1-2. Give example of some ways wey people fit treat us for bad way.

 JESUS talk one story about one widow wey continue to beg one judge make e judge im matter well because person de treat-am for bad way. Jesus disciples really understand how that woman for the story de feel because many people for that time no de treat other people well. (Luke 18:​1-5) We too fit understand how this woman feel because e fit be say some people don treat us for bad way for past.

² Plenty people for the world today de do partial, them no dey kind, and them de like to cheat other people. Because of this one, e no de surprise us when them treat us for bad way. (Eccl. 5:8) But we fit no expect say our Christian brother or sister go treat us for bad way or do wetin fit pain us well-well, but e de happen. The truth be say, our brothers and sisters no really want do wetin go pain us, but them no dey perfect. We fit learn plenty things from wetin Jesus do when people no treat-am well. If we fit dey patient when people wey no de serve Jehovah suffer us because of our faith, e no go good make we dey more patient with our Christian brothers and sisters wey de worship Jehovah with us? How Jehovah de feel when brother or sister for congregation or person wey no de worship Jehovah treat us for bad way? Jehovah de really care about how we de feel when this kind thing happen to us?

3. How we take know say Jehovah de really care when people treat us for bad way?

³ Jehovah want make people treat us for better way and e de  see-am when people no treat us well. “Jehovah like correct thing.” (Ps. 37:28) Jesus make-am clear say Jehovah go make sure say people get the “correct judgement quick-quick” for the correct time. (Luke 18:7, 8) Small time, e go end all suffer and people no go treat us for bad way again.—Ps. 72:1, 2.

4. How Jehovah de help us when people treat us for bad way?

⁴ Na true say we go need to wait for the time wey Jehovah go remove all problems. But even now, Jehovah de help us when people treat us for bad way. (2 Pet. 3:13) For example, e de teach us wetin we fit do when people treat us for bad way so that we no go cause more problem for ourself. One way wey e de do this one na through the better example of im Son. Bible show us wetin Jesus do when them treat-am for bad way. Jehovah still de give us better advice from Bible wey fit help us when people treat us for bad way.

DEY CAREFUL ABOUT WETIN YOU GO DO WHEN PEOPLE TREAT YOU FOR BAD WAY

5. Why we need to dey careful about the way we behave when them treat us or other people for bad way?

⁵ E fit really pain us when them treat us for bad way or when we see as them de treat other people for bad way. (Eccl. 7:7) Faithful servants of Jehovah like Job and Habakkuk feel the same way. (Job 6:2, 3; Hab. 1:​1-3) Na true say e dey normal to feel like that, but we go need to dey careful about wetin we go do so that we no go do wetin we go regret after.

6. Wetin Absalom example teach us? (Still check the picture.)

⁶ When person treat us or treat person wey we love for bad way, we fit want do the person wetin go pain-am back. But if we do like that, e fit cause more problem. Think about the example of Absalom wey be King David son. E really vex when im step brother Amnon rape im sister, Tamar. According to the Law wey Jehovah give Moses, them suppose kill Amnon for wetin e do. (Lev. 20:17) Na true say Absalom get right to vex, but e no get right to kill Amnon.—2 Sam. 13:​20-23, 28, 29.

7. When the person wey write Psalm 73 see how wicked people de treat good people for bad way, how this one affect-am?

⁷ When e be like say them no punish people wey de treat other people for bad way, we fit start to think say gain no dey to do wetin correct. Make we see the example of the person wey write Psalm 73. E see as wicked people de  treat good people for bad way, but for im eye, e just be like say the wicked people de enjoy life. E talk say: ‘Things de always dey easy for wicked people.’ (Ps. 73:12) E really vex as e see say wicked people de suffer good people, sotey e think say gain no dey to continue to serve Jehovah. E say: “When I try to understand-am, e trouble me.” (Ps. 73:​14, 16) E still talk say: “As for me, my two leg don almost comot from road; I don nearly slide fall.” (Ps. 73:2) The same thing happen to one brother wey we go call Alberto.

8. Wetin happen to one brother when them treat-am for bad way?

⁸ Some brothers talk say Brother Alberto thief congregation money, but this one no be true. This one make-am no fit serve as elder again and other people for congregation wey hear about the matter no come de respect-am again. E talk say: “This one make me vex well-well and everything just tire me.” E really vex sotey e stop to de go meeting, and e come be inactive publisher for five years. This story show wetin fit happen to us if we no control the way we de vex when people treat us for bad way.

HOW WE FIT COPY JESUS EXAMPLE WHEN THEM TREAT US FOR BAD WAY?

9. How them treat Jesus for bad way? (Still check the picture.)

⁹ Jesus show us better example about wetin we fit do when them treat us for bad way. People  for im family and other people no treat-am well. Im family people talk say e de craze, and leaders for Jew people religion talk say the power wey e de use do miracle come from demons. Rome soldiers laugh-am, torture-am, and kill-am. (Mark 3:​21, 22; 14:55; 15:​16-20, 35-37) Jesus endure and e no do them back. Wetin we fit learn from im example?

10. How Jesus behave when people treat-am for bad way? (1 Peter 2:​21-23)

¹⁰ Read 1 Peter 2:​21-23. a Jesus show us better example about wetin we suppose do when them treat us for bad way. E know when to talk and when to keep quiet. (Matt. 26:​62-64) Sometimes, when other people lie for im head, e de decide say e no go talk anything. (Matt. 11:19) And even when e talk, e no insult or threaten the people wey dey against-am. Jesus no de talk anyhow. E de control im mouth because e “put im life for the hand of the person wey de judge well.” Jesus know say Jehovah de see how people de treat-am and e trust say Jehovah go solve the problem for the right time.

