1. How apostle Paul feel about ministerial servants?

 MINISTERIAL servants de do important work for congregation. Apostle Paul really value the work wey this brothers de do. For example, when e write letter to Christians for Philippi, apostle Paul no only greet the elders, e still greet the ministerial servants.—Phil. 1:1.

2. How Brother Luis de feel about im work as ministerial servant?

² Whether them dey young or them don old, many brothers wey be ministerial servants de get plenty joy as them de help the congregation. For example, Brother Devan dey 18 years when them make-am ministerial servant. But no be so e be with brother Luis, them make-am ministerial servant when e just pass 50 years. How Brother Luis feel to be ministerial servant? E talk say, “I really dey happy to serve my brothers and sisters for congregation as ministerial servant. Them don really show me love and this na chance for me to show say I love them!” And na so many ministerial servants de feel.

3. Which questions we go answer for this article?

³ If you be brother wey don baptize and you no be ministerial servant, you fit make plan to be ministerial servant? Wetin fit move you to do this one? Which fine-fine character Bible talk say you need wey go make you qualify as ministerial servant? For this article, we go answer this questions. But, make we first talk about the kind work wey ministerial servants de do for congregation.

 WHICH WORK MINISTERIAL SERVANTS DE DO FOR CONGREGATION?

4. Which work ministerial servants de do for congregation? (Still check the picture.)

⁴ Ministerial servant na brother wey don baptize, wey holy spirit appoint to help elders care for plenty important work for congregation. Some ministerial servants de make sure say publishers get enough territory and books wey them go use for preaching. Some of them de help to clean and care for the Kingdom Hall. Ministerial servants still de do attendant work and de help with sound and video for congregation meetings. But wetin dey important pass be say, ministerial servants na brothers wey love Jehovah and wey de live their life for way wey de make Jehovah happy. And say them get deep love for their brothers and sisters. (Matt. 22:​37-39) Wetin brother wey don baptize go do to fit be ministerial servant?

5. Wetin brother wey want be ministerial servant go need to do?

⁵ Bible talk about some fine-fine character wey brothers need to get to fit qualify as ministerial servants. (1 Tim. 3:​8-10, 12, 13) If you want be ministerial servant, you go need to study this fine-fine character for Bible and work hard make this character de show for your life. But, make you sofri think about wetin make you want be ministerial servant.

WETIN MAKE YOU WANT BE MINISTERIAL SERVANT?

6. Wetin suppose move you to want serve your brothers and sisters? (Matthew 20:28; still check the picture.)

⁶ Make we talk about Jesus Christ wey be our best example. Na love for im Papa and the love wey e get for people move-am to do everything wey e do. That love move Jesus to work hard and even do work wey servants de do. (Read Matthew 20:28; John 13:5, 14, 15) If na love de move you, Jehovah go bless you and help you as you de try your best to fit qualify as ministerial servant.—1 Cor. 16:14; 1 Pet. 5:5.

7. Why e no good make brother want be ministerial servant because e want make people de praise-am?

⁷ For this world, people de like people wey de try to be number one for wetin them de do. But no be so e be for Jehovah organization. Brother wey get love for people like Jesus, no de want control other people or no de want make them think say e dey important pass them. If  them appoint brother wey want make people see-am as person wey dey important pass them, e no go want do some small-small work wey e need to do to care for Jehovah sheep. E fit de think say if e do this kind work, e don bring imself down. (John 10:12) Jehovah no go bless anybody wey de work hard because e want make other people see-am as important person.—1 Cor. 10:​24, 33; 13:4, 5.

8. Which correction Jesus give im apostles?

⁸ E get sometimes wey even Jesus disciples wey be im close friends want make Jesus give them work because them want dey important pass other people. Think about wetin James and John do. Them ask Jesus make e give them important position for im Kingdom. Jesus no praise James and John for wetin them do. Instead, Jesus correct im 12 apostles when e talk say: “Anybody wey want be big man among una, must be una servant, and anybody wey want be first among una must be slave for all of una.” (Mark 10:​35-37, 43, 44) Brothers wey de work hard for congregation because them want serve other people go be blessing for the congregation.—1 Thess. 2:8.

