STUDY ARTICLE 48
Use Your Sense Well When You De Face Test of Faith
“Use your sense well for everything.”—2 TIM. 4:5.
SONG 123 De Follow Wetin Jehovah Arrange
WETIN WE GO LEARN? a
1. Wetin e mean for us to use our sense well? (2 Timothy 4:5)
SOMETIMES, something fit happen for congregation wey fit make us vex. When this kind thing happen, e fit make-am hard us to hold Jehovah tight. How we fit handle this kind problem? We need to use our sense well, dey alert and stand well for the faith. (Read 2 Timothy 4:5.) We de use our sense well when we dey calm, think well and try to see matter the way Jehovah de see-am. This one go help us make the way we de feel no control us.
2. Wetin we go talk about for this article?
2 For the article before this one, we talk about three problem wey we de face from outside Jehovah organization. But for this article, we go talk about three problem wey we fit face for inside Jehovah organization wey fit test if we hold Jehovah tight. Them be (1) when brother or sister do wetin pain us, (2) when we receive strong correction, and (3) when e hard us to agree with some change wey Jehovah organization make. How we fit use our sense well and hold Jehovah and e organization tight when we face this kind problem?
WHEN BROTHER OR SISTER DO WETIN PAIN US
3. Wetin we fit begin de think if brother or sister for congregation do wetin pain us?
3 Brother or sister, or even elder don do wetin pain you before? The truth be say e no really get-am for mind to do wetin go pain you. (Rom. 3:23; Jas. 3:2) But wetin e do really make you vex. The matter fit don worry you for mind sotey you no fit sleep. You fit don ask yourself say, ‘If this brother fit do this kind thing to me, you sure say this na really God organization?’ Na the way Satan want make you think be that. (2 Cor. 2:11) To de think like this fit make us leave Jehovah and e organization. So when brother or sister for congregation make us vex, wetin go help us continue to use our sense well make we no start to think the way Satan want make we think?
4. How Joseph show say e use e sense well when e brothers do wetin bad to-am, and wetin we fit learn from e example? (Genesis 50:19-21)
4 No vex sotey you no fit forgive. When Joseph still dey young, e senior brothers no treat-am well. Them hate-am and some of them want even kill-am. (Gen. 37:4, 18-22) And later, them sell am as slave. Because of this one, Joseph really suffer for about 13 years. Joseph for start to feel say Jehovah no love-am. And say Jehovah abandon-am when e need help. But Joseph no start to vex for Jehovah. Instead, Joseph dey calm and show say e use e sense well. When e get chance to pay e brothers back, e no do-am. E show say e love them and forgive them. (Gen. 45:4, 5) Wetin help Joseph fit do like that? Na because e use e sense think well. E no continue to think about the problem wey e brothers put-am, but e put mind for wetin Jehovah want. (Read Genesis 50:19-21.) Wetin we fit learn from this one? No allow wetin brother or sister for congregation do you make you vex for Jehovah or start to think say Jehovah no de care for you. Instead, think about how Jehovah de help you handle the problem. Another thing be say, if brother or sister make you vex, make you show-am love and forgive-am.—1 Pet. 4:8.
5. How Miqueas use e sense well when some brothers do wetin really pain-am?
5 Make we see wetin happen to one elder for South America wey e name na Miqueas. b E talk about the time wey some elders do wetin really pain-am. E talk say: “I never ever worry like this before. E really disturb me, I no fit sleep for night, and I just de cry like small pikin.” Even with this one, brother Miqueas continue to use e sense well and do e best to control the way e de feel. E pray plenty times say make Jehovah give-am holy spirit and power to fit endure-am. E do research with our book them to get wetin go help-am fit endure. Wetin we fit learn from this one? If brother or sister do wetin make you vex, make you dey calm and try control the way you de feel. You fit no know wetin the brother or sister de face wey make-am behave like that. So beg Jehovah say make e help you see the matter the way the brother or sister de see-am. This one go help you put-am for mind say the brother or sister no really get-am for mind to do wetin go make you vex. And e go still help you fit forgive-am. (Prov. 19:11) Remember say, Jehovah know how you de feel and e go give you the power to fit endure.—2 Chron. 16:9; Eccl. 5:8.
WHEN WE RECEIVE STRONG CORRECTION
6. Why e dey important say make you see strong correction as love from Jehovah? (Hebrews 12:5, 6, 11)
6 When them give person strong correction, e de really pain. But if you de think about only the pain, you fit start to feel say them give you the strong correction because them hate you. Or say the correction pass the way e suppose be. This one fit make you no understand say na because Jehovah love you make-am correct you. (Read Hebrews 12:5, 6, 11.) And if you allow how you de feel control you, you go give Satan chance to make you feel bad more-more. E no want make we take the correction wey Jehovah de give us. In fact, e want make we leave Jehovah and E organization. If they don give you strong correction, how you fit show say you de use your sense well?
