1-2. (a) Why e dey important make people wey just marry trust Jehovah? (Psalm 37:3, 4) (b) Wetin we go learn for this article?

YOU de plan to marry, or you just marry? Anyone wey e be, we dey sure say you want enjoy life with the person wey you really love. Na true say marriage get e own problem, and you go need to make some important decisions. But, the way you and your husband or wife go handle the problems and make decisions go affect wuna happiness for many years. If wuna trust Jehovah, wuna go make better decisions, wuna marriage go really strong, and wuna go really happy. But if wuna no follow Jehovah advice for wuna marriage, wuna go face plenty problem and wuna no go de happy.—Read Psalm 37:3, 4.

² Even though this article na for people wey just marry, we go still learn about problems wey fit affect all married people. We go talk about wetin we fit learn from the example of some servants of Jehovah for Bible. Their example go teach us things wey we fit do for our life and even for our marriage. We go still see wetin we fit learn from some married servants of Jehovah for our time.

3-4. Which problems people wey just marry fit face?

³ When people just marry, some people fit de encourage  them to live their life like other people. For example, their papa, mama, and family people fit want make they start to born pikin quick-quick. Or their friends and family people fit encourage them to get their own house and put plenty things inside to make the house fine.

⁴ If they no dey careful, they fit make decision wey go make them de owe plenty money. And because of this one, they go use all their time de work so that they fit pay the money wey they owe. And this work fit make them no get time for personal study, family worship, and preaching. They fit even miss meeting to work overtime so that they go get more money or to make sure say they no sack them for work. If they live their life like this, they go miss better chance to do more for Jehovah.

5. Wetin you learn from the example of Klaus and Marisa?

⁵ Plenty example don show say if to gather money and property na the main thing for our life, we no go happy. See wetin this husband and wife learn about this one. Their name na Klaus and Marisa. * When they just marry, two of them de work so that they fit get plenty money and property. But, they no really happy. Klaus talk say: “We really get plenty things, even pass wetin we need, but we no get any plan to do more for Jehovah. But to talk true, life no easy for us and na so-so stress we de face.” E fit be say you too don see say to put money and property as the main thing for life, no de make you happy. If na so e be with you, no too think-am. The good example of other people fit help you. Make we first talk about wetin husband them fit learn from King Jehoshaphat.

6. How King Jehoshaphat follow the advice wey dey Proverbs 3:5, 6, when plenty army gather to fight them?

⁶ You be husband? You de feel say your work too much for you? If na so you de feel, you fit learn from King Jehoshaphat example. Because Jehoshaphat na king, e de care for the whole nation of Israel. Wetin help-am fit do this big work? Jehoshaphat do everything wey e fit do, to protect e people. E make the city them for Judah really strong and arrange strong army wey pass one million one hundred and sixty thousand. (2 Chron. 17:12-19) After some time, Jehoshaphat face serious problem. People from Ammon, Moab and the mountain area for Seir gather to go fight Jehoshaphat and e people. (2 Chron. 20:1, 2) Wetin Jehoshaphat do? E pray make Jehovah help-am and give-am power. E follow the good advice for Proverbs 3:5, 6. (Read-am.) They write this prayer for 2 Chronicles  20:5-12. And the prayer show say Jehoshaphat really trust Jehovah. How Jehovah answer e prayer?

7. How Jehovah answer Jehoshaphat prayer?

⁷ Jehovah use Jahaziel wey be Levite tell Jehoshaphat say: “Make wuna arrange wunaself, stand for where wuna dey, and see how Jehovah go save wuna.” (2 Chron. 20:13-17) This one no be the normal way wey people de fight war. But this command no come from man, e come from Jehovah. Because Jehoshaphat trust Jehovah with all e heart, e do wetin Jehovah talk. When Jehoshaphat carry the people to go fight their enemy, e no put the best soldier for front. Instead, e put people wey de sing to Jehovah for front. And they no carry anything wey they fit use fight. Jehovah do wetin e promise Jehoshaphat; e help Jehoshaphat win their enemy.—2 Chron. 20:18-23.