WETIN FIT HELP YOU TO WANT SERVE BROTHERS AND SISTERS FOR CONGREGATION?

9. Wetin fit make-am de hungry you to want help your brothers and sisters?

⁹ Na true say you love Jehovah and want serve other people. But e fit no de hungry you to do the kind work wey ministerial servants de do. Wetin fit make-am de hungry you to want help your brothers and sisters? Make you think about the kind joy wey you go get when you de serve your brothers and sisters. Jesus talk say: “Na when person de give e go happy pass when e de receive.” (Acts 20:35) Jesus no only talk this thing, but e still do-am. E really happy no be small as e serve other people. You too fit get this kind joy.

10. How Jesus show say e de happy to serve other people? (Mark 6:​31-34)

¹⁰ Think about one example wey show say Jesus really de happy to serve other people. (Read Mark 6:​31-34.) E get one time wey Jesus and im apostles don tire. Them comot de go one quiet place to fit rest small. But plenty people reach there before them because them want make Jesus teach them. Jesus for tell them say e no go fit teach them, because Jesus and im apostles “no even get time to rest or even chop.” Or Jesus for hurry teach them one or two things and tell them say make them de go. But because Jesus really love them, e “start to teach them plenty things.” And e continue to teach them until day don de dark. (Mark 6:35) No be must say Jesus go teach them that time, but Jesus do-am because “e pity them.” E really want teach them because e love them. To de help other people really make Jesus happy.

11. How Jesus care for the people wey listen to-am? (Still check the picture.)

¹¹ Jesus no just teach the plenty people wey come meet-am, e do pass that one. E give them wetin them need. E do miracle to provide food and e tell im apostles make them share-am give the people. (Mark 6:41) As e do this one, e teach im disciples how to serve other people. Jesus still show say to do things for other people really dey important, and na this kind work ministerial servants de do. Think about how Jesus apostles go don happy as them work together with Jesus to give this people food until “all the people chop belleful”! (Mark 6:42) This na just one example wey show say Jesus de think of wetin other people need first before im own. When e dey this earth, e use all im life serve people. (Matt. 4:23; 8:16) Jesus really  happy to teach other people and e sofri care for wetin them need. As you de work hard to be ministerial servant, you too go get more joy as you de serve other people from your heart.

12. Why e no good make we de think say we no fit do anything to help for congregation?

¹² If you feel say e get plenty things wey you no sabi do, no let that one tire you. We dey sure say you get some better-better character wey you fit use help people for congregation. Think about wetin Paul talk for 1 Corinthians 12:​12-30, and after, beg Jehovah make e help you see how you fit use wetin you don learn for your life. Wetin Paul talk make-am clear say, them value you and need you for congregation like all other servant of Jehovah. If you no be ministerial servant now because you still de work hard to get some of the better-better character wey you need to qualify, make you no tire. Instead, continue to do wetin you fit do to serve Jehovah and de help your brothers. Dey sure say the elders de think about you and them go give you work wey you go fit do for congregation.—Rom. 12:​4-8.

13. Wetin we fit talk about the character wey Bible say ministerial servants suppose get?

¹³ See another thing wey you fit put for mind. Most of the character wey Bible talk say ministerial servants need to get, na the same character wey all servant of Jehovah suppose get. All of us need to be Jehovah tight friend, de happy to help other people, and live our life the way wey go make God happy. So, you fit don already get most of the character wey you need to become ministerial servant.

WETIN YOU FIT DO TO QUALIFY AS MINISTERIAL SERVANT?

14. Wetin e mean to “dey serious”? (1 Timothy 3:​8-10, 12)

¹⁴ Make we talk about some things wey fit make brother qualify to be ministerial servant as e dey for 1 Timothy 3:​8-10, 12. (Read-am.) Ministerial servant must “dey serious.” Them fit still translate that word as “person wey reach to respect,” or “person wey de do im work well.” This one no mean say you no go laugh with people or de enjoy life. (Eccl. 3:1, 4) But, e mean say you need to de work hard to do the work wey them give you. If you de always finish your work for correct time and you de do-am well, the brothers and sisters for congregation go know say them fit trust you and this one go make them respect you.

