1-2. Which better reasons we get to show each other love wey no de fail?

WE GET plenty reason to show love wey no de fail to our brothers and sisters. Wetin be some of them? See how this Bible verse them answer this question: “No stop to show love wey no de fail, and continue to show say you be person wey they fit trust. . . . That one go make you get favor and good name with God and people.” “Person wey get love wey no de fail de benefit e self.” “Person wey de do good and de show love wey no de fail, go get life.”—Prov. 3:3, 4; 11:17, ftn.; 21:21.

² This Bible verse them show three reason why we suppose de show each other love wey no de fail. Number one, e go make us dey special to God. Number two, we ourself go gain. For example, we go be tight friends with other people and our friendship with them go last. Number three, for future we go enjoy plenty blessing, even everlasting life. True-true, we get better reasons to obey wetin Jehovah talk, when e say: “De show each other love wey no de fail and de pity for each other.”—Zech. 7:9.

3. Which questions we go answer for this article?

³ For this article, we go answer four questions. (1) Who we suppose show love wey no de fail? (2) Wetin we fit learn from the book of Ruth about how to show this special love? (3) How we fit show this special love for this our time? (4) Wetin we go gain if we de show love wey no de fail?

4. How we fit show love wey no de fail like Jehovah? (Mark 10:29, 30)

⁴ For the first article for this watchtower, we learn say Jehovah de show love wey no de fail, or special love only to people wey love-am and de worship-am. (Dan. 9:4) So, we want ‘de copy Jehovah example as e children wey e really love.’ (Eph. 5:1) We want make the love wey we get for our brothers and sisters really come from our heart. Make e be deep-strong love.—Read Mark 10:29, 30.

5-6. Why the man for this example still de work for the company?

⁵ You go agree say for us to fit show our brothers and sisters for congregation love wey no de fail, we must really understand wetin e be. To really understand this love, make we use one example explain-am.

⁶ Think-am say one man don work for one company for many years, and e de do e work well. But all this years, e never ever meet the owners of the company. And e fit no always agree with the decisions wey the company de make. But e still de work for there because e need that work to get money to care for e family. No be because e really love the company. And e go continue to work for the company until e retire unless e get better work for another place.

7-8. (a) Why servants of Jehovah for Bible time show love wey no de fail? (b) Why we go talk about some verse them for the book of Ruth?

⁷ So, wetin be the difference between the way the man work for the company and love wey no de fail? The difference na the reason for the action. The man still dey that company because of the money wey e de get. But servants of Jehovah for Bible time show love wey no de fail because e come from their heart, no be because they force them to do-am or because of wetin they go gain. Think about the example of David. Even though say Jonathan papa want kill David, David continue to love Jonathan with all e heart. David love this e dear friend sotey even many years after Jonathan die, David continue to show love wey no de fail to Jonathan pikin, wey be Mephibosheth.—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ We fit learn more about this special love from some verse them for the book of Ruth. Wetin we fit learn about love wey no de fail from the people wey them talk about for that book? How we fit use wetin we learn for our congregation? *

9. Why Naomi think say na Jehovah de cause e problem?

⁹ For the book of Ruth, they write the story of Naomi, e daughter-in-law Ruth, and Boaz. Boaz love Jehovah and e come from the family of Naomi husband. One time when hunger dey for Israel, Naomi, e husband, and their two sons pack go Moab. As them dey there, Naomi husband come die. Later, the two sons marry. But after sometime, they still die. (Ruth 1:3-5; 2:1) This problems really make Naomi faith weak. Because of the kind pain wey Naomi feel, e think say na Jehovah de cause e problem. Na e  make e talk say: “The hand of Jehovah dey against me.” “The Almighty God don make life really bitter for me.” E still talk say: ‘Na Jehovah dey against me, and the Almighty God de cause problem for me.’—Ruth 1:13, 20, 21.

