1-2. According to 1 Peter 4:7, 8, wetin go help us endure hard condition?

AS WE de near the end of this world, the problems wey we de face fit de serious more-more. (2 Tim. 3:1) For example, after one country for West Africa do election, people begin fight serious fight. For more than six months, our brothers and sisters dey for serious danger because people around them just de fight. But, our brothers and sisters manage to survive for that hard condition. Wetin help them? Some of them go stay with other brothers and sisters for place wey the trouble no reach. One brother talk say: “For that kind condition, I really glad because friends dey around me. We encourage each other.”

² When “great tribulation” start, we go happy if we get good friends and this friends love us. (Rev. 7:14) So, e really dey important make we get tight friends now. (Read 1 Peter 4:7, 8.) We go fit learn plenty things from wetin happen to Jeremiah for Bible. Just before they destroy Jerusalem that time, Jeremiah receive help from e friends and so e survive. * How we fit do like Jeremiah?

3. (a) Wetin for make Jeremiah separate e self from other people? (b) Wetin Jeremiah tell e secretary, and wetin be the result?

³ For at least 40 years, people around Jeremiah no hold God tight. Some na neighbors, and maybe some na family people from the same village wey the name na Anathoth. (Jer. 11:21; 12:6) But Jeremiah no separate e self. Jeremiah even tell e secretary, wey e name na Baruch, how e de feel. Baruch really hold Jeremiah tight. We too, know how Jeremiah feel that time because we fit read about-am for Bible. (Jer. 8:21; 9:1; 20:14-18;  45:1) Baruch write about the things wey Jeremiah face. As e de write-am, the two of them go don learn how to really trust and respect each other.​—Jer. 20:1, 2; 26:7-11.

4. Wetin Jehovah tell Jeremiah make e do, and how this work make Jeremiah and Baruch be tight friend?

⁴ For many years, Jeremiah no fear to warn Israel people about wetin go happen to Jerusalem. (Jer. 25:3) Jehovah tell Jeremiah make e write all the warning for book, so that this one fit still help the people repent. (Jer. 36:1-4) Maybe this work wey Jeremiah and Baruch do last for some months. As them de do this work wey God give them, they go don really enjoy to talk with each other and this one make their faith strong.

5. Wetin make us know say Baruch na good friend to Jeremiah?

⁵ After they write the book finish, Jeremiah need to trust e friend Baruch say e go tell the people the message. (Jer. 36:5, 6) Baruch put e life for danger, and e do this assignment with strong heart. E go the temple and e read the message for inside the book to the people. This thing wey Baruch do go don really make Jeremiah glad. (Jer. 36:8-10) The rulers for Judah hear the thing wey Baruch do. So they command Baruch make e read wetin dey inside the book make they hear, and make e read-am loud! (Jer. 36:14, 15) The rulers decide say they go tell King Jehoiakim the thing wey Jeremiah talk. This people do good to Baruch when they talk say: “Make wuna go hide wunaself, you and Jeremiah. Make wuna no allow anybody know the place wey wuna dey.” (Jer. 36:16-19) Na really better advice be that one!

6. Wetin Jeremiah and Baruch do when they give them trouble?

⁶ When King Jehoiakim hear this thing wey Jeremiah write, e over vex. Then e burn the book, and e talk say make they arrest Jeremiah and Baruch. But Jeremiah no fear. E take  another book, and e give-am to Baruch. As e de talk the message from Jehovah, Baruch de write-am. E write “for inside the [book] all the things wey King Jehoiakim of Judah burn for fire.”​—Jer. 36:26-28, 32.

7. Wetin fit don happen as Jeremiah and Baruch work together?

⁷ Many times, when people face problem together and they survive-am together, their friendship de tight more. So we go fit talk say, as Jeremiah and Baruch work together to write another book after wicked King Jehoiakim don destroy the first one, they come know each other more-more and their friendship come tight pass before. Wetin we fit learn from the example wey this two faithful men show us?

