1, 2. (a) Wetin fit happen when some things change for the way we no expect-am? (Check the first picture.) (b) According to Psalm 131, wetin fit help us to get peace of mind?

ONE husband and wife don serve for Bethel pass 25 years. Their name na Lloyd and Alexandra. But after, Jehovah’s organization change their assignment to regular pioneer. When they first tell two of them, e no sweet them at all. Lloyd talk say: “I feel say Bethel and my work for Bethel don become my life. For my head, I agree with why they say make we go pioneer. But as time de go, I de always feel say they reject me.” Sometimes Lloyd go dey happy, but for another time, e go dey sad.

² When somethings change for our life for the way we no expect-am, e fit make us de fear and worry. (Prov. 12:25) We fit no even know how to face-am. When this kind thing happen, wetin fit help us ‘relax and dey quiet’? (Read Psalm 131:1-3.) Some people for Bible time continue to get peace of mind, even when their condition change. Na so e still be for our time. Make we talk about some of them.

3. How Joseph life change the way e no expect?

³ Na Joseph Jacob like pass for all e children. But when Joseph dey about 17 years e brothers sell-am as slave because of jealousy. (Gen. 37:2-4, 23-28) For about 13 years, Joseph suffer well-well. E endure life as slave and as prisoner for Egypt. The place wey Joseph dey far from where e papa dey. But, wetin help Joseph make e no tire for e condition and start to vex?

4. (a) Wetin Joseph put for e mind when e dey for prison? (b) When Joseph pray to Jehovah, how Jehovah answer e prayer?

⁴ When Joseph de suffer for prison, e go don de put e mind for things wey show say e de get blessing from Jehovah. (Gen. 39:21; Ps. 105:17-19) When Joseph dey young, e dream about things wey they go happen for front. This one go don still make e mind strong say Jehovah dey e back. (Gen. 37:5-11) E fit be say e tell Jehovah all e problem for prayer many times. (Ps. 145:18) Jehovah show say e go dey with Joseph even with all the problems. This one give Joseph strong heart and show say God listen to e prayer.​—Acts 7:9, 10. *

5. How “the peace wey God de give” fit give us power make we continue to serve Jehovah?

⁵ Today, we fit get “the peace wey God de give.” No matter how hard our problem dey, this peace go protect the way we de think, and e go make our mind come down. (Read Philippians 4:6, 7.) When our problem and worry be like say e don too heavy for us, the peace of God fit give us power. This one go make us continue to serve Jehovah, and we no go tire. Make we talk about some example for our time to show say this one na true.

6, 7. When we pray about the particular problem wey we get, how that one fit help us get peace of mind again? Give example.

⁶ Ryan and Juliette na temporary special pioneer before. When they hear say their assignment don change, e pain them well-well. Ryan talk say: “We no waste time tell Jehovah for prayer. We know say as we dey here, na special chance for us to show say we trust Jehovah. That time, plenty new ones dey our congregation. So we pray make Jehovah help us make our faith strong so that we go be fine example for them.”

⁷ Wetin Jehovah do to answer their prayer? Ryan talk say: “As I pray finish, quick-quick the worry and bad feeling wey we get before just disappear. The peace wey God de give protect our heart and the way we de think. We come know say Jehovah fit still de use us if we continue to get trust.”

8-10. (a) How holy spirit fit help us manage our problem and worry? (b) How Jehovah fit help us so that we go continue to do well for e service?

⁸ The spirit of God fit make our mind come down. And to help us understand wetin really dey important pass for life, the spirit fit direct our heart go some verse for inside Bible. (Read John 14:26, 27.) Make we talk about the example of Philip and Mary. This husband and wife don serve for Bethel for almost 25 years. Before e reach four months, many things happen to them. Two of them mama die, another person for the brother family die, and Mary papa get one kind brain sickness (wey them de call dementia). The two of them begin care for Mary papa.

 ⁹ Philip talk say: “That time, I think say I de manage my condition well but something de miss. As I de read one topic for Watchtower wey we de use for meeting, I see Colossians 1:11. Na true say I de endure, but e no really complete. I need to ‘endure well with patience and joy.’ This Bible verse remind me say no be wetin person de face for life go show whether e go get joy or e no go get. Instead, person de get joy when God’s spirit de work for e life.”

¹⁰ Jehovah bless Philip and Mary for many ways because they continue to serve Jehovah with strong faith. Small time after they comot for Bethel, they get Bible students. The students want study more than once every week, and they progress well. Mary talk say: “This Bible students na our joy, and this na one way wey Jehovah de tell us say everything go dey fine.”

11, 12. (a) Wetin Joseph do to give Jehovah something to bless? (b) How Jehovah bless Joseph because e endure?

¹¹ When things just change the way we no expect-am, we fit de over worry about wetin go happen sotey, life tire us. This one for happen to Joseph, but e no allow-am. E choose to manage the condition well, and e do something wey Jehovah go bless. Joseph no worry e self say e dey prison. E work hard to do any work wey the chief officer for the prison say make e do. E work the same way wey e de work when e dey for Potiphar house.​—Gen. 39:21-23.

