1-2. (a) Small time, wetin the rulers for the world go announce one day? (b) Which questions we need to find the answer?

THINK-AM say the rulers for this world just make that announcement wey we don de wait for since, wey be “peace dey and fear no dey.” They go fit claim say peace don really dey for the world. This rulers fit want make we think say they don handle all the problem for the world. But they no go fit stop wetin want happen next! Why we talk so? According to the prophecy for Bible, “their destruction go just come quick-quick, . . . and they no go fit escape.”​—1 Thess. 5:3.

² Some important questions need answer: (1) Wetin go happen for “great tribulation”? (2) Wetin Jehovah want make we do when that time reach? And (3) how we fit prepare ourself now so that we no go stop to serve Jehovah well for the great tribulation?​—Matt. 24:21.

3. According to Revelation 17:5, 15-18, how God go destroy “Babylon the Great”?

³ Read Revelation 17:5, 15-18. God go destroy “Babylon the Great”! As we don talk before, the rulers for this world no go fit stop wetin God go do when time reach. Why we talk so? Because Bible talk say “God put-am inside their heart to do wetin e get for mind.” Wetin be that thing wey God get for  mind? Na to destroy lie-lie Christians * and all lie-lie religion. God go put wetin e get for mind inside the heart of “the ten horns” of the “red wild animal.” Different-different government de support the “wild animal,” wey be United Nations; na all this different-different government be the “ten horns.” (Rev. 17:3, 11-13; 18:8) When the rulers for this world attack lie-lie religion, that one go show say the great tribulation don start. This thing go affect everybody for this earth. People no go expect-am and they go fear.

4. (a) Wetin the rulers for this world fit use as reason to explain why them de attack Babylon the Great? (b) Wetin former members of those religion fit try to do?

⁴ We no know wetin the rulers for this world go use as reason to attack Babylon the Great. They fit talk say religion de make-am hard for people to get peace for this world and say them de put mouth for politics. Or they fit still talk say religion don too gather plenty money and property. (Rev. 18:3, 7) When the rulers go attack all lie-lie religion, e fit happen say no be all the members of those religion they go destroy. Na different-different organization form lie-lie religion. So, e fit be say na this different-different organization the rulers go destroy. When they don destroy all that organization, their former members go know say their leaders for religion no help them as they promise. And they go fit try to show say they no be part of those lie-lie religion again.

5. Wetin Jehovah don promise about the great tribulation, and why?

⁵ Bible no talk how long the rulers of this world go use destroy Babylon the Great, but we know say e no go take too much time. (Rev. 18:10, 21) When the great tribulation start, Jehovah don promise say e go “make that time short” so that e “people wey e don choose” and true religion go survive. (Mark 13:19, 20) But wetin Jehovah go want make we do from the time wey the great tribulation start go reach the war of Armageddon?

6. Apart from say we go stop to be part of lie-lie religion, which other thing we must do?

⁶ For the article before this one, we discuss say Jehovah expect make we no get anything to do with Babylon the Great. But we no go only stop to be part of Babylon the Great, we go do pass that one. We must make up our mind to do wetin true religion de teach. Make we talk about two ways wey we fit do this one.

7. (a) How we fit continue to follow the things wey Jehovah see as righteous things? (b) According to Hebrews 10:24, 25 why e dey important for us to meet together, especially now?

⁷ First, we must continue to follow the things wey Jehovah see as righteous things. We no go accept the rotten behavior wey people for this world get. For example, we no de accept anything about sex wey God hate. Part of this things na when man marry another man or woman marry another woman. And the way this kind men and women de behave and dress still dey among the things wey we no go accept. (Matt. 19:4, 5; Rom. 1:26, 27) Second, we must continue to worship with our Christian brothers and sisters. We de do this one for any place wey we fit, according to the situation. E fit be for our Kingdom Hall, or for the house of our brothers and sisters, or even for secret place. No matter wetin happen, we no go ever stop to hold our meetings. The truth be say, we need to meet together “especially as the day don de near.”​—Read Hebrews 10:24, 25.