8. Why e fit hard us to make tight friends, and why we no suppose tire?

⁸ E fit hard us to tell other people how we de feel if person don do wetin make us vex before. (Prov. 18:19, 24) Or we fit de feel say we no get the time and power to get tight friends. But make we no tire. If we want make our brothers and sisters support us when we de face problems, na now we go make our friendship tight with them. And one important way wey we fit do this one na when we tell them wetin dey our mind and how we de feel.​—1 Pet. 1:22.

9. (a) How Jesus show say e trust e friends? (b) Why e be say, if you tell your friends things wey you get for mind and how you de feel, wuna friendship go de tight more-more? Give example.

⁹ Jesus do wetin show say e trust e friends. E tell them things and e no hide anything from them. (John 15:15) How we fit do like Jesus? Somethings de make us happy, some de worry us for mind, and some de make us vex. When we tell our friends about this things, we de do like Jesus. When person de talk to you, make you listen well. And when you do like that, you fit see say plenty things wey you de think, many plans wey you get, and how you de feel many times, na the same with the person. Make we talk about the example of Sister Cindy. This sister dey around 20 years. E make friend with one sister wey e name na Marie-Louise. This sister dey around 60 years, and e de pioneer. This two sisters de preach together every Thursday morning, and them de talk with each other well about different-different things. Cindy talk say, “I de like to talk about important things with my friends because this one de make me know and understand them pass before.” Na good thing if you tell your friends things wey you get for mind, tell them the way you de feel and listen to them when them de talk. Like Sister Cindy, this one go  make wuna be tight friends pass as wuna be before.​—Prov. 27:9.

10. According to Proverbs 27:17, which good things fit happen when we work together with our brothers and sisters?

¹⁰ Just as the example of Jeremiah and Baruch show us, when we de work with brothers and sisters and we see the fine way wey them de do things, we de learn from them and we de near them pass before. (Read Proverbs 27:17.) For example, make we talk say you de preach one day. Then, you hear your friend as e de use strong heart de defend the things wey e believe, or maybe you see as e de talk from e heart about Jehovah and the things wey E go do for future. How this one go make you feel? You go love this your friend more-more, no be so?

11-12. Give one example to show say when we de preach with our friends, our friendship with them go de tight more-more.

¹¹ Make we talk about two example. They go help us see say when people de work together for preaching, them de near each other more-more. One sister wey e name na Adeline dey 23 years. E tell another sister wey e name na Candice make they go preach for area wey people no really dey to preach. Adeline talk say: “That time, we want put ourself more for the preaching work and enjoy-am more. Two of us want wetin go make us continue to give Jehovah our best.” Wetin this two sisters gain as them de work together? Adeline talk say: “Everyday after we preach finish, we de talk about how we feel, how our discussion with people encourage us, and wetin make us believe say Jehovah de direct us for the preaching work. The two of us enjoy this things wey we talk about that time, and the way we know each other come better pass before.”

¹² Two sisters from France wey their name na Laïla and Marianne, go preach for five weeks for one city wey the name na Bangui. This city na the capital of Central African Republic and na very busy place. Laïla talk say: “Me and Marianne no de see things the same way. But  we glad say we tell each other how we de feel and we show real love. This one make our friendship tight more-more. Marianne no de waste time before e start to enjoy new place, e get love for the people, and e de preach with all e power. As I see all this one, I come get more respect for Marianne.” You no need to travel go another country before you go enjoy fine things like this. Anytime wey you preach with brother or sister for your area, you get the chance to know that person pass before, and the chance to make wuna friendship tight pass before.

13. Wetin de happen sometimes wey we work together with our friends?

¹³ Sometimes when we de work together with our friends, we no de only see the fine things wey them de do, we still de see their mistake. Wetin fit help us handle this kind situation? Make we talk about Jeremiah again. We go learn wetin help Jeremiah see the fine things wey e friends de do and forgive them for their mistake.

