PERSON wey e work na to study weather condition use computer to check the weather. E see heavy rain with thunder and strong breeze (or, storm) de come one area wey plenty people de live. E no want make any bad thing happen to the people. So e do everything wey e fit do to warn them before the thing reach their area.

For the same way, Jehovah don de warn everybody for our time about one strong “storm.” People don hear different-different report about wetin bad weather cause. But this “storm” go worse pass anything wey they fit don hear. How Jehovah de warn people? And why we go fit dey sure say e de give people enough time to do something about the warning? To know the answer, make we first talk about different-different warning wey Jehovah give people for Bible time.

For Bible time, Jehovah warn people about different-different “storm,” or punishment wey e don decide to give them. This one na because they decide say they no go obey e command. (Prov. 10:25; Jer. 30:23) For each situation, e first warn the people well before the time. E still tell them wetin they need to do so that they go fit obey. (2 Ki. 17:12-15; Neh. 9:29, 30) Many times, God de use e faithful servants for earth to warn bad people and to help them see say they need to do something quick-quick. This one na to help the people make they change.​—Amos 3:7.

Noah na one example of faithful servant wey God use warn people. The people for e time de live dirty life and they like trouble. For many years, e no fear to warn them say God go bring heavy rain to destroy the world. (Gen. 6:9-13, 17) E still tell them the thing wey they need to do to survive. They know Noah as person wey preach about wetin good.​—2 Pet. 2:5.

Even with everything wey Noah do, the people no listen to the message wey e receive from God. They show say they no get any faith at all. Because of that one, they die when the heavy rain “come and destroy all of them.” (Matt. 24:39; Heb. 11:7) As they see say they go soon die, they no fit ever talk say God no first warn them that time.

For some other time, Jehovah warn people for short time before the “storm” or punishment start. Even with that one, e make sure say the people wey the punishment go affect get enough time to do something about the warning. For example, before the people of Egypt suffer from the Ten Punishment, Jehovah give them enough time to change. God send Moses and Aaron make they go warn Pharaoh about the number seven punishment. For this number seven punishment, ice block go fall like rain with force, and destroy plenty things. Since the ice block go begin fall the next day, we go fit talk say God give them enough time to escape and hide from the punishment? Bible answer say: “Any person among the servants wey Pharaoh get and the person get fear for the thing wey Jehovah talk, quick-quick, e bring e own servants and e animals enter inside the house them. But any person wey e heart no accept the thing wey Jehovah talk, the person leave e servants and e animals for outside.” (Ex. 9:18-21) So e clear say Jehovah give enough warning. And as some people do something quick-quick about the warning, they no suffer like other people.

For the same way, Pharaoh and e servants receive warning before the number ten punishment. But they reject the warning. They show say they really dey foolish. (Ex. 4:22, 23) Because of that one, their first sons die. The situation really dey sad! (Ex. 11:4-10; 12:29) They for fit do something about the warning before the punishment come?  Yes! Before the number ten punishment come, Moses no waste time to warn Israel people. And e still tell them the thing wey they go do if they want save their family. (Ex. 12:21-28) How many people do something about the warning? According to some calculation, the number of people wey the punishment no touch dey about three million. Israel people dey among and “plenty different-different people,” from Egypt and people from other place. All of them mix with Israel people and comot from Egypt.​—Ex. 12:38; ftn.

This examples show say when Jehovah warn people, e de always give them enough time make they do something about the warning. (Deut. 32:4) Why God do like that? Apostle Peter explain the reason say, Jehovah “no want destroy anybody. Instead, e want make everybody repent.” (2 Pet. 3:9) The truth be say, God care about those people. E be want make they repent and do wetin e tell them so that they no go suffer from the punishment.​—Isa. 48:17, 18; Rom. 2:4.

Today, everybody must obey quick-quick, the warning wey God de give for the whole world. When Jesus dey this earth, e give one warning say for “great tribulation,” God go destroy this world. (Matt. 24:21) This one go happen for future. Jesus explain for clear way the thing wey e followers go see and experience as that time de near. Today, we de see some kind important things de happen for the whole world. Na this things Jesus talk about for Bible.​—Matt. 24:3-12; Luke 21:10-13.

Because this prophecy de happen for our time, Jehovah de tell people for every corner make they support the way e de rule and obey e command. E want make people enjoy better life now and still enjoy the blessings wey the new world go bring, if they obey. (2 Pet. 3:13) Jehovah want make people get faith for the things wey e don promise. To help them get this faith, e de give them important message, na “the good news about the Kingdom.” This message go save their life. Jesus talk say they go preach this message “for everywhere for this earth, so that people for the whole world go hear.” (Matt. 24:14) God don arrange e true worshippers make they tell people about e message. Them de preach this message for about 240 lands. Jehovah want make plenty people do something about the warning. E want make they survive the “storm” or correct punishment wey e go bring.​—Zeph. 1:14, 15; 2:2, 3.

So the important question no be whether Jehovah de give people enough time to listen to e warning. E de always do like that. But, the important question na: People go do something about the warning wey God de give them as time still dey? God don send us make we go tell people e message. So, make we do our best to help plenty people wey we fit, so that they go survive the end of this world.