8. How our message wey we de preach fit change for future?

⁸ For the great tribulation, the message wey we go de preach fit change. Now, na the good news about the Kingdom we de preach and de try to help people make they come serve Jehovah. But for great tribulation, our message fit strong. Bible say our message go dey like when big-big ice block de fall like rain. (Rev. 16:21) Maybe that time, we go preach about the end of the remaining part for this world wey Satan de control. When that time reach, we go know the particular message wey we go preach. Which way we go use preach that time? Na the same way wey we don de use to preach for more than one hundred years now? Or we go use different way? For now we no know. But no matter the way wey we go use preach, e fit be say we go need to use strong heart preach about the punishment wey Jehovah go bring!​—Ezek. 2:3-5.

9. Wetin the rulers fit do because of our message, but wetin we dey sure say God go do?

⁹ We fit expect say the rulers for this world no go like our message and they go try to stop our preaching work forever. We trust say na Jehovah de support us for our preaching work now. For the same way, we go still need to trust Jehovah make e support us for future. We believe say our God go give us power to finish e work.​—Mic. 3:8.

10. As Luke 21:25-28 talk, how plenty people go feel when they see wetin de happen for great tribulation?

¹⁰ Read Luke 21:25-28. For the great tribulation, all the things wey people think say they go last forever go scatter. This one go shock the people. And as the world enter the worst time wey people don ever face, people go dey inside “pain,” and go de fear wetin go happen to them. (Zeph. 1:14, 15) That time, things fit hard more-more even for servants of Jehovah. Some things fit hard for us because we no dey part of this world. We fit no get some things wey we really need.

11. (a) After they destroy lie-lie religion, why people and rulers for the world go face Jehovah Witness people? (b) Why we no need to fear the great tribulation?

 ¹¹ Time go come when the people wey their religion no dey again go vex because the religion of Jehovah Witness people still dey. We fit imagine how they go make other people know say them de really vex. They fit even show-am for Internet and television or talk-am for radio. Satan and the governments wey e de control go hate us because our religion na the only one wey they no destroy. They go see say their plan to remove all religion for this earth never complete. So, we go be the people wey they go want attack. Na this time those governments go come be Gog of Magog. * They go come together as one group with all their power to attack servants of Jehovah. (Ezek. 38:2, 14-16) We fit begin de worry about wetin go happen for great tribulation, especially as we no know everything about wetin go happen. But, we no need to fear the great tribulation. Jehovah go tell us wetin to do so that we go dey safe. (Ps. 34:19) We go fit ‘stand up straight and raise our head’ because we know say ‘the time wey God go save us don near.’ *

12. How “the faithful and discreet slave” don de prepare us make we ready for wetin go happen for future?

¹² “The faithful and discreet slave” don de prepare us make we hold Jehovah tight for great tribulation. (Matt. 24:45) They don use many ways to help us ready. Make we see one example: our convention programs from 2016 go reach 2018 come for time wey we really need-am. The different-different talk for the conventions encourage us. They help us to know the character wey we need to get more-more as the great tribulation de near. Make we take small time talk about this character them again.

13. How we fit continue to hold Jehovah tight, and why we need to do like that now?

¹³ Hold Jehovah Tight: The topic wey we use for 2016 convention program encourage us make we no leave Jehovah. This program teach us say if each of us get strong friendship with Jehovah, we go hold Jehovah tight. They remind us say when we de pray with all our heart and de study Bible, e go help us come near Jehovah. If we do this one, we go get the power to face our problems, no matter how hard they be. As this world wey Satan de control go soon end, we fit expect say we go face strong problems more-more. This problems go make us know whether we hold God and e Kingdom tight. People fit continue to laugh us. (2 Pet. 3:3, 4) One main reason why they fit laugh us na because we no de support any part for this world wey Satan de control. We need to continue to hold Jehovah tight now so that for the great tribulation, we no go leave Jehovah.

