1. Which question we fit ask ourself?

YOU de fear sometimes when you think about things wey go soon happen, like when they go destroy lie-lie religion, when Gog of Magog go attack Jehovah people, and when Armageddon go come? You don ever ask yourself say, ‘I go still hold Jehovah tight when this things de happen?’ If this kind question don ever come your mind, wetin Jesus talk for the Bible verse wey this article come from, go really help you. Jesus tell e disciples say: “Make wuna no allow anything worry wuna heart. Make wuna show say wuna get faith.” (John 14:1) If we get strong faith, we go fit face anything wey go happen for future.

2. How we fit make our faith strong pass as e dey now, and wetin we go talk about for this article?

² We need to think about how we de handle test of faith now, so that we go know how we fit make our faith strong to handle the one wey go come for future. When we think about-am, we go see where we need to improve for our faith. Anytime wey we face test of faith and we no fall, our faith de strong pass before. And this one go help us endure other problems wey we fit face for future. For this article, we go talk about four problems wey Jesus disciples face wey show say they need more faith. We go still talk about how we fit face that kind problem, and how e fit make us ready for wetin go happen for future.

3. Wetin Jesus want make we understand about faith for Matthew 6:30, 33?

³ Na normal thing say every man want make e family get  enough food, cloth and place to stay. But e no easy to get this things for this hard time. Some of our brothers and sisters no get work again, and even though they don try their best, they never fit get another one. Some no gree accept some kind work because servants of Jehovah no suppose do that kind work. When this kind thing happen, we need strong faith say Jehovah go make sure say we and our family get wetin we need. This one na wetin Jesus tell e disciples when e de teach them ontop mountain. (Read Matthew 6:30, 33.) When we dey sure say Jehovah no go ever leave us, we go fit put our heart and mind for Jehovah worship. As we de see how Jehovah de give us wetin we need, our friendship with Jehovah go tight and our faith go strong pass before.

4-5. Wetin help one family when them de worry about how to get wetin they need?

⁴ See how Jehovah help one family for Venezuela when them de worry about how they go get wetin they need. Before, Castro family de get money from wetin them de harvest from their farm. But after, some bad people use gun drive them from their land and take over the place. Their papa wey e name na Miguel talk say: “Now, we de get wetin to chop from the small land wey person give us to farm. Every morning I de beg Jehovah to give us wetin we need for that day.” Even though say life hard for this family, they no de ever miss meeting or preaching because they get strong faith say Jehovah go give them wetin they need every day. They put Jehovah worship as the number one thing for their life, and Jehovah de give them wetin they need.

⁵ Even with all this problem, Miguel and e wife, Yurai still de think about the way Jehovah don care for them. Sometimes, Jehovah use brothers and sisters give them wetin they need or help Miguel get work. Other times, Jehovah use branch office give them wetin they need. Jehovah no ever leave them. And because of this one, the faith wey this family get don really strong. Their first daughter name na Yoselin. After e talk one example of how Jehovah help them, e say: “E really touch me to see how Jehovah care for us. Jehovah na my friend and I dey sure say e go always help me.” E still talk say: “The problems wey our family don face don make us ready to fit face big ones wey fit come for future.”

6. How you fit make your faith dey strong when you de face money problem?

⁶ You de face money problem? If na so, this time no easy for you. But even as things be, you fit still use this time to make your faith strong. Pray to Jehovah, read wetin Jesus talk for Matthew 6:25-34 and think about-am. Still think about brothers and sisters for our time. Their example show say Jehovah de care for  people wey de put e worship as the number one thing for their life. (1 Cor. 15:58) If you do-am, your faith go strong. And e go make you dey sure say Jehovah go help you the way e help other people wey don face the kind problem wey you de face. Jehovah know wetin you need and e know how to help you get-am. As you de see Jehovah hand for your life, your faith go strong more-more. And e go help you fit endure other problem for future wey big pass this one.—Hab. 3:17, 18.