10. How Jehovah feel about wetin Naomi talk and wetin e do?

¹⁰ How Jehovah feel about this things wey Naomi talk and wetin e do? Jehovah no leave this e servant wey de suffer. Instead, e feel for Naomi. Jehovah understand say ‘too much suffer fit make person wey get sense behave like mad person.’ (Eccl. 7:7) But Naomi need help wey go make-am know say Jehovah never leave-am. How Jehovah help Naomi? (1 Sam. 2:8) Jehovah use Ruth help Naomi because Ruth show Naomi love wey no de fail. Ruth show Naomi deep love from e heart, and comfort Naomi so that Naomi go know say Jehovah still dey with-am. Wetin we learn from this example wey Ruth show?

11. Why we de help brothers and sisters for congregation wey de face problem?

¹¹ Love wey no de fail go move us to help people wey de face problem. Just as Ruth no leave Naomi, na so brothers and sisters de use all their heart help people for congregation wey problem don make them weak. They love this brothers and sisters, and they ready to do anything wey they fit do to help them. (Prov. 12:25, ftn.; 24:10) And this one na wetin apostle Paul advice us say make we do. E talk say: “Encourage people wey no dey happy, help people wey dey weak, dey patient with everybody.”—1 Thess. 5:14.

12. Wetin be the best way to help brother or sister wey de face problem?

¹² Many times, the best way to help brother or sister wey de face problem, na to listen to the person and make the person know say you still love-am. Jehovah de see wetin you de do to help e precious sheep. (Ps. 41:1) Proverbs 19:17 talk say: “The person wey de show favor to poor person de borrow Jehovah something, and God go pay-am back for wetin e do.”

13. How Ruth decision different from Orpah own, and how Ruth show say e get love wey no de fail? (Check picture for front cover.)

¹³ We fit learn more about love wey no de fail when we think about wetin happen to Naomi after e husband and two pikin die. When Naomi hear say “Jehovah don de bless e people with food,” e decide say e go go back to Judah. (Ruth 1:6) E two daughter-in-law follow-am. But as them de go, Naomi beg them three times say make they go back to Moab. Wetin come happen? Bible talk say: “Orpah kiss e mother-in-law and leave them. But Ruth no gree leave Naomi.” (Ruth 1:7-14) Orpah  follow wetin Naomi talk and go back. But Ruth do wetin Naomi no expect. Na true say Ruth too, dey free to go back but because e really love Naomi, e decide to stay and help Naomi. (Ruth 1:16, 17) Ruth no stay with Naomi because they force-am, but e do-am from e heart. Wetin Ruth do, show say e really get love wey no de fail for Naomi. Wetin we fit learn from Ruth?

14. (a) Wetin brothers and sisters today de do to show say they get love wey no de fail? (b) From wetin Hebrews 13:16 talk, which kind things de make Jehovah happy?

¹⁴ Love wey no de fail go make us do pass wetin people expect from us. Today, servants of Jehovah de copy people for Bible time. Them de show love wey no de fail for other servants of Jehovah, even the ones wey they never meet before. For example, when they hear say natural disaster happen for the area wey their brothers dey, they go quick find out how they fit help. When person for congregation get money problem, they go quick find out wetin the person need and help-am. Just like the brothers for Macedonia that time, them de do pass wetin the person expect. They ready to “give pass wetin they get” to help their brothers. (2 Cor. 8:3) E really de sweet Jehovah to see say e people de show this kind love!—Read Hebrews 13:16.

15-16. How Ruth show say e no tire to help Naomi?

¹⁵ We fit learn some important lessons from the story of Ruth and Naomi. Make we talk about some of them.

¹⁶ No tire to help. When Ruth first talk say e go follow Naomi go back to Judah, Naomi no gree. But that one no make Ruth change mind. Wetin come happen? ‘When Naomi see say Ruth no ready to leave-am, Naomi stop to tell Ruth wetin fit change e mind.’—Ruth 1:15-18.

17. Wetin go help us no quick tire to help person wey de face problem?

¹⁷ Wetin we learn: E no easy to help people wey de face problem. But make we no tire to help them. For example, sister wey need help, fit no gree make we help-am the first time. * Even with this one, love wey no de fail go make us no leave the sister. (Gal. 6:2) We hope say as time de go, the sister go accept our help and allow us comfort-am.

