ONE Jew wey e name na Mordecai really do important things wey happen for the Bible book of Esther. Mordecai na Jew wey they carry as slave and e de work for the palace of one king of Persia. This one happen sometime after the year 500 B.C.E. “when [King] Ahasuerus de rule.” (Plenty people for this our time believe say that king na Xerxes I.) When some people de plan to kill Ahasuerus, Mordecai leak their secret. The king arrange make they honor Mordecai for public to show say e really like wetin Mordecai do. Later, when Haman wey be the enemy of Mordecai and enemy of other Jew people die, the king make Mordecai prime minister for e kingdom. That position give Mordecai the chance to make law wey save Jew people wey dey the kingdom wey King Ahaseurus de rule from people wey want kill them.—Esther 1:1; 2:5, 21-23; 8:1, 2; 9:16.

Some people wey de write about things wey don happen for past talk say the Bible book of Esther na lie-lie story and say Mordecai no be real person wey don live for past. But for 1941, people wey de dig ground to find out wetin don happen for past see something wey fit be proof say the story of Mordecai wey Bible talk na true. Wetin they see?

They see one writing for flat clay (Persian cuneiform writing) wey mention one man wey e name na Marduka (Mordecai for English). E work as person wey dey in charge of money for Shushan. One man wey de study things about this area wey e name na Arthur Ungnad, talk about this writing wey they see. E talk say na the first time wey they mention Mordecai for other writing wey no be part of Bible.

Some years after Ungnad write this one, some people wey go school well-well don translate plenty other writing wey they write for flat clay. Some of them na the small-small flat clay wey they see for the city of Persepolis wey don scatter. They see them for the area wey near the place wey them de keep money wey dey close to the city wall. When they check the time wey this small-small flat clay don dey inside ground, they see-am say na for the time of Xerxes I. They write-am for Elamite language and they see plenty names wey the Bible book of Esther talk about. a

Plenty small-small flat clay wey they see for the city of Persepolis (Persepolis tablets) mention the name Marduka, and say e do secretary work for the palace for Shushan when Xerxes I de rule. One of the flat clay talk say Marduka na translator. This one match with wetin Bible talk about Mordecai. As Bible talk, na servant e be for the palace of King Ahasuerus. Mordecai de always sitdown for the gate of the palace of the king for Shushan. (Esther 2:19, 21; 3:3) This gate na big place wey the servants of the king de work.

Plenty things dey wey the Marduka wey the Persepolis tablets talk and Mordecai wey Bible talk about take resemble. They live for the same time and for the same place, and they get the same position for the place wey they work. All this things wey people wey de dig ground see and wetin Bible book of Esther talk about Mordecai fit be proof say Marduka and Mordecai na the same person.