8. Wetin husband them fit learn from Jehoshaphat?

⁸ Wuna wey be husband fit learn from Jehoshaphat example. Because na your work to care for your family, you de do your best to protect and support your family. But, when problem come, make you no feel say you fit handle-am by yourself. No trust yourself! Instead, when you dey alone, pray make Jehovah help you. And when you de pray with your wife, pray with all your heart. De study Bible and de read the publications wey our organization de produce. Use wetin you learn for your life. This one go show say you de follow Jehovah direction. Other people fit no like your decision because you de follow advice from Bible. They fit even tell you say you no get sense. Or say the best way to protect your family na to get plenty money so that you fit buy anything wey you want. But remember Jehoshaphat, e trust Jehovah and e show-am for wetin e do. Jehovah no leave Jehoshaphat, and e no go ever leave you. (Ps. 37:28; Heb. 13:5) Which other thing married people fit do to make sure say they enjoy their marriage?

9. Wetin we fit talk about prophet Isaiah and e wife?

⁹ The main thing for Isaiah and e wife, na to worship Jehovah. Isaiah na prophet, and e fit be say e wife still do work of prophet because Bible call-am “the prophetess.” (Isa. 8:1-4) E clear say Isaiah and e wife put the worship of Jehovah as number one thing for their marriage. So, they be better example for married people today!

10. When husband and wife de study things wey Bible talk say go happen, how this one go help them?

¹⁰ Married people today fit put Jehovah first for their marriage, when them de do everything wey they fit for Jehovah work. They fit make their trust for Jehovah strong pass before, if them de study things wey Bible talk say go happen, and de see how e de always happen. * (Titus 1:2) They fit think about how they fit do their part to make wetin Bible talk happen. For example, as them de preach, them de do their part to make sure say as  Jesus talk, people go hear the good news before the end come. (Matt. 24:14) When husband and wife dey sure say things wey Bible talk de happen, e go make them put all their heart to do more for Jehovah.

11. Wetin Priscilla and Aquila do, and why?

¹¹ Young married people fit learn from Priscilla and Aquila. This husband and wife na Jews and that time them dey the city of Rome. They don hear the good news about Jesus and become Christians. E clear say them de enjoy their life. But, their life change when Emperor Claudius command all the Jews to comot from Rome. How you think say this one affect Aquila and Priscilla? They leave the place wey they know, go find new house, and start their business wey be to make tent again. This problem wey they face make them stop to put the Kingdom first? The answer na no. For their new place for Corinth, Aquila and Priscilla help brothers and sisters for the congregation. They still join apostle Paul to make the faith of the brothers and sisters strong. After, they still go other place wey they need more people to preach. (Acts 18:18-21; Rom. 16:3-5) They really enjoy their life together as them dey busy de work for Jehovah.

12. Why e dey important make married people get plan to do more for Jehovah?

¹² Married people for our time wey de put the Kingdom first for their life, de copy Priscilla and Aquila. The best time for them to talk how they go use their life, na before they marry. When husband and wife decide to do more for Jehovah, and they struggle together to do-am, they go see as Jehovah de use e holy spirit de help them. (Eccl. 4:9, 12) Make we talk about the experience of Russell and Elizabeth. Russell talk say, “Before we marry, we talk about wetin we want do for Jehovah.” Elizabeth talk say, “We talk about-am so that when we want make other decisions later, we go make sure say e no affect our decision to do more for Jehovah.” Later, their situation allow them to go  Micronesia go preach for area wey they need more publishers.

13. As e dey for Psalm 28:7, wetin go happen when we trust Jehovah?

¹³ Plenty married people for our time de do like Russell and Elizabeth. They don decide say they go live simple life so that they go get plenty time to preach and teach people about the Kingdom. When husband and wife decide say they go do more for Jehovah, and they work together to do-am, they go get plenty blessings. They go see how Jehovah de care for them, their trust for Jehovah go grow, and they go really dey happy.—Read Psalm 28:7.