14. Wetin Jeremiah learn about Jehovah, and how that one help Jeremiah?

¹⁴ Maybe na Jeremiah write the book of 1 Kings and 2 Kings, and e still write the book of Jeremiah. That work go don help Jeremiah see the way Jehovah de show people pity. For example, Jeremiah know say when King Ahab stop to do bad things, Jehovah talk say Ahab no go see the time when E go destroy everybody for e family. (1 Ki. 21:27-29) Jeremiah still know say Manasseh even do bad things pass Ahab to make Jehovah vex. Even with that one, Jehovah forgive Manasseh because e repent. (2 Ki. 21:16, 17; 2 Chron. 33:10-13) This examples show say God dey patient and e de show pity when e de do things with e friends. This one go don help Jeremiah to do like God.​—Ps. 103:8, 9.

15. How Jeremiah show say e dey patient like Jehovah the time wey Baruch allow other things remove e mind from e assignment?

¹⁵ Think about how Jeremiah help Baruch when e allow other things remove e mind from e assignment for some time. E no quick talk for e mind say Baruch no go fit change. Instead, e help this e friend Baruch as e tell Baruch the clear message from God. (Jer. 45:1-5) Wetin we fit learn from this example?

16. As e dey for Proverbs 17:9, wetin we need to do so that the friendship wey we get with our brothers and sisters go continue?

¹⁶ The truth be say, make we no expect say our brothers and sisters no go do mistake. So, when we don be tight friend with person, we need to work hard so that we go continue to be friends. If our friend make mistake, we fit need to use Bible help this our friend; we no go hide anything. (Ps. 141:5) And when they do something and e pain us, we need to forgive them. If we don forgive them, make we no try to talk about the matter again. (Read Proverbs 17:9.) For this our time wey things really hard, make we de put our mind for the fine-fine things wey our brothers and sisters de do, instead of their mistake. This one really dey important! If we do like that, our friendship with them go de tight more-more. E really good make we do like that because we go need tight friends for great tribulation.

17. How Jeremiah show say e be better friend even when condition hard?

¹⁷ The things wey prophet Jeremiah do show say e love e friends even when condition hard. For example, make we talk about one man for Bible wey e name na Ebed-melech. E de work for palace. After e save Jeremiah make e no die  for inside one deep pit wey potopoto plenty, e begin fear say the rulers go take e own life. When Jeremiah hear wetin happen, e no close mouth. E no feel say e friend go fit manage endure wetin go happen by e self. Even though say Jeremiah dey for inside prison, e do everything wey e fit do to help e friend. So e comfort Ebed-melech with the thing wey Jehovah promise.​—Jer. 38:7-13; 39:15-18.

18. According to Proverbs 17:17, wetin we suppose to do when our friend de suffer?

¹⁸ Today, different-different things de make life hard for our brothers and sisters. For example, many of them de suffer when things like war happen or heavy rain scatter their property. When that kind thing happen, some of us fit tell this brothers and sisters make they come stay for our house. Other people go fit support this brothers and sisters with wetin they need. But all of us fit pray to Jehovah make e help our brothers and sisters. When we hear say one brother or sister don tire because of something, na true say we fit no know the thing wey we go talk or do. But all of us go fit do something to help. For example, we fit spend time with that our friend. We fit take our time listen to the brother or sister well when e de talk. And we fit tell the person about any Bible verse wey we like. (Isa. 50:4) The important thing be say, you dey with your friends to help them when they need you.​—Read Proverbs 17:17.

19. If we make tight friends now, how that one go help us for future?

¹⁹ Now na the time wey we must ready to get tight friendship with our brothers and sisters, and try make e continue to be like that. Why? Na because our enemies go try to use lie-lie separate us. They go try to make us fight each other. But no matter wetin they do, e no go work. They no go fit make us stop to love our brothers and sisters. Nothing wey they do go fit spoil the friendship wey we get with each other. The truth be say, the friendship wey we get with our brothers and sisters go last forever!