STUDY ARTICLE 45
How Jehovah De Help Us Succeed for Our Preaching Work?
“They go really know say prophet dey with them before.”—EZEK. 2:5.
SONG 67 Make We Preach
WETIN WE GO LEARN? a
1. Wetin we need to get for mind and wetin we need to dey sure of as we de preach?
FOR this last days, plenty people dey against our preaching work. And e dey important make we get-am for mind say this kind thing go de happen more-more as time de go. (Dan. 11:44; 2 Tim. 3:12; Rev. 16:21) Even with this one, we dey sure say Jehovah go always help us. Why? Because Jehovah de always help e servants fit do the work wey e give them, no matter how the work hard reach. Make we use prophet Ezekiel as example. We go talk about some things wey happen to-am when Jehovah send-am go preach to Jew people for Babylon.
2. Wetin Jehovah talk about the people wey Ezekiel preach to, and wetin we go talk about for this article? (Ezekiel 2:3-6)
2 Which kind people prophet Ezekiel preach to? Jehovah talk say the people dey stubborn, no de feel for people and they no de follow law. Them bad like chuku-chuku and wicked like scorpion. Na this one make Jehovah tell Ezekiel plenty times say: “Make you no fear”! (Read Ezekiel 2:3-6.) So wetin help Ezekiel fit succeed for e preaching work? E succeed because (1) na Jehovah send-am, (2) Jehovah use e holy spirit give-am power, and (3) the word of God make e faith strong. How this three things help Ezekiel? And how them de help us for this our time?
NA JEHOVAH SEND EZEKIEL
3. Wetin Jehovah tell Ezekiel wey fit don make e faith strong, and How Jehovah make Ezekiel dey sure say E go help-am?
3 Jehovah tell Ezekiel say: “I de send you.” (Ezek. 2:3, 4) This word wey Jehovah tell Ezekiel, fit don make e faith strong. Why? Because Ezekiel fit don remember when Jehovah tell Moses and Isaiah the same thing when E choose them to be E prophet. (Ex. 3:10; Isa. 6:8) Ezekiel still know how Jehovah help the two prophet succeed for their work even though e really hard them. So as Jehovah tell Ezekiel two times say: “I de send you,” e give Ezekiel mind say Jehovah go really help-am. Even self, Ezekiel write plenty times say: “Jehovah tell me.” (Ezek. 3:16) And plenty times, e write say: “Jehovah talk to me again.” (Ezek. 6:1) True-true, e really dey clear to Ezekiel say na Jehovah send-am. Another thing na say, Ezekiel papa na priest. So e fit don teach Ezekiel how Jehovah de always help E prophets. For example, Jehovah tell Isaac, Jacob, and Jeremiah, say: “I dey with you.”—Gen. 26:24; 28:15; Jer. 1:8.
4. Wetin Jehovah tell Ezekiel wey fit don give-am power to continue to preach?
4 Wetin most of the people wey Ezekiel go preach to, do? Jehovah tell Ezekiel say: “The people of Israel no go gree listen to you because they no want listen to me.” (Ezek. 3:7) As they no gree listen to Ezekiel, e mean say na Jehovah they no want listen to. This one make Ezekiel mind come down say as the people no gree listen to e message, e no mean say e don fail for e work. Jehovah still tell Ezekiel say when the things wey e preach about happen, “they go really know say prophet dey with them before.” (Ezek. 2:5; 33:33) E dey clear say this one comfort Ezekiel and give-am the power wey e need to succeed for the preaching work.
NA JEHOVAH STILL SEND US
Just as them do to Ezekiel, people fit no like our preaching work and dey against-am, but we know say Jehovah dey with us (Check paragraph 5-6)
5. Wetin Isaiah 44:8 talk wey fit give us power to continue our preaching work?
5 Just like Ezekiel, we too de get the power to continue to do the preaching work because we know say na Jehovah send us. E give us special honor as e make us e “Witness.” (Isa. 43:10) This one na really special favor! Just as Jehovah tell Ezekiel say: “Make you no fear,” na so e still de tell us say: “Make wuna no fear.” Why we no suppose fear people wey dey against our preaching work? Because, just like Ezekiel, na Jehovah send us and E de support us.—Read Isaiah 44:8.
6. (a) Wetin Jehovah tell prophet Isaiah wey show say E de support us? (b) Wetin de give us power and comfort us?