14. How Peter and e wife show say they trust the promise for Matthew 6:25, 31-34?

¹⁴ Married people fit still learn from apostle Peter and e wife. Around six months to one year after apostle Peter meet Jesus, e make one important decision. Peter na fisherman and e de do this work to care for e family. So, when Jesus invite Peter to use all e time join for the preaching work, Peter really need to think about e wife. (Luke 5:1-11) But e choose to follow Jesus preach. And that one na better decision. We get good reason to believe say e wife support e decision. Bible show say after Jesus go back to heaven, Peter travel with e wife to encourage the congregations for some time. (1 Cor. 9:5) E clear say e wife show good example for congregation. Na e make Peter no fear to give husband and wife them for congregation advice. And they write-am for Bible. (1 Pet. 3:1-7) True-true, Peter and e wife trust the promise wey Jehovah make when e say e go care for them if they put e Kingdom first for their life.—Read Matthew 6:25, 31-34.

15. Wetin you learn from the experience of Tiago and Esther?

¹⁵ If you don marry for some years now, how you fit continue to get the mind to do more for Jehovah? One thing wey fit help you na the experience of other servants of Jehovah wey don marry. For example, you fit read the article wey be “Their Heart Move Them to Go Preach.” Na this kind article help Tiago and Esther, one husband and wife wey come from Brazil. E help them really want go preach for area wey they need more publishers. Tiago talk say: “When we read about servants of Jehovah for our time wey Jehovah don help, we too want follow Jehovah advice and see how e go help us.” After some time, they pack go Paraguay. And they don dey there since 2014 de preach to people wey de speak Portuguese language. Esther talk say: “One Bible verse wey we really like na Ephesians 3:20. Plenty times, we don see say wetin dey that verse de happen to us as we de work for Jehovah.” For that book of Ephesians, apostle Paul talk say Jehovah go give us pass wetin we ask for. That promise don happen plenty times.

¹⁶Young married people for our time fit learn from other Christians wey don learn to trust Jehovah. Some married people fit don de pioneer for plenty years. You fit meet them to advice you if you de think of how to do more for Jehovah. This na another way to show say you trust Jehovah. (Prov. 22:​17, 19) Elders fit still encourage young married people to do more for Jehovah and advice them about how they fit do-am.

17. Wetin happen to Klaus and Marisa, and wetin we learn from their experience?

 ¹⁷ Sometimes, our decision to do more for Jehovah fit no work the way we plan-am. This na wetin happen to Klaus and Marisa wey we talk about for paragraph 5. Three years after they marry, they pack from their house go join do construction work for Finland branch. But, they tell them say na only six months they go stay there. When they first hear-am, they no happy. But small time after this one, they invite them to attend one class to learn Arabic language. And now, them dey another country, de preach to people wey de speak Arabic language. And they really de enjoy this work. When Marisa think about wetin happen, e talk say: “I first de fear to do wetin I never do before and e show say I need to trust Jehovah with all my heart. But I don see how Jehovah don help us for plenty ways wey we no expect. After this experience, my trust for Jehovah don strong pass before.” As this example show, make you dey sure say Jehovah go always bless you if you trust Jehovah with all your heart.

18. Wetin fit help married people continue to trust Jehovah?

¹⁸ Marriage na gift from Jehovah. (Matt. 19:5, 6) E want make married people enjoy this gift. (Prov. 5:18) Young married people, how wuna de live wuna life? Wuna de do wuna best to show Jehovah say wuna really like everything wey e don give wuna? Make wuna pray to Jehovah, and read Bible so that wuna go see advice wey fit wuna situation. Then make wuna follow the advice from Jehovah. True-true, wuna go really enjoy wuna life if wuna put the worship of Jehovah as number one thing for wuna marriage!