¹² One day, they say make Joseph begin care for two men. This men work for Pharaoh palace before, and them dey for high position that time. The way Joseph treat them make their mind come down. So they tell Joseph the dream wey they dream for night. (Gen. 40:5-8) That time, e no know say that discussion go bring blessing. Na true say Joseph endure another two years for prison. But na the same day wey they release Joseph from prison e become second in command to Pharaoh.​—Gen. 41:1, 14-16, 39-41.

13. No matter the condition wey we dey, how we fit give Jehovah something wey e go bless?

¹³ Like Joseph, we fit see ourself for condition wey we no fit really control. But if we dey patient and do our best to manage our condition well, we go do something wey Jehovah go bless. (Ps. 37:5) The truth be say, we fit “confuse” and de worry ourself sometimes. But just as apostle Paul talk-am, we no go ever worry sotey we no get “hope” again. (2 Cor. 4:8; ftn.) This word wey Paul talk go happen to us, especially if we continue to put all our heart for the preaching work.

14-16. How Philip continue to preach with all e heart even as e condition de change?

¹⁴ Philip the preacher na one correct example. E put e mind for the preaching work no matter how e condition change reach. People begin suffer Christians well-well after they kill Stephen. * Around that time, Philip de enjoy one new assignment. (Acts 6:1-6) Because of the trouble, Christians scatter go different-different place. But this one no make Philip just sit-down fold e hand de do nothing. E go preach for Samaria, city wey plenty people never hear the good news that time.​—Matt. 10:5; Acts 8:1, 5.

¹⁵ Philip dey ready to go anywhere wey holy spirit direct say make e go. So because of this one, Jehovah use Philip preach to people for different-different place wey the good news never reach. That time, Jew people de treat Samaria people anyhow. But Philip no be like that, e preach to them. Maybe na this one make plenty people listen well-well.​—Acts 8:6-8.

¹⁶ The next place wey holy spirit direct Philip go na Ashdod and Caesarea. Plenty people wey they no be Jew dey this two place. (Acts 8:39, 40) After about 20 years since Philip first preach for Samaria, e condition change again. Now e don be family man, and e de live for territory wey e de preach. No matter how Philip life change reach, e continue to put all e heart for the preaching work. No wonder Jehovah bless Philip and e family well-well.​—Acts 21:8, 9.

17, 18. When we de put our mind for the preaching work, how e fit help us when things change?

¹⁷ Plenty people for full-time service don see say when they put their heart for the preaching work e de make them glad, and e de help them continue to serve Jehovah even when their condition change. Make we see the example of one husband and wife from South Africa. Their name na Osborne and Polite. When they comot for Bethel, they think say they go see house and part-time work quick-quick. Osborne talk say: “E pain us say we no see work quick-quick as we think.” The wife talk say: “For three months we no see work, and we no save any money. Things no dey easy for us at all.”

¹⁸ Wetin help this husband and wife to fit manage the hard condition? Osborne talk  say: “As we de preach with the congregation, e really help us put our mind for the work and de think for the right way. Instead of us to stay house and de over worry ourself, we choose to do our best for the preaching work. This one really give us joy. We find work everywhere, and at last we see work.”

19-21. (a) Wetin go help us continue to get peace of mind? (b) Wetin we fit gain when we try to manage and master our new condition?

¹⁹ We don see from all this example say, e good make we do our best to manage our condition well, and get better mind as we de wait for Jehovah. If we do like that, we go continue to get peace of mind. (Read Micah 7:7.) As time de go, we go even see say, as we de try to manage and master our new condition, e don make our friendship with Jehovah strong more-more. Polite talk say: “Change of assignment don teach me wetin e really mean to trust Jehovah even when e be like say hope no dey. My friendship with Jehovah don strong more-more.”

²⁰ Mary, wey we don talk about before, still de pioneer even as e de take care of e papa. E talk say: “I don learn say anytime wey worry want start, I need to stop, pray and then relax. To leave things for the hand of Jehovah na the number one thing wey I don learn. And this na wetin I go really need for future.”

²¹ Lloyd and Alexandra wey we first talk about talk say, change of assignment test their faith for the way they no expect. But they talk say: “The things wey we face help us check whether we really get strong faith, the type wey fit help and comfort us for hard time. We don better pass as we dey before.”

22. If we de try to manage our condition well, wetin we go dey sure of?

²² For this wicked world, our life fit change the way we no expect. The work wey we de do for Jehovah fit change, sickness fit come, and the way we de care for our family fit change. But no matter wetin the change be, make you know say, Jehovah de care for you, and e go help you when the time reach. (Heb. 4:16; 1 Pet. 5:6, 7) For now, try to manage your condition well. Always pray to Jehovah, your Papa for heaven, and make wuna friendship dey tight. Learn to trust Jehovah say e go care for you. If you do like this, you go always get peace of mind even when your condition change.