Jehovah bless Peter with more work because e bring body down, accept strong correction (Check paragraph 7)
7. (a) As e dey for the picture, how Jehovah use Peter after e accept strong correction? (b) Wetin you learn from Peter example?
7 Accept the correction and change your way. E pass one time wey Jesus correct Peter for front of the other apostles. (Mark 8:33; Luke 22:31-34) E go don make Peter shame. Even with that one, Peter no stop to follow Jesus. E accept the correction and learn from e mistake. Because of this one, Jehovah bless Peter as e no leave Jesus and still give-am important work for congregation. (John 21:15-17; Acts 10:24-33; 1 Pet. 1:1) Wetin we fit learn from Peter example? When we accept strong correction, change our way, and no put mind for the shame wey the strong correction bring, we and other people go really gain. This one go make Jehovah and our brothers and sisters value us.
8-9. When them give brother Bernardo strong correction, how e first feel, but wetin help-am correct the way e de think?
8 Make we talk about one brother for Mozambique wey e name na Bernardo. Them remove brother Bernardo as elder for congregation. When them tell-am, how e feel? E talk say: “I really vex for the elders because I no like the strong correction wey they give me.” Brother Bernardo worry about how brothers and sisters for congregation go de look-am. Brother Bernardo talk say, “E take me some months before I fit start to think well about the correction, and trust Jehovah and e organization again.” Wetin help brother Bernardo to fit change the way e de feel?
9 Brother Bernardo correct the way e de think. E talk say: “The time wey I be elder, I use Hebrews 12:7 help brothers and sisters correct how them de see correction from Jehovah. So I ask myself say, ‘Now, who suppose follow the advice for this verse?’ Na all servant of Jehovah, and me join.” Then, brother Bernardo correct the way e de do things so that e go fit trust Jehovah and E organization again. Now e de do e personal Bible reading more and de take more time think about wetin e read. Even though say e still de worry about wetin brothers and sisters fit think about-am, e still de preach with them and answer question for meeting. After some time, them make brother Bernardo elder again. If you don receive strong correction like brother Bernardo, try comot your mind for the shame wey the correction cause. Accept the correction and correct your mistake. c (Prov. 8:33; 22:4) If you do like that, make you know say Jehovah go bless you as you hold-am and e organization tight.
WHEN E HARD US TO AGREE WITH SOME CHANGE WEY JEHOVAH ORGANIZATION MAKE
10. For the time of Israel people, which change about how them de worship Jehovah fit don affect some men?
10 When things change for Jehovah organization, e fit test if we really hold Jehovah tight. And if we no dey careful, we fit even allow-am make us leave Jehovah. For example, think about how this kind thing fit don affect some Israel people after Jehovah give them the Law. Before Jehovah give Israel people the Law, na the head for the family de do the work of priest. They go make altar, and do sacrifice to Jehovah for their family. (Gen. 8:20, 21; 12:7; 26:25; 35:1, 6, 7; Job 1:5) But after Jehovah don give them the Law, the head of the family no go fit do the work of priest again. Jehovah talk say na only men from Aaron family go be priest. After they start to follow this Law, any man wey do sacrifice and e no come from Aaron family, them go kill-am. d (Lev. 17:3-6, 8, 9) Na this change be one of the reason why Korah, Dathan, Abiram, and 250 chieftain turn against Moses and Aaron? (Num. 16:1-3) E fit be, but we no really know if na e make-am. But wetin we know be say, Korah and e friends no hold Jehovah tight. If the way we de do things for Jehovah organization change, and e affect you, wetin you go do?
When the work of the Levites for Kohath family change, they use all their mind do their new work. Some de sing, some na gatemen, and some de care for things wey dey store for the tabernacle and later for temple (Check paragraph 11)
11. Wetin we fit learn from the example of some Levites from Kohath family?
11 Use all your mind support any change wey Jehovah organization make. When Israel people de travel for the wilderness, Jehovah give the men for the family of Kohath special work. Any time wey Israel people move from the camp wey them dey, some men for the family of Kohath go carry the ark of the covenant for front of all the people. (Num. 3:29, 31; 10:33; Josh. 3:2-4) This na really special favor! But when them reach the Promise Land, things change for them. For there, them no go need to de carry the ark every time. So by the time wey Solomon de rule for Israel, them don give some men for Kohath family the work to de sing for tabernacle, some na gatemen, and the other ones de care for things wey them keep for store. (1 Chron. 6:31-33; 26:1, 24) No place for Bible show say this men for the family of Kohath complain about their new work, or say them want the kind special work wey them de do before. Wetin we fit learn from this one? Use all your heart support any change wey Jehovah organization make, even the one wey affect the work wey you de enjoy for congregation. So make you happy for the one wey them give you for congregation. Remember say no be the work wey you de do for congregation de show how you dey important reach to Jehovah. Wetin de make Jehovah really value us na as we de obey.—1 Sam. 15:22.
