1. Wetin make us really dey sure say we de live for “the last days”?

NA AFTER 1914 they born you? If na so, then you don live your whole life for the time wey Bible call “the last days” of this world. (2 Tim. 3:1) Jesus talk say some things go de happen for this our time, and all of us don hear about this things. Some of them na war, hunger, earthquake, disease, plenty people no go de do the right thing, and people go de suffer servants of Jehovah. (Matt. 24:3, 7-9, 12; Luke 21:10-12) We still don see people de behave for the way wey apostle Paul talk about. (Check the box “ The Way People Be for Our Time.”) As servants of Jehovah, we really dey sure say we de live for “the last part” of the last days.​—Mic. 4:1.

2. Which questions we need to answer?

² Plenty time don pass since 1914. Because of this one, we dey sure say this our time wey we dey so, na the last part of “the last days.” Since this world go soon end, we need to get answer to some important questions: (1) Which things go happen for the end of “the last days”? And (2) wetin Jehovah want make we do as we de wait for those things to happen?

3. Which announcement 1 Thessalonians 5:1-3 talk say the leaders for this world go make?

³ Read 1 Thessalonians 5:1-3. For this Bible verse, Paul talk about “the day of Jehovah.” This “day” go start with the attack wey they go attack “Babylon the Great,” and e go end with Armageddon. “Babylon the Great” na all lie-lie religion  together. (Rev. 16:14, 16; 17:5) Just before that day start, leaders for this world go announce say “Peace dey and fear no dey!” (Some other Bible translate-am as: “Peace and safety.”) Sometimes, leaders for the world de talk that kind thing, when them de talk about how different-different country go de do things well together. * But, the announcement say “peace dey and fear no dey” wey that Bible verse talk about go dey different. Why? Because when this one go happen, plenty people go think say the leaders for this world don succeed to make the world dey safe pass as e dey before. But the truth be say, “great tribulation” go start and “destruction go just” come.​—Matt. 24:21.

4. (a) Wetin we need to wait and see about the announcement wey they go make say “peace dey and fear no dey”? (b) Wetin we don already know about-am?

⁴ We know some things about the announcement wey they go make say “peace dey and fear no dey.” But, some things dey wey we no know. We no know wetin go cause the announcement and how the leaders go make-am. And we no know whether na different-different announcement they go make, or na just one announcement. But the thing wey we know be say: Leaders for this world no go fit bring peace, so make we no allow them fool us with that announcement. Instead, na that announcement Bible tell us say make we de expect. E go be the sign say “the day of Jehovah” go soon start!

5. Wetin 1 Thessalonians 5:4-6 tell us make we do so that we go ready for “the day of Jehovah”?

⁵ Read 1 Thessalonians 5:4-6. The advice from Paul tell us wetin we need to do so that we go dey sure say we ready for “the day of Jehovah.” E say make “we no sleep as other people de do. Instead, make our eye dey open.” For example, we must dey careful make we no join any side for politics or put ourself for things about politics. If we put ourself for this things, we fit come be “part of the world.” (John 15:19) We know say na the Kingdom of God go fit bring peace for this world; na the only hope wey we get be that.

6. Wetin we want help people make they do, and why?

⁶ Apart from say we no go sleep, we still want help other people make they wake up. We go help them learn about the things wey Bible tell us say the world go face for future. Make we remember say, when the great tribulation start, time no go dey for people to begin serve Jehovah. Na because of that one e dey very important make we de preach now! *

7. Wetin Jehovah expect us make we do now?

⁷ Na small time remain for “the day of Jehovah” to start. So Jehovah want make we dey  busy de do the preaching work. We need to make sure say we “de get plenty things to do for the work of the Lord.” (1 Cor. 15:58) Jesus talk about wetin we suppose de do. That time when e talk about all the things wey people go experience for the last days, e still talk say: “And, they go need to preach the good news first for the whole world.” (Mark 13:4, 8, 10; Matt. 24:14) Just think-am: Everytime wey you go preaching, you de help to make that prophecy for Bible happen.

8. Wetin make us know say the preaching work de grow?

⁸ The preaching work de really grow. Why we talk so? Every year, more people de hear the good news of the Kingdom. For example, think about how the number of publishers don plenty for this last days. For 1914, we get 5,155 publishers for 43 lands. But today, we get about 8.5 million publishers for 240 lands! Even with that one, work still dey. We must continue to tell people say na God’s Kingdom be the only solution to all the problem wey we de face today.​—Ps. 145:11-13.

9. Why we need to continue to preach the Kingdom message?

⁹ Our preaching work no go end until Jehovah talk say the work don finish. You think say time still dey for people to come know Jehovah and Jesus Christ? (John 17:3) We no know. But we know say before great tribulation start, people go fit still choose to serve Jehovah if “the condition of their heart dey good for everlasting life.” (Acts 13:48) How we fit help this kind people before time finish?

10. How Jehovah de help us to teach people the truth?

¹⁰ Jehovah de use e organization to give us everything wey we need to teach people the truth. For example, the Life and Preaching meeting wey we de do every week de train us. This meeting de help us know the things wey we need to talk when we meet people the first time and when we de do return visit. This meeting still de teach us how to conduct Bible study. Jehovah’s organization don still give us things for our Teaching Toolbox. This things de help us to . . .

• start discussion with people,

• make people get interest for the message,

• make people to want learn more,

• teach people the truth when we de study Bible with them, and

•   invite people wey their interest dey for the message to visit our website and Kingdom Halls.

