 12:41.
14. Wetin Jesus mean when e talk say “Nineveh people go come back to life for Judgment Day”?
14 Wetin Jesus mean when e talk say, “Nineveh people go come back to life for Judgment Day”? Jesus talk say for future, some people go “resurrect to face judgment.” (John 5:29) The Judgment Day wey Jesus talk about, na the One Thousand Years wey e go rule. And for that time, e go bring “people wey do the correct thing for God eye and people wey no do the correct thing for God eye,” back to life. (Acts 24:15) People wey no do the correct thing for God eye go “resurrect to face judgment.” This one mean say after Jehovah don bring them back to life, Jehovah and Jesus go de watch them to see how them de behave and whether them go follow wetin them de learn. If Nineveh person wey Jehovah bring back to life no gree worship-am, Jehovah go destroy-am forever. (Isa. 65:20) But for all the people wey go choose to worship Jehovah, e go give them the chance to live forever!—Dan. 12:2.
15. (a) Why we no suppose talk say nobody for Sodom and Gomorrah go come back to life? (b) How we suppose understand wetin Jude 7 talk? (Check the box wey the title na, “ Wetin Be the Meaning of Wetin Jude Talk?”)
15 When Jesus de talk about people for Sodom and Gomorrah, e talk say for “Judgment Day,” e go easy for them pass the people wey reject-am and the things wey e teach. (Matt. 10:14, 15; 11:23, 24; Luke 10:12) Wetin Jesus mean? You fit think say wetin Jesus talk no be wetin go really happen. But remember say when Jesus talk say the people for Nineveh go come back to life for “Judgment Day,” e de talk wetin go really happen. So e be like say wetin Jesus talk about people for Sodom and Gomorrah too, go really happen. The “Judgment Day” wey Jesus talk about when e de talk about people for Sodom and Gomorrah, and Nineveh people, na the same. Just like the people for Nineveh, the people for Sodom and Gomorrah do bad things. But Nineveh people get the chance to repent. Still remember wetin Jesus talk about the people wey go “resurrect to face judgment.” E talk say them be “people wey don do bad things.” (John 5:29) So e be like say hope dey for people for Sodom and Gomorrah, Jehovah fit bring some of them back to life. E dey possible say some of them go come back to life and get the chance to learn about Jehovah and Jesus Christ!
16. Wetin we know about how Jehovah go decide who e go bring back to life? (Jeremiah 17:10)
16 Read Jeremiah 17:10. This verse talk wetin we know about how Jehovah de judge: Jehovah de see each person heart, and e know “the deep things wey person de think.” When e de decide who e go bring back to life, e go ‘give each person according to how e do things.’ Jehovah no go look face when e de decide who e go bring back to life, but e go show pity if reason dey to show pity. So make we no ever talk say person no go come back to life, unless we dey sure because we see-am for Bible.
THE JUDGE OF THE WHOLE EARTH GO DO WETIN CORRECT
17. Wetin go happen to people wey don die?
17 From when Adam and Eve join Satan sin against God come reach now, billions of people don die. Death na really our “enemy”! (1 Cor. 15:26) Wetin go happen to all the people wey don die? Among the plenty servants of Jehovah wey go come back to life, na only 144,000 God go take go heaven. Them go get life wey no fit ever end. (Rev. 14:1) The rest of the people wey serve Jehovah well before them die, “go come back to life [as] people wey do the correct thing for God eye.” And them go live forever for this earth, if them continue to do wetin correct for God eye for the One Thousand Years Wey Jesus Go Rule, and for the time of final test. (Dan. 12:13; Heb. 12:1) And for the One Thousand Years Wey Jesus Go Rule, “people wey no do the correct thing for God eye,”—wey be people wey never get the chance to serve Jehovah, or “people wey don do bad things”—go get the chance to change their life and worship Jehovah. (Luke 23:42, 43) But for some people wey wicked well-well sotey them make up their mind to dey against Jehovah, Jehovah don decide say e no go ever bring them back to life.—Luke 12:4, 5.
18-19. (a) Why we fit dey sure say Jehovah go judge people wey don die well? (Isaiah 55:8, 9) (b) Wetin we go talk about for the next article?
18 We fit really dey sure say when Jehovah de judge people, e go always judge well? Yes! Abraham understand say Jehovah wey be “the Judge of the whole earth” dey perfect, get sense well-well, and e de show pity. E don train im Son Jesus Christ and give-am the work to judge people. (John 5:22) Jehovah and Jesus know wetin dey each person heart. (Matt. 9:4) So when them de judge each person, them go always do ‘wetin correct’!
19 So make we make up our mind to trust Jehovah and all im decision. We know say we no qualify to judge, but na Jehovah qualify to judge! (Read Isaiah 55:8, 9.) Na im make we trust Jehovah and im Son Jesus, and we leave all the work to judge for their hand. Another thing be say, we dey sure say Jesus wey be our King, go copy im Papa example to judge well and show pity. (Isa. 11:3, 4) But wetin we fit talk about how Jehovah and Jesus go judge people for great tribulation? Wetin we no know? And wetin we know? We go answer this questions for the next article.
SONG 57 De Preach for All Kind of People
b To know if God go bring Adam, Eve, and Cain back to life, abeg check January 1, 2013 Watchtower, p. 12, ftn. (For English.)