14. (a) Which change go happen among the brothers wey we de receive direction from for this earth? (b) Why we go need to hold God tight that time?

¹⁴ For great tribulation, na other brothers go direct our work for this earth. Time go reach when the remaining anointed Christians for this earth go go heaven to join fight the war of Armageddon. (Matt. 24:31; Rev. 2:26, 27) This one mean say the Governing Body no go dey with us for this earth. But, the plenty people wey God go save for  Armageddon go still de get direction. That time, na some brothers from the other sheep go de give us direction. This brothers qualify for the work. To show say we hold God tight, we go need to support them and follow the direction wey they receive from God. We must do like that if we want survive.

15. Wetin fit help us make we continue to endure, and why e dey important make we do so now?

¹⁵ De Endure: The topic wey we use for 2017 convention program na “Make You No Tire!” This program help us make we continue to endure problems more-more. We learn say no be because things de go well for us de make us fit de endure. We fit get power to endure more-more when we trust Jehovah. (Rom. 12:12) Make we no ever forget the thing wey Jesus promise. E say: “If person endure reach the end, e go survive.” (Matt. 24:13, ftn.) This promise mean say we must continue to serve God well no matter the kind problem wey we de face. If we endure any problem now, e go make our faith strong more-more before the great tribulation start.

16. Wetin de make us get strong heart, and wetin we fit do now so that our heart go de strong more-more?

¹⁶ Strong heart: The topic wey we use for 2018 convention program na “Make Your Heart Strong!” The talks for this convention remind us say no be wetin we sabi do or wetin we know de make us get strong heart. Just as we de fit endure because we trust Jehovah, na so too we must trust Jehovah if we want get strong heart. Wetin fit help us to trust Jehovah more-more? Na when we de read Bible everyday and think deep about the way Jehovah don save e people before-before. (Ps. 68:20; 2 Pet. 2:9) When the governments attack us for great tribulation, we go need to get strong heart and put our trust for Jehovah more-more. (Ps. 112:7, 8; Heb. 13:6) If we trust Jehovah now, we go get the kind strong heart wey we need when Gog attack us. *

17. Why we no need to fear Armageddon? (Check picture for front cover.)

¹⁷ As we talk for the article before this one, most of us don live our whole life for the last  days of this world. But we still get hope say we go survive the great tribulation. The war of Armageddon go be the end of this world wey Satan de control. But we no need to fear. Why? Because na Jehovah go fight this war. (Prov. 1:33; Ezek. 38:18-20; Zech. 14:3) Jesus Christ go lead Jehovah’s army to fight the war of Armageddon when Jehovah give the command to do so. Anointed Christians go don resurrect and join Jesus for heaven with plenty-plenty angels. They go join fight against Satan, e demons, and their human armies.​—Dan. 12:1; Rev. 6:2; 17:14.

18. (a) Wetin Jehovah don promise us? (b) How Revelation 7:9, 13-17 make us get hope say we go survive wetin go happen for future?

¹⁸ Jehovah don promise say: “No matter the weapon wey they make to attack you, no one go work.” (Isa. 54:17) Some people go “come out of great tribulation” alive and they go really plenty! This people serve Jehovah well and they go still continue to serve Jehovah. (Read Revelation 7:9, 13-17.) Bible give us plenty reason to get hope say we go survive wetin go happen for future! We know say “Jehovah de protect faithful people.” (Ps. 31:23) Servants of Jehovah go really happy when Jehovah go clean all the lie wey e enemies don put for e name.​—Ezek. 38:23.

19. Which correct hope we go soon enjoy for future?

¹⁹ For new world, people go free from the hand of Satan. Just think how 2 Timothy 3:2-5 go describe people that time. (Check the box “ The Way People Go Be for Future.”) Brother George Gangas * serve as Governing Body member till e die. E describe how that time go be, e talk say: “The world go really be one fine place when everybody go de worship Jehovah! Small time, you go get the chance to live inside the new world. As Jehovah de live, na so you too go de live. We go live forever.” This one na correct hope wey we get!