12. How sister Zaina feel when them say make e comot for Bethel?
12 See the example of one sister wey e name na Zaina wey de serve for Bethel and wey really love e Bethel work well-well. After e don serve for Bethel for more than 23 years, them send-am as special pioneer. E talk say: “E really shock me when them tell me say I go comot for Bethel. E make me feel say I dey useless. And I begin ask myself say, ‘Which bad thing I do?’ ” And to make things bad more-more for sister, some brothers and sisters for congregation tell-am say: “If to say you de do your work well, them for no talk say make you comot for Bethel.” This one really pain sister Zaina sotey e de cry every night. But e talk say: “I no ever let-am make me start to think say Jehovah and e organization hate me.” Wetin help sister Zaina fit use e sense well?
13. Wetin sister Zaina do wey help-am fit control the bad way wey e de feel?
13 Sister Zaina no allow the way e de feel control-am. Wetin help-am? E read our book them wey talk about the kind problem wey e de face and how to endure-am. The topic wey be “You Can Cope With Discouragement!” for February 1, 2001, Watchtower, really help-am. The Watchtower talk about how Mark go don feel when apostle Paul no gree make e continue to follow them for the missionary work. Sister Zaina talk say: “The example of Mark just be like medicine for wetin I de face.” Sister Zaina no stop to preach with brothers and sisters for e congregation or start to feel say e own don finish. Sister Zaina tell e self say Jehovah holy spirit dey E organization and the brothers wey de direct us really care about-am. E still get-am for mind say Jehovah organization must do the correct thing so that Jehovah work go continue.
14. Which change really hard brother Vlado to support, and wetin help-am fit later support-am?
14 Think about one elder for Slovenia wey e name na Vlado and e dey 73 years. E no easy for brother Vlado to follow wetin our organization talk, say make them close their Kingdom Hall, and join another congregation wey de use another Kingdom Hall. E talk say: “The Kingdom Hall really fine, so I no understand why them say make we no use-am again. E pain me well-well because e never tey wey we repair the hall and make-am fine again. Na carpenter I be, so na me make some chair for the Kingdom Hall. Another thing be say, the things wey our organization say make we do as we go join another congregation, no really easy for us wey don old.” Wetin help brother Vlado to fit support wetin organization talk? E talk say: “Jehovah de bless people wey de support any change wey E organization make. All this better-better change de prepare us for the big change wey de come for future.” You dey among people wey organization say make their congregation join another congregation? Or them comot the work wey you de enjoy for organization for your hand or change-am? Abeg, always get-am for mind say Jehovah understand how you de feel. Jehovah go really bless you if you support the change and hold-am and e organization tight.—Ps. 18:25.
USE YOUR SENSE WELL FOR EVERYTHING
15. How we fit use our sense well if something wey happen for Jehovah organization make things no easy for us?
15 As the end of this Satan world de near more-more, make we get-am for mind say problem fit de come even from inside congregation. And this problems fit test if we really hold Jehovah tight. So we must use our sense well. If brother or sister for congregation do wetin pain you, no vex for-am sotey you no fit forgive-am. If them give you strong correction, no put mind for the shame wey the strong correction bring, but accept-am and change your way. And when the change wey Jehovah organization make affect you, support-am with all your mind and obey wetin Jehovah organization say make we do.
16. Wetin go help you fit continue to trust Jehovah and e organization?
16 You go fit continue to trust Jehovah and e organization even when you de face problem. But to fit do this one, you need to use your sense well. This one mean say you go dey calm, think well when something happen and see-am the way Jehovah see-am. Make you study about how some people for Bible, wey face the kind problem wey you face, succeed and learn from their example. Beg Jehovah make e help you. And make you de attend meeting and preach with brothers and sisters for congregation. No run from them. If you do like this, nothing wey Satan go do wey go fit make you leave Jehovah and E organization.—Jas. 4:7.
SONG 126 Dey Ready, Stand Well, Get Strong Heart
a Sometimes e fit hard us to hold Jehovah and e organization tight. This one fit happen especially when something wey happen for congregation make us vex. For this article, we go talk about three of this kind problem and wetin we go do to fit continue to hold Jehovah and e organization tight.
b We change some names.
c You fit see other information wey fit help you, for August 15, 2009 Watchtower, page 30, inside the article “Did You Once Serve? Can You Serve Again?”
d The Law talk say any man wey want kill animal for e family to chop must carry the animal go tabernacle. Na only men wey their house really far from the tabernacle this Law no affect.—Deut. 12:21.