1. Wetin Jehovah want make we do?

E DE REALLY sweet Jehovah to de show love wey no de fail. (Hos. 6:6) And Jehovah want make e servants de show this love too. E use prophet Micah encourage us say make we “value love wey no de fail.” (Mic. 6:8, ftn.) But before we go fit do this one, we must know wetin this love dey about.

2. How you fit know say person get love wey no de fail?

² Wetin ‘love wey no de fail’ really mean? The word wey we translate as ‘love wey no de fail’ na “loyal love,” and na about 230 place e dey for our New World Translation Bible. So wetin this love really be? The “Glossary of Bible Terms” for our New World Translation Bible show say, this one na special kind of love. If you get this love for person, you no go ever stop to love the person, and you go trust and hold the person tight no matter wetin happen. Plenty times, Bible use this word when e de talk about the love wey dey between Jehovah and people. But this kind love fit still dey between people. Jehovah na the best example of Person wey de show this love. For this article, we go talk about how Jehovah de show this love to people. And for the next article, we go talk about how we fit copy Jehovah example and de show brothers and sisters for congregation this kind love.

3. Wetin Jehovah tell Moses about E self?

³ Small time after Israel people comot from Egypt, Jehovah tell Moses something about E name and the kind God wey e be. E talk say: ‘Jehovah, Jehovah, God wey e get pity and soft-heart, e no de vex quick-quick, and na only truth  e de talk. E de show love wey no de fail for plenty way, e de show love wey no de fail to thousands of people, e de forgive mistake and sin.’ (Ex. 34:6, 7) With this good things wey Jehovah talk about e self, e use-am show Moses something wey dey special about E love wey no de fail. Wetin be that special thing?

4-5. (a) Wetin Jehovah talk about e self? (b) Which questions we go answer for this article?

⁴ Jehovah no just talk say e de show love wey no de fail, but e talk say e de show ‘love wey no de fail for plenty way.’ They describe Jehovah like this for six other place for Bible. (Num. 14:18; Neh. 9:17; Ps. 86:15; 103:8; Joel 2:13; Jonah 4:2) For all the place wey Bible use this word, na only Jehovah they use-am describe, no be people. E really dey important to know say plenty times, Jehovah talk about e self like this for Bible. True-true, love wey no de fail dey important to Jehovah. * Na e make King David talk say: “O Jehovah, your love wey no de fail, de reach heaven . . . O God, your love wey no de fail, really dey special! Na for the shadow of your wings people go run go, for protection.” (Ps. 36:5, 7) You value this special love wey Jehovah de show, the way David value-am?

⁵ Make we answer two questions wey go help us really understand this special love wey Jehovah de show. (1) Who Jehovah de show love wey no de fail? (2) How we de gain when Jehovah show us this special love?

6. Who Jehovah de show love wey no de fail?

⁶ Who Jehovah de show love wey no de fail? Bible talk say we fit love things, like ‘life,’ ‘the name of God,’ ‘the way Jehovah de judge,’ and ‘good things.’ (Ps. 34:12; 69:36; 99:4; Am. 5:15) But we no fit show special love or love wey no de fail to things, na only to people. And Jehovah no de show this special love to everybody. E de only show-am to people wey get special friendship with-am. Our God no de ever leave e friends. E don arrange wonderful things for them, and e no go ever stop to love them.

7. How Jehovah don show say e love everybody?

⁷ Jehovah don show say e love everybody for this world. Na this one make Jesus tell Nicodemus say: “God really love [everybody for] this world sotey e send the only special Son wey e get, so that  anybody wey continue to get faith for-am no go die, but e go get life wey no go end.”—John 3:1, 16; Matt. 5:44, 45.

8-9. (a) Why Jehovah de show special love to e servants? (b) Wetin be the next thing wey we go talk about?