7. As e dey for Matthew 8:23-26, how one “strong breeze” test the faith wey Jesus disciples get?

⁷ One time when Jesus and e disciples de travel with boat, strong breeze start to blow. Jesus use wetin happen teach e disciples say they need to make their faith strong pass as e dey that time. (Read Matthew 8:23-26.) As the strong breeze de blow, water come de enter the boat. But Jesus just de sleep. Because of fear, the disciples wake Jesus up and beg-am to save them. But Jesus sofri ask them say: “Why wuna de fear like this, wuna with small faith?” The disciples for no fear. They suppose know say Jehovah go fit protect Jesus and all the people wey dey with-am. Wetin we learn from this one? Strong faith fit help us endure any problem no matter how e serious reach.

8-9. Which problem test Anel faith, and wetin help-am?

⁸ Make we talk about one single sister from Puerto Rico, wey e name na Anel and see how e faith come really strong after one serious problem wey e face. The problem start for 2017, when Hurricane Maria destroy Anel house. Because of this strong breeze and heavy rain, Anel no come get work again. Anel talk say: “That time wey I get this problem, e really worry me. But I pray and that one help me trust Jehovah. And I no allow the problem confuse me and make me no do wetin I suppose do.”

⁹ Anel talk say another thing wey help-am endure the problem na to de obey. E talk say: “As I follow the direction wey Jehovah organization give us, e help me stop to worry. Jehovah really help me as e use brothers and sisters encourage me and give me the things wey I need.” E still talk say: “The things wey Jehovah give me pass anything wey I fit ask for, and e really make my faith strong pass before.”

10. Wetin you fit do if you de face serious problem?

¹⁰ You de face any serious problem for your life now? You fit de suffer because of natural disaster or because of serious sickness wey don make life tire you, and you no know wetin to do. Your problem fit worry you sometimes, but no allow the problem make you stop to trust Jehovah. Pray to Jehovah, that one go make you near  Jehovah more. Think about how Jehovah don help you before, e go make your faith really strong. (Ps. 77:11, 12) Get-am for mind say Jehovah no go ever leave you.

11. Why we need to decide now to de obey people wey Jehovah de use direct us?

¹¹ Which other thing fit help you endure problem? As Anel talk, na to de obey. You need to trust the people wey Jehovah and Jesus trust. Sometimes, people wey Jehovah de use direct us fit tell us make we do something wey no make sense to us. But remember say, Jehovah de bless people wey de obey. We don read-am for Bible and see-am from wetin happen to other servants of Jehovah say to obey de save life. (Ex. 14:1-4; 2 Chron. 20:17) Think deep about this examples. And e go help you want do your best to follow any direction wey Jehovah organization de give us now and for future. (Heb. 13:17) With this one, you no need to fear the great tribulation wey go soon come.—Prov. 3:25.

12. How Luke 18:1-8 show say faith fit help us endure when people do us partial?

¹² Jesus know say when e disciples face partial, e go shake their faith. To help them fit endure-am, Jesus use one example wey dey the book of Luke. Jesus talk the story of one widow wey continue to beg one judge wey no de fear God make e judge e case well. The woman dey sure say if e continue to beg the judge, the judge go gree. And at last, the judge gree. Wetin we learn? Jehovah no de do partial. Na e make Jesus ask say: “True-true, since the people wey God choose de beg God for help every day and night, e no go do something make they get the right judgement?” (Read Luke 18:1-8.) Jesus still ask say: “When the Son of man come, e go really see this kind faith for this earth?” When people do us partial, make we dey patient and continue to endure. This one go show say we get strong faith like that widow. And that faith go make us get the mind say small time Jehovah go do something to help us. We still need to believe say prayer get power. Sometimes, Jehovah fit even answer our prayer the way we no expect.

13. How prayer help one family wey they no treat well?

¹³ Make we talk about wetin happen to sister Vero wey de live for Democratic Republic of the Congo. E husband no de serve Jehovah and they get one daughter wey dey 15 years. They run comot from their village, when some soldiers attack the village. As them de run, they reach where the soldiers block road. The soldiers stop them and talk say they go kill them. Then sister Vero start to cry. Because the pikin want make e mama mind come down, e start to pray make everybody hear. And e use Jehovah name many times for the prayer. When e pray finish, the  leader of the soldiers ask-am say, “Young girl, who teach you how to pray?” E talk say, “Na my mama. E use the example for Matthew 6:9-13 teach me.” Then the leader talk say: “Young girl, make you go with your mama and papa, and Jehovah your God go protect you!”