6 Jehovah don promise us say e go support us. Before Jehovah choose us as e Witness, e first talk say: ‘When you pass inside water I go dey with you; and when you pass inside river, e no go cover you. When you waka pass inside fire, e no go burn you, and e no go wound you.’ (Isa. 43:2) Sometimes when we de preach, we de face problem wey be like river and temptation wey be like fire. Even with this one, Jehovah de help us make we fit continue to preach. (Isa. 41:13) Just as e happen for the time of prophet Ezekiel, plenty people for this our time no de gree listen to our message. But this one no mean say we don fail for our preaching work. One thing wey de give us power and comfort us na as we know say Jehovah de happy with us as we no tire to do this work wey e give us. Apostle Paul write say: ‘God go bless each person for the way e do e own work.’ (1 Cor. 3:8; 4:1, 2) One sister wey don pioneer for plenty years talk say: “E de make me happy to know say Jehovah de bless us for this work.”
JEHOVAH USE E HOLY SPIRIT GIVE EZEKIEL POWER
Ezekiel see vision of Jehovah chariot for heaven and this one make-am dey sure say Jehovah go help-am succeed for e preaching work (Check paragraph 7)
7. How Ezekiel de feel anytime wey e think about the vision? (Check picture for front cover.)
7 Prophet Ezekiel see say God holy spirit really get power. For one vision, e see how Jehovah de use E holy spirit de control the powerful angels and the big-big wheel of the chariot wey e see for heaven. (Ezek. 1:20, 21) When Ezekiel see the vision, wetin e do? E write say: “When I see-am, I fall face ground.” Wetin e see really surprise-am sotey e fall for ground. (Ezek. 1:28) Anytime wey Ezekiel think about the vision, e fit don make e faith strong say Jehovah go fit use E holy spirit help-am succeed for the work wey E give-am.
8-9. (a) Wetin happen to Ezekiel when God tell-am say make e stand up? (b) How Jehovah give Ezekiel more power to fit preach to those stubborn Israel people?
8 Jehovah tell Ezekiel say: “Son of man, stand up make I talk to you.” That command and God holy spirit give Ezekiel the power wey e need to fit stand up. Ezekiel write say: “E spirit enter me and make me stand up.” (Ezek. 2:1, 2) Later and till the end of e preaching work, Jehovah use e holy spirit direct and help Ezekiel. (Ezek. 3:22; 8:1; 33:22; 37:1; 40:1) Jehovah use e holy spirit give Ezekiel power to fit do the work wey E give-am, wey be to preach to people wey ‘stubborn and wey no get feeling.’ (Ezek. 3:7) Jehovah tell Ezekiel say: “I don make your face strong like their face, and your forehead strong like their forehead. I don make your forehead strong like diamond and strong pass rock. Make you no fear them, or let their face threaten you.” (Ezek. 3:8, 9) Jehovah de use this one tell Ezekiel say: ‘Make you no allow their strong head make you tire. I go make you strong.’
9 After that one, God use e spirit carry Ezekiel go the place where the people wey e go preach to, de stay. Ezekiel write say: “I really feel Jehovah strong hand for my body.” Na one week Ezekiel use learn and understand the message wey e want preach to the people. (Ezek. 3:14, 15) Then Jehovah tell-am make e go one valley, for there, “God spirit enter” e body. (Ezek. 3:23, 24) Now, Ezekiel don ready to start e preaching work.
JEHOVAH STILL DE USE E SPIRIT GIVE US POWER TODAY
Wetin help prophet Ezekiel, and wetin de help us for our preaching work today? (Check paragraph 10)
10. Wetin go help us fit do our preaching work well, and why?
10 Wetin go help us fit do our preaching work well? To answer that question, think about wetin happen to Ezekiel. Before e start e preaching work, God spirit give-am the power wey e need. Just as e be for Ezekiel, we go fit do the preaching work today only with the help of God spirit. Why? Because Satan de fight against us to make sure say this preaching work stop. (Rev. 12:17) Plenty people feel say Satan too strong for us, so we no go fit ever win-am. But we de win-am as we de preach. (Rev. 12:9-11) How? When we de preach, we de show Satan say we no de fear wetin e fit do us. So anytime wey we preach, we de win and Satan de loose. So wetin we fit talk as we de fit do our preaching work even though say Satan de fight against us? We fit talk say Jehovah de support us, and use e holy spirit give us power to fit continue to preach.—Matt. 5:10-12; 1 Pet. 4:14.
11. Wetin holy spirit fit do for us, and wetin we go do so that we go continue to get-am?
11 Which other thing we fit learn when we think about how Jehovah give Ezekiel the power wey e need to fit preach? We fit learn say God fit use e holy spirit help us manage any problem wey we fit get for our preaching work. (2 Cor. 4:7-9) So, wetin we go do so that we go continue to receive holy spirit? We need to always pray for-am and get faith say Jehovah go answer our prayer. Jesus tell e disciples say make they “continue to ask, . . . continue to find-am . . . continue to de knock.” Then Jehovah “go give holy spirit to people wey de beg for-am.”—Luke 11:9, 13; Acts 1:14; 2:4.