⁸ As we don first talk, Jehovah de show love wey no de fail only to people wey be e friends—people wey de worship-am. This one dey clear from wetin King David and prophet Daniel talk. For example, King David talk say: “No stop to show your love wey no de fail to people wey know you.” “Jehovah love wey no de fail, go last forever for people wey de fear-am.” And Daniel talk say: ‘O Jehovah the true God, you de show love wey no de fail to people wey love you and de obey your commandments.’ (Ps. 36:10; 103:17; Dan. 9:4) As this verse them show, Jehovah de show this kind love to e servants because they know-am, de fear-am, love-am, and de obey e commandments. Jehovah de show this special love only to people wey de worship-am for the correct way.

⁹ Before we start to worship Jehovah, we de gain from the love wey Jehovah de show everybody for this world. (Ps. 104:14) But as we become servants of Jehovah, we come still de gain from the special love wey e de show e servants. In fact, Jehovah promise e servants say: “I no go stop to show you love wey no de fail.” (Isa. 54:10) True-true, as e happen to King David, “Jehovah go care for person wey hold-am tight, for special way.” (Ps. 4:3) So wetin we go do as Jehovah de show us this kind love? King David talk say: ‘Anybody wey get sense go put heart for this things and take time to think about how Jehovah don show love wey e no de fail.’ (Ps. 107:43) With this better advice from Jehovah, make we see three ways wey we de gain from this special love wey Jehovah de show e servants.

10. How e de help us as we know say Jehovah love for us de last forever? (Psalm 31:7)

¹⁰ Jehovah love wey no de fail, de last forever. For Psalm 136, Bible talk-am 26 times say Jehovah love wey no de fail, de  last forever. Verse one of that chapter talk say: “De thank Jehovah because e good; e love wey no de fail, de last forever.” (Ps. 136:1) From verse 2 to 26, they repeat this words, ‘because e love wey no de fail, de last forever.’ As we de read the remaining part of Psalm 136, e de really sweet us to see the plenty way, wey Jehovah de show us this special love. And e no de ever stop to show-am. As they repeat this word “because e love wey no de fail, de last forever,” e show say the love wey Jehovah get for e people no de ever change. E de really encourage us to know say Jehovah no de quick tire for e servants! Instead e de hold them tight and e no de ever leave them, especially when them de face serious problem. How this one de help us? When we know say Jehovah hold us tight, e de make us happy and de give us power to fit manage our problems, and continue to worship Jehovah.—Read Psalm 31:7.

11. As Psalm 86:5 talk, wetin de make Jehovah de forgive us?

¹¹ Because of e love wey no de fail, Jehovah de forgive us. When Jehovah see say person wey sin don repent and stop to do bad things, na this love wey no de fail, de move-am to forgive the person. King David talk say Jehovah “no de deal with us as our sins reach, and e no de give us the punishment wey we suppose get for our mistakes.” (Ps. 103:8-11) Because King David don sin against Jehovah before, e know how person de feel when e conscience de worry-am. But e still learn say Jehovah “ready to forgive.” Wetin de make Jehovah forgive person? The answer dey Psalm 86:5. (Read-am.) True-true, as King David talk for e prayer, Jehovah de forgive because e really de show love wey no de fail to people wey de pray make e forgive them.

12-13. If our conscience still de worry us after Jehovah don forgive us, wetin go help us?

¹² When we sin, the correct thing to do na to show say we no happy for wetin we do. This one fit make us beg Jehovah to forgive us and stop to do the bad things. But even after Jehovah don forgive some of e servants, their conscience still de worry them. Their heart de tell them say  Jehovah no go ever forgive them even though say they don pray make e forgive them and really repent. If you de feel like this, one thing wey go help you na to know say Jehovah ready to show e servants love wey no de fail.

¹³ How this one de help us? Even with the sin wey dey our body, we fit enjoy to worship Jehovah with clean conscience. This one na because ‘the blood of Jesus, the Son of God de make us clean from all sin.’ (1 John 1:7) When you de feel bad because you don sin, make you remember say Jehovah ready to forgive you if you don repent. See how King David connect the special love wey Jehovah de show us and the way e de forgive us. E talk say: “Just as heaven high pass earth, na so e love wey no de fail, be for people wey de fear-am. As morning dey far from evening, na so e don put our sins far from us.” (Ps. 103:11, 12) True-true, Jehovah ready to forgive all our sin.—Isa. 55:7.

