AROUND the year 670 B.C.E., Assyria don de rule plenty place for the world pass any other nation. One British Museum website talk say, Assyria rule from “Cyprus wey dey for west reach Iran wey dey for east, and for some time e even rule Egypt join.” Nineveh wey be the capital of Assyria na the city wey big pass for the world that time. E get plenty fine-fine garden, big-big palace, and big-big library. The things wey they write for wall, for olden days Nineveh, show say King Ashurbanipal call e self “king of the world,” like other kings wey rule Assyria. For the time wey e rule, Assyria and Nineveh just be like place wey no other nation fit win for war.

Even with that one, when Assyria don over strong, Zephaniah wey be prophet of Jehovah talk say: “[Jehovah] go . . . destroy Assyria, and e go turn Nineveh to empty place, the place go dry like desert.” Apart from that one, Nahum wey be prophet of Jehovah talk say: “Carry silver, carry gold! . . . The city dey empty, they don abandon-am, e don scatter finish! . . . Everybody wey see you go run from you and talk say, ‘They don destroy Nineveh!’ ” (Zeph. 2:13; Nah. 2:9, 10; 3:7) When people hear this prophecy them, they fit don wonder say: ‘This kind thing go fit ever happen? As Assyria get power reach, any other nation fit ever win-am for war?’ This one go don be like wetin no dey possible.

Even with that one, wetin people no expect happen. Small time before the year 600 B.C.E., Babylon soldiers and Media soldiers together, don already win Assyria. People stop to live for Nineveh, and as time de go, people forget about the city kpatakpata! One book wey the Metropolitan Museum of Art for New York write, talk say as time de go, they abandon the city and people only know about Nineveh from Bible. One Internet website wey de talk about things wey happen for olden days, talk say small time after the year 1800, “nobody even know whether the capital of the great Assyria don ever dey before.” But, for the year 1845, Austen Henry Layard wey e work na to dig olden days things for ground start to dig parts of the city of Nineveh wey scatter remain for ground. The things wey e dig come out show say true-true, Nineveh na big city before.

The prophecy them about Nineveh happen as Bible talk-am. This one make us really believe say the other prophecy them wey Bible talk, about how the governments today go end, go still happen.—Dan. 2:44; Rev. 19:15, 19-21.