14. Wetin fit test our faith, and wetin go help us endure?

¹⁴ This kind experience de teach us say prayer really dey important. But what if Jehovah no quick answer your prayer or answer-am the way e answer this family? Just like that widow for the story wey Jesus talk, continue to pray. Get the mind say Jehovah no go ever leave you and say as time de go, Jehovah go find the best way to answer your prayer. Continue to beg Jehovah make e give you e holy spirit. (Phil. 4:13) Remember say small time Jehovah go bless you sotey you go forget all the suffer wey you don suffer. As Jehovah de help you endure all your problem, your faith go de strong. And you go fit endure any problem wey go come for future.—1 Pet. 1:6, 7.

15. As e dey for Matthew 17:19, 20, which problem Jesus disciples face?

¹⁵ Jesus teach e disciples say if they get faith, problem no go stop them to worship Jehovah. (Read Matthew 17:19, 20.) E get one time wey they no fit drive demon comot from person body, even though say they don do-am before. Wetin cause-am? Jesus tell them say they need to get more faith. E still tell them say even if they face problem wey be like mountain, strong faith go help them continue to worship Jehovah. Today too, we fit face problem wey be like mountain.

16. How faith don help sister Geydi endure after they kill e husband?

¹⁶ Think about wetin happen to sister Geydi wey come from Guatemala. E husband name na Edi. When them de come back from meeting one day, bad people kill e husband. How sister Geydi faith de help-am endure even with the strong pain wey e de feel because of wetin happen? E talk say: “I de pray to Jehovah and de tell-am how I de feel. This one de give me peace of mind. I de see how Jehovah de use my family and friends for congregation de care for me. As I de do my best for Jehovah work, e de make the pain reduce and de help me survive day by day and I no de worry too much about tomorrow. I don learn from wetin happen say no matter the kind test wey I go face for future, I go fit endure-am with help from Jehovah, Jesus, and our organization.”

17. Wetin go help us when we get problem wey be like mountain?

¹⁷ You still de struggle with the pain of your person wey die? Take time read story of people wey they resurrect for  Bible. This one go make your faith strong. You de feel bad because they disfellowship your family member? Study Bible so that you go dey sure for your mind say Jehovah de always discipline e people for the correct way. No matter the problem wey you de face, use-am as chance to make your faith strong. Pray to Jehovah and tell-am how you de feel. No ever separate yourself from brothers and sisters for congregation. (Prov. 18:1) De do things wey go help you endure, even if you de cry when you remember wetin happen to you. (Ps. 126:5, 6) Continue to de go meeting, preaching and de read Bible. And continue to think about the wonderful blessings wey Jehovah go give you for future. As you de see the way Jehovah de help you now, your faith go de grow and e go strong pass before.

18. If you see say you need to improve for your faith, wetin you go do?

¹⁸ If the problems wey you de face now, or the one wey you don face before de show say you need to improve for your faith, no allow-am discourage you. See-am as chance to make your faith really strong. Beg Jehovah to give you “more faith,” just like Jesus apostles. (Luke 17:5) And still think about the examples wey we don talk about for this article. Just like Miguel and Yurai, remember all the time wey Jehovah help you. Like sister Vero pikin, and sister Anel, pray with all your heart to Jehovah, especially when you de face serious problem. And like sister Geydi, know say Jehovah fit use your family and friends help you. When you allow Jehovah help you endure any problem wey you get now, your faith go strong say Jehovah go help you endure any problem wey you fit face for future.

19. Wetin Jesus dey sure say go happen, and wetin you fit dey sure of?

¹⁹ Na true say Jesus help e disciples see where their faith dey weak, but e no ever doubt say Jehovah go help them endure any problem wey go come for future. (John 14:1; 16:33) Jesus dey sure say plenty people go survive the great tribulation wey de come, because of their strong faith. (Rev. 7:9, 14) You go dey among them? Yes, Jehovah fit help you survive if you use every chance wey you get now, to get faith and make-am strong!—Heb. 10:39.