14. How King David describe the way the special love wey Jehovah get for us, de protect us?

¹⁴ Because of e love wey no de fail, Jehovah de protect e friendship with us. King David pray to Jehovah say: “Na you be the place wey I de run go hide; You go protect me from trouble. You go surround me with people wey de shout with happiness because you don save me. . . . Jehovah de surround people wey trust-am with e love wey no de fail.” (Ps. 32:7, 10) For Bible time, when they fence city round, e de protect people wey dey inside the city, from their enemy. The special love wey Jehovah get for us be like that fence. E de protect us from anything wey fit spoil our friendship with Jehovah. Another thing na say, na this love de make Jehovah draw us come e side.—Jer. 31:3.

15. How Jehovah love wey no de fail be like where person fit run go for protection?

¹⁵ King David use another way describe how Jehovah de protect e people. E talk say: “Na you I de run go meet for protection, the God wey de show me love wey no de fail.” E still talk about Jehovah say: “E de show me love wey no de fail, and na my strong tower, the Person wey I trust to protect me, and save me, my shield and the Person wey de cover me from trouble.” (Ps. 59:17; 144:2) Why King David compare Jehovah love wey no de fail with place of protection and strong tower? Na because, no matter where we dey for this earth, so far we de worship Jehovah, e go protect us from anything wey fit spoil our precious friendship with-am. This same promise dey Psalm 91. The place talk say: “I go tell Jehovah say: ‘Na you de protect me and na you be my strong tower.’ ” (Ps. 91:1-3, 9, 14) Moses use this same example of where person fit run enter for protection, talk about Jehovah. (Ps. 90:1, ftn.) Another thing be say, small time before Moses die, e use another better example compare Jehovah love wey no de fail. E talk say: “Na God be the place wey we de hide, e de carry e people with e hand wey no de fail.” (Deut. 33:27) As Moses talk say Jehovah “de carry e people with e hand wey no de fail,” wetin e mean?

16. Which two ways Jehovah don bless us? (Psalm 136:23)

¹⁶ When we trust Jehovah say e go protect us, that one de comfort us. But sometimes, problem fit make us feel bad and e fit hard us to happy again. When this kind thing happen, wetin Jehovah go do  for us? (Read Psalm 136:23.) E go use e hand sofri carry us up, and help us stand again so that we go happy again. (Ps. 28:9; 94:18) How this one de help us? We know say we fit always trust Jehovah. This one de help us remember say Jehovah don bless us for two ways. Number one, we know say no matter where we dey for this earth, Jehovah go always protect us. And number two, our Papa for heaven de really care about us.

17. Wetin we dey sure of, because Jehovah love no de fail? (Psalm 33:18-22)

¹⁷ As we don learn, anytime wey we de face problem, we dey sure say Jehovah go support us and help us so that we go fit hold-am tight. (2 Cor. 4:7-9) Prophet Jeremiah talk say: “Na because of Jehovah love wey no de fail, make us still dey alive. Because the way e de show pity no de ever end.” (Lam. 3:22) We dey sure say Jehovah go continue to show us love wey no de fail because Bible tell us say, “Jehovah de put eye for people wey de fear-am, people wey de expect make e show them love wey no de fail.”—Read Psalm 33:18-22.

18-19. (a) Wetin we go remember? (b) Wetin we go learn for the next article?

¹⁸ Wetin we go remember? Before we start to worship Jehovah, we de gain from the love wey Jehovah de show everybody. But now wey we de worship Jehovah, we still de gain from e special love. Because of that love, Jehovah de carry us for e hand and de protect us. E go always keep us for e side and do the wonderful things wey e don promise us. E want make we be e friends forever! (Ps. 46:1, 2, 7) So, no matter the problem wey we fit face, Jehovah go give us the power wey we need to hold-am tight.

¹⁹ We don see how Jehovah de show e servants love wey no de fail. E still want make we show this kind love to our Christian brothers and sisters. How we fit do-am? We go see the answer to this important question for the next article.