True-true, just to get this tools no dey enough. We must use them. * For example, maybe you give tract or magazine to person after wuna discuss finish because e get interest for the message. So the person go fit de read-am before wuna see again. Na our work to always dey busy for the preaching work. We fit do this one when we de do everything wey we fit do every month to preach the good news.

11. Why we put Online Bible Study Lessons for our jw.org website?

¹¹ For our jw.org^® website, we get wetin we de call Online Bible Study Lessons. This one na another way wey Jehovah de use help people to learn the truth. (Check under BIBLE TEACHINGS > ONLINE LESSONS.) Why we put this lessons for our website? Every month, plenty-plenty people for the whole world de check Internet for Bible lessons. The lessons for our website fit help people to begin learn the truth for Bible. Another thing be say, some people wey you preach to, fit never ready to accept Bible study. If na so, show them the place wey they fit see this lessons for our website. Or, you fit send them the link (or, address) wey they fit use reach the place wey the lessons dey. *

12. Wetin person fit learn from the Online Bible Study Lessons?

¹² Our Online Bible Study Lessons talk about this topic them: “The Bible and Its Author,” “The Bible’s Main Characters,” and “The Bible’s Message of Hope.” As person de study this lessons, e go learn:

• How Bible go fit help person

• The kind people wey Jehovah, Jesus, and the angels be

• Why God make us

• Why suffer-suffer and wicked things dey

The lessons still talk about how Jehovah go . . .

• end suffer and death,

• bring dead people back to life, and

• use e Kingdom replace human government as they don fail.

13. The online lessons replace the Bible study arrangement? Explain.

¹³ The online lessons no replace the Bible study wey we de do with people. Jesus don give us the special work to make disciples. When people get interest for the message, we de hope say they go study the online lessons, they go like wetin they learn, and they go want learn more. If e happen like that, maybe they go fit accept Bible study. For the end of each lesson, the person go get chance to fill form say e want make person come de conduct e Bible study. Everyday for our website, we de receive about 230 form from people! To learn Bible face-to-face like that dey important!

14. According to the thing wey Jesus talk for Matthew 28:19, 20, wetin we need to try our best make we do, and why?

¹⁴ Read Matthew 28:19, 20. As we de conduct Bible study, e good make we try our best to “make disciples . . . , de teach them to do all the things [wey Jesus] don command.” We need to help people understand say e dey important for them to serve Jehovah and support e Kingdom. This one mean say we need  to try and help people make they fit do the things wey them de learn, make they give their life to Jehovah, and baptize. Na only that one go fit help them survive the day of Jehovah.​—1 Pet. 3:21.

15. Wetin we no get time to do, and why?

¹⁵ As we don talk before, na very small time remain between now and the end of this world. Because of this one, we no get time to continue Bible study with person if e no want change e life to show say e want be disciple of Christ. (1 Cor. 9:26) For this our work, we no get time to waste because time no dey! Plenty people still need to hear the message before time finish.

16. According to Revelation 18:2, 4, 5, 8, wetin all of us need to do? (Still check footnote.)

¹⁶ Read Revelation 18:2, 4, 5, 8. This Bible verse them show us another thing wey Jehovah want make e servants do. All true Christian must make sure say nothing connect them with Babylon the Great. Maybe before person learn the truth, e don be member for lie-lie religion. The person fit don de attend their service and de do things wey them de do. Or maybe e don contribute money to that organization. Before Bible student go qualify as unbaptized publisher, e must make sure say e don remove hand from any part of lie-lie religion. E go stop to be member of e former church or any other organization wey lie-lie religion get connection with. One way wey the person fit do this one, na to write letter to them say e no get anything to do with them again. *

17. Which kind work servant of God must make sure say e no do, and why?

¹⁷ True Christian must make sure say the work wey e de do no get anything to do with Babylon the Great. (2 Cor. 6:14-17) For example, e no go accept work for church. Apart from that one, if servant of Jehovah de work for another company e no go do plenty work for place or building wey lie-lie religion de use. And if the person get e own business, e no go want try to get work or accept to do work for any part of Babylon the Great. Why we really dey serious about this matter? Na because we no want dey part of anything wey lie-lie religion de talk and do.  For Jehovah, this things no clean.​—Isa. 52:11. *

18. How one brother follow wetin dey Bible for matter about e work?

¹⁸ Some years ago, one contractor give one elder one small work make e do for one church. The work na carpenter work. The brother get e own business, and the church dey the town wey the brother de live. This contractor know say the brother don de talk say e no want do any work for church. But this time, the contractor really need person to do the work. Even with that one, the brother follow wetin dey Bible and e no accept the work. The next week, newspaper for the area show picture of another carpenter for the church. The carpenter de put cross for the church. If to say our brother change e mind and e go do that work, maybe na e picture for dey the newspaper. That kind thing for really spoil e name among brothers and sisters! And how you think say Jehovah for feel?

19-20. (a) Wetin we don learn? (b) Which other things we need to learn?

¹⁹ Small time, the next important prophecy for Bible go happen. The leaders for this world go soon announce say “peace dey and fear no dey.” Because of the things wey Jehovah don teach us, we know say any peace wey the leaders go bring no dey real and e no go last. Wetin we suppose to do before the announcement and before the destruction come? Jehovah want make we dey busy de preach the Kingdom message and try to make more disciples. At the same time, we need to separate ourself from anything wey lie-lie religion de do. That one mean say we go stop to be members of Babylon the Great and we no go do any work wey Babylon the Great get connection with.

²⁰ Other things go happen for the last part of “the last days,” after they don announce say “peace dey and fear no dey.” And other things still dey wey Jehovah want make we do. Wetin be this things, and how we fit prepare ourself for everything wey we go experience for future? We go get the answer for the next article.