THE WORD OF GOD MAKE EZEKIEL FAITH STRONG
12. As e dey for Ezekiel 2:9–3:3, where the scroll come from and which message dey the scroll?
12 God holy spirit give Ezekiel the mind and power wey e need to fit preach. But e no end for there, the word of God still make Ezekiel faith strong. For vision, Ezekiel see hand wey hold one scroll. (Read Ezekiel 2:9–3:3.) Where the scroll come from? Which message dey the scroll? How the scroll make Ezekiel faith strong? Make we talk about-am. The scroll come from the throne of God. E fit be say Jehovah give the scroll to one of the angels wey Ezekiel see before, make e give-am to Ezekiel. (Ezek. 1:8; 10:7, 20) Na message from God dey the scroll. The message na the plenty message about the judgment from Jehovah wey Ezekiel go tell the stubborn people of Israel wey de stay near river Chebar. (Ezek. 2:7) And na the front and back of the scroll the message dey.
13. Wetin Jehovah tell Ezekiel say make e do with the scroll, and why the scroll sweet?
13 Jehovah tell prophet Ezekiel say make e chop the scroll, belleful. Ezekiel obey and chop the scroll finish. Wetin this part of the vision mean? E mean say Ezekiel need to understand everything about the message wey e want preach to the people. E need to believe the message so that e go fit preach-am well. When Ezekiel chop-am, something happen; the scroll “sweet like honey for [e] mouth.” (Ezek. 3:3) Why the scroll sweet for e mouth? Na because, e really sweet Ezekiel for mind to be person wey de represent Jehovah and this one na big honor to-am. (Ps. 19:8-11) Ezekiel really happy say Jehovah make-am E prophet.
14. Wetin help Ezekiel really ready to fit do the preaching work wey Jehovah give-am?
14 After, Jehovah tell Ezekiel say: “Listen to all the things wey I de tell you and put them for your heart.” (Ezek. 3:10) Wetin Jehovah de use this one tell Ezekiel be say, make e remember the things wey dey the scroll and take time think about-am. This one make Ezekiel faith strong more-more, and still help-am sabi the message wey e want preach to the people. (Ezek. 3:11) When Ezekiel don really understand and believe the message wey dey the scroll, na that time e ready to start the preaching work. And e help-am continue until e finish the work.—Compare Psalm 19:14.
THE WORD OF GOD DE MAKE OUR FAITH STRONG TODAY
15. To fit endure as we de preach, wetin we need to put for mind?
15 For us to fit endure as we de preach, we must continue to allow the word of God make our faith strong. We need to put all the things wey Jehovah de tell us for mind. For this our time, na Bible Jehovah de use talk to us. So how we fit make sure say the Bible continue to affect every part of our life?
16. Wetin we must do with the Word of God, and how we go take digest-am?
16 When we chop food and our body digest-am, e de make us strong more-more. Na so e still be when we study Bible and think deep about wetin we study, e go make our faith strong more-more. E dey important make we always remember the lesson wey we learn about the scroll. Jehovah want make we chop e Word belleful. This one mean say we go understand Bible well. We de do this one when we de pray, read Bible, and think deep about wetin we read. The first thing wey we need to do na to pray to make our heart ready for wetin we want learn. Then we go read the Bible. The next thing na to stop, and think deep about wetin we don read. Wetin go happen? The more we de think deep about wetin we learn from Bible, the more we go de understand wetin Bible de teach and the more e go de make our faith strong.
17. Why e dey important make we de think deep about wetin we read for Bible?
17 Why e dey important to read Bible and think deep about wetin we read? E dey important because e go help us get the power or mind wey we need to fit preach now. E go still help us get the mind to fit preach the strong judgment message wey we go preach for future. Another thing be say, when we de think deep about the fine-fine character wey Jehovah get, our friendship with-am go de strong more-more. When we do this one, we go get peace of mind and really happy.—Ps. 119:103.
WE GO CONTINUE TO ENDURE
18. Last-last, wetin the people wey we preach to go know, and why?
18 Na true say we no be prophet like Ezekiel. But we don make up our mind to continue to preach the word of God, until God say the work don finish. When God want destroy this wicked world, the people wey we preach to no go get any reason to talk say nobody warn them or say God forget them. (Ezek. 3:19; 18:23) Instead, e go dey clear to them say the message wey we preach, na from God.
19. Wetin go give us the power to succeed for our preaching work?
19 Wetin go give us the power to succeed for our preaching work? Na the same three things wey help Ezekiel succeed. We go continue to de preach because (1) we know say na Jehovah send us, (2) e de use e holy spirit give us power, and (3) the Word of God de make our faith strong. As Jehovah de help us, we de get the power to fit continue to preach and “endure reach the end.”—Matt. 24:13.
SONG 65 Make We De Grow!
a For this article, we go talk about three things wey help prophet Ezekiel fit do the work wey Jehovah give-am. And this one go help us trust Jehovah say e go help us succeed for our preaching work.