YOU DE struggle sometimes to do your personal Bible study every week? E de hard you to enjoy-am? E de happen to all of us sometimes. But think about other things wey we de always do, like to de bath. To bath de take time and sometimes, e de tire person to do-am, but after person bath finish, e de feel good! Bible study fit be like that. E fit make us feel good. (Eph. 5:26) See some things wey fit help us:

• Plan time wey you go study every week. Personal Bible study dey part of “the things wey dey important pass” wey Christians no suppose miss. (Phil. 1:10) To help you no forget the time wey you suppose study, write the day and the time for paper and put-am for where you go quick see-am, like the door of your fridge. Or you fit set alarm for your phone to remind you the time wey you don choose to study.

• Choose how you go de study. E go easy for you to sitdown study for long time, or e go better for you to study small-small for different-different time? Na you know yourself pass. So get this one for mind as you de plan how you go study. Even if you no feel like to study for the time wey you don choose, why you no just try study for only ten minutes? If you try-am for just ten minutes, you go see say you go gain small thing. E better to study small, than say you no study at all. And e fit be say after the ten minutes, you go don really enjoy-am sotey you want continue.—Phil. 2:13.

• Choose topics wey you go study before the study time. If na when you want study you de choose wetin you want study, you fit no “use your time well.” (Eph. 5:16) So why you no write down the articles or topics wey you for like study? For example, if some questions come your mind and you go like understand-am well, make you write-am join the ones wey you don already get. And if something come your mind after you don study finish, make you add-am join the topics wey you go study later.

• Ready to adjust your plan if need dey. Ready to adjust your plan if need dey. For example, you fit adjust the amount of time for the study or the topics wey you choose. Wetin dey important pass no be when you study, or the amount of time you use,  or wetin you study, but na to make sure say you study every week.

We de really gain when we study every week. E de make our friendship with Jehovah strong, e de help us to learn how to make better decision, and e de make our faith strong.—Josh. 1:8.