You go like gain well-well from your personal study? Try the things wey dey this article. Them fit help you put mind for wetin you de study.

•  Choose better place wey you go use for your study. If e dey possible, look for place wey dey clean and wey get better light so that you go fit see wetin you de study well. You fit sitdown for chair and put the book for table, or you fit choose better place to sitdown for outside your house.

•  Look for better place wey you go fit dey alone. Jesus pray “for early morning” for “one place wey people no dey.” (Mark 1:35) If e no dey possible for you to dey alone for your study, you fit let your family or the people wey you de stay with know say you want study and beg them make them no disturb you.

•  No allow anything comot your mind from wetin you de study. As you de study, no ­allow anything comot your mind from wetin you de study. If na phone or tablet you de use study, try set-am make e no disturb you. As you de study, if you remember something wey you need to do, make you write-am down to do-am later and continue your study. If e de hard for you to put mind for wetin you de study, take small time waka round or stretch your body.