18. Which thing fit don make Ruth no happy?

¹⁸ Make e no vex you. When Naomi and Ruth reach Bethlehem, them see Naomi former neighbors. Naomi tell them say: “My hand full when I de comot, but Jehovah don make me come back with empty hand.” (Ruth 1:21) Imagine how Ruth go don feel as e hear wetin Naomi talk! Ruth don do everything wey e fit do, to help Naomi. Ruth don cry with Naomi, comfort Naomi, and waka with Naomi for many days. Even with all this one, Naomi still talk say: “Jehovah don make me come back with empty hand.” Wetin Naomi talk just be like say e no value all the things wey Ruth don do, even as Ruth dey there with-am. This one fit don make Ruth no happy. But, e no still leave Naomi.

19. Wetin go help us no leave person wey de face problem?

¹⁹ Wetin we learn: Today, sister wey de face problem fit talk wetin go pain us  even as we de do our best to help-am. But make we no allow that one vex us, because we no want leave our sister wey need help. We go still pray make Jehovah help us find another way to comfort-am.—Prov. 17:17.

20. Wetin help Ruth continue to help Naomi?

²⁰ Encourage people for the correct time. Ruth don really show special love to Naomi, but now Ruth need encouragement. And Jehovah use Boaz encourage Ruth. Boaz tell Ruth say: “Make Jehovah bless you for wetin you don do, and make you get complete blessing from Jehovah the God of Israel wey you come meet to protect you with e wing.” Wetin Boaz talk really touch Ruth. So, Ruth tell Boaz say: ‘You don comfort me, and wetin you talk really touch your servant.’ (Ruth 2:12, 13) Boaz encourage Ruth when e need the encouragement, and that one make Ruth no tire to help Naomi.

21. As Isaiah 32:1, 2 talk, wetin better elders de do?

²¹ Wetin we learn: Sometimes, people wey de show other people love wey no de fail, still need encouragement. Boaz thank Ruth when e see the way e de help Naomi. Na the same thing elders de do today. When they see brothers and sisters for congregation wey de do their best to help other people, them de thank them for their work. This encouragement go help them no tire to help other people.—Read Isaiah 32:1, 2.

22-23. How the way Naomi feel change, and why? (Psalm 136:23, 26)

²² After some time, Boaz give Ruth and Naomi, plenty food. (Ruth 2:14-18) How Naomi feel for wetin Boaz do? E talk say: “Make Jehovah, wey no de stop to show love wey no de fail for people wey dey  alive and people wey don die, bless-am.” (Ruth 2:20a) This one really show say the way Naomi de feel don change. Before, because of the pain wey Naomi de feel for e heart, e talk say: “Jehovah dey against me,” but now wey e de happy, e talk say: “Jehovah . . . no de stop to show love wey no de fail.” Wetin fit don make Naomi change?

²³ At last, Naomi come see say Jehovah no ever leave-am. E see say na Jehovah use Ruth support-am when e de come back to Judah. (Ruth 1:16) E still see say na Jehovah use Boaz, one of their family person wey fit “claim them back,” give e and Ruth wetin they need. * (Ruth 2:19, 20b) E fit don think for e mind say: ‘Na now I really know say Jehovah no ever leave me, say e dey with me all this time!’ (Read Psalm 136:23, 26.) Naomi go don really happy say Ruth and Boaz no tire to help-am. We dey sure say all of them go don really happy say Naomi faith don strong again.

24. Why we go continue to show brothers and sisters for congregation, love wey no de fail?

²⁴ Wetin we don learn from the book of Ruth about love wey no de fail? This love de make us no quick tire for our brothers and sisters wey de face problem. E still de make us do everything wey we fit do to help them. Elders need to de encourage people wey de show this kind love to other people. And make them de do-am for the correct time. When we see say people wey their faith first weak, don de serve Jehovah well again, e de really make us happy. (Acts 20:35) But wetin be the main reason why we de continue to show this special love? Na because we want copy Jehovah example and make-am happy as e de show ‘love wey no de fail for plenty way.’—Ex. 34:6; Ps. 33:22.