FOR Bible time, house manager de take care of the house or property of another person.

When Joseph, the son of Jacob dey Egypt as slave, e begin manage the things wey e master get. The truth be say, e master na Egypt person and e “put everything wey e get for the hand of Joseph.” (Gen. 39:2-6) After, when Joseph come get plenty power and begin rule for Egypt, e choose one servant to care for e house.​—Gen. 44:4.

When Jesus dey this earth, some people de live far from their farm. So they go select some servants as manager to care for the farm. This servants de check the work wey the other workers de do for the farm everyday.

That time, who fit be house manager? For the time of the apostles, one man for Rome wey e name na Columella talk say before person choose slave as manager or caretaker, the slave go don “learn to do the work well.” The slave go make “sure say the workers do the work but e no go dey harsh with the workers.” E still talk say the first important thing wey they expect from the slave na say, make e no think say e know everything, e need to always want learn new things.

Bible use the example of house manager and the work wey e de do to talk about some of the work wey we de do for congregation. For example, apostle Peter encourage Christians say “God de show e special favor. . . . So as better slave wey God don show this kind favor, make each person use any gift wey e don receive to serve other people.”​—1 Pet. 4:10.

Jesus use the example of house manager for the story wey e talk for Luke 16:1-8. Apart from that one, e promise e followers say e go choose “faithful and discreet slave,” or “servant wey they fit trust.” E talk this one for the prophecy about the sign wey we go use know say e don dey around as King. The main work wey this slave go do na to teach followers of Christ things about God for the time of the end. This things wey they go teach go be like food for followers of Christ. (Matt. 24:45-47; Luke 12:42) The faithful slave de prepare publications and de make sure say servants of God for the whole world get-am. This publications de make our faith strong and we glad say we de receive them.