15. (a) Ministerial servant ‘no de deceive people with wetin e talk.’ Wetin this one mean? (b) Ministerial servant ‘no get long-throat to gain something wey no be im own.’ Wetin this one mean?

 ¹⁵ Ministerial servant ‘no de deceive people with wetin e talk.’ This one mean say ministerial servant go dey honest, no de lie, and them fit trust-am. E go do wetin e talk and e no go deceive other people. (Prov. 3:32) E ‘no go get long-throat to gain something wey no be im own.’ This one mean say ministerial servant go de talk true for business and money matter. E no go use the better friendship wey e get with brothers and sisters for congregation to play them wayo because e want make money.

16. (a) Ministerial servant “no de drink too much wine.” Wetin this one mean? (b) Wetin e mean to “get clean conscience”?

¹⁶ Ministerial servant “no de drink too much wine.” This one mean say ministerial servant no de drink too much alcohol and people no go know-am as person wey de drink well-well. If you “get clean conscience,” this one mean say you de live your life the way Jehovah want. Even though say you no dey perfect, you go enjoy the peace wey de come when person be friend of God.

17. How brother fit show say them fit trust-am when them give-am work for congregation? (1 Timothy 3:10; still check the picture.)

¹⁷ If them don ‘test you to see whether you qualify,’ this one mean say elders don see say them fit trust you because you de handle any work wey them give you well. So, when elders give you work, sofri follow wetin them talk say make you do and follow the direction wey Jehovah organization give. Make sure say you understand wetin you need to do and when you suppose finish the work. When you do your work with better mind, brothers and sisters for congregation go see say you don de grow to be person wey them fit trust. Elders, make una make sure say una de train brothers wey don baptize. (Read 1 Timothy 3:10.) Una get brothers wey don baptize for una congregation wey dey around 10-14 years or wey never even reach? Them de do their personal study and de prepare for meeting well? Them de always answer question for meetings and de go preaching? If na so, give them work wey person wey dey their age go fit do. If una do this one, this young brothers fit show say them de do their work well. So, when them don dey around 17-19 years, them fit qualify to be ministerial servant.

18. Wetin e mean when Bible talk say, “Nobody fit talk say [you] de do bad things”?

 ¹⁸ “Nobody fit talk say [you] de do bad things.” This one mean say nobody go fit get any better reason to talk say you do bad thing. Na true say, people fit lie against us. But even if them do like that, make e be say wetin them talk no be true. People really lie against Jesus, and e talk say this same thing go happen to im disciples. (John 15:20) But, if like Jesus you live clean life, you go get better name for congregation.—Matt. 11:19.

19. Wetin e mean when Bible talk say brother wey don marry must be “husband of one wife”?

¹⁹ “Husband of one wife.” The way Jehovah arrange marriage from the beginning na say, marriage suppose dey between one man and one woman. If you don marry, use all your heart support this arrangement. (Matt. 19:​3-9) Make servant of Jehovah no ever put hand for sex wey no clean. (Heb. 13:4) But no be only that one. This one still mean say e go love im wife and no de put eye for other women.—Job 31:1.

20. How brother fit show say e de direct im family “for fine way”?

²⁰ E de “direct [im] children and [im] own family for fine way.” If you be family head, no play with your work for family. De always do family worship. De work with your wife and your children for preaching plenty times as you fit. Help your children make them get tight friendship with Jehovah. (Eph. 6:4) Brother wey de care for im family well de show say e go fit care for brothers and sisters for congregation well.—Compare 1 Timothy 3:5.

21. Wetin you fit do to qualify to be ministerial servant?

²¹ Brother, if you never be ministerial servant, abeg sofri read this article and pray to Jehovah about the matter. Study the things wey Bible talk say brothers must do to become ministerial servant and work hard to fit de do them. Think about how the love wey you get for Jehovah and your brothers and sisters strong reach. Love your brothers and sisters more-more and think about why you want be ministerial servant. (1 Pet. 4:8, 10) Work hard to fit qualify to be ministerial servant and you go really happy as you de serve your brothers and sisters for congregation. Make Jehovah really bless everything wey you de do, as you de work hard to fit qualify to be ministerial servant!—Phil. 2:13.