11. How we fit control wetin we de talk? (Still check the picture.)

¹¹ When person treat us for bad way, we fit copy Jesus when we try our best to control wetin we talk. Sometimes we fit no talk anything at all because wetin the person talk or do fit no really dey serious. And sometimes we fit decide say we no go talk anything because we no want talk wetin go cause more problem. (Eccl. 3:7; Jas. 1:​19, 20) But for some other time, we go need to talk something when we see say them de treat other people for bad way or when we need to defend the truth.  (Acts 6:1, 2) For this kind situation, make we try our best to talk for calm way and show respect.—1 Pet. 3:15. b

12. How we fit put wetin happen for “the hand of the Person wey de judge well”?

¹² We fit still copy Jesus example as we de put wetin happen for the hand of “the Person wey de judge well.” When people no understand us, or treat us for bad way, we trust say Jehovah really understand wetin happen. When we know and trust say Jehovah go handle all matter for the correct time, this one go help us to endure when them treat us for bad way. When we trust Jehovah and wait for-am to solve all problems, this one go help us make we no continue to vex or hate other people. If we continue to vex because of the bad way wey them treat us, e fit make us do something wey bad, e fit make us no de happy again, and e fit spoil our friendship with Jehovah.—Ps. 37:8.

13. Wetin fit help us continue to endure when them treat us for bad way?

¹³ Na true say we no fit copy Jesus example for perfect way. Sometimes, we fit talk or do things wey we go later regret. (Jas. 3:2) And sometimes the bad way wey them treat us fit cause us pain and make us feel bad for the rest of our life for this Satan world. If na so you de feel, know say Jehovah really understand wetin de happen to you. And even Jesus understand how you de feel because people don treat-am for bad way before. (Heb. 4:​15, 16) Apart from the better example of Jesus wey Jehovah don give us, e still give us better advice from Bible wey fit help us endure when them treat us for bad way. Make we see two verses from the Bible book of Romans wey fit help us.

“LEAVE-AM FOR GOD TO SHOW IM VEX”

14. When them treat us for bad way, wetin e mean to ‘leave the matter for God to show im vex’? (Romans 12:19)

¹⁴ Read Romans 12:19. Apostle Paul tell Christians say when people treat them for bad way, make them ‘leave the matter for God to show im vex.’ We fit do this one when we allow Jehovah to handle the matter for im own time and for im own way. After them treat one brother wey im name na John for bad way, the brother talk say: “I see say I need to control how I de vex so that I no go do any bad thing, but this one no easy. Romans 12:19 help me see say I need to dey patient and wait make Jehovah handle the matter.”

15. When them treat us for bad way, why e good make we wait for Jehovah to correct the matter?

¹⁵ We de gain when we wait for Jehovah to handle any problem wey we de face. If we do like that, we go avoid the plenty problem wey fit come because we de try to handle the matter by ourself. Jehovah really want help us. E just be like say e de tell us say: ‘Leave the matter for me, I go handle-am.’ Jehovah promise say, ‘e go pay back.’ If we accept this promise, we go leave the matter for Jehovah hand and trust say e go handle the matter for the best way. Na wetin help brother John wey we talk about before. E talk say: “If I wait for Jehovah to solve my problem, Jehovah go handle-am for the best way.”

“CONTINUE TO WIN THE BAD WITH THE GOOD”

16-17. How prayer fit help us to “continue to win the bad with the good”? (Romans 12:21)

¹⁶ Read Romans 12:21. Paul beg Christians say make them “continue to win the bad with the good.” And for the Things Wey Jesus Teach Ontop Mountain, Jesus talk say: “Make una continue to love una enemies and de pray  for people wey de suffer una.” (Matt. 5:44) Na exactly wetin Jesus do be that. E fit be say you don think about the kind suffer wey Jesus endure when Rome soldiers nail-am for pole. Them treat Jesus for bad way and e endure serious pain. The truth be say, we no fit really understand the kind serious pain wey Jesus feel.

¹⁷ Jesus no allow the bad way wey people treat-am to make-am stop to serve Jehovah. Jesus no insult those soldiers, instead e pray say: “Papa, forgive them because them no know wetin them de do.” (Luke 23:34) When we pray to Jehovah to help people wey de treat us for bad way, this one go help us to dey calm and still help us to change how we de feel about them.

18. How prayer help Brother Alberto and John to endure when them treat them for bad way?

¹⁸ Prayer help the two brothers wey we don talk about for this article to fit endure when them treat them for bad way. Brother Alberto talk say: “I pray for the brothers wey no treat me well. I ask Jehovah plenty times to help me forget wetin them do me.” We happy say Brother Alberto don de serve Jehovah again. Brother John talk say: “Plenty times, I pray to Jehovah make e help the brother wey treat me for bad way and help me fit forgive-am. Jehovah help me to stop to vex for my brother and to stop to see-am as bad person. And the prayer still help me to get peace of mind and to dey calm.”

19. As we continue to live for this world wey Satan de control, wetin we must continue to do? (1 Peter 3:8, 9)

¹⁹ As we continue to live for this world wey Satan de control, e dey possible say people go treat us for bad way. But no matter the kind way wey them treat us, make we no stop to pray to Jehovah to help us. Make we copy Jesus example when them treat us for bad way. And make we no stop to follow the better-better advice for Bible. If we do like this, we dey sure say Jehovah go bless us.—Read 